Sunday, October 08, 2006

last night

မနေ့ညက
***
မြို့ပြညရဲ့ ထုံးစံတခုအတိုင်း မနေ့ညက မီးပျက်တယ်။
ခါတိုင်းမီးပျက်ရင် သိပ်မကြာပေမဲ့ ဒီတခါ နဲနဲကြာနေတော့ မီးမရှိရင် ဘာအလုပ်မှ မဖြစ်တာကြောင့် အမှောင်ထဲမှာ ယောင်ချာချာနဲ့။
ဒါနဲ့ပဲ ကီးတချောင်းကျိုးနေလို့ မတီးဖြစ်တာကြာတဲ့ ဖုံအလိမ်းလိမ်း ဂစ်တာလေးကိုယူ ပြတင်းပေါက်နားထိုင်ပြီး ဂစ်တာတီးဖြစ်တယ်။
လပြည့်ကျော်တရက်ညပေမဲ့ လမင်းကို မမြင်ရဘူး။ မိုးတိမ်တွေနဲ့ ဖုံးနေလို့။ လမင်းကို မမြင်ရပေမဲ့ တိမ်ကြိုတိမ်ကြားက လရောင်နဲ့ ညက လင်းနေတယ်။ ညဥ့်နက်နေပေမဲ့ မှောင်မနေဘူး။ ကောင်းကင်ကလဲ ပြာလဲ့လဲ့နဲ့ .. တိမ်ဖြူဖြူတအုပ်တဆုပ်ကိုလဲ ကောင်းကင်ထက်မှာ ဟိုနေရာ ဒီနေရာ မျောလွင့်နေတာ မြင်ရတယ်။ ခြံထောင့်က သရက်ပင်အိုကြီးကတော့ ညရဲ့ အလင်းအောက်မှာ အရုပ်ဆိုးဆိုးနဲ့ မားမားကြီး မလှုပ်မရှက် ရပ်လို့။
‘ဖျားတဲ့ည’ ‘လွမ်းတဲ့ည’ ‘မူးတဲ့ည’ စသဖြင့် ည ဆိုတဲ့ ခေါင်းစဉ်လေးတွေနဲ့ ညကဗျာ စီးရီးတွေ ရေးခဲ့ဖူးတယ်။ ခုတော့လဲ ညတွေကို အရင်လို မခံစားဖြစ်တာကြာပေါ့။ မီးပျက်တော့မှပဲ ညကို သေချာကြည့်မိတော့တယ်။ ‘မီးပျက်တဲ့ည’ခေါင်းစဉ်နဲ့တော့ ကဗျာမရေးဖူးသေးဘူး။ ရေးအုံးမှပဲ။
ကီးတချောင်းကျိုးနေတဲ့ ဂစ်တာက စစချင်းတော့ တီးလို့သိပ်မကောင်းပါဘူး။ အဲဒီကျိုးနေတဲ့ကီးရဲ့ ကြိုးကို ငဲ့ပြီး ကျန်တဲ့ ကြိုးတွေကို လိုက်ညှိထားရတော့ ကြိုးတွေက လျော့တော့တော့မို့ အသံကလဲ ဖျော့တော့တော့။
မတီးတာကြာလို့ လက်တွေလဲ နာချင်ချင်၊ တဖြည်းဖြည်းနဲ့ ညကနက်လာပြီး အေးစက်စက်ဖြစ်လာပေမဲ့ ရင်ခွင်ထဲက ဂစ်တာလေးက တဖြည်းဖြည်း နွေးထွေးလို့လာတယ်။ ဖျော့တော့တော့ သူ့သံစဉ်တွေလဲ တိတ်ဆိတ်နေတဲ့ ညထဲမှာ တငြိမ့်ငြိမ့် မျောလွင့်လို့ .. ။
***
နေညိုချိန်ကို ဦးညွတ်ဂုဏ်ပြုမယ် ..
ရောင်စဉ်ဆိုတာ အလင်းရှိမှသာ ခွဲခြားနိုင်လိမ့်မယ် ပန်းနုကောင်းကင်ရေ..
တိမ်လွှာပြင်ကို ဆေးဆိုးလိုက်စမ်းပါ ..
နေရောင်ခြည်ရယ် အနောက်ဖက်မကူးခင် အရှေ့က တိမ်ထုကို ဆေးသွင်းခဲ့ဦး .. .. ..
နေညိုညိုရယ် မင်းရေးဆွဲတဲ့ တိမ်ပန်းချီကားချပ်ကို
မြင်နိုင်သူတွေ အားလုံးအတွက်တော့ ပိုင်ဆိုင်နိုင်ခွင့်ရှိတယ်
ရှိရမယ်လေ .. .. ..
လေပြေလာရာ လမ်းဘက်လျှောက်ဦးမယ် ..
လာပါမေရယ် .. ပန်းရနံ့သင်းတဲ့ စိမ်းလန်းမြက်ခင်းပြင် ဖြတ်လျှောက်ကြမယ်လေ ..
တူစုံမောင်မယ် ခရီးကြမ်းဘ၀လမ်းမှာ
သာယာကြည်လင် ချမ်းမြေ့ခြင်းနဲ့ စိတ်ဓာတ်ခွန်အားကို ဖြည့်စွက်ခဲ့ဦး .. ..
တိမ်ညိုညိုရယ် ပန်းပွင့်မဲ့မျက်ရည်လိုနေဆဲမှာ
ရွာပါစေလေ ပန်းဖူးပွင့်မှ စိုပြေလန်းဆန်းမယ်
ဖူးပွင့်ပါမှ .. ..
***
သဘာဝတရားကြီးကတော့ ..
မြင်နိုင်သူတွေ အားလုံး ပိုင်ဆိုင်နိုင်ခွင့် ..
နှလုံးသားရှိသူတွေ အားလုံး ခံစားနိုင်ခွင့် .. တူညီစွာ ပေးထားတာပါပဲ။
ခံယူသူဘက်က ..
အပြုံးနဲ့ ခံယူမလား .. အမုန်းနဲ့ခံယူမလား .. အရှုံးနဲ့ ခံယူမလား ..
ကိုယ့်စိတ်တိုင်းကျ ခံယူနိုင်ခွင့်ရှိပါရဲ့။
***

No comments: