Wednesday, December 28, 2016

ဧည့်သည်ကြီး၏ အိမ်အပြန် …

***
ဆေးလိပ်အတို
နေအညိုမှာ
အိမ်ပြန်လိုသည့် သူ့ဆန္ဒ။...
.
နေရောင်မပျောက်
ရွှေရောင်တောက်ပ
ဤကာလမှာ
သူက အိမ်ပြန်ရလေပြီ။
.
အိမ်အပြန်လမ်း
ကိုရင်ဂျမ်းအား
ဝမ်းနည်းဝမ်းသာ ကြိုကြသည်။
.
သူသာမြင်သော်
ပျော်ရွှင်မဆုံး ပီတိဖုံးလို့
ပြုံးတုံ့မျက်နှာ သာလိမ့်မည်။
.
သြော် …
ဆေးလိပ်မတို
နေမညိုမီ
မြန်မာပြည်သို့
သူ့ကို ပြန်ပို့ခဲ့လေပြီ။
***
 
ဆရာကြီး ဦးတင်မိုးအား ဦးညွှတ်လျက် - 

မေဓာဝီ
28.12.16

Read More...

Saturday, December 24, 2016

မောင်ကြီးသို့ ပေးစာ (၃)

ဈေးသွားတဲ့နေ့ ...
***
မောင်ကြီးရေ …

ဒီနေ့ ဒီဇင်ဘာလ ၂၄ ရက် ခရစ်စမတ် အကြိုနေ့မို့ ရှင်မတို့ကျောင်းက စနေ တနင်္ဂနွေ သင်တန်းတွေ ပိတ်တာနဲ့ ခါတိုင်းလို အိပ်ရာ စောစောမထဘဲ ခြောက်နာရီ ခွဲလောက်မှ ထဖြစ်တယ်။ မျက်နှာသစ် အဝတ်လဲပြီး တပတ်စာ ဈေးဝယ်ဖို့ အိမ်နားက ဈေးကလေးဆီ လမ်းလျှောက်ထွက်ခဲ့လေရဲ့။ မနက်ခင်း ကောင်းကင်က တိမ်တဆုပ် တအုပ်နဲ့မို့ နေမပူဘူး၊ အေးလည်း မအေးဘူး။ သာသာယာယာနဲ့ နေလို့ကောင်းရုံကလေး… ။
.
အိမ်ရှေ့ကနေ တဘက်လမ်းကို ကူးမယ်ဆိုတော့ လူကူးမျဉ်းကြားမှာ ရှင်မနဲ့ အတူဈေးလိုက်တဲ့ တူမလေးရယ်၊ ဦးလေးကြီး တယောက်ရယ် ကားအရှင်းကို စောင့်နေကြတာပေါ့။ အိမ်ရှေ့က လမ်းမကြီးကလည်း မနက်စောစောတောင် ကားအသွားအလာ မပြတ်ဘူး မောင်ကြီးရဲ့။
.
ရှင်မတို့လည်း လမ်းကူးဖို့ စောင့်နေရင်းနဲ့ ကားနှစ်စီး ရှေ့ဆင့်နောက်ဆင့် မောင်းလာရာက တစီးက လူကူးမျဉ်းကြား တည့်တည့်မှာ ကျွိခနဲ ရပ်လိုက်တယ်။ ဘာလို့ပါလိမ့်လို့ လှမ်းကြည့်တော့ ခုနက ဦးလေးကြီးက လမ်းကူးသွားတာ လမ်းလယ် ပလက်ဖောင်းတုံးဆီ ရောက်နေပြီ။ အဲဒီကားပေါ်ကလူက လမ်းဖြတ်ကူးတဲ့ ဦးလေးကြီးကို တခုခုလှမ်းပြောတာ။ သူ့ကားလာနေတာကို လမ်းဖြတ်ကူးရသလား ... ပေါ့။ သြော် ... ဖြစ်မှ ဖြစ်ရလေ ... လူကူးမျဉ်းကြားမှာ ကားက အရှိန်လျှော့ရ ရပ်ပေးရမှာကို သူကပဲ လှမ်းပြောရတယ်လို့။ ရှင်မလည်း အမြင်ကပ်လို့ လှမ်းပြောလိုက်သေးတယ်၊ ကြားကြား မကြားကြားပေါ့။ “ဒါ လူကူးမျဉ်းကြားလေ” ... လို့။
.
ဟုတ်တယ်လေ မောင်ကြီးရယ် ... ။ ရှင်မတို့ မြန်မာပြည်သားတွေရဲ့ ဘဝက လူကူးမျဉ်းကြားမှာတောင် သေပြေးရှင်ပြေးကူးလို ကူးရ၊ ကားအရှင်းကို တမေ့တမော ရပ်စောင့်လို စောင့်ရနဲ့ ... ။ ကားပေါ်က လူတွေဟာ ယာဉ်စည်းကမ်း လမ်းစည်းကမ်းကို နားမလည်တာလား တမင်လုပ်နေကြတာလား ... လို့ စိတ်ပျက်လက်ပျက် တွေးမိတယ်။
.
ဦးလေးကြီးကတော့ သူမှန်တာမို့ ဘာမှခွန်းတုံ့မပြန်ဘဲ ပုံမှန်ပဲ လမ်းကူးသွားတယ်၊ ရှင်မလည်း ကမန်းကတန်း တဘက်လမ်းကူးပြီး ဈေးကို ဆက်သွားတာပေါ့။ ဟင် ... ရှင်မ ပလက်ဖောင်းပေါ်က လျှောက်ရဲ့လား ... ဟုတ်လား ... မောင်ကြီးကတော့ လုပ်ပြီ၊ လူသွား ပလက်ဖောင်းဆိုတာ လူတွေလျှောက်ဖို့ လုပ်ပေးထားတာမှ မဟုတ်ဘဲ မောင်ကြီးရဲ့။ လမ်းကူးလိုက်တာနဲ့ ပလက်ဖောင်းပေါ်မှာ ဘတ်စ်ကားမှတ်တိုင်၊ နံစော်ေ်နတဲ့ စည်ပင်အမှိုက်ပုံး၊ ဂျာနယ်သည်၊ အသုပ်သည်၊ အဲဒါတွေလွန်သွားရင်လည်း မညီမညာတဲ့ ပလက်ဖောင်းတွေက အိမ်တွေနဲ့ ကပ်နေတာကြောင့် ဈေးသွားတိုင်း ကားလမ်းပေါ်ကပဲ ဆင်းလျှောက်ရတာလေ။
.
ရန်ကုန်မြို့က ပလက်ဖောင်းတွေ အကြောင်း မောင်ကြီးလည်း အသိသားနဲ့။ လမ်းလျှောက်လို့မရတဲ့ ပလက်ဖောင်းတွေရဲ့ ဘေးမှာလည်း ညအိပ်ညနေ ရပ်ထားတဲ့ ကားတွေကရှိတော့ ကားလမ်းမပေါ်ကပဲ ဆင်းလျှောက်ရတာ ထုံးစံဖြစ်နေပါပြီ။ မျက်နှာချင်းဆိုင်က ကားကြီးတွေ ဝီးခနဲ ဖြတ်သွားမှ ကမန်းကတန်း ဘေးကိုယို့ပြီး ရှောင်ရတယ်။ လမ်းပေါ်မှာ ဆင်းလျှောက် သွားပြန်တော့ ကွမ်းတံတွေးကစပြီး ခွေးတွေရဲ့ အညစ်အကြေး အဆုံး မနက်ခင်းရဲ့ ရှုချင့်စဖွယ် မြင်ကွင်းအဖြစ် မြင်ရတာပါပဲ မောင်ကြီးရယ်။ ဘေးဘီဝဲယာ မကြည့်အားဘူး၊ ရှေ့ကြည့် အောက်ကြည့်နဲ့ ကိုယ့်အန္တရာယ်ကိုယ် ကြည့်ရှောင်နေရတာပ။
.
ဒီလိုနဲ့ ဈေးရောက်ရော ... ။ ဒီနေ့ ဈေးထဲမှာ ဈေးသည်တွေ အတော်ပါးနေတာ။ ဝယ်နေကျ ငါးသည်မထွက်လို့ တခြားဆိုင်မှာ ဝယ်ရတယ်။ တခြားဆိုင် ဆိုပေမဲ့ အဲဒီဆိုင်က အမေတို့ အဖေတို့ ဝယ်နေကျဆိုင်ပါပဲ။ ရှင်မလည်း ငါးတွေ ပုစွန်တွေဝယ်ပြီး ပိုက်ဆံပေးတော့ ဆိုင်ခုံပေါ်က ငါးသည် အဒေါ်ကြီးက မယူဘူး သိလား၊ ငါးခုတ်ပေးတဲ့ ဦးလေးကြီးကိုပဲ ပေးခိုင်းတယ်။ တခုခုဆို ဦးလေးကြီးကို မေးငေါ့ငေါ့ ပြနေတော့ ဘယ်လိုပါလိမ့်ပေါ့။
.
“အိမ်မှာနေရတာ ပျင်းလို့ ဈေးထဲလိုက်လာတာ၊ အစ်မက အလုပ်မလုပ်တော့ဘူးလေ ...”
လက်ဘက်ရည်ခွက်ထဲကို မုန့်တွေဗျစ်ခနဲ နှစ်ရင်း သူက ပြောတယ် သိလား။ လက်ကို ပြန်အပင့်မှာ ရွှေလက်ကောက်ကြီးတွေက ချွင်ခနဲ။ ရှင်မလည်း အလိုက်အထိုက် “သြော် .. ဟုတ်ကဲ့” ပေါ့။
“စင်္ကာပူက သားက ဖုန်းဆက်ရင် မေးတာ၊ အမေ ဘယ်မှာလဲ၊ ဘာလုပ်နေလဲ ... ဆိုပြီးလေ၊ ကိုယ့်မှာ ညာရတယ်၊ အမေ အိမ်မှာပါ သားရယ် ...လို့ ... ဟင်းဟင်း”
ရှင်မလည်း သူ့လိုပဲ ဟင်းဟင်း လို့လိုက်ရယ်ရင်း ဆွဲခြင်းလေးမပြီး အမြန်လစ်ရတယ် မောင်ကြီးရေ ... ။
.
နောက် ဝယ်နေကျ အပျိုကြီးညီအစ်မ ရောင်းတဲ့ ဟင်းရွက်ဆိုင်ကလည်း ပိတ်ထားတာနဲ့ စနေသား အဘရဲ့ ဟင်းရွက်ဆိုင်မှာ သွားဝယ်ရတယ်။ အဲဒီအဘကတော့ အာဝဇ္ဇန်းကောင်းကောင်းနဲ့ ဖော်ဖော်ရွေရွေပါပဲ။ သူ့ဆိုင်က ပစ္စည်းလည်းစုံတယ်။
“လာနော် စနေနေ့မှာ စနေသားလေးရောင်းတဲ့ ဆိုင်က လာဝယ်ကြ၊ လတ်တယ် စုံတယ် ... အသက် ဆယ်နှစ်သားကတည်းက ဒီမှာ ရောင်းလာတာ”
“ဟင် ... အဘက ဆယ်နှစ်သားကတည်းက ဒီဈေးမှာ ရောင်းတာလား”
“ဟုတ်ပါ့ တူမကြီးရေ ... ဈေးရောင်းသက် အနှစ် ၅၀ ကျော်သွားပြီ၊ အခု အဘအသက် ၆၈ နှစ်၊ 74 မှာ ဘွဲ့ရတယ်”
.
ရှင်မ တအံ့တသြ သူ့ကိုကြည့်မိတယ်။ ရှင်မ ငယ်ငယ်ကတည်းက ဒီဈေးကို အမေနဲ့လိုက်ပြီး ဝယ်နေကျ။ အဲဒီအဘကိုလည်း မှတ်မိပါတယ်။ သူ ဘွဲ့ရပြီးသားဆိုတာကတော့ အခုမှ သိတော့တယ်။ သူက ဆက်ပြောသေးတယ်။
“အဘငယ်ငယ်က ဈေးရောင်းလိုက် ကျောင်းပြေးတက်လိုက် လုပ်ရတာလေ။ တက္ကသိုလ်တက်တော့လည်း ဈေးရောင်းရင်း တက်ခဲ့တာပဲ။ ဘွဲ့ရတော့ ဝန်ထမ်းဝင်လုပ်လိုက်သေးတယ်၊ ပိုက်ဆံမရလို့ အလုပ်ကထွက်ပြီး ဈေးပြန်ရောင်းတာ”
.
“အဘက တော်လိုက်တာ”
ရှင်မ ဘာပြောရမှန်းမသိတော့ဘူး မောင်ကြီးရေ ... ။ အသားညိုညို ဂင်တိုတိုနဲ့ စွပ်ကျယ်လက်ပြတ်၊ ချည်ပုဆိုးခပ်တိုတို ဝတ်ပြီး ဈေးခေါ်ကောင်းတဲ့ အဘဟာ ရှင်မအသက် ၃ နှစ်သမီး အရွယ်ကတည်းက ဘွဲ့ရပြီးသား ... တဲ့လေ။
.
ဘွဲ့ရ ကွမ်းယာသည်၊ ဘွဲ့ရ ဆိုက်ကားဆရာ၊ ဘွဲ့ရ အကြော်သည်၊ ဘွဲ့ရ အသုတ်သည် ... စသဖြင့် ရှိတာ ရှင်မလည်း သိပါတယ်။ ဒါက ဒီဘက်ခေတ်မှလို့ ထင်ခဲ့တာ။ ခု ဒီအဘကတော့ အရင်ခေတ်ကတည်းက ဘွဲ့ရပညာတတ် တယောက် ... ဒါပေမဲ့ ကုန်စိမ်းသည်ဘဝနဲ့ ရပ်တည်နေဆဲ။
.
ဈေးကအပြန်လမ်းမှာတော့ ရှင်မအတွေးတွေနဲ့ ရှုပ်ထွေးလို့ပေါ့ မောင်ကြီးရယ်။ လူကူးမျဉ်းကြားမှာ မရပ်တဲ့ကား၊ ပလက်ဖောင်းပေါ်က ဆိုင်ကလေးတွေ၊ လမ်းမပေါ်က ကွမ်းတံတွေးနဲ့ ခွေးချေး၊ ငါးဆိုင်ပေါ်က ငါးမရောင်းတဲ့ ငါးသည်၊ ဘွဲ့ရ ပညာတတ် ကုန်စိမ်းသည် ... စတဲ့ စတဲ့ အကြောင်းအရာတွေ ပြန်တွေးရင်း အိမ်ပြန်လာခဲ့ပါတော့တယ်။
.
သြော် ... ဒါနဲ့ ... နောက်တခါ မောင်ကြီး ရန်ကုန်ရောက်လို့ ဈေးသွားရင် အဲဒီဇာတ်ကောင်လေးတွေ ကြည့်ခဲ့ဖို့ မမေ့နဲ့အုံး ... နော် ... ။
မောင်ကြီးရဲ့
ရှင်မ
မေဓာဝီ
***
၂၄၊ ဒီဇင်ဘာ၊ ၂၀၁၆
၁၇း၁၄ နာရီ

Read More...

Sunday, December 04, 2016

ဆန္ဒ

ဆန္ဒ
***

ရောင်စုံဘောလုံး ကဗျာလေး
သီကြွေးခဲ့တဲ့ ကလေးဘဝ
ပြန်ရခွင့်သာ ရှိခဲ့ရင် …
...
အမေ့ရင်ခွင်မှာ ခေါင်းတင်မှေးရင်း
သားချော့တေးချင်းတွေ နားဆင်
အိပ်ရာဝင်ခဲ့တဲ့ ကလေးဘဝ
ပြန်ရခွင့်သာ ရှိခဲ့ရင် … 
...

လိုရင် ငို - ကြည်ရင် ပြုံး
ဟန်ဆောင်မျက်နှာဖုံးတွေ မရှိ
ပကတိအပြစ်မဲ့တဲ့ ကလေးဘဝ
ပြန်ရခွင့်သာ ရှိခဲ့ရင် …
… … … …
… … … …
… … … …
ဘဝကို အသစ်က ပြန်စ
သောကမှန်သမျှ လွတ်ကင်းလို့
ငြိမ်းချမ်းခြင်းရချင်တယ် … ။ …။
***
 မေဓာဝီ
4.12.16
22:44

Read More...

Saturday, December 03, 2016

ဆင်ရာတိမ်မိုးနှင့် အများပိုင်စကားလုံးများ

စကားလုံးတွေ နာမည်ကြီးသောအခါ အများပိုင်သွားတတ်လေသည်။
.
တဦးတယောက်က စတင်တီထွင်ထားသော စကားလုံး ဖြစ်လင့်ကစား ထိုစကားလုံးကို အများက နှစ်ခြိုက်စွာ သုံးစွဲရင်း အများပိုင်ဖြစ်သွားသော စကားများရှိခဲ့ဖူးသည်။ ဥပမာ ဆိုကြပါစို့ ... ရွှေအိုရောင်။ ဆရာကြီးဒဂုန်တာရာ စတင်သုံးခဲ့သည့် စကားလုံး။ ရွှေအိုရောင် အပြင် ပန်းနုရောင်အို၊ လေနုအေး၊ ဂေါ်ဂင်နီ၊ ဝတ်လစ်စလစ်လမ်းမကြီး ... စသဖြင့် စကားလုံး အသစ်အဆန်းတွေ ဆရာကြီးက တီထွင် သုံးစွဲခဲ့သည်။ ထိုစကားများအနက်မှ ရွှေအိုရောင် ဆိုသည့် စကားလုံးကတော့ဖြင့် ယနေ့ခေတ် လူအများသုံးစွဲနေကြသည့် အများပိုင် စကားလုံး ဖြစ်၍နေချေပြီ။
.
ငယ်စဉ်က ခင်မောင်တိုးသီချင်းတွေ စွဲစွဲလမ်းလမ်း နားထောင်တော့ “ဆင်ရာတိမ်မိုး” ဆိုသည့် သီချင်းလေးကို သံစဉ် စာသားနှင့်တကွ ပေးထားသည့် ခေါင်းစဉ်လေးကိုလည်း အင်မတန် သဘောကျမိ၏။ ဆင်ရာတိမ်မိုး ... တဲ့ ... ။ သီချင်းရေးသူနှယ် ပေးတတ်လိုက်ပါဘိတော့ ... လို့ ဆိုပြီး ထိုခေါင်းစဉ်လေးအား မှတ်မှတ်ရရ ရှိနေခဲ့သည်။
.
သို့နှင့် ရှေးကဗျာ စာပေတွေနှင့် ရင်းနှီးလာစဉ် ၁၂ လရာသီမိုး ကဗျာတွင် “နတ်တော်ရောက်ငြား၊ မိုးသားမငြိမ်၊ ဆင်ရာတိမ်” ဟု ဖတ်လိုက်ရသည့်အခါ ဆင်ရာတိမ် ... ဆိုသည့်စကားလုံးက နဂိုကတည်းက ရှိနေနှင့်ပါလားဟု တွေးမိရင်း ဆင်ရာတိမ်မိုးကို ပို၍ စိတ်ဝင်စားခဲ့မိလေသည်။

လက်ဝဲသုန္ဒရ ရေးသည့် ရတုတွင်လည်း "နတ်ပန်းဝေမြိုင်၊ သဇင်လှိုင်က၊ ဖြိုင်ဖြိုင်မကြဲ၊ စွတ်ရုံ ဖွဲ၏၊ သွန်းမြဲဟန်မှာ၊ ဆင်ရာတိမ်မိုး၊ ခေါ်ကြရိုးတည့် ... ” ဟူ၍ ဆင်ရာတိမ်မိုးက ပါခဲ့သည်။ ဒီလိုနှင့် ဆင်ရာတိမ်မိုးတွေ လိုက်ရှာရင်း ရာသီဖွဲ့ကဗျာတွေထဲမှာ (အထူးသဖြင့် နတ်တော်လဖွဲ့တွေမှာ) ဆင်ရာတိမ်မိုး အသုံးကို အများအပြား တွေ့ရသည်။
.
ဆင်ရာတိမ်မိုး၏ အနက်က ကိုယ်ထင်သလို တိမ်တွေဆင်ပြီး ရွာသောမိုး မဟုတ်ခဲ့ပြန်။ နတ်တော်လတွင် ရွာသောမိုးက ဆင်ခြေရာတိမ်သွားအောင် ရွာသောမိုး ဟူ၍ လည်းကောင်း၊ နတ်တော်လမှာ မိုးမရွာဘဲ မိုးသားတိမ်လိပ်တို့သာ ကောင်းကင်မှာ ဆင်ယင်လှုပ်ရှားကြသည်ဟူ၍ လည်းကောင်း ဆိုကြသလို ... ဆင်ခြေရာ ပျောက်ရုံ ခပ်တိမ်တိမ်ရွာသောမိုး၊ ဆင်ခြေရာ မြင်းခြေရာ တိမ်မြုပ်အောင် ရွာသောမိုးဟုလည်း ဆိုကြသည်ကို မှတ်သားခဲ့ရသည်။
.
ထိုအခါမှ ဆင်ရာတိမ်မိုး ဟူသည့် စကားသည် ခင်မောင်တိုး သီချင်းရေးသူ ကိုမောင်မောင် (အဉ္ဖလီ) ထွင်သော စကားလုံးမဟုတ်ဟု သိခဲ့ရလေတော့သည်။ သို့တိုင်လျက် ထိုတေးရေးသူကို မချီးကျူးဘဲ မနေနိုင်။ ထိုရှေးခေတ် အသုံးအနှုန်းကို သီချင်းခေါင်းစဉ်တပ်ကာ စွဲမက်ဖွယ် ရေးဖွဲ့နိုင်ပေစွဟု ကြိတ်၍ ချီးကျူး အားကျမိပါသည်။
.
ဆယ်ကျော်သက်အရွယ် ဝတ္ထုတွေဖတ်တော့ အထူးသဖြင့် နွမ်ဂျာသိုင်း ဝတ္ထုများ၏ ခေါင်းစဉ်တွေသည် ငယ်ငယ်က ကျောင်းသင်ခန်းစာ ဖတ်စာထဲက စာသားများ ဖြစ်နေသည်ကို သတိမူမိသည်။ “ဟိုဘက်ကမ်းက မီးထိန်ထိန်” “အလယ်ကလူ စကားဝဲ၏” စသဖြင့် ... ။ ထိုသည်ကို အားကျ၍ ကိုယ်တိုင် ဘလော့ကလေးမှာ ရေးခဲ့သည့် စာတချို့၏ ခေါင်းစဉ်တွေသည် ဖတ်စာထဲက စာသားများ ဖြစ်သော ”ရာသီဥတု ပူသည်” ”ညအခါ လသာသာ” တို့ကို သုံးစွဲခဲ့ဖူးသည်။
.
နွမ်ဂျာသိုင်းဆိုလို့ သူ၏ ”ဒေါင်းယာဉ်ပျံ ဘုံနံဘေးမှာ စာရေးလို့ထားချင်တယ်” ဝတ္ထုခေါင်းစဉ်သည်လည်း ရှေး ကဗျာထဲမှ စာသားပင်ဖြစ်သည်။ တွံတေးသိန်းတန်၏ နာမည်ကြီးသီချင်း "နှမလက်လျှော့ နေလေတော့" သည်ပင် ရှင်မဟာရဋ္ဌသာရ၏ ပုရေနိသင် အစချီ ပိုဒ်စုံရတုတွင်ပါသော စာသားဖြစ်နေသည်။ ရှင်မဟာရဋ္ဌသာရက ခုလိုရေးထားခဲ့သည်။

"ဤဘဝတွင် နှမလက်လျှော့၊ နေလေတော့ဟု၊ ချစ်ပေါ့မကြုံ၊ ညှိးငယ်ပုံမျှ၊ ရွက်ဟုန်ကြွေကြုပ်၊ ချမင်းတုပ်သို့၊ စိတ်ချုပ်မပွင့်၊ ပျံ့လွင့်မေတ္တာ၊ ကရုဏာနှင့်၊ တဏှာလောဘ၊ ဒေါသမြှေးထူ၊ ရမ္မက်မြူကို၊ ဘယ်သူနှိုးရှာ လေတော့မည်။
.
ထိုသို့ ရှေးက အသုံးအနှုန်းတွေ ကဗျာစာသားတွေ ခေတ်အဆက်ဆက် ယူငင်သုံးစွဲခဲ့ကြသော်ငြား မူရင်း မည်သူမည်ဝါဟု ခရက်ဒစ်လည်း မပေးကြ။ ကြာတော့ မူရင်းရေးသူကိုပင် ပရိသတ်က မသိကြတော့။ နောက်လူတွေ ထွင်သည်ဟုသာ ထင်ကြပေလိမ့်မည်။
.
မူရင်းရေးသူတွေသာ သက်ရှိထင်ရှား ရှိနေသေးလျှင် သူတို့တီထွင် ရေးဖွဲ့ထားသည့် စာသား ယူငင်သုံးစွဲကြသည်ကို အပြစ်တင်ကြလေမည်လား … ။ လားလားမျှ မထင်ပါ။ သူတို့စကားလုံး အများသုံးကာ ကျယ်ကျယ်ပြန့်ပြန့် ဖြစ်သွားသည့်အတွက် ပို၍ပင် ဝမ်းမြောက်ကြပါလိမ့်မည်။
.
စာတပုဒ်၊ စာတပိုဒ် နှစ်ခြိုက်၍ quote လုပ်ကာ ယူငင်သုံးစွဲလိုပါက မူရင်းပိုင်ရှင်ကို ညွှန်းရန် လိုအပ်ပါသော်လည်း … စကားလုံးများ နာမည်ကြီးသောအခါ အများပိုင် ဖြစ်သွားကြလေတော့သည်။
***
မေဓာဝီ
၃ ဒီဇင်ဘာ ၂၀၁၆
.
(မနှစ်က ရေးပြီး အဆုံးမသတ်ြဖစ်ဘဲ တပိုင်းတစ ဖြစ်နေတဲ့စာလေး ဖေ့စ်ဘွတ်မှာ only me လုပ်ထားတာ on this day memory မှာ ပြန်ပေါ်လာလို့ အဆုံးသတ်ပြီး တင်လိုက်ပါတယ်။)

Read More...

Thursday, November 24, 2016

မောင်ကြီးသို့ ပေးစာ ... (၂)

အမျိုးသားအောင်ပွဲ ... ကျေးဇူးတော်နေ့ 
***

မောင်ကြီးရေ … 
.
ဒီကနေ့က ရှင်မတို့ မြန်မာနိုင်ငံရဲ့ ၉၆ နှစ်မြောက် အမျိုးသားအောင်ပွဲနေ့ပေါ့။ မနေ့က ကျောင်းမှာ စာသင်တော့ Grade 4 က ကျောင်းသားလေးတွေကို နက်ဖြန်ကျောင်းပိတ်တယ် … ဘာဖြစ်လို့လဲ သိလားလို့ ရှင်မက မေးတော့ သူတို့သေချာမသိဘူး၊ ဒါနဲ့ … National day (အမျိုးသားနေ့) လို့ ပြောပြပြီး အမျိုးသားနေ့ရဲ့ သမိုင်းအကျဉ်းချုပ်ကိုလည်း ရှင်းပြလိုက်ရတယ်။
.
Grade 4 ကျောင်းသားလေးတွေထဲမှာ သြစတေးလျမှာမွေးဖွား ကြီးပြင်းပြီး ဒီမှာ ကျောင်းလားတက်တဲ့ ကျောင်းသားလေး တယောက်လည်း ပါတယ် မောင်ကြီးရဲ့။ သူ့နာမည်က ရော်ဘင် တဲ့။ သူ့မိဘနှစ်ပါးက မြန်မာတွေပေမဲ့ သူကတော့ မြန်မာလို မပြောတတ်ဘူး၊ သူ့ကိုယ်သူလည်း သြစတေးလျန်းလို့သာ ခံယူထားတယ်။ I’m not Myanmar လို့ မကြာခဏ ပြောတဲ့ ကလေးပေါ့။
.
အတန်းထဲမှာ သူရှိနေတဲ့အတွက် သူနားလည်အောင် အင်္ဂလိပ်လို ပြောမှရတယ်။ အမျိုးသားနေ့ရဲ့ အစက လွန်ခဲ့တဲ့ ၉၆ နှစ်ဖြစ်တဲ့ ၁၉၂၀ ခုနှစ်မှာ ဖြစ်ကြောင်း၊ အဲဒီနှစ် ဒီဇင်ဘာလ ၅ ရက်မှာ နယ်ချဲ့အင်္ဂလိပ်အစိုးရ ပြဋ္ဌာန်းတဲ့ ရန်ကုန်တက္ကသိုလ် အက်ဥပဒေကို တက္ကသိုလ်ကျောင်းသားတွေ မကျေနပ်လို့ သပိတ်မှောက်ကြကြောင်း … အမျိုးသားနေ့လို့ သတ်မှတ်ကြမယ်ဆိုတော့ နေ့အမျိုးမျိုးကို စဉ်းစားရာက အမျိုးသားတော်လှန်ရေး စတင်တဲ့နေ့ဖြစ်တဲ့ ကျောင်းသားတွေ သပိတ်မှောက်တဲ့နေ့ကို သတ်မှတ်ဖို့ ဆုံးဖြတ်လိုက်ကြကြောင်း၊ အမျိုးသားနေ့ အဓိပ္ပါယ်ပိုရှိဖို့အတွက် ဒီဇင်ဘာ ၅ ရက်လို့ မသတ်မှတ်ဘဲ မြန်မာပြက္ခဒိန်ရဲ့ တန်ဆောင်မုန်းလပြည့်ကျော် ဆယ်ရက်နေ့ကို သတ်မှတ်တာ ဖြစ်ကြောင်း ... စသဖြင့် ရှင်မလည်း တတ်သရွေ့ မှတ်သရွေ့ အင်္ဂလိပ်လို ရှင်းပြလိုက်ရတယ်။
.
ဒါတွင်မကသေးဘူး …
မြန်မာပြည်သည် ဒို့ပြည်
မြန်မာစာသည် ဒို့စာ
မြန်မာစကားသည် ဒို့စကား
… ဆိုတဲ့ ကြွေးကြော်သံတွေကိုပါ အင်္ဂလိပ်လို ဘာသာပြန်ပြီး ဆိုပြ လိုက်ရသေးတာ။ ကိုယ့်စာ ကိုယ့်စကားကို ကလေးအရွယ်ကတည်းက တန်ဖိုးထားစေချင်လို့ပါ မောင်ကြီးရယ်။ ရှင်မတို့တိုင်းပြည်ဟာ ကိုယ်ပိုင်စာပေနဲ့ ဘာသာစကားရှိတယ်ဆိုတာကို သူတို့လေးတွေ ဂုဏ်ယူစေချင်လို့ ပါ။ များသောအားဖြင့် နိုင်ငံတကာ ကျောင်းတွေမှာ တက်ကြတဲ့ ကလေးအများစုဟာ မြန်မာစာကို ဂရုမစိုက်တဲ့အပြင် အထင်တောင် သေးကြတာကလား။ ရှင်မကတော့ မြန်မာစာ မသင်ရပေမဲ့ ကြုံရင်ကြုံသလို မြန်မာစာကို ချစ်မြတ်နိုးတတ်ဖို့ သိမ်းသွင်းဆွဲဆောင်ရတာပဲ။
.
အဲဒါနဲ့ တဆက်တည်း အခွင့်သင့်လို့ သူတို့လေးတွေကို လွတ်လပ်ရေးနေ့၊ ပြည်ထောင်စုနေ့ စသဖြင့် မြန်မာပြည်ရဲ့ သမိုင်းဝင်နေ့တွေကို မေးကြည့်တော့ သေသေချာချာသိသူ တယောက်မှကို မရှိဘူး မောင်ကြီးရေ။ သူတို့က မသင်ရသလိုလို ဘာလိုလို ဝေ့လည်ကြောင်ပတ် လုပ်နေသေးတာ။ ဒါနဲ့ပဲ သူတို့ရဲ့ မြန်မာစာ ဖတ်စာအုပ် ထုတ်ခိုင်းပြီး ရှာကြည့်လိုက်တော့ ဗိုလ်ချုပ်အောင်ဆန်း ဆိုတဲ့ ခေါင်းစဉ်အောက်မှာ ဇန်နဝါရီလ ၄ ရက်နေ့ဟာ လွတ်လပ်ရေးအောင်ပွဲနေ့ ဖြစ်ကြောင်း ရေးထားတာ တွေ့ရတယ်။
.
ကျောင်းသားတွေဟာ သူတို့ သင်ခန်းစာထဲမှာလည်း သင်ပါလျက်နဲ့ ဒီလိုနေ့တွေကို စိတ်ဝင်စားမှု အတော်လေး အားနည်းသွားပြီ မောင်ကြီးရဲ့။ ကိုယ့်တိုင်းပြည်အကြောင်း ကိုယ် သိထားသင့်တာပေါ့ … လို့ ရှင်မကပြောတော့ ဟိုသြစတေးလျန်းလေး ရော်ဘင်က ဒါ ငါ့တိုင်းပြည် မဟုတ်ဘူး။ ငါတိုင်းပြည်က သြစတေးလျ တဲ့။ အဲဒီလို ပါဆို … ။
***
တိုက်တိုက်ဆိုင်ဆိုင်ပါပဲ … နိုဝင်ဘာ ၂၄ ရက်နေ့ဟာ အမေရိကန်နိုင်ငံရဲ့ Thanksgiving day ကျေးဇူးတော်နေ့ ဖြစ်သတဲ့ မောင်ကြီးရေ။ သူတို့ဆီမှာလည်း အစိုးရ ရုံးပိတ်ရက် တရက်ပေါ့။ Thanksgiving day အကြောင်း ကြုံလို့ မောင်ကြီးကို ပြောပြရအုံးမယ်။ ၁၆၂၀ ခုနှစ် မှာ Mayflower သင်္ဘောကြီးနဲ့ အင်္ဂလန်ကနေ အမေရိကကို ရောက်လာတဲ့ ခရီးသွားတွေဟာ စစချင်း ကြမ်းတမ်းတဲ့ ရာသီဥတုဒဏ်ကို အတော်လေး ခံရစဉ်မှာရော ကောက်ပဲသီးနှံတွေ စိုက်ပျိုးရာမှာပါ ဒေသခံ အမေရိကန် လူနီတွေက ကူညီပေးခဲ့တာကြောင့် သူတို့ အဆင်ပြေခဲ့ရတယ်။ ကောက်ပဲသီးနှံတွေ ရိတ်သိမ်းချိန်ရောက်တော့ ကိုယ့်ကိုယ် ကျေးဇူးပြုခဲ့ဖူးသူတွေကို ကျေးဇူးတင်တဲ့အနေနဲ့ အားလုံးဖိတ်ကြားပြီး ပျော်ပျော်ပါးပါး စားသောက်ကြသတဲ့။
.
၁၇၈၉ ခုနှစ်မှာတော့ အမေရိကန်သမ္မတ ဂျော့ခ်ျဝါရှင်တန်က နိုဝင်ဘာ ၂၆ ရက်ကို National Thanksgiving နေ့အဖြစ် သတ်မှတ်ပေးခဲ့တယ်တဲ့ မောင်ကြီးရေ ... ။ ဒီလိုနဲ့ ခေတ်အဆက်ဆက် သမ္မတအဆက်ဆက် Thanksgiving day ကို ပြောင်းလဲသတ်မှတ်ရာက ၁၉၄၁ မှာတော့ နိုဝင်ဘာလ တတိယပတ်ရဲ့ ကြာသာပတေးနေ့ကို Thanksgiving day လို့ သတ်မှတ်ပြီး အများပြည်သူ အလုပ်ပိတ်ရက် အဖြစ် ကြေငြာပေးခဲ့သတဲ့။
.
အခုခေတ်မှာတော့ Thanksgiving day က မိသားစုတွေ ပြန်လည် ဆုံစည်းကြ ညစာအတူ စားကြတဲ့ နေ့ပေါ့ မောင်ကြီးရယ်။ Thanksgiving ညစာရဲ့ ထင်ရှားတဲ့ အစားအစာတွေကတော့ မောင်ကြီး သိပြီးဖြစ်တဲ့အတိုင်း ကြက်ဆင်သားနဲ့ ရွှေဖရုံသီးမုန့်ပေါ့။
.
ဆိုတော့ မောင်ကြီးရယ် … ရှင်မက ဒီရက်နှစ်ခု လာတိုက်ဆိုင်တာကို တွေးနေမိတယ်။ ရှင်မတို့ရဲ့ အမျိုးသားနေ့ဟာလည်း တကယ်တော့ ကျေးဇူးတော် နေ့ပဲလေ။
.
ဘာလဲ … မောင်ကြီးက ဘာဆိုင်လို့လဲ ရှင်မရဲ့ လို့ တွေးနေတာ မဟုတ်လား။ ဒီလိုလေ မောင်ကြီးရဲ့။ အမျိုးသားနေ့က အစပြုလို့ ကျောင်းသားတွေဟာ အင်္ဂလိပ်အစိုးရကို တော်လှန်ခဲ့တယ်၊ အဲဒီမှာပဲ အားလုံးရဲ့ ရင်ထဲမှာ မျိုးချစ်စိတ်တွေ ကိန်းအောင်းခဲ့ကြတယ်လေ။ အမျိုးသားစိတ်ဓာတ် ဆိုတာ ရှင်မတို့ တိုင်းပြည် လွတ်လပ်ရေး ရရာ ရကြောင်းရဲ့ အခြေခံ အုတ်မြစ်ပဲ မဟုတ်လား။
.
ရှင်မတို့တိုင်းပြည်ကြီး လွတ်လပ်ရေးရခဲ့တာ အရင်းစစ်လိုက်ရင် အမျိုးသားနေ့က စခဲ့တာမို့ အမျိုးသားနေ့ကို ကျေးဇူးတော်နေ့လို့ ဆိုတာ ရှင်မ မလွန်ပါဘူးနော် ... ။
.
တော်သေးပြီ မောင်ကြီးရေ ... ရှင်မရဲ့ စာ အဆုံးမသတ်ခင်မှာ ဆရာကြီး မင်းသုဝဏ်ရဲ့ အမျိုးသားအောင်ပွဲနေ့ မင်္ဂလာ နှုတ်ခွန်းဆက် ကဗျာလေး မောင်ကြီးဖတ်ဖို့ မျှဝေလိုက်ပါရစေ။
.
အိုးဝေတဲ့ တညံညံ၊
ရွှေဒေါင်းပျို တောင်ညိုဦးမှာ
ကျူးရင့်အောင်သံ။
.
အောင်ပွဲရယ်ခံ
နိုင်ငံတဲ့ သာရေး၊
မင်္ဂလာ စည်တော်ရွမ်းချိန်မို့
ခွန်းချိုဆက်တေး ။ ... ။ (မင်းသုဝဏ်)

***
ဒီကဗျာလေးက ၁၉၃၅ ခုနှစ် နိုဝင်ဘာလထုတ် ကြီးပွါးရေး မဂ္ဂဇင်းမှာ ပါခဲ့တဲ့ ကဗျာလေးတဲ့ မောင်ကြီးရဲ့။ ဘယ့်နှယ့်လဲ ... ။ အခုချိန်နဲ့ ကွက်တိပဲ မဟုတ်လား။ အိုးဝေသံတွေ တညံညံနဲ့ မင်္ဂလာစည်တော် ရွမ်းတဲ့အချိန် ... သြော် ... ဆရာကြီးသာ ခုနေရှိရင် တိုင်းပြည်အတွက်ရော ဆရာကြီးရဲ့ သားအတွက်ပါ ဝမ်းသာဂုဏ်ယူစွာနဲ့ ကဗျာတွေ ရေးဖွဲ့နေအုံးမှာလို့ ရှင်မတော့ ထင်မိတာပါပဲ မောင်ကြီးရေ ... ။
***
မောင်ကြီးရဲ့
ရှင်မ
မေဓာဝီ
(၂၄၊ နိုဝင်ဘာ၊ ၂၀၁၆)
အမျိုးသားအောင်ပွဲနေ့
၂၂း၃၈ နာရီ

Read More...

Tuesday, November 15, 2016

မောင်ကြီးသို့ ပေးစာ

(၁)
သူက ဗိုလ်အောင်ဒင်
***
မောင်ကြီးရေ ...
ဒီနေ့က တန်ဆောင်မုန်းလပြည့်ကျော် တရက်နေ့မို့ ကထိန်ပွဲတွေ ပြီးသွားပြီပေါ့။ ဒီနှစ်ကထိန်ရဲ့ Theme song ကတော့ "ဗိုလ်အောင်ဒင်" သီချင်း ဆိုတာ မောင်ကြီးလည်း ဖေ့စ်ဘွတ်ထဲကနေ တွေ့နေ ကြားနေရမှာပါပဲ။ ကထိန်ပွဲသာ ပြီးသွားရော မောင်ကြီး ရှင်မ အပါအဝင် လူတိုင်းပါးစပ်ဖျားမှာ ဗိုလ်အောင်ဒင် သီချင်းက စွဲကျန်ခဲ့တော့တာ ... ။ ရှင်မ ဆို ... ဟင်းချက်ရင်းလည်း ဗိုလ်အောင်ဒင် ... ပန်းကန်ဆေးရင်းလည်း ဗိုလ်အောင်ဒင် ... ဖြစ်နေတာ မောင်ကြီးရဲ့။
.
အဲဒီလို ဟိုးလေးတကျော် ဖြစ်နေတဲ့ ဗိုလ်အောင်ဒင် သီချင်းကို ဆိုတဲ့သူက မနော ... တဲ့။ မနောဆိုတာ ဘယ်သူမှန်း သေချာ မသိပေမဲ့ ဗိုလ်အောင်ဒင် ကတော့ ရှင်မ သိပ်ကြိုက်တဲ့ ရုပ်ရှင်ဇာတ်ကား တကားပေါ့။ အဲဒီဇာတ်ကားကို စာရေးဆရာ ဒါရိုက်တာကြီး ရွှေဒုံးဘီအောင် ရိုက်ကူးပြီး ရှင်မတို့ အဘိုးရဲ့ ဗြိတိသျှဘားမား ရုပ်ရှင် ကုမ္ပဏီက ထုတ်လုပ်တာကြောင့်လည်း ဗိုလ်အောင်ဒင်ကို ပိုပြီး နှစ်သက် စွဲလမ်းမိတာ ဖြစ်ကောင်း ဖြစ်နိုင်ပါတယ် မောင်ကြီးရေ ... ။
.
ဗိုလ်အောင်ဒင်နဲ့ ပတ်သက်ပြီး ရှင်မသိသလောက် မောင်ကြီးကို ပြောပြရအုံးမယ်။
.
စာရေးဆရာ ရွှေဒုံးဘီအောင်ဟာ ဗိုလ်အောင်ဒင်ဇာတ်လမ်းကို ရေးပြီး အဘိုး (ဒါရိုက်တာ ဦးချန်ထွန်း)က ရိုက်ကူးဖို့ပဲ ... တဲ့။ ဒါပေမဲ့ အဘိုးက မရိုက်ဖြစ်တာနဲ့ ရွှေဒုံးဘီအောင်ကိုယ်တိုင်ပဲ ရိုက်ကူးဖို့ ဖြစ်လာခဲ့တယ်။ အဲဒီဇာတ်ကားဟာ ရွှေဒုံးဘီအောင်ရဲ့ ပထမဆုံး ပွဲဦးထွက် ဇာတ်ကားတဲ့ ... မောင်ကြီးရဲ့။ သူက ဇာတ်ကားကို နာမည်ပေးဖို့ စဉ်းစားတော့ မင်းသား ခင်မောင်ရင်ရဲ့ နာမည်ရင်း အောင်ဒင် ရဲ့ အရှေ့မှာ ဗိုလ် တပ်ပြီး ဗိုလ်အောင်ဒင် လို့ အမည်ပေးခဲ့တာ ဆိုပဲ။
.
ဗိုလ်အောင်ဒင်ဇာတ်ကားမှ မင်းသားကြီး ခင်မောင်ရင်

ဗိုလ်အောင်ဒင်ရဲ့ ဇာတ်လမ်းကတော့ မောင်ကြီးလဲ သိတာပဲမို့ ထပ်မပြောတော့ပါဘူး။ မောင်ကြီးပြောတဲ့ သူခိုးငတက်ပြား ဇာတ်လမ်းလို ဗိုလ်အောင်ဒင်ကို သူတော်ကောင်း ဓားပြဗိုလ်ကြီးအဖြစ် ဆရာရွှေဒုံးက ဖန်တီးခဲ့တယ်။ နှလုံးသား ရေးရာမှာကတော့ ရာမ၊ ဒဿနဲ့ မယ်သီတာတို့ ဇာတ်လမ်းလို ဦးဘချစ်၊ ဗိုလ်အောင်ဒင်နဲ့ မမြဝင်းတို့ သုံးပွင့်ဆိုင် အချစ် ဇာတ်လမ်းပေါ့ ... ။ လူကြမ်းကြီး ဗိုလ်အောင်ဒင်က ဒဿလို လူစားနော် ... ။ ရာမထက် ဒဿက မယ်သီတာကို ပိုချစ်တယ်လို့ ပြောကြသလို ဗိုလ်အောင်ဒင် မမြဝင်းကို ချစ်တဲ့ အချစ်ကတော့ ကိုကိုချစ်ထက် သာတယ်လို့ ရှင်မကတော့ ထင်တာပဲ မောင်ကြီးရေ ... ။
.
ဗိုလ်အောင်ဒင်ကို ဘယ်နှစ်ခါ ပြန်ကြည့်ကြည့် မမြဝင်း လက်ကိုင်ပုဝါလေး ရွေးတဲ့အခန်းမှာ တထိတ်ထိတ် ဖြစ်နေရတုန်းပဲ။ ရှင်မကတော့ မမြဝင်းကို ဗိုလ်အောင်ဒင့် လက်ကိုင်ပုဝါကိုသာ ရွေးစေချင်ခဲ့တာ သိလား။ ဗိုလ်အောင်ဒင်က လူဆိုးပေမဲ့ သူ့ဘက်မှာ ပရိသတ်က ရှိနေတာ။ လူဆိုးကို မင်းသားအဖြစ် ပရိသတ်ကို မြင်စေခဲ့တာမှာ ဆရာရွှေဒုံးရဲ့ ဗိုလ်အောင်ဒင်က ဆရာချစ်ဦးညိုရဲ့ လင်္ကာဒီပချစ်သူထက် အများကြီးစောတာပေါ့။
.
မမြဝင်းက ကိုကိုချစ် လက်ကိုင်ပုဝါကို ရွေးချယ်မိလိုက်တော့ စိတ်ထဲ ဟင်ခနဲ ဖြစ်မိတာ အမှန်ပဲ။ ဗိုလ်အောင်ဒင် ဇာတ်ကားမှာ ကိုကိုချစ်နောက် မြက ပါသွားပေမဲ့ ဆရာရွှေဒုံးက ဗိုလ်အောင်ဒင်ပြန်လာပြီ ဆိုပြီး ဝတ္ထု ထပ်ရေးသေးတယ်တဲ့။ အဲဒီမှာ ဗိုလ်အောင်ဒင်က မြကို ချစ်တဲ့စိတ်နဲ့ မနေနိုင် မထိုင်နိုင်ဖြစ်ပြီး ကိုကိုချစ်ဆီက ပြန်သွားခိုးခဲ့တာ ဆိုပဲ မောင်ကြီးရဲ့။ အဲဒီဇာတ်လမ်းက ဝတ္ထုအဖြစ်နဲ့သာ ရှိပြီး ရုပ်ရှင် ဖြစ်မလာခဲ့ဘူး။ ဂျပန်ခေတ်မှာ ခင်မောင်ရင် ကွယ်လွန်သွားတဲ့အတွက် ဇာတ်ကား ဆက်မရိုက်နိုင်တော့ဘူးလေ။
.
ဒါပေမဲ့ ... သားဗိုလ်အောင်ဒင်ဆိုပြီး ကျော်ဆွေ၊ မြင့်မြင့်ခင်၊ ခင်အုံးမြင့် တို့နဲ့ ရိုက်ခဲ့တယ်။ ဗိုလ်အောင်ဒင်နဲ့ မြတို့ရဲ့ သားက ကျော်ဆွေ ဖြစ်လာတာ ပေါ့။ အဲဒီဇာတ်ကားလည်းပဲ အောင်မြင်ခဲ့ပါတယ်။ (ဒေါ်) ခင်အုံးမြင့်ဆို အဲဒီဇာတ်ကားနဲ့ ကျားခင်စိန် ဖြစ်လာတာပဲ မဟုတ်လား။
.
ဗိုလ်အောင်ဒင်ပြန်လာပြီ ဝတ္ထု လက်ကမ်းကြော်ငြာ

တိုက်တိုက်ဆိုင်ဆိုင်ပဲ မနေ့က အလုပ်အားရက် စာအုပ်တွေ ရှင်းရာက အဖေ့ လွယ်အိတ်အဟောင်းလေး မွှေတော့ အဲဒီထဲမှာ ဓာတ်ပုံတပုံနဲ့ ကြော်ငြာစာရွက်ကလေးတခု ထွက်လာတယ်။ မင်းသားကြီး ခင်မောင်ရင်ရဲ့ ဓာတ်ပုံနဲ့ ဗိုလ်အောင်ဒင် ပြန်လာပြီ ဝတ္ထု ကြော်ငြာစာရွက်ကလေးပါ။ မောင်ကြီးကတော့ သိပြီးသားပေမဲ့ ... ခုခေတ် မသိသေးတဲ့ ကလေးတွေအတွက် သူဟာ ဗိုလ်အောင်ဒင် ... ဆိုတာ သိရအောင် မောင်ကြီးကတဆင့် ပြောပြလိုက်ပါအုံး ... နော်။
***
မောင်ကြီးရဲ့
ရှင်မ
.
မေဓာဝီ
၁၅၊ ၁၁၊ ၁၆

Read More...

Saturday, October 15, 2016

စနေမနက် ဈေးဝယ်ထွက်ခြင်း

မနေ့က ကလေးတွေ စာမေးပွဲ နောက်ဆုံးဘာသာဖြေပြီးတော့ ဒီကနေ့ကစပြီး သီတင်းကျွတ် ကျောင်းပိတ်ရက်ရှည် စပါပြီ။ စနေ တနင်္ဂနွေ သင်တန်းတွေလည်း ဒီတပတ် ပိတ်ထားသေးတာမို့ အနားရတဲ့ weekend ပေါ့။ ဒါနဲ့ပဲ ဒီနေ့မနက် အိမ်နားက ကျောက်မြောင်းဈေးကို သွားဖြစ်တယ်။ ဟိုရက်ပိုင်းတွေက စာမေးပွဲမေးခွန်းတွေနဲ့ အလုပ်ရှုပ်နေလို့ ကျောက်မြောင်းဈေးကို မရောက်ဖြစ်ခဲ့ဘူး။ မနက် ၇ နာရီ ဈေးကိုရောက်တော့ ဈေးကလေးက စည်ကားစပြုနေပါပြီ။
.
အမြဲဝယ်နေကျ ငါးဆိုင်မှာ လူရှင်းနေတာနဲ့ အရင်ဝင်လိုက်တယ်။ ပစွန်အလတ်စားက တဆယ်သား တထောင်၊ ဘော့ချိတ်လေးတွေက ရှစ်ရာဈေး တဲ့။ တထောင်တန်ထဲက သုံးဆယ်သား၊ ရှစ်ရာတန်ထဲက အစိတ်သား ယူလိုက်တယ်။ ငါးကြင်းဖြူ သုံးဆယ်သားနဲ့ ကကတစ် အရွယ်တော် တကောင်ထပ်ယူတော့ ငါးကြင်းဖြူက တထောင်ဈေးနဲ့ သုံးထောင်ဖိုး၊ ကကတစ်က ရှစ်ရာဈေးနဲ့ နှစ်ထောင့်ရှစ်ရာဖိုး။ စုစုပေါင်း တသောင်းရှစ်ရာဖိုးပေါ့။ သုံးလေးရက် စားမှာဆိုတော့ တန်တယ်ပဲ ဆိုပါတော့။
.
ဝက်သားဆိုင်မှာ ဝယ်နေကျအတိုင်း ငါးထောင်ဖိုးထည့်ခိုင်း လိုက်တယ်။ ပြီးခဲ့တဲ့အပတ်က မလာလို့ မျှော်နေကြောင်း၊ မအားလို့ မလာနိုင်ရင် တယောက်ယောက်ကို လွှတ်ပြီး ယူခိုင်းလို့ရပါကြောင်း ရွှန်းရွှန်းဝေအောင် ပြောရှာတယ်။ သူက ဝက် နှလုံးတွေ ကျောက်ကပ်တွေ ယူမလား မေးသေးတယ်။ ခါတိုင်းဆို ဝက်သားတုတ်ထိုး လုပ်စားဖို့ ယူဖြစ်ပေမဲ့ ခုတော့ အစ်မကြီးက ဝက်သားမစားရတော့တာမို့ မယူဖြစ်တော့ဘူး။ ဝက်သားကို တနင်္ဂနွေ ဆွမ်းလောင်းဖို့ကလွဲရင် မဝယ်ဖြစ်တော့တာ ကြာပြီ။
.
ဝက်သားဆိုင်နဲ့ မျက်နှာချင်းဆိုင်က အပျိုကြီး ညီအစ်မ နှစ်ယောက်ရဲ့ ဟင်းသီးဟင်းရွက် ဆိုင်မှာတော့ ချဉ်ပေါင်နှစ်စီး၊ ပဲပြား နှစ်တုံး၊ ကင်းပုံသီး အစိတ်သား၊ သံပုရာသီးနှစ်လုံး၊ ကြက်ဟင်းခါးသီး နှစ်လုံး၊ ခဝဲသီးတလုံး၊ တရုတ်နံနံ၊ ဗမာနံနံ၊ ငရုတ်သီးစိမ်း တရာဖိုးစီ စသဖြင့် ဝယ်ခဲ့တယ်။ အားလုံးပေါင်းမှ နှစ်ထောင့် သုံးရာဖိုးထဲရယ်။ သူတို့က ကျိုက်ထီးရိုးနားက ဝေပုလ္လတောင်မှာ ကထိန်အလှူ သွားမှာမို့ ဒီကနေ့ ဟင်းသီးဟင်းရွက်တွေ သိပ်မတင်ပါဘူး။ ရှိတာလေးတွေကို လျှော့ဈေးနဲ့ ရောင်းပေးနေတာ။ မြန်မာပြည်မှာ ဈေးဝယ်ရတဲ့အထဲမှာ ဟင်းသီးဟင်းရွက် ဝယ်ရတာ အတန်ဆုံးပါပဲ။ ငရုတ်သီးစိမ်း နံနံပင် ၁၀၀ ဖိုးလောက် ဝယ်လို့ရတာ ဘယ်လောက် ပျော်စရာ ကောင်းလိုက်သလဲ ... နော်။
.
ဟင်းရွက်ဆိုင်နဲ့ မျက်စောင်းထိုးက သစ်သီးဆိုင်မှာတော့ သြဇာသီး ငါးလုံး နှစ်ထောင့်ငါးရာ၊ ထောပတ်သီး တလုံး ၇၀၀ နဲ့ သုံးလုံး နှစ်ထောင့်တရာဖိုး ဝယ်ခဲ့လိုက်တယ်။ ဆန်းကစ်တလုံး ၇၀၀ မို့ မဝယ်ခဲ့တော့ဘူး။ မားကက်ပလေ့စ်မှာတောင် တလုံး ၅၀၀ ပဲလေ။ နက်ဖြန် လပြည့်နေ့မို့ ဈေးတက်တာလို့ ဆိုပါတယ်။ သူတို့လည်း တက်ဈေးနဲ့ ဝယ်ရတာမို့ ဈေးတင်ရောင်းရတာပါ ... တဲ့။ သူများနိုင်ငံတွေ ပွဲတော်ချိန် လျှော့ဈေးနဲ့ အပြိုင် ရောင်းကြပေမဲ့ ကိုယ့်နိုင်ငံမှာတော့ ပွဲတော်ချိန် ဈေးတက်တာ ထုံးစံပဲ မဟုတ်လား။
.
ဘုရားပန်းကို မနေ့က ရုံးက ကလေးတယောက် သွားဝယ်တာ နည်းနေတာနဲ့ ဒီနေ့ထပ်ဝယ်ရတယ်။ ဂန္ဓမာ အဖြူ အပွင့်ကြီးက ဆယ်ပွင့်ကို နှစ်ထောင်၊ အပွင့်သေးတွေက အစည်း လှလှ တစည်းမှ တထောင်ဆိုတာနဲ့ အသေးနှစ်စည်းသာ ဝယ်ခဲ့လိုက်တယ်။ သပြေအငုတ်လေးတွေက တငုတ် သုံးရာနဲ့ နှစ်ငုတ် ငါးရာဖိုး။ တခြားပန်း နွမ်းရင်သာ နွမ်းမယ်၊ သပြေပန်းလေးတွေက အမြဲစိမ်းလန်းနေတာမို့ သပြေကို မပြတ်တမ်း ဘုရားတင်ဖြစ်ပါတယ်။ ဈေးသက်သာပြီး ကျက်သရေရှိတဲ့ မြန်မာဆန်တဲ့ ပန်းသပြေလေးတွေကို ဘုရားကပ်လှူရတာလောက် စိတ်ချမ်းသာတာ မရှိဘူး။ တခြားနိုင်ငံတွေမှာတော့ ဘုရားတင်ဖို့ ပန်းတခက် တလေကိုတောင် အနည်းဆုံး ၅ ဒေါ်လာလောက် ပေးရတာလေ။
.
ကြက်သွန် အာလူး နဲ့ တိုလီမုတ်စ လိုအပ်သမျှတွေ ဝယ်ပြီး ဈေးထဲက ပြန်မထွက်ခင် ဂေါ်ရခါးသီးတွေ လတ်လို့ သုံးလုံး ငါးရာနဲ့ ဝယ်လိုက်သေးတယ်။ ဈေးဝယ်ပြီးချိန် လက်ထဲမှာ ငါးထောင်တန်တရွက်နဲ့ အကြွေတချို့သာ ကျန်ပါတော့တယ်။ လာတုန်းက ငါးထောင်တန် ခြောက်ရွက် တထောင်တန် သုံးရွက်နဲ့ ငါးဆယ် တရာ နှစ်ရာတန် တချို့ပါခဲ့တာ။ ဘာပဲဖြစ်ဖြစ် ကိုယ့်ပြည် ကိုယ့်ရွာ ကိုယ့်ဒေသမှာ ဈေးဝယ်ရတာ သက်သာတယ်လို့ ထင်တာပါပဲ။ သားငါး အသီးအရွက် ဈေးသက်သာပြီး ကိုယ်နှစ်သက်တာတွေ ဝယ်လို့ရနေတာမဟုတ်လား။ တခုပဲ ... ဆေးမဆိုး ရေမထိုး အလေးမခိုးဘူးဆိုတာတော့ အာမ မခံနိုင်ဘူးလေ။ :)
.
ဈေးမဝယ်ခင်က ဆားဗစ်ဆင်လုပ်ဖို့ အပ်ထားတဲ့ကားက ဈေးဝယ်ပြီးချိန်မှာ ပြီးနေပါပြီ။ အတွင်းအပြင် သန့်ရှင်းရေး လေးထောင် တဲ့။ အရင်လုပ်နေကျ ဦးချစ်မောင်လမ်းက ဆိုင်ထက် ငါးရာပိုများတယ်။ အတွင်းတွေ လယ်သာပေါလစ်ရ်ှလုပ်ထားတာလဲ ချွဲကျိကျိနဲ့။ ဘာပဲဖြစ်ဖြစ် ဈေးဝယ်ရင်း တလက်စတည်း ပြီးသွားတာပေါ့လို့ တွေးရင်း ဈေးစာရင်းကို စိတ်ထဲက တွက်လို့သာ အိမ်ပြန်လာခဲ့ပါတော့တယ် … ။
***
မေဓာဝီ
၁၅. ၁၀. ၁၆

Read More...

Friday, October 14, 2016

အွန်လိုင်း အင်တာဗျူး

လောကအလှအွန်လိုင်းမဂ္ဂဇင်းနဲ့ (၂၀၀၉ ဒီဇင်ဘာလမှာ) အင်တာဗျူးဖြစ်တုန်းက ဖြေခဲ့တာလေး ပြန်တွေ့လို့ ...
***

(Q) ဘယ်အချိန်ကစလို့ စာတွေရေးဖြစ်ခဲ့တာပါလဲ။
(A) ရေးတာကတော့ အလယ်တန်းကျောင်းသူ ဘ၀လောက်က စပြီး ရောက်တတ်ရာရာ ကဗျာလေးတွေ စာလေးတွေ ရေးဖြစ်ပါတယ်။ ၁၉၈၈ လောက်မှာ မဂ္ဂဇင်းကို စပို့ဖြစ်တယ်။ ပန်းဝေသီ မဂ္ဂဇင်းမှာ (ဆရာ) နွမ်ဂျာသိုင်း အယ်ဒီတာလုပ်နေတဲ့ အချိန် ကလောင်သစ်တွေကို ဖိတ်ခေါ်တဲ့ ပန်းနုသစ်သီကဏ္ဍကို ပို့လိုက်တာပါ။ ပထမဆုံးပို့တဲ့ ၀တ္ထုလေးက တနှစ်ကျော်ကျော် အကြာ (၁၉၈၉ နိုဝင်ဘာလ) မှာ ပုံနှိပ်ဖော်ပြခြင်း ခံခဲ့ရပါတယ်။ ၀တ္ထုနာမည်က “စိတ်ဖောက်ပြန်ခြင်း” … တဲ့။
---
(Q) မြန်မာစာကို နှံ့စပ်တဲ့ လူတယောက်ဆိုတော့ ဘယ်ဘာသာတွဲနဲ့ ကျောင်းမှာ သင်ယူခဲ့တာပါလဲ။
(A) မြန်မာစာကို မနှံ့စပ်သေးပါဘူး။ ၀ါသနာအရ လေ့လာနေတာပဲ ရှိပါတယ်။ ကျောင်းပြီးခဲ့တာကတော့ ရူပဗေဒ အဓိကနဲ့ပါ။
---
(Q) ဟိုအရင်တုန်းက ကဗျာဆိုတာ သူ့မှာနည်းစံနစ်လေးတွေရှိတယ်။ ကာရန်မိရမယ်၊ ဘာညာပေါ့။ ဒီနေ့ခေတ်မှာတော့ ကဗျာဆိုတာ လွတ်လပ်သွားတယ်။ ဘယ်လိုမျိုးကို ကဗျာလို့ ခေါ်ပါသလဲ။
(A) ရှေးကဗျာတွေမှာတော့ သူ့ရေးနည်း ဥပဒေသနဲ့ သူရှိကြတယ်။ ရတု၊ ရကန်၊ အဲ၊ အန်၊ လူးတား စသဖြင့် သူ့စပ်နည်းနဲ့သူ ရေးဖွဲ့ကြတယ်။ ခုခေတ်မှာတော့ အရင်ကလို ဥပဒေသတွေနဲ့ စည်းကမ်းတင်းကျပ်တာမျိုး မရှိတော့ဘူး။ လွတ်လပ်သွားတယ်ပေါ့။ အဲဒီလို လွတ်လပ်သွားတယ်ဆိုပေမဲ့ ကဗျာမှာ ကာရန်မပါရင်တောင် အသံ (နရီ) တော့ ရှိသင့်တယ်လို့ ထင်ပါတယ်။ အသံမပါရင် စကားပြေ ဖြစ်သွားမယ်လို့ ထင်တာပါပဲ။ (ကျမအထင်ကို ပြောတာပါ၊ မြန်မာမှာရော ကမ္ဘာမှာပါ ခေတ်အဆက်ဆက် ငြင်းနေကြတဲ့ ခေါင်းစဉ်မို့ သိပ်တော့ မပြောရဲဘူး)
.
ဘယ်လိုမျိုးကို ကဗျာလို့ခေါ်လဲ ဆိုတာတော့ ကဗျာဆရာမဟုတ်လို့ မပြောတတ်ပါဘူး။ ခုခေတ်ပညာရှင်တွေ ကဗျာကို ဘယ်လိုအဓိပ္ပါယ်ဖွင့်ကြသလဲ မသိပါ။ ရှေးပညာရှင်ကြီးတွေကတော့ ကဗျာဆိုတာ ပညာရှိတို့ရဲ့ ဥစ္စာလို့ ဆိုကြတယ်။ ကျမ်းကိုးပြီးပြောရရင်တော့ ကဗျာသင်္ဂဟမေဒနီထဲမှာ ခုလိုဖော်ပြထားပါတယ်။
.
“က၀ီဟိဗန္ဓိတဗ္ဗန္တိကဗျံ - ပညာရှိတို့ ဖွဲ့ဆို သီကုံး အပ်သောကြောင့် ကဗျာမည်ကြောင်း, က၀ီနံ ဣဒန္တိ ကဗျံ - ပညာရှိတို့သာ ဖွဲ့ဆိုနိုင်၍ ပညာရှိတို့၏ ဥစ္စာရတနာ ဖြစ်သောကြောင့် ကဗျာမည်ကြောင်းကို ကျမ်းအစောင်စောင်တွင် ပညာရှိ အသီးသီးတို့ မိန့်ဆိုတော် မူခဲ့ကြသည့်အတိုင်း ကဗျာတခု ဖွဲ့လိုသောသူသည် မြန်မာမှု, သဒ္ဒါနည်း, အလင်္ကာနည်း, ဆန်းနည်း, ကာရန်ယူနည်း, ကာရန်လွှဲနည်း, ကာရန်ခံနည်း, ကာရန်အုပ်နည်း, အကျဉ်းကို အကျယ်ပြုနည်း, အကျယ်ကို အကျဉ်းပြုနည်း, ချီ-ချ နည်း, ကြိယာထားနည်း, တော-ရပ်-ဖြတ်-စပ်နည်း စသော အချက်အလက်များနှင့် စကားပရိယာယ် ကြွယ်ဝရခြင်း, စကားလုံး သိမ်မွေ့ရခြင်း, အဓိပ္ပါယ် စုံလင်ပြည့်ဝစေခြင်း, တော-တောင်-ရေ-မြေ ဗဟုဿုတ, ဒေသန္တရ ဗဟုဿုတ, စာပေ ဗဟုဿုတရှိခြင်း စသည်များကို လိမ်မာ ကျွမ်းကျင်ပြီးရုံသာမက- မိမိစပ်လိုသော ကဗျာလင်္ကာကို အနည်းဆုံး ၂-ပုဒ် ၃-ပုဒ်ခန့် ရရှိထားပြီးလည်း ဖြစ်ရပေသည်၊ ထို့ကြောင့် ကဗျာဟူသည် ပညာရှိတို့၏ ဥစ္စာရတနာ ဖြစ်သည်-ဆိုခြင်းမှာ အလွန် လျော်ကန်လှပေသည်။”
.
အဲဒါကိုဖတ်ပြီး ကဗျာရေးဖို့ လက်တွန့်ခဲ့ဖူးတယ်။
---
(Q) မော်ဒန်၊ ပို့စ်မော်ဒန် ကဗျာဆိုတာတွေကိုရော နှစ်သက်ပါသလား။
(A) ဘယ်လိုကဗျာအမျိုးအစားမဆို ခံစားလို့ရရင် နှစ်သက်တာချည်းပါပဲ။ နားမလည်ရင်တော့ ခံစားလို့မရဘူး … မကြိုက်ဖူး ဆိုပါတော့။
---
(Q) စာရေးဆရာဆိုတာ ကိုယ်ရေးတဲ့စာကို တာဝန်ယူရတယ်ဆိုတာ… အဲဒီ သဘောထားအမြင်လေးကို ရှင်းပြပါလား။
(A) စာရေးဆရာမှ မဟုတ်ပါဘူး။ စာရေးသူတိုင်းဟာ မိမိရေးတဲ့စာအပေါ်မှာ တာဝန်ရှိတယ်လို့ ထင်ပါတယ်။ စာတပုဒ်ရေးပြီး .ကိုယ့်နာမည်တပ်လိုက်တာနဲ့ ဒီစာနဲ့ ပတ်သက်တဲ့ ကောင်းကျိုးဆိုးကျိုးတွေဟာ ကိုယ့်အပေါ်မှာ မူတည်သွားပါပြီ။ ဒီစာရဲ့ အကျိုးဆက်ဟာ ကိုယ့်အပေါ်မှာ တာဝန်ရှိသွားပါပြီ။
.
စာရေးဆရာမ ဂျူးကတော့ ခုလိုရေးဖူးတယ်။
“စာရေးသူတိုင်းသည် ကိုယ့်သမိုင်းကို ကိုယ်တိုင်ရေးနေသူများ ဖြစ်သောကြောင့် တာဝန်အလွန်ကြီးပါသည်။ ထိုတာဝန်ကို ကျွန်မတို့သည် ဂုဏ်သိက္ခာဖြင့်ရင်းရမည်။
ထိုဂုဏ်သိက္ခာကိုလည်းကျွန်မတို့ဖတ်သော စာအုပ်များက ပေးအပ်ပါလိမ့်မည်။” တဲ့။
---
(Q) စာရေးသူ၊ စာဖတ်သူ ဆိုတဲ့ သဘောထား အမြင်လေးကရော။
(A) စာရေးသူတွေဟာ စာဖတ်သူဘ၀က စခဲ့တာပါပဲ။ စာဖတ်သက် ရင့်လာတာနဲ့အမျှ ကိုယ်ဖတ်ခဲ့တဲ့ စာတွေကို အားကျပြီး စာရေးချင်စိတ် ဖြစ်လာတယ်။ ကိုယ့်အတွေ့အကြုံ ကိုယ့်အတွေးအခေါ်တွေကို ပြန်လည် မျှဝေချင်လာတယ်။ ဒီလိုနဲ့ စာဖတ်သူကနေ စာရေးသူ ဖြစ်လာတယ်။ စာရေးသူဖြစ်လာတော့လည်း ရေးချည်းနေလို့ မရပါဘူး။ ဖတ်လည်း ဖတ်နေရဦးမှာပါပဲ။
.
စာရေးသူ စာဖတ်သူနဲ့ ပတ်သက်ပြီး ဘလော့မှာ စာတပုဒ် ရေးခဲ့ဖူးပါတယ်။ 
အတိုချုပ် ပြောရရင်တော့ စာရေးသူတယောက် ရေးလိုက်တဲ့ စာတပုဒ်ကို စာဖတ်သူတွေက ရှုထောင့်အသီးသီးကနေ ခံစားခွင့် ရှိတယ်။ ဖြန့်ထွက်တွေးခွင့်ရှိတယ် ဆိုတာပါ။ ဒီလိုတွေးတော ခံစားလိုက်တဲ့အခါမှာ ကိုယ်ပေးချင်တဲ့ မက်ဆေ့ခ်ျနဲ့ လွဲသွားတတ်တာမျိုး (အဆိုးဘက် တိမ်းသွားတာမျိုး) ဖြစ်တတ်တာမို့ စာရေးသူတွေက အင်မတန် သတိထားရပါတယ်။ ဒါကြောင့်မို့လည်း စာရေးသူတွေက ကိုယ်ရေးတဲ့စာအပေါ်မှာ တာဝန်ရှိတယ်လို့ ဆိုခဲ့တာပါ။
---
(Q) ရေးတဲ့အခါမှာ စာဖတ်သူကို တစ်ခုခု ပေးလိုက်မယ်လို့ ရည်ရွယ်ရေးတာလား ဘယ်လို မု(ဒ်)မျိုး နဲ့ရေးပါသလဲ။
.
(A) တခုခုပေးမယ်ဆိုတဲ့ ရည်ရွယ်ချက်လို့ပြောရင် ဆရာကြီးလုပ်တယ် ထင်ကြဦးမယ်။ ဆရာလုပ်လိုတဲ့ စိတ်နဲ့ ရေးတာ မဟုတ်ပေမဲ့ တကယ်တမ်း စာဖတ်သူတွေ တခုခုရစေချင်ပါတယ်။ ဥပမာ - ဘာသာရေးနဲ့ ပတ်သက်တာမျိုး ရေးရင် ဘာသာရေး အသိလေးတွေ ရစေချင်တာမျိုး၊ ရသစာပေ ရေးရင်ကတော့ … (ဦး) သုမောင်ပြောတဲ့ ကွမ်းစကားလိုပေါ့။ အရည်မရ အဖတ်မရပေမဲ့ ရသတမျိုးမျိုး စာဖတ်သူမှာ ခံစားကျန်ရစ်တယ်ဆိုရင် ကိုယ်ရေးရကျိုးနပ်တာပါပဲ။
---
(Q) အလုပ်တစ်ခု လုပ်တယ်ဆိုရင် အကောင်းအဆိုး ဒွန်တွဲနေတတ်ပါတယ်။ ရသစာပေတွေ ရေးတဲ့အခါ မြန်မာစာနဲ့ ပတ်သက်လို့ ဆောင်းပါးလေးတွေ ရေးတဲ့အခါမှာ အကောင်းလို့ ယူဆရပေမယ့် အဆိုးအနေနဲ့ ကြုံတွေ့ရတာလေးတွေ ရှိပါသလား။ အင်တာနက်မှာ စာရေးတဲ့အခါမှာ စိတ်အနှောင့်အယှက်ဖြစ်စရာ ရှိပါသလား။
.
(A) အကောင်းရေးပေမဲ့ အဆုိုးနဲ့ ကြုံရတာမျိုးတွေ ရှိပါတယ်။ ကိုယ်ကလဲ အရေးမတတ်တာ ပါမှာပေါ့လေ။ ကြာတော့လဲ မေ့မေ့ပျောက်ပျောက် ဖြစ်သွားတာပါပဲ။ စိတ်အနှောက်အယှက် ဖြစ်စရာတွေလည်း တခါတလေ ကြုံရပါတယ်။ ဒါပေမဲ့ စာရေးတာ ၀ါသနာပါနေတော့ ဘယ်လိုပဲ ကြုံကြုံ ရေးနေမိဦးမှာပါပဲ။
---
(Q) ခုလောလောဆယ် ဘာတွေ လုပ်နေပါသလဲ။
(A) ကျောင်းသားပြန်လုပ်နေပါတယ်။
---
(Q) စိတ်ဖိစီးမှုတွေကို ဘယ်လိုပြေပျောက်အောင် လုပ်ပါသလဲ။
(A) တခါတလေ သီချင်းနားထောင်တယ်၊ ဆိုတယ်။
ဒါနဲ့မှ မပျောက်ရင် တရားနာတယ်။ မေတ္တာပို့တယ်။
ဒါနဲ့မှ မရရင်တော့ တရားထိုင်ပါတယ်။
---
(Q) အားလပ်ချိန်မှာ ဘာတွေ လုပ်ပါသလဲ။
(A) များသောအားဖြင့် အင်တာနက်မှာ အချိန်ကုန်တာ များတယ်။ စာတွေလိုက်ဖတ်တာပေါ့။ ဒီထက် အချိန်ပိုရရင် စာရေးတယ်။ တခါတလေတော့ စာလဲ မဖတ်၊ စာလဲမရေးဘဲ စိတ်အပြောင်းအလဲ ဖြစ်အောင် ရုပ်ရှင်ကြည့်ပါတယ်။
---
(Q) ယနေ့ခေတ်လူငယ်တွေကို ဘယ်လိုမြင်မိပါသလဲ။
(A) ကိုယ့်ထက်ပိုတော်ကြပါတယ်။
---
(Q) စာဖတ်သူများကို ဘာများပြောချင်တာ ရှိပါသလဲ။
(A) စာဖတ်သူတွေ စာဆက်ဖတ်ကြပါလို့ …
စာမဖတ်သူတွေကိုလည်း စာဖတ်ဖို့ အားပေးတိုက်တွန်းကြပါလို့ ပြောချင်ပါတယ်။
.
ခုလို တကူးတက အင်တာဗျူးတဲ့ လောကအလှကို ကျေးဇူးတင်ပါတယ်။
***
(မေးသူ - ဟနစံ။ ဖြေဆိုသူ - မေဓာဝီ)

Read More...

Thursday, October 13, 2016

... အတူ ...

အတူ

***
အတူပြုဖူးတဲ့ ကုသိုလ်တွေ
အတူနေခဲ့တဲ့ နေ့ရက်များ
အတူစားခဲ့တဲ့ မနက်စာ...
အတူသာယာခဲ့တဲ့ အချိန်များ
အတူသွားခဲ့တဲ့ စာပေပွဲ
အတူတွဲထားတဲ့ လက်နှစ်ဖက်
အတူနှစ်သက်တဲ့ နေရာလေး
အတူအလေးထားတဲ့ ပုဂ္ဂိုလ်တွေ
ကို နဲ့ မေ … နှစ်ယောက်တဘဝ
အတူလျှောက်ကြတဲ့ လမ်းခရီးမှာ
နီးနီးဝေးဝေး မညည်းကြေးသွားမယ်လေ …
***
မေဓာဝီ
13.10.16
18.45

Read More...

Wednesday, September 28, 2016

တရေးနိုး ... ဖိုးလမင်းနဲ့ ကိုပွ

ညက ... မအိပ်ခင် ကော်ဖီနဲ့ ရေနွေးကြမ်း သောက်တာ များသွားပြီး ၂ ချက်ခွဲလောက်မှာ ဆီးသွားချင်လို့ နိုးလာတယ်။ ...အိမ်သာသွားဖို့ မီးဖိုခန်းထဲ ဝင်တော့ ပြတင်းပေါက်က အလင်းရောင်ကြောင့် မီးဖိုးခန်းထဲမှာ လင်းနေတာပဲ။ ဒါနဲ့ အိမ်သာမဝင်ခင် ပြတင်းပေါက်နား အရင်သွားပြီး ကောင်းကင်ကို မော့ကြည့်တော့ လမင်းကြီးသာနေလိုက်တာ ကောင်းကင်တခွင်လုံး လင်းထိန်လို့။ ဖုန်းကလဲ အိပ်ရာထဲမှာ ကျန်ခဲတော့ ဓာတ်ပုံ ရိုက်ချင်ပေမဲ့ မရိုက်လိုက်ရဘူး။ ကိစ္စဝိစ္စပြီးလို့ အိပ်ရာထဲ ပြန်ရောက်တော့ မျက်လုံးက ကျယ်ပြီး မအိပ်ချင်သေးတာနဲ့ ခေါင်းအုံးဘေးက ဖုန်းကလေးယူ ဖေ့စ်ဘွတ်ထဲ ဟိုကြည့် ဒီကြည့် လုပ်နေမိတယ်။ 
.
ထိန်ထိန်သာနေတဲ့ လမင်းကြီးပုံတွေ ရိုက်ပြီး တင်ထားကြတဲ့ မိတ်ဆွေတချို့ရဲ့ ပို့စ်တွေလည်း မြင်တော့ ဓာတ်ပုံမရိုက်ခဲ့မိလေခြင်းလို့ စိတ်ထဲတွေးရင်း ဟိုဟိုဒီဒီဖတ်နေတုန်း ကိုပွရဲ့ ပို့စ်အသစ်ကို တွေ့လိုက်တော့ ဝမ်းသာအားရ ဖတ်ဖြစ်သွားတယ်။ အများသိကြတဲ့အတိုင်း ကိုပွရဲ့ ပို့စ်က ဟာသတွေချည်းမို့ ဖတ်ရင်း ပြုံးစိပြုံးစိ အသံမထွက်ဘဲ ရယ်နေမိတယ်။
 .
ကိုပွအမေ့ခြေရာယူနေတုန်း ဆန်ခံလာတဲ့ သီလရှင် ရောက်လာတဲ့ အခန်းဖတ်နေတဲ့အချိန် ဘေးနားမှာ အိပ်မောကျနေတဲ့ အကိုက ဟိုဘက်ဒီဘက် လှည့်ရင်း နိုးလာတာမို့ ဖုန်းကို အသာပိတ်ပြီး သူ့ဘက် လှည့်လိုက်တယ်။ သူက ကိုယ့်ကိုကြည့်ပြီး ...

" မေ ... ဘာဖြစ်လို့လဲ" လို့ မေးတော့

"ဘာမှ မဖြစ်ပါဘူး ... ဟိဟိ"

ကိုယ်ကလည်း ရယ်ချင်စိတ်က မဖျောက်နိုင်သေးတော့ ဘာမှမဖြစ်ဘူးသာ ပြောရတာ မျက်နှာက ပြုံးစိစိ ပါးစပ်ကလည်း ဟီဟိ လို့ ထွက်သွားတော့ ... သူက ထပ်မေးပြန်တယ်။

"ဘာတွေ သဘောကျနေတာလဲ မေ"

ဒီအချိန်ကြီး ဖေ့စ်ဘွတ်ထဲက ကိုပွစာကို ဖတ်ပြီး ရယ်နေတာ မပြောချင်လို့ ခုလို ပြောလိုက်တယ်။

"ခုနကလေ ... မေ ရှူရှူးသွားပေါက်တော့ ပြတင်းပေါက်ကနေ လမင်းကြီးသာနေတာ မြင်လို့"

ဘာမှတော့ မဆိုင်ဘူး၊ ပါးစပ်ထဲတွေ့ရာ လျှောက်ပြောလိုက်တာ။

"ဟင် ... ဘယ်လို"

"ဖိုးလမင်းကြီးလေ ... သာနေလိုက်တာ လင်းထိန်နေတာပဲ ကိုရဲ့ အာ့ကြောင့်"

"အမယ် ... လျှောက်ပြောနေတယ် ... အဲဒါ ... ကို အိပ်ရင်း ဖောင်ပြင်နေတာ မြင်လို့ ပြောတာ မဟုတ်လား"

သူပြောမှ ကိုယ်က ပိုရယ်ချင်သွားရော ...

"ဟီးဟီး .... အင်း အင်း ... ဟုတ်တယ်"
ပြီးပြီးရော အင်း ... လိုက်တော့ ထပ်မေးသေးတယ်။

"အဲဒီတော့ မေက ဘာလုပ်လိုက်လဲ"

"မေကလား ... ဓာတ်ပုံရိုက်လိုက်တယ်"

သူ့ကို စ-ချင်တာနဲ့ အဲလို ပြောပြီး တခွိခွိရယ်မိတော့ သူက "ကြည့်စမ်း တော်တော်ဆိုးတဲ့ မေ" လို့ ပြောပြီး
"ဘယ်နှနာရီ ရှိပြီလဲ ... မေ" တဲ့ မေးတယ်။

"၃ နာရီထိုးပြီ"

"ဒါဆို ပြန်အိပ်လိုက်အုံးမယ်။ ၅ နာရီ နှိုးနော်"

ပြောပြီး တခေါခေါ ပြန်အိပ်ပျော်သွားပါရော။ ရယ်ချင်လွန်းလို့ မအိပ်နိုင်တဲ့ ကိုယ့်မှာတော့ ကိုပွကို ပြန်ဖွင့် ဆုံးအောင်ဖတ်၊ အသံမထွက်အောင် ရယ်၊ သူပြောတာတွေကို ပြန်စဉ်းစားပြီရယ် ... မနက်ကျမှ ဒါကို ပို့စ်တင်ရမယ်လို့ တွေး .... ရယ်ရင်း တွေးရင်း ၅ နာရီ ထိုးခါနီးမှ မှေးခနဲ ပြန်အိပ်ပျော်သွားပါတော့တယ်။
***
မေဓာဝီ
၂၈၊ ၀၉၊ ၁၅

(မနှစ်က ဖေ့စ်ဘွတ်မှာ ရေးခဲ့တာလေးပါ။)

Read More...

Sunday, September 11, 2016

ပီတိ


ပီတိ
***
မြေးနှင့် အဘွား 
သားနှင့် အမိ
ဆုံတွေ့သည့်ခိုက်
သည်းလှိုက်ပီတိ
ရင်ဝယ်ငြိသည်
အမိ ဝမ်းမြောက်ပါစေသောဝ်။ 
***
မေဓာဝီ
၁၁ စက်တင်ဘာ၊ ၂၀၁၆
၂၃း၀၄ နာရီ

Read More...

Friday, September 09, 2016

ရထားသံလမ်းပေါ်က ကဗျာနှစ်ပုဒ်

မနှစ်က ဖေ့စ်ဘွတ်မှာ တင်ခဲ့တဲ့ ကဗျာနဲ့ ဒီနှစ်တင်ဖြစ်တဲ့ ကဗျာ ... တိုက်တိုက်ဆိုင်ဆိုင် ဓာတ်ပုံလေးတွေက ရထားသံလမ်းလေးတွေချည်း ဖြစ်နေတယ်။ မနှစ်က ကဗျာရဲ့ ဓာတ်ပုံက အင်္ဂလန်နိုင်ငံ South Stafford-shire နယ်က Bilbrook ဆိုတဲ့ ရွာငယ်ကလေးရဲ့ဘူတာရုံ ရထားသံလမ်းပါ။ အင်္ဂလန်မှာနေတုန်းက အလုပ်သွား ကျောင်းသွားရင် အိမ်နဲ့ မနီးမဝေးက အဲဒီဘူတာလေးကနေ တခါတလေ ရထားစီးဖြစ်တယ်။ များသောအားဖြင့်ကတော့ ဘတ်စ်နဲ့သွားတာပါပဲ။ ရထားစီးဖြစ်တဲ့အခါ ဘူတာရုံလေးမှာ စောင့်နေရင်း ဘုရားစာရွတ်တဲ့အခါရွတ်၊ ဟိုငေး ဒီငေး ဟိုတွေးဒီတွေး တွေးတဲ့အခါ ငေးလို့ တွေးလို့ပေါ့။ မနှစ်က ဒီဓာတ်ပုံလေးကို အယ်လ်ဘမ်ထဲ ပြန်တွေ့ပြီး ကဗျာလေး ရေးဖြစ်သွားခဲ့ပါတယ်။ 
.
ပိုင်ဆိုင်ခွင့်ရတဲ့ခဏ
ဘဝဆိုတာက တိုတိုလေး ... 
.
ခွန်းဆက်ဖို့ပြင်နေဆဲ 
နှုတ်ဆက်လို့ ခွဲခဲ့ရတဲ့အခါ
ကံကြမ္မာကိုသာ ယိုးမယ်ဖွဲ့မိတယ်။ 
***
၁ဝ၊ ၉၊ ၂၀၁၄ 
***
နောက်တပုံကတော့ သြဂုတ်လထဲမှာ ကျောင်းက ကျောင်းသားတွေနဲ့ တိုက်ကြီးမြို့နယ်ကို ရေဘေးကယ်ဆယ်ရေး ပစ္စည်းတွေ သွားလှူတော့ ကယ်ဆယ်ရေးစခန်း လုပ်ထားတဲ့ ဘုန်းတော်ကြီးကျောင်းနားမှာ တွေ့ရတဲ့ ရထားသံလမ်းလေးကို သဘောကျလို့ ရိုက်ထားခဲ့လိုက်တယ်။ မိုးရာသီမို့ ပတ်ဝန်းကျင်မှာ စိမ်းစိုနေတာပဲ။ အစိမ်းရောင်တွေ ကြားမှာ လဲလျောင်းနေတဲ့ သံလမ်းလေးရဲ့ ဘေးတဘက်တချက်မှာ ကျွန်းပင်တန်းနဲ့ ... ။ ဒီသံလမ်းလေးတွေကို ကြည့်ပြီး ကဗျာတပုဒ် ရေးဖြစ်ခဲ့တယ်။ 
.

သံလမ်းများ
***
ဘယ်မှာ ဆုံမလဲ
ဘယ်မှာ ဆုံးမလဲ
... ... ... ... ... 
... ... ... ... ...
... ... ... ... ...
ဘဝရထားကြီးကို ကျောမှာပိုးရင်း  
မညည်းမညူ ခရီးအတူ သွားခဲ့တယ်။
***
မေဓာဝီ
၉၊ ၀၉၊ ၂၀၁၆

Read More...

Monday, September 05, 2016

အပေါင်း အနုတ် နှင့် ညီမျှခြင်း ( + - = )

.
(၁) အပေါင်း
+ + + +
အမှတ်တရ ရက်လေးတွေ တရက်တိုးတိုင်း ... ...
... ... ...
သံယောဇဉ်တွေ တိုးပွါး
ချစ်ခြင်းမေတ္တာတွေ တိုးပွါး
နားလည်မှုတွေ တိုးပွါး ...
... ... ...
(၂) အနုတ်
- - - -
သံသယတွေ လျော့ပါး
ပဋိပက္ခတွေ လျော့ပါး
မာန်မာနတွေ လျော့ပါး ...
... ... ...
(၃) ညီမျှခြင်း
= = = =
ရည်ရွယ်ချက်တွေ တူညီ
ရည်မှန်းချက်တွေ တူညီ
ရပ်တည်ချက်တွေ တူညီ
... ... ...
ရှေ့ဆက်ရမယ့် ပန်းတိုင်ဆီ ...
မှီတွယ်ရာ ပခုံး
နူးညံ့တဲ့ နှလုံးသား
အင်အားရှိတဲ့ လက်များနဲ့
ဆက်သွားကြမယ် အတူတူ ... ... ။
***
 
မေဓာဝီ
၅၊ ၀၉၊ ၂၀၁၆
၁၆း၀၀ နာရီ
(တနှစ်နဲ့ ၆ လပြည့် ... အမှတ်တရ)

Read More...

Wednesday, August 31, 2016

ဘလော့ဒေးနှင့် ဆယ်စုနှစ်သို့ သမင်လည်ပြန် ...

***
၂၀၀၆ ခုနှစ် သြဂုတ်လ ၃၀ ရက်နေ့မှာ စခဲ့တဲ့ ကျမရဲ့ "တွေးမိတွေးရာ ရေးမိရေးရာ" ဘလော့လေးဟာ ခုဆိုရင် ဆယ်နှစ်တင်းတင်း ပြည့်ခဲ့ပါပြီ။ ရေးခဲ့သမျှတွေ ပြန်ကြည့်တော့ ဆယ်နှစ်အတွင်းမှာ ပို့စ်ပေါင်း ၇၃၉ ပုဒ် ရေးဖြစ်ခဲ့တာ တွေ့ရတယ်။ ပို့စ်တွေကို ကဗျာ အက်ဆေး ဝတ္ထု ခရီးသွားဆောင်းပါးနဲ့ ကိုယ်ရေးကိုယ်တာ စသဖြင့် ခေါင်းစဉ်လေးတွေ ခွဲပြီးတင်ခဲ့ပါတယ်။ ဘလော့ရေးခါစက တချိန်ကျရင် စုပြီး စာအုပ်ထုတ်မယ်လို့ ရည်ရွယ်ခဲ့ပေမဲ့ ဘလော့ဂါတွေ တယောက်ပြီးတယောက်သာ စာအုပ်တွေ ထုတ်ပြီး စာရေးဆရာတွေ ဖြစ်သွားကြတယ်၊ ကျမကတော့ ခုထိမထုတ်ဖြစ်သေးပါဘူး။
.
ဘလော့ဒေးလို့ သတ်မှတ်ခဲ့ကြတဲ့ ၃၁ သြဂုတ်နဲ့ ကျမဘလော့လေး ဆယ်နှစ်တင်းတင်း ပြည့်တဲ့အချိန် ဘလော့မှာ လှမ်းခဲ့သမျှ ခြေရာလေးတွေကို ပြန်ကြည့်ရင်း အင်တာနက် စသုံးဖြစ်ခဲ့ပုံတွေကို ပြန်တွေးမိတယ်။ ၂၀၀၆ မှာမှ ဘလော့စရေးပေမဲ့ ဒီ့အရင်ကတည်းက အင်တာနက် သုံးဖြစ်နေပါပြီ။
.
အင်တာနက်စသုံးခြင်း
*
၂၀၀၀ ပြည့်နှစ်ကျော်ခါစမှာ အင်တာနက်ကို dial up နဲ့ စသုံးချိန်က outlook express နဲ့ အီးမေးလ်လောက်သာ သုံးဖြစ်ခဲ့တယ်။ dial up က ဖုန်းလိုင်းနဲ့ ချိတ်ရတာမို့ အင်တာနက်သုံးနေရင် ဖုန်းက ဘီးဇီးဖြစ်နေပြီး တခါတခါ ဖုန်းဝင်လာရင် အင်တာနက် လိုင်းကျသွားတတ်ပါတယ်။ ပုံတွေ attached file တွေတွဲပြီး အီးမေးလ်ပို့ရင်လည်း အချိန်သိပ်ကြာပါတယ်။ အဲဒီလို အဆင်မပြေမှုတွေနဲ့သာ သုံးရတယ် ဖုန်းဘေလ်လာတော့ တသိန်းကျော် ဆောင်လိုက်ရပြီးနောက်ပိုင်း broadband တပ်လိုက်ပါတော့တယ်။ ADSL တွေချပေးတဲ့အခါ ADSL လည်း ထပ်တပ်ခဲ့တယ်။
.
Broadband နဲ့ ADSL တွေ တပ်ခါစ free email ဖွင့်လို့ရတဲ့ web site တွေဖြစ်တဲ့ postman တို့ yahoo, msn, aol တို့ကနေ အီးမေးလ်ရော messenger ပါ သုံးဖြစ်တယ်။ အဲဒီအချိန်တုန်းက စစချင်းမို့ ဝက်ဘ်ဆိုက်တွေကို ပိတ်တာဆို့တာ သိပ်မရှိသေးပါဘူး။ Skype ကနေ conference call ခေါ်ပြီး လူအများနဲ့ ပြောလို့ရတဲ့အထိ ကွန်နက်ရှင်ကောင်းပါတယ်။ နောက်ပိုင်းကျတော့ yahoo, msn တွေရဲ့ မေးလ်ရော မက်ဆန်ဂျာရော သုံးလို့ မရတော့ပါဘူး။ ပုဂံနက်က မေးလ်ကိုပဲ သုံးရပါတော့တယ်။ အစိုးရကလည်း အီးမေးလ်တွေ အဝင်အထွက်ကို စောင့်ကြည့် စစ်ဆေးဖို့ ဆက်သွယ်ရေးက တပ်သားလေးတွေကို တာဝန်ပေးထားတယ်လို့ သိရတာကြောင့် အီးမေးလ် အင်တာနက် သုံးရတာဟာ လုံခြုံမှုမရှိသလို ပရိုက်ဗေစီလည်း မရှိခဲ့ပါဘူး။
.
chat room နဲ့ forum များ
*
အဲဒီနောက် ပလန်းနက်မြန်မာနဲ့ ပုဂံဝက်ဘ်ဆိုက်တွေထဲမှာ လူစည်ကားလာကြတယ်။ ကမ္ဘာတဝှမ်းက မြန်မာတွေဟာ မြန်မာလို ပြောလို့ရတဲ့ ချတ်ရွမ်းတွေမှာ ဆုံကြ ပြောကြတယ်။ အဲဒီတုန်းက ပလန်းနက်နဲ့ mmchat ကို အသုံးများခဲ့ကြပါတယ်။ ချတ်ရွမ်းမှာ ပျော်စရာကောင်းသလို ငြင်းခုန်ကြ ရန်ဖြစ်ကြ ဆဲကြတာတွေ လည်းရှိတယ်။ အကြောင်းအရာတခုကို တင်ပြ ဆွေးနွေး ငြင်းခုန်နိုင်တဲ့ ဖိုရမ်တွေလည်း သက်ဝင် လှုပ်ရှားလာကြတယ်။ မှတ်မှတ်ရရ mercy killing နဲ့ ပတ်သက်ပြီး ဖိုရမ်ထဲမှာ အများနဲ့ တယောက် ဆွေးနွေး ငြင်းခုန်ခဲ့ဖူးတယ်။ ပုဂံနက်ထဲမှာ လူငယ်တွေကို ဘာသာရေး မှိုင်းတိုက်ခဲ့တဲ့ ဘကြီးဝိဟာရီ (မိုးပြာဂိုဏ်းခေါင်းဆောင်) နဲ့ အခြေအတင် ပြောခဲ့ဖူးတယ်။ အဲဒီတုန်းကတော့ သူမှန်းမသိခဲ့ပါဘူး။ နောက်ဆုံး ပုဂံဖိုရမ်ရဲ့ အက်ဒ်မင်က bias လုပ်ပြီး ကိုယ့်စာတွေ တင်မပေးတော့တာနဲ့ ပုဂံဖိုရမ်ကို ကျောခိုင်းပြီး နေးတစ်မြန်မာ ဖိုရမ်ကို ရောက်ခဲ့ပြန်တယ်။
.
forum မှ blog ဆီသို့
*
အက်ဒ်မင်ရဲ့ ထိမ်းချုပ်မှုရှိနေတဲ့ ဖိုရမ်တွေကို ငြီးငွေ့လာချိန်မှာ ဖိုရမ်ထဲမှာရှိတဲ့ ညီလင်းဆက်၊ ကိုမောင်လှ၊ နိုင်းနိုင်းစနေတို့က ဘလော့စရေးနေကြပါပြီ။ သူတို့လင့်ခ်တွေကို လိုက်ကြည့်ရင်း ကိုယ်လည်း ဘလော့တခုလုပ်ချင်စိတ် ဖြစ်လာတယ်။ အဲဒီအချိန် google က free ပေးတဲ့ ဂျီမေးလ်တွေ သုံးနေကြပြီမို့ ဂျီမေးလ်အကောင့်နဲ့ ဖွင့်နိုင်တဲ့ blogspot ကို သုံးပြီး ဘလော့တွေ ရေးကြပါတယ်။ ကိုယ်လည်းပဲ နည်းပညာဆိုင်ရာ ဟိုလူ ဒီလူ အကူအညီတောင်း၊ ညီလင်းဆက်ရေးတဲ့ ဘလော့လုပ်နည်းတွေဖတ်ပြီး ကိုယ်ပိုင် ဘလော့တခု ဖန်တီးဖြစ်ခဲ့တယ်။ ကိုယ်ရေးထားတဲ့ စာတိုပေစလေးတွေ တနေ့တပုဒ်တင်ရင်း အကျေနပ်ကြီး ကျေနပ်လို့ပေါ့။
.
ပထမဆုံးပို့စ်နဲ့ ဘလော့
*
စစချင်းပို့စ်မှာ ကြောင်ဂါးဖီးရဲ့ I can but I won't ဆိုတဲ့ ပုံလေးကို သဘောကျလို့ ကိုယ်နဲ့လည်းတူလို့ Me ဆိုတဲ့ ခေါင်းစဉ်နဲ့ တင်ခဲ့ပါတယ်။ အဲဒီတုန်းက မြန်မာလို မြင်ရဖို့အတော်လေး ကြိုးစားခဲ့ရပါတယ်။ အင်တာနက် စာမျက်နှာပေါ်မှာ ကိုယ်ရေးတဲ့စာကို ကွန်ပျူတာ စာလုံးနဲ့ မြင်ရတဲ့ ခံစားချက်က ဟိုးအရင် မဂ္ဂဇင်းထဲ ကိုယ့်စာမူပါလို့ ပျော်ရွှင်ကြည်နူးရတဲ့ ခံစားချက်မျိုးနည်းတူပါပဲ။ ကိုယ့်စာကိုယ် တစိမ့်စိမ့် ကြည့်မဝခဲ့ဘူး။
.
မြန်မာစာလုံးများနဲ့ ဘလော့
*
ကွန်ပျူတာပေါ်မှာ မြန်မာစာကို စစချင်း CE font နောက်တော့ Win font တွေ သုံးပြီး ရိုက်ခဲ့ကြတယ်၊ ဖိုရမ်တွေ ချတ်ရွမ်းတွေမှာ ဝင်းစာလုံးနဲ့ပဲ ရိုက်ခဲ့ကြပေမဲ့ ဘလော့ပေါ်လာတဲ့ အချိန်မှာတော့ ဇော်ဂျီစာလုံးကို တညီတညွတ်တည်း သုံးခဲ့ကြပါတယ်။ ဝင်းစာလုံး သုံးတဲ့ ဘလော့တွေရှိပေမဲ့ အင်မတန်နည်းပါတယ်။ အများစုက ဇော်ဂျီကိုပဲ သုံးကြတယ်။ ဇော်ဂျီသုံးမယ်ဆိုရင် ဇော်ဂျီကီးဘုတ်ကို ဒေါင်းလုတ်ယူ အင်စတောလုပ်ပြီး သုံးရပေမဲ့ သူက user friendly ဖြစ်တာကြောင့် တဖြည်းဖြည်း ဇော်ဂျီသုံးစွဲသူတွေ များပြားလာခဲ့ပါတယ်။ အဲဒီတုန်းက ယူနီကုတ်ပေါ်ပြီလား မပေါ်သေးဘူးလားတော့ မသိပါဘူး၊ ယူနီကုတ် သုံးတဲ့သူတော့ မတွေ့ရပေးပါဘူး။
.
ရေးမိရေးရာ ဘလော့
*
မဂ္ဂဇင်းလို အယ်ဒီတာမရှိ၊ ဖိုရမ်လို အက်ဒ်မင်မရှိတဲ့ ဘလော့ရေးသူတွေဟာ ကိုယ့်စာကိုယ် တာဝန်ယူကြရပါတယ်။ ဝေဖန်ခံ အဆဲခံနိုင်ကြရတယ်။ အဲဒီတုန်းက အစိုးရကို ဝေဖန်မိရင် တဘက်က လက်ခုပ်တီးသလို တဘက်ကလည်း ပြစ်တင်ဆဲရေးတာ ခံရတယ်။ အဲဒီတုန်းက အွန်လိုင်းမဂ္ဂဇင်းတွေရဲ့ အမှားတချို့နဲ့ ဘလော့ရေးဖော် အချင်းချင်းရဲ့ သတ်ပုံအမှားလေးတွေ ထောက်ပြတတ်တဲ့ ကျမလည်း လူအမြင်ကတ်ခံရတဲ့ စာရင်းဝင် တယောက်ပါပဲ။
.
နေ့စဉ်ကြုံတွေ့ရတဲ့ အဖြစ်အပျက်လေးတွေ၊ ကိုယ်မျှဝေချင်တဲ့ အကြောင်းအရာနဲ့ စာတွေ ကဗျာတွေအပြင် တွေးမိသမျှ ချရေးဖြစ်ခဲ့တာမို့ ဘလော့ဟာ ကျမအတွက်တော့ စာရေးဖို့ လေ့ကျင့်ကွင်းတခု ဖြစ်ခဲ့ပါတယ်။ ၂၀၀၆ သြဂုတ်နောက်ပိုင်းနဲ့ ၂၀၀၇ ခုနှစ် အစောပိုင်း ကာလတွေဟာ စာအရေးဖြစ်ဆုံး အချိန်တွေပါပဲ။ အဲဒီတုန်းက ဘလော့မှာ တနေ့တပုဒ် မှန်မှန် ရေးဖြစ်ခဲ့ပါတယ်။ နေ့စဉ်ရေးခဲ့တာမို့ အဲဒီတုန်းက စာတွေဟာ ကုန်ဈေးနှုန်းအပါအဝင် ခေတ်ကို ထင်ဟပ်တဲ့ အကြောင်းအရာတွေ များပါတယ်။
.
သမိုင်းထဲက ဘလော့
*
ဒီလိုနဲ့ ၂၀၀၇ ခုနှစ် သြဂုတ်လထဲမှာ အစိုးရက ကြေငြာမထားဘဲ စက်သုံးဆီတွေ ဈေးတိုးမြှင့်လိုက်တော့ တချို့ဘတ်စ်လိုင်းတွေ မထွက်ဘူး၊ ကားခတွေဈေးတက်သွားတယ်။ အခြေခံ လူတန်းစားတွေ ကသီလင်တ ဖြစ်ကြတဲ့အခါ ဘတ်စ်ကားမစီး အငှားကားမစီးဘဲ တစုတဝေးထဲ လမ်းလျှောက်ကြတဲ့ အဖြူရောင် လှုပ်ရှားမှု ပေါ်ပေါက်လာခဲ့ပါတယ်။ အဲဒီအချိန်က သိပ်ကို sensitive ဖြစ်နေတဲ့ကာလ ... ရွှေဝါရောင်တော်လှန်ရေး မတိုင်ခင်အချိန်လေးပေါ့။ ကျမက အစိုးရသတင်းစာထဲမှာ ပါတဲ့ ဆောင်းပါးတပုဒ်ကို ထောက်ပြဝေဖန်တဲ့ စာတပုဒ် ဘလော့မှာ ရေးခဲ့လိုက်တယ်။ အဲဒီဆောင်းပါးကို ဟစ်တိုင်အွန်လိုင်းမီဒီယာက သူတို့စာမျက်နှာမှာ ထည့်ခွင့်တောင်းပြီး ထည့်လိုက်တဲ့အခါ .... ။
... ... ... ...
... ... ... ...
.
အဲဒီဆောင်းပါးနဲ့ ပတ်သက်လို့ ကျမကို ကွန်မန့်တွေနဲ့ ချီးကျူးအားပေးသလို ဝေဖန် ဆဲရေး ခြိမ်းခြောက်တာတွေလည်း ခံခဲ့ရပါတယ်။ အဲဒီအချိန်မှာ ရွှေဝါရောင် အစပျိုးနေပါပြီ။ ဘလော့တွေနဲ့ ဘလော့ဂါတွေကိုလည်း သတိထားကြည့်ရှုနေတဲ့ အချိန်။ နောက်ဆုံး မိသားစုရဲ့ ဆန္ဒအရ ဘလော့ကို ပိတ်ခဲ့လိုက်ပြီး သွားဖို့အမြဲတမ်း ငြင်းဆန်ခဲ့တဲ့ ဗြိတိန်နိုင်ငံကို သွားမယ်လို့ ဆုံးဖြတ်ခဲ့ပါတယ်။ မှတ်မှတ်ရရ စက်တင်ဘာ ၁၀ ရက်မှာ ဘလော့ပိတ်ခဲ့ပြီး တလမကြာပါဘူး၊ အောက်တိုဘာ ၆ ရက်မှာ ဗြိတိန်ကို ကျောင်းသားဗီဇာနဲ့ ထွက်ခဲ့ပါတယ်။ တချို့က ကျမကို မီဒီယာကို ခုတုံးလုပ်ပြီး အင်္ဂလန်သွားတာလို့ အမနာပ ပြောခဲ့ကြတယ်။ အမှန်တကယ်က ကျောင်းလျှောက်ပြီး ကျောင်းသားဗီဇာနဲ့ တရားဝင်သွားခဲ့ခြင်း ဖြစ်တဲ့အပြင် ဟိုရောက်တော့လည်း ဘာအခွင့်အရေးမှ မယူခဲ့ပါဘူး။ (ဆိုလိုတာက Asylum မလျှောက်ခဲ့ပါဘူး) နေထိုင်ခွင့် ဗီဇာမကုန်ခင်မှာပဲ ရန်ကုန်က အစ်မကြီး နေမကောင်းလို့ မြန်မာပြည် ပြန်လာခဲ့တာပါ။
.
ရွှေဝါရောင်တော်လှန်ရေးမှာ ဘလော့ဂါတွေဟာ အစိုးရက စောင့်ကြည့်ခံခဲ့ရတဲ့ သူတွေ ဖြစ်ခဲ့တယ်။ ကျမ အင်္ဂလန်ရောက်ပြီး မကြာခင် နေဘုန်းလတ် အဖမ်းခံရတဲ့ သတင်းကို စိတ်မကောင်းစွာ ကြားခဲ့ရပါတယ်။
.
ဘဝထဲက ဘလော့
*
အင်္ဂလန်ရောက်ခါစ ကွန်ပျူတာ မရှိတာကြောင့် ဘလော့မရေးနိုင်ပါဘူး။ ကျောင်းစာကြည့်တိုကက ကွန်ပျူတာကလည်း မြန်မာစာ အင်စတောလုပ်ခွင့် မရှိပါဘူး။ ဒါနဲ့ပဲ ကိုရန်အောင်က ကူညီပေးမယ်ဆိုလို့ စာရွက်ပေါ်မှာ လက်ရေးနဲ့ချရေး၊ ဘားဂလစ်နဲ့ ရိုက် ပြီး သူ့ဆီပို့ သူက မြန်မာလို ပြန်ရိုက်ပေးပြီး ကျမဆီ ပြန်ပို့၊ အဲဒါကို ကော်ပီလုပ်ပြီး မြန်မာစာ မမြင်ရတဲ့ စက်မှာ လေးထောင့်ကွက်တွေကို ရေတွက်ရင်း ဘလော့ရေးခဲ့ရဖူးတယ်။ ဗြိတိန်ရဲ့ ဆောင်းရာသီအချိန် ... ညဘက် အပူပေးစက် ပိတ်လိုက်လို့ အေးစက်နေတဲ့ စာကြည့်တိုက်ထဲမှာ သန်းခေါင်ကျော်လောက်ထိ နေပြီး ခိုက်ခိုက်တုန်စွာ ဘလော့ရေးခဲ့ရတဲ့ နေ့ရက်တွေကို ပြန်ပြောရင် ဇာတ်နာတယ်များ ဆိုနေမလား။
.
ကျောင်းအိပ်ကျောင်းစား နေရတဲ့ ကျောင်းမှာ တပတ်တခါ ကျောင်းက ဟိုဟိုဒီဒီ စရိတ်ငြိမ်း လိုက်ပို့တာကို မလိုက်ဘဲ စနေတနင်္ဂနွေဆိုရင် အမလတ် အိမ်ကို အပြေးပြန်ပြီး သူ့ကွန်ပျူတာနဲ့ ဘလော့ရေးခဲ့တဲ့ အထိ ဘလော့ကို စွဲလမ်းခဲ့တယ်။ အချိန်ပိုင်း အလုပ်ကလေးရတော့ ပထမဆုံးရတဲ့ လစာနဲ့ တိုရှီဘာလက်ပ်တော့လေး ဝယ်ပြီးတဲ့နောက် ဘလော့ကို စိတ်တိုင်းကျ ပြန်ရေးလိုက်တာ အဲဒီနှစ်က စာမေးပွဲတောင် ကျလို့။ ကျောင်းအိပ်ကျောင်းစားကနေ ဦးရီးတော်အိမ်ကိုရောက်၊ အဲဒီမှာ အင်တာနက်တပ်မထားတော့ ဖုန်းလိုင်းနဲ့ခိုးသုံးပြီး ဦးရီးတော် အငြိုငြင် ခံခဲ့ရသေးတယ်။ နောက်တော့ မိုဘိုင်းအင်တာနက် ဝယ်သုံးပြီး ကွန်နက်ရှင် ခပ်နှေးနှေးနဲ့ ဘလော့ဂင်းခဲ့ရတယ်။
.
ဘလော့ခေတ် ကုန်ပြီလား ...
*
ဖေ့စ်ဘွတ်ခ်လို လူမှုကွန်ရက်စာမျက်နှာတွေ ပေါ်ပေါက်လာချိန်မှာ ဘလော့ရေးသူတွေ အတော်နည်းသွားတယ်။ အရင်က တက်တက်ကြွကြွ ရေးခဲ့သူတွေလည်း သိပ်မရေးဖြစ်တော့ဘဲ active မဖြစ်တော့တဲ့ ဘလော့တွေ များလာခဲ့တယ်။ ကိုယ်တိုင်လည်း ဘယ်နေရာရောက်ရောက် ဘလော့ကို မရေးဘဲ မနေနိုင်အောင် စွဲလမ်းခဲ့ရာက တဖြည်းဖြည်းနဲ့ စွဲလမ်းစိတ် လျော့နည်းလာသလို ဘလော့ခေတ်ကလည်း မှေးမှိန်လာခဲ့ပါတယ်။ ဘလော့ကို ဘဝတခုလို ထင်မှတ်ခဲ့ရာက ဘလော့ဟာ ဘဝမဟုတ်မှန်း သိလာခဲ့ပြီပေါ့။
.
ဘလော့နိဂုံး
*
ဒီလိုနဲ့ပဲ တနှစ်ပြီးတနှစ် အသက်ကြီးပြင်းရင်း တချိန်မှာတော့ ဘလော့လေးနဲ့ ခွဲခွါရမယ့် အချိန်ရောက်လာပါလိမ့်မယ်။ အဲဒီအခါမှာ တချိန်က တွေးမိတွေးရာ ရေးမိရေးရာတွေ ရေးခဲ့တဲ့ မေဓာဝီ ဆိုသူကို ကျန်ရစ်သူတွေက သတိရချင်လည်း ရမယ် ... မေ့ချင်လည်း မေ့သွားကြမှာပါပဲ။ ဒါကိုက သဘာဝတွေပဲ မဟုတ်လား။ မေဓာဝီကို သိသူ မသိသူ ချစ်သူ မုန်းသူ ဘယ်လိုမှ မနေသူ အားလုံးအတွက် ပျော်ရွှင်ဖွယ် နေ့ရက်လေး ဖြစ်ပါစေလို့ 310816 ဘလော့ဒေးမှာ ဆုတောင်းလိုက်ပါတယ်။
***
မေတ္တာဖြင့် ...
မေဓာဝီ
၃၁ သြဂုတ် ၂၀၁၆

Read More...

Friday, July 29, 2016

သူ ... ပျော်ရွှင်ပါစေ …


သူနှင့်ကျမ အမှတ်တရ နေ့လေးတွေတိုင်းတွင် နှစ်ယောက်အတူ ရှိမနေသည်က များလှသည်။ ယခုလည်း မကြာခင် အချိန်ပိုင်းမှာ သူ့မွေးနေ့ကို ရောက်တော့မည်၊ သူနှင့်ကျမက တယောက်တနေရာစီ။
.
တကယ်တော့ တနေရာစီ ဝေးကွာနေပေမဲ့ နှစ်ယောက်သား အတူရှိနေသည်နှင့် သိပ်တော့ မထူးခြားလှပါ။ အိပ်ရာဝင် အိပ်ရာထ၊ အလုပ်ဆင်း အလုပ်တက်၊ ကော်ဖီချိန် ထမင်းစားချိန်၊ ရထားပေါ် တက်ခ်စီပေါ်အထိ မက်ဆေ့ခ်ျပို့ရင်း စကားပြောရင်း ခွဲခွါနေ့များကို နွေးထွေးစွာ ကျော်ဖြတ်ခဲ့ကြသည်။
.
တဦးနှင့်တဦး အားလပ်ချိန် မတူကြလျှင်လည်း အကြောင်းမဟုတ်။ အတူတူ နှစ်ယောက်သား ဟိုဟိုဒီဒီ သွားလာခဲ့စဉ် ရိုက်ကူးထားခဲ့သော ဓာတ်ပုံလေးများကို ပြန်ကြည့်ရင်း အလွမ်းပြေခဲ့ကြရသည်။ ဒီလိုလုပ်ကြရအောင်ဟု တိုင်ပင်ထားကြသည် မဟုတ်ဘဲ နှစ်ဦးသား အလေ့အထတို့ တိုက်ဆိုင်ကြခြင်းသာ။
.
ကျမက ရန်ကုန်မှာ အလုပ်ပြန်လုပ်နေပြီမို့ သူရှိရာသို့ မသွားနိုင်တော့ သူက ခွင့်ရရင် ရသလို ကျမထံ ပြန်လာရလေပြီ။ ကျမက စင်္ကာပူနိုင်ငံ၏ ကြပ်တည်း ကျဉ်းမြောင်းသော အခန်းငယ်လေးထဲတွင် နေထိုင်ရ အသားမကျနိုင်သည်ကြောင့် သူ့ကိုသာ ပြန်လာရန် တောင်းဆိုထားရ၏။


ဟိုအရင်အခေါက်တွေ သူပြန်လာစဉ်မှာတော့ ကျမတို့နှစ်ယောက် အိမ်နားက ဟိုတယ်မှာ တည်းရင်တည်း ခရီးတွေ ထွက်ရင်ထွက် … နေရေးထိုင်ရေး အဆင်မပြေသေး။ ဒီတခေါက်မှာတော့ ကျမမိဘများ ကျေးဇူးကြောင့် နေထိုင်စရာ အိမ်ခန်းကလေး ရှိခဲ့ပြီ။ သူ ပြန်မလာခင် အိမ်ကလေးကို ပြုပြင် သန့်ရှင်းစေပြီး လိုအပ်သည့် ပစ္စည်းလေးတွေ ဝယ်ထည့်ခဲ့ရသည်။ အိမ်ထောင်ကျပြီး တနှစ်ကျော်မှ ခန်းဝင် ပစ္စည်းဝယ်ရတဲ့ အဖြစ်။ 


ဘာပဲဖြစ်ဖြစ် နှစ်ယောက်လုံး ပျော်ကြသည်။ သူကတော့ ပိုပျော်လိမ့်မည်လား မသိ။ ထိုအိမ်လေးမှာ နေ့သည့် လေးငါးရက်တွင် နေ့စဉ် ဈေးသွား ချက်ပြုတ် လျှော်ဖွပ် သိမ်းဆည်း ဘုရားဝေယျာဝေစ္စပါ လုပ်ရင်း ကြည်နူး ကျေနပ်နေလေသည်။ ခွင့်ရက်မှာ အအိပ်မက်သည့်သူက ကျမ မနက်စောစော ၆ နာရီခွဲ ကျောင်းသွားရန်အတွက် ငါးနာရီခွဲသာသာမှာ အိပ်ရာက ထနေရပြီ။ သူ့ကိုပါ ကျောင်းမှာ လက်တွေ့ သင်ခန်းစာများ သင်ကြားစေတော့ ကျောင်းဆရာလုပ်ခဲ့ဖူးသည့် သူက ဆရာပိုး ပြန်ဝင်ပြီး တက်ကြွနေခဲ့သည်။ နှစ်ယောက်ဆုံတွေ့ချိန်က ခဏလေးပေမဲ့ ကြည်နူး ချမ်းမြေ့ဖွယ်။
.
သူ ပြန်သွားပြီး နောက်လတွင် တခေါက်လာရန် စီစဉ်ရင်း ပျော်ရွှင်နေခဲ့သည်။ သူ့ကို အမြဲ ပျော်စေချင်ပါသည်။ လုပ်ငန်းခွင်တွင် သူ ပင်ပန်းလွန်းသည်။ သူ့ဘဝ တလျှောက်လုံးလည်း ပင်ပန်းခဲ့တာတွေ များလှပြီ။ ကျမနှင့်အတူ လက်တွဲလျှောက်လှမ်းသည့် ဘဝခရီးတလျှောက် သူ စိတ်ချမ်းမြေ့ ပျော်ရွှင်စေရမည်ဟူသည့် စကားလက်ဆောင်လေးကို သူ့မွေးနေ့ အမှတ်တရ အဖြစ် ပေးအပ်နှင်းဆက် လိုက်ပါတော့သည်။
.
ချစ်တဲ့ အကို ပျော်ရွှင်ပါစေ

ချစ်သော
မေ
29.07.16

Read More...

Wednesday, July 20, 2016

အဖေ့မွေးနေ့အတွက် …

ဝါဆိုလသည် အမှတ်တရများစွာဖြင့် ပြည့်လို့နေပေသည်။ ဝါဆိုလပြည့်ကျော်တရက်က အဖေ့မွေးနေ့။ ဒီကနေ့ အဖေ ၇၁ နှစ်ပြည့်သည်။ အဖေ့မွေးနေ့ပေါင်းများစွာ အဖေ့အနားမှာနေခဲ့ပြီး မွေးနေ့ပွဲလေးတွေ ဆင်နွှဲခဲ့ကြဖူး၏။ ယခုတော့ အဖေက အဝေးမှာမို့ မနက်စောစော အဖေ့ထံ ဖုန်းခေါ်၍သာ မွေးနေ့ဆုတောင်း စကားပြောနိုင်ခဲ့သည်။ စကားပြောဆိုအပြီး နှုတ်ဆက်ကာ ဖုန်းမချခင် အဖေက သာဓုခေါ်ခဲ့သည်။
.
''သမီးက မနေ့က ဥပုသ်စောင့်ထားတော့ သီလရှင်လေးပေ့ါ'' ဟု အဖေက ချစ်စနိုးပြောသည်။ မနေ့က ဝါဆိုလပြည့်မို့ န၀င်္ဂသီလယူကာ ဥပုသ်စောင့်ဖြစ်ပြီး ဒီကနေ့ မနက်စောစော အလုပ်ပြန်စသည်မို့ အဖေ့မွေးနေ့အတွက် အထူးတလည် ချက်ပြုတ် ဆွမ်းလောင်းခြင်း မပြုနိုင်။ မုန့်ပုံးနှင့် ဝတ္ထုငွေသာ ကပ်လှူနိုင်ခဲ့သည်။ အဖေကတော့ အဖေ့အတွက် မည်သည့်ကုသိုလ်ကို မည်သို့ပင်ပြုစေကာမူ ကျေနပ်နေသည်သာ။ အဖေသည် သူ့ကို နားအလည်ဆုံး၊ ခွင့်အလွှတ်နိုင်ဆုံးသူပါပဲ … ။

ပြီးခဲ့တဲ့နှစ် အောက်တိုဘာလက အဖေနှင့်အမေရှိရာ ဖလော်ရီဒါသို့ လိုက်သွားစဉ် ရုတ်တရက် အူအတက်ခွဲစိတ်ခဲ့ရသည်။ တညလုံး ဗိုက်အောင့်၍ နာကျင်စွာခံစားနေစဉ် အဖေက ကြင်နာစွာ ပြုစုပေးခဲ့သည်။ ဆေးရုံမှဆင်းပြီး နောက်ပိုင်းလည်း သောက်ရသည့် ဆေးပေါင်းများစွာကြောင့် အစားပျက်ကာ အန်ဟယ် အော့ဟယ် ဖြစ်တိုင်း အဖေက အန်ထားသည့် အညစ်အကြေးများကအစ သန့်ရှင်းပေးခဲ့သည်။ ထိုစဉ်က အမေကလည်း နေသိပ်မကောင်း၍ အဖေ့မှာ အမေ့ကိုရော သူ့ကိုပါ မနားရအောင် ပြုစုပေးရရှာလေသည်။
.
“အဖေ့ကို အားနာတယ်” … ဟု သူကပြောတော့ အဖေက … “သမီးလေးကို ပြုစုပေးရလို့ အဖေက ဝမ်းသာနေတာ” ဟု ပြောလေသည်။ လူမမာတယောက် ပြုစုရခြင်းကို အလုပ်ရှုပ်သည်ဟု မမြင်ဘဲ အဖေတို့ အနားမှာနေတုန်း သမီး ခုလိုဖြစ်တာ ကံကောင်းတယ်ဟုလည်း တဖွဖွပြောသေးသည်။
***
အဖေက လောဘနည်းသူ၊ ဒေါသနည်းသူ၊ သည်းခံနိုင်စွမ်းရှိသူ၊ ရောင့်ရဲတင်းတိမ်တတ်သူ၊ ကိုယ့်အတွက်ထက် တဖက်သားကို ပိုမိုကြည့်သည့်သူ၊ သူတို့တွေကို ဘာသာရေးမျက်စိ ဖွင့်ပေးခဲ့သူ၊ ဗုဒ္ဓအဘိဓမ္မာတရားတော်နှင့် မိတ်ဆက်ပေးခဲ့သူ၊ မိရိုးဖလာလွန် ဗုဒ္ဓဘာသာဝင်တွေ ဖြစ်အောင် သင်ပြပေးခဲ့သူ။ အဖေ့ကြောင့် မြန်မာစာပေနှင့် ကဗျာတွေကို ချစ်မြတ်နိုးတတ်ခဲ့သည်။ အဖေ့ကြောင့် မြန်မာသံစဉ်ဂီတတွေကို ခံစား နားဆင်တတ်ခဲ့သည်။ အဖေ့ကြောင့် မျိုးချစ်စိတ် ရှိခဲ့သည်။ အဖေ့ကြောင့် အမှားအမှန်ကို ဝေဘန်ပိုင်းခြားနိုင်စွမ်း အထိုက်အလျောက် ရရှိခဲ့ပါသည်။
.
ဖလော်ရီဒါမှာ ရှိနေစဉ် အဖေ့ထံမှာ ပဋ္ဌာန်းသင်ခဲ့ရသည်။ “အသုံးချအဘိဓမ္မာ ပဋ္ဌာန်းဒေသနာ” ဟု အမည်တပ်၍ အဘိဓမ္မာ အခြေခံသိရုံဖြင့် ပဋ္ဌာန်းကို အကြမ်းမျဉ်း နားလည်နိုင်အောင် အဖေက သင်ပေးခဲ့သည်။ အဘိဓမ္မာကို စာတွေ့တွင်မဟုတ်ဘဲ လက်တွေ့အသုံးချနိုင်အောင် အဖေက နည်းလမ်းပြပေးခဲ့သည်။ ပဋ္ဌာန်းမြန်မာပြန်ကို ဇယားဖြင့် စီစဉ်ပေးထားသဖြင့် အလွယ်တကူနားလည်စွာ ရွတ်ဖတ်နိုင်စေခဲ့သည်။
.
အမေရိကန်နိုင်ငံမှာ ရုပ်ဝတ္ထု ပစ္စည်းတွေ ပြည့်စုံသည့်တိုင် အဖေက မြန်မာပြည်ကို တမ်းတစွာဖြင့် “ဆရာလည်း မရှိ တပည့်လည်းမရှိတဲ့ အရပ်မှာ ကြာရှည်မနေချင်ဘူး” ဟု တခါတရံ ညည်းတွားရှာသည်။ အမေရိကန်နိုင်ငံမှာက အဖေသိလိုသည့် ဘာသာရေးဆိုင်ရာ မေးခွန်းများကို မေးမြန်းရမည့် ဆရာရင်းမရှိ၊ အဖေ့ထံမှ လိုလိုလားလား သင်ယူချင်သည့် တပည့်လည်းမရှိ။ မြန်မာပြည်မှာတော့ အဖေ့မှာ ဆရာတွေရော တပည့်တပန်းတွေပါ ပေါများလှပါသည်။ အဖေမရှိသော်လည်း အဖေ့တပည့်တွေက မကြာခဏ ဖုန်းဆက်ကြ သတင်းမေးကြသည်။ သီတင်းကျွတ်ဆိုလျှင် ဆရာ့ကို အဝေးမှ ကန်တော့လိုက်ပါကြောင်း အမှာစကား ပါးကြသည်။ အဖေကလည်း အဖေ့ဆရာတွေကို ရံဖန်ရံခါ သမီးတွေမှ တဆင့် ကန်တော့စေသည်။ အဖေက ဆရာတွေကို ချစ်တော့ အဖေ့ကိုလည်း တပည့်တွေက ချစ်ကြသည်ပင်။
.
အဖေ့ကို သက်ရှည်ကျန်းမာစွာ ကျမ်းစာများ ပြုစုရေးသားစေချင်ပါသည်။ ရှားပါးကျမ်းစာအုပ်တွေ ပြန်ဖော်ထုတ် ပုံနှိပ်လိုသည့် အဖေ့ကိုတော့ သူတို့တတွေ ဝိုင်းတားထားရသည်။ စာအုပ် အုပ်ရေတထောင်ထုတ်လို့မှ ငါးရာမကုန်နိုင်သည့် ခေတ်ကာလဝယ် အဖေပြန်လည် ရိုက်နှိပ်လိုသည့် စာအုပ် ကျမ်းလေးကြီးတွေက အရောင်းထိုင်းမှာ၊ ငွေအိပ်နေမှာ၊ ဂိုထောင်မှာ စာအုပ်တွေပုံနေမှာဟု သူတို့က တားမြစ်ကြသည်။ အဲဒီစာအုပ်တွေ အီးဘွတ်လုပ်ထားလို့ရတာပဲဟုဆိုတော့ အဖေက သိပ်မကြိုက်ချင် အင်တင်တင်။ ခေတ်ကာလ အခြေအနေကို အဖေနားလည်နိုင်မည် ထင်ပါသည်။
.
အဖေ အမြတ်နိုးဆုံး တန်ဖိုးအထားဆုံးက စာအုပ်များပင် ဖြစ်သည်။ စာအုပ်ချစ်မြတ်နိုးသော အဖေက တချိန်က လျှမ်းလျှမ်းတောက်ခဲ့သည့် ဟံသာဝတီ၏ မျိုးဆက်ဖြစ်နေသည်မှာ ဂုဏ်ယူစရာ။ သို့ပေသိ ယခုအခါ၌ ဟံသာဝတီ ဟူသည် စာရွက်ပေါ်တွင် အမည်သာရှိတော့သည်မှာ နှမြောစရာ။ ဟံသာဝတီ စာအုပ်တိုက် သတင်းစာတိုက် မျိုးဆက်ဖြစ်သည့်အတွက် စာအုပ်စာတမ်း အဖေ့မှာ ပေါများလှသည်။ အရင်ကတော့ ကိုယ်ပိုင်စာကြည့်တိုက်ကလေး လုပ်ထားခဲ့ပြီး စာအုပ် အမျိုးအစား စုံလင်အောင် ဖြည့်တင်းထားခဲ့သည်။ အဖေ့၏ စာအုပ်ဗီရိုတွေထဲမှ များပြားလှစွာသော စာအုပ်များသည် သူတို့အတွက် ငယ်စဉ်ကနေ ယခုတိုင် စိတ်အာဟာရ ဖြစ်ခဲ့ရသည်။
.
အဖေက သူစုဆောင်းထားခဲ့သော စာအုပ်များကို အလွန်တန်ဖိုးထားလေသည်။ အမေရိကန်နိုင်ငံသို့ သွားရတော့မည် ဆိုတော့ အဖေက ကြွေကျမတတ် ဖြစ်နေသော ရှေးစာအုပ်များကို ကိုယ်တိုင် အဖုံးချုပ် ကော်ကပ်ကာ စနစ်တကျ သိမ်းဆည်းခဲ့သည်။ တခြားစာအုပ်တွေထက် ဘာသာရေးစာအုပ်များကို ပိုမြတ်နိုးသော အဖေက ဘာသာရေးစာအုပ်များကို ဘယ်သူ့မှ မငှားနဲ့နော် ဟု မှာထားသေးသည်။ စာအုပ်များစွာ သယ်မသွားနိုင်သည်မို့ အဖေလိုချင်သော စာအုပ်ဆိုလျှင် မရရအောင်ရှာဝယ်ပြီး စာတိုက်မှဖြစ်စေ လူကြုံဖြင့် ဖြစ်စေ ပို့ပေးရသေးသည်။
.
အဖေမြတ်နိုးတဲ့ စာအုပ်များရှိရာ အဖေချစ်သော မြန်မာပြည်မှာ အဖေနှင့်အတူ ရှိကာ အဖေနှစ်သက်သော မြန်မာ အစားအစာတွေ ချက်ကျွေးချင်ပါသေးသည်။ သို့ပေမဲ့ တဘက်က ကြည့်လျှင်တော့ ခေတ်မီပြည့်စုံသော ဆေးဝါး၊ ကျန်းမာရေးနှင့် ညီညွတ်သော အစားအသောက်များ၊ အပူအအေး မျှတစွာ နေထိုင်နိုင်ခြင်းနှင့် ရေ မီး ကြောင့်ကြရန်မလိုခြင်း၊ ခြင် ယင် ကြွက် ပိုးဟပ် စသည့် သတ္တဝါများ ရန်မှ ကင်းဝေးခြင်းတို့ကြောင့် ထိုတိုင်းပြည်တွင် ဆက်လက် နေထိုင်စေချင်မိပြန်သည်။
.
တကယ်တော့ နေရာဒေသ နီးခြင်းဝေးခြင်းက အဓိက မဟုတ်ပါလေ။ အဖေ နေကောင်း ကျန်းမာ သက်ရှည်စွာဖြင့် ဘာသာ သာသနာ အကျိုးကို ဆောင်ရွက်နိုင်လျှင်ဖြင့် မည်သည့်နေရာမှာနေနေ အဓိပ္ပါယ်ရှိသော နေထိုင်ခြင်း ဖြစ်သည့်အတွက် သူတို့လည်း ခွဲခွါရကျိုးနပ်ပေမည် မဟုတ်လား။
.
ချစ်သော အဖေ
သက်ရှည် ကျန်းမာ ပျော်ရွှင်ပါစေ
. . . .
အဖေ့ချစ်တဲ့ သမီးငယ်
***
20.07.16
ဝါဆိုလပြည့်ကျော် တရက်
ဗုဒ္ဓဟူးနေ

Read More...

Sunday, July 03, 2016

ပန်းစကား




ပန်းစကား
 ***
ပန်းစကား
နမ်းမလား မေ ... ၊
အပွင့်ရွှေဝါရောင်နဲ့
ပင်မြင့်ခေါင် တောင်ပုပ္ပါးမှာ
သင်းပျံ့လို့ဝေ ... ။
 .
ဗျတ္တပန်းဆက်ရာမြေ
ညင်းလေပြေ ဆော်အသွေး၊
တောင်ခိုးတဝေဝေနဲ့
မှောင်မိုးစွေ ရာသီလွမ်းမှာ
ပန်းရနံ့မွှေး ...  ။ ... ။
***
မေဓာဝီ
၃ ဇူလိုင် ၂၀၁၆
(ခေတ္တ ပုပ္ပါး)

Read More...

Saturday, May 21, 2016

သုံးနားညီ ...


သုံးနားညီ
***
မိုးရေရ၍
စိမ်းမြနေသော
သစ်ပင် တော။...
.
နေရောင်ခ'၍
ဝင်းပနေသော
သစ်ပင် တော။
.
လေပြေသ'၍
ယိမ်းကနေသော
သစ်ပင် တော။
.
မိုး နှင့် နေ လေ
သုံးထွေ ညီမျှ
အစဉ်ရမှ
သာစွရှုမော
စိမ်းစို တော။ ။
 
*** 
မေဓာဝီ
20.05.16
07.06

Read More...

Monday, May 16, 2016

မိုးမျှော်တေး ...


မိုးမျှော်တေး
***
မြရည်စိုလူး
ပိတောက်ဖူးလည်း
မိုးဦးမျှော်ရ ...
ကြာလှပြီ။
.
ခရမ်းရောင်သန်း
ပျဉ်းမပန်းလည်း
လွင့်နွမ်းကြွေကျ
မြေခပြီ။
.
ဝါနုရောင်ဖြာ
ပန်းငုဝါလည်း
ပူဗျာပါကျွမ်း
ညှိုးနွမ်းပြီ။
.
မိုးကိုမျှော်လည်း
မိုးဖွဲမစွေ
မိုးရေမစွတ်
မိုးငတ်မွတ်သော
ဝန်းကျင်တောမှာ
မိုးရွာစေရေး
တေးဖွဲ့သီ။
***
မေဓာဝီ
16.05.16

Read More...

Thursday, May 05, 2016

သို့ ... / မှ ... ချစ်သူ


သတိရရင်
ကောင်းကင်ကို မော့ကြည့်
တိမ်တွေလို ရှိနေမှာ။
.
နီးတခါ ဝေးတလှည့်
အတူရှိခဲ့တဲ့ နေ့များ
အားတဲ့အခါ လွမ်းနေပါ။
.

 ပြက္ခဒိန်တခုဟောင်း
ရက်မှ နှစ် ပြောင်းသွား  
အမှတ်တရနေ့များကို သတိရပါ။
.
အလုပ်ခွင်မှာ ဂရုစိုက်
အိပ်ငိုက်ရင် သီချင်းဆို
စိတ်ကို ပျော်အောင်ထားပါ။
.

ပြန်ဆုံဆည်းမယ့်ရက်
လက်ချိုးရေတွက်ကာ
စိတ်ကူးနဲ့ ကြည်နူးပါ။
.
သတိရရင် ... 
မြေပြင်ကို ငုံ့ကြည့်
အရိပ်ကလေးလို ရှိနေမှာ။
***
မေဓာဝီ
၀၅၊ ၀၅၊ ၂၀၁၆

Read More...