Thursday, December 31, 2009

အဆုံး

စခဲ့သမျှ နောက်ဆုံး
အဆုံးသတ်ရပြီ၊
အရှုံးမဖက် အမုန်းမစွက်
ပြုံးလျက်သာ အဆုံးသတ်ချင်သည်။

နေ့ညများအလီလီ
ရာသီတွေ အခါခါပြောင်း၊
အသစ်အဟောင်းရယ်နဲ့
အဖြစ်ပေါင်း ကုဋေကုဋာကြုံလို့
မရေမရာ သံသရာတကျောမှာ
မျောပါလို့ညောင်း။ … ။
***
မေဓာဝီ
၂၀၀၉၊ ဒီဇင်ဘာ၊ ၃၁
၁၃း၀၀ နာရီ

မြန်မာပြည်သူ ပြည်သားများနှင့်တကွ ကမ္ဘာသူ ကမ္ဘာသားအားလုံး မင်္ဂလာရှိသော နှစ်သစ် အကူးအပြောင်း ဖြစ်ပါစေ ... ။

Read More...

Monday, December 28, 2009

ကြိုဆိုပါတယ် နှစ်ထောင့်တဆယ်

ဆန္ဒတွေကို ချရေး
မျှော်လင့်ချက်တွေ တထွေးကြီးနဲ့
မဝေးမနီးမှာ ရောက်လာတော့မယ့်
နှစ်ထောင့်နဲ့တဆယ်ကို
ကြိုဆိုရပေအုံးမယ် … ။

ပြုံးပျော် ရယ်မောရင်း …
တွေဝေ ငေးမောရင်း …
ရင်ခုန် လှိုက်မောရင်း …
အချိန်တွေ စီးဆင်းခဲ့တာ
ဘာလိုလိုနဲ့ တနှစ်ကုန်ဆုံးခဲ့ပါပေါ့လား … ။

အမှားတွေနဲ့ပျော်မွေ့
အမှန်တွေကိုမေ့လျော့
ပေါ့ပေါ့ဆဆ ရှင်သန်
နည်းမမှန် လမ်းမကျ
တိုတောင်းလှတဲ့ ဒီဘ၀မှာ
ဘယ်အရာကိုမှ ညီမျှခြင်း ဆွဲမရဘူးဆိုတာ
အချိန်ကြာလာတာနဲ့အမျှ သိလာခဲ့ရပြီ … ။

ဘ၀ဆိုတာ … သင်္ချာပုစ္ဆာတပုဒ်လား …
ဘ၀ဆိုတာ … ဓာတုဓာတ်ပေါင်းစုတခုလား
ဘ၀ဆိုတာ … ရူပဗေဒ သီဝရီလား …
ဒါမှမဟုတ် -
ငြင်းချက်ထုတ်နေကြတဲ့ ဖီလော်ဆိုဖီလား …
အားကြီးသူဘက် ရပ်တည်ခဲ့ကြရတဲ့ သမိုင်းတွေလား …
ခံစားသူ စိတ်တိုင်းကျ ဖန်တီးခဲ့ကြတဲ့ စာပေ ဂီတလား …
စဉ်းစားလို့ မရတော့ပါဘူး … ။

တကယ်တမ်းကျ …
ဘ၀ဆိုတာ စက်ဝိုင်းတခုပမာ …
ခွါပြီးရင်ဆုံ … ဆုံပြီးရင်ခွါ
လည်ပတ်နေတဲ့ သံသရာပဲ မဟုတ်လား … ။

ဒီသံသရာဝဲသြဃက
မလွတ်မြောက်နိုင်သေးသမျှတော့
ဖြစ်ချင်တဲ့ ဆန္ဒ
တောင့်တတဲ့ မျှော်လင့်ချက်
လိုအပ်တဲ့ ငြိမ်းချမ်းမှု
အစုစု အဖြာဖြာ
ရရာရကြောင်း
ကောင်းကောင်းဆိုးဆိုး
ကြိုးစားကြရင်း …
ဘ၀အမောတွေ သောကတွေနဲ့
မောလျနေကြရတာပါပဲ … ။

ကဲပါလေ … ဘာပဲဖြစ်ဖြစ်
ညစ်တာတွေ ဖယ်ရှား
မေတ္တာတွေ တကယ်ပွါးလို့
သစ္စာဆိုတဲ့ အမှန်တရားကို မတွေ့သေးသမျှတော့ …
ဆန္ဒတွေကို ချရေး
မျှော်လင့်ချက်တွေ တထွေးကြီးနဲ့
မဝေးမနီးမှာ ရောက်လာတော့မယ့်
နှစ်ထောင့်နဲ့တဆယ်ကို
ကြိုဆိုရပေအုံးမယ်။
***
မေဓာဝီ
၂၈၊ ဒီဇင်ဘာ၊ ၂၀၀၉
၁၆း၁၀ နာ၇ီ

Read More...

Sunday, December 27, 2009

နှစ်သစ်ကို ဘယ်လိုကူးပြောင်းမလဲ

တနှစ်ဟောင်း၍ နှစ်သစ်ပြောင်းလုပြီ။
နှစ်သစ်ကို ဘယ်လိုကူးပြောင်းမလဲဟု မိမိကိုယ်ကို မေးကြည့်မိ၏။
ကမ္ဘာတလွှားက ထိုထိုသူများရော ဘယ်လိုကူးပြောင်းကြလေမလဲ တွေးကြည့်မိ၏။

သဘာဝအလျောက် ပြောင်းလဲ နေသည့် ဖြစ်ပျက် အစဉ်တွေကို လူတွေက နာရီ နေ့-ည၊ ရက်-လ-နှစ်များနှင့် ဥတု ရာသီများ အဖြစ် သတ်မှတ်ခဲ့ကြသည်။ ထိုသတ်မှတ်မှုများကိုလည်း ခေတ်အဆက်ဆက် လက်ခံခဲ့ကြသည်။ လောကမှ မလွန်မြောက်နိုင်သေးခင်တော့ လောက၏ သတ်မှတ်ချက်များကို လက်သင့်ခံရမည် မဟုတ်လား။ ဒီတော့လည်း နေ့ဟောင်း နေ့သစ်၊ လဟောင်း လသစ်၊ နှစ်ဟောင်း နှစ်သစ် ပြောင်းလဲ ဖြစ်စဉ်တွေကို အများနည်းတူ လက်ခံကြိုဆိုရမည်ပင်။

တကယ်တမ်းတော့ အဟောင်း အသစ် ပြောင်းလဲ ဖြစ်စဉ်ဟူသည် ဖြစ်-ပျက် သဘောမျှသာ။ သို့သော်လည်း ဤဖြစ်စဉ် အခိုက်အတန့်လေးမျှကို လူတွေက တခုတ်တရ အရေးလုပ်နေကြသည်။ ပျော်ပွဲသဘင်များ ဆင်ယင်ကျင်းပကြသည်။ မီးရှူးမီးပန်းများ လေထဲပစ်ဖောက်ကြသည်။ ထိုသို့ပြုလုပ်ကျင်းပရန် ကုန်ကျမည့် ငွေကြေးတွေကို အမှောင်ထဲက ကလေးငယ်များ၊ သေရာညောင်စောင်းထက် လဲလျောင်းနေကြသည့် မမာသည်များ၊ ကပ်သုံးပါး၏ ဒုက္ခသည်များကို ထောက်ပံ့ပေးကမ်း လှူဒါန်းပါမူ မည်မျှ အကျိုးများစေမည်လဲ။

အချိန်တို့သည် လူတို့မသတ်မှတ်ထားလျှင်လည်း ပြောင်းလဲနေမည်ပင် ဖြစ်သလို လူတို့ ပွဲလမ်းသဘင် မကျင်းပလျှင်လည်း ကုန်ဆုံးနေမည်ပင် ဖြစ်သည်။ တနှစ်ပြီးတနှစ်ဖြင့် အချိန်တွေက မသိလိုက်ဘာသာ တရွေ့ရွေ့ အကုန်မြန်လွန်းသည်။ လွန်ခဲ့သည့် ဆယ်နှစ်က ကြုံခဲ့ရသည့် ထောင်စုနှစ် အပြောင်းက သိပ်မကြာသေးဟု ထင်ရချိန်မှာ ယခု ဆယ်စုနှစ်ထပ်မံ ပြောင်းလဲ ပြန်ပြီ။ ထိုဆယ်စုနှစ်အတွင်း ဘာတွေထူးခြားစွာ ပြောင်းလဲ သွားပါသလဲ။

လူတွေ ဆယ်နှစ်စာ ပို၍ အိုမင်းလာကြသလို အကုသိုလ်တွေ ဆယ်နှစ်စာ ပိုမို များပြားလာကြလေသလား …
နည်းပညာတွေ ဆယ်နှစ်စာ တိုးတက်လာကြသလို စစ်လက်နက်တွေ ဆယ်နှစ်စာ ပိုမို ဖြစ်ထွန်းလာကြလေသလား …
ဆေးပညာတွေ ဆယ်နှစ်စာ တိုးတက်ကောင်းမွန် လာကြသလို ရောဂါဘယတွေနဲ့ မမာသည်တွေ ဆယ်နှစ်စာ ပိုမိုများပြား လာကြလေသလား …
လောဘ ဒေါသ မောဟ သားကောင်တွေ၊ အတ္တသမားတွေကို တချိန်လုံး ထမ်းပိုးထားရသည့် ကမ္ဘာကြီးလည်း ပူနွေးလိုက် ချမ်းအေးလိုက် အတွင်းလှိုက်စားသည့် ဒဏ်ရာဒဏ်ချက်များစွာဖြင့် ခပ်ယဲ့ယဲ့ ဖြစ်၍နေပြီ။

စေ့စေ့တွေးကြည့်လျှင် မတည်မြဲသည့် ဘ၀တွေက ထိတ်လန့်စရာ၊ တုန်လှုပ်စရာ၊ သံဝေဂရစရာပင်။ တနှစ်ကုန်ဆုံးလုချိန်မှာ ပြုခဲ့သည့် ကောင်းမှုတွေနှင့် မကောင်းမှုတွေကို ချိန်စက်ကြည့်လျှင် မည်သည့်ဘက်ကို ချိန်ခွင်လျှာပိုမလဲဟု တွေးမိသည်။ သေချာသည်ကတော့ မရည်ရွယ်ဘဲ ပြုမိမှားသည့် မကောင်းမှုတွေ ဒုနဲ့ဒေး ဖြစ်နိုင်ပါသည်။ ကုသိုလ်ဆိုသည်ကတော့ တမင်တကာလုပ်ယူမှ ရသည်မဟုတ်လား။ ထို့ကြောင့်ပင် နှစ်သစ်အကူးအပြောင်း ကာလမှာတော့ အလိုလို တိုးပွါးနေမည့် အကုသိုလ်များကို ခဏ ရပ်တံ့ကာ ကုသိုလ်ကောင်းမှုများပြုရင်း ကူးပြောင်းရလျှင် မကောင်းပေဘူးလား။

သို့ဖြစ်လျှင် နှစ်သစ်ကို မည်သို့ကူးပြောင်းရမလဲ ... ။

တချို့က … သောက်စား မူးယစ်ရင်း နှစ်သစ်ကူးညကို ကူးပြောင်းကုန်ဆုံးကြလိမ့်မည်။
တချို့လည်း … ရောက်လာတော့မည့် နှစ်သစ်ကို နံပါတ် ပြောင်းပြန်ရေတွက်ရင်း ပျော်ရွှင်စွာ အော်ဟစ် ကူးပြောင်းကြလိမ့်မည်။
တချို့ကတော့ … မိမိချစ်သူ ခင်သူများနှင့် အတူ စားသောက်ရင်း စကားစမြည် ပြောဆိုရင်း နှစ်သစ်ကို ကြိုဆိုကြလိမ့်မည်။
တချို့က စာဖတ်ရင်း ... တချို့က သီချင်းနားထောင်ရင်း ... တချို့က ရုပ်ရှင်ကြည့်ရင်း ... နှစ်သစ်ကူးပြောင်းကြလိမ့်မည်။
တချို့ကလည်း … မေ့မေ့လျော့လျော့ အိပ်စက် နားနေရင်း နှစ်သစ်ကူးပြောင်းမှန်းမသိ ကူးပြောင်းသွားကြလိမ့်မည်။
တချို့ကတော့ … ဆုတောင်းမေတ္တာပို့သ-ရင်း အလှူဒါနပြုကြရင်း နှစ်သစ်ကို မင်္ဂလာရှိစွာ ကူးပြောင်း ကြိုဆိုကြလိမ့်မည်။
... ... ... ... ... ... ... ... ...
... ... ... ... ... ... ... ... ...
... ... ... ... ... ... ... ... ...
... ... ... ... ... ... ... ... ...
သင်ရော … နှစ်သစ်ကို မည်သို့ မည်ပုံ ကူးပြောင်းလိုပါသလဲ။
***
မေဓာဝီ
၂၆၊ ဒီဇင်ဘာ၊ ၂၀၀၉
၂၃း၄၂ နာရီ

Read More...

Thursday, December 24, 2009

ခရစ်စမတ် အပိုင်းအစများ

ခရစ်စမတ်နဲ့ ရာသီဥတု

နက်ဖန်ဆို ခရစ်စမတ် ရောက်ပြီ။ ဒီနှစ် ခရစ်စမတ်ကို အဖြူရောင် ခရစ်စမတ်လို့ ဆိုရမလားပဲ။ ဘိလပ်မြေ တခွင်လုံး အဖြူရောင် နှင်းတွေ ဖုံးနေတယ်။ ခရစ်စမတ် မတိုင်ခင်ကတည်းက တနိုင်ငံလုံး အပူချိန်တွေ သိသိသာသာ ကျနေပြီ။ ဒီနှစ် ထူးထူးခြားခြား တောင်ဘက်ပိုင်းမှာ နှင်းတွေ အရင်စမြင်ရတယ်။ နောက်တော့ မြောက်ပိုင်း … နောက် တနိုင်ငံလုံးနီးပါး ရေတွေခဲ၊ နှင်းတွေကျပြီး လေယာဉ်၊ ရထား၊ ကားတွေလည်း အသွားအလာခက်ကုန်ကြတယ်။ ယာဉ်တိုက်မှု မတော်တဆမှုတွေလည်း တော်တော်များတယ်။ စကော့တလန်မှာ အနုတ် ၁၆ ဒီဂရီ စင်တီဂရိတ်ထိ အပူချိန်ကျသတဲ့။ အနှစ် ၂၀ အတွင်း အဆိုးရွားဆုံးဆိုပဲ။

စက်ဘီးလေးလည်း နှင်းတွေဖုံးလို့ မရုန်းနိုင်ရှာ
နှင်းခြုံလွှာဆင်မြန်းရင်း ချမ်းနေရှာတဲ့ ကားလေးတွေ


နှင်းဦးထုပ်ဆောင်းထားတဲ့ အမှိုက်ပုံးတွေ
***
ခရစ်စမတ် ဈေးဆိုင်တန်း

ကျမလည်း ကျောင်းပိတ်ပိတ်ချင်းပဲ ကျောင်းတက်တဲ့မြို့ကလေးကနေ ဦးရီးတော်ရှိရာမြို့ကို သွားလိုက်တာ ကံကောင်းတယ်ဆိုရမယ်။ အဲဒီအချိန်က ခုလောက် ရာသီဥတု မဆိုးသေးဘူး။ ခရီးသွားလို့ အဆင်ပြေသေးတယ်။ နောက်တရက် ဘာမင်ဂန်ကို ဗီဇာကိစ္စသွားတော့လည်း အေးအေးဆေးဆေးပဲ။ အပြန်မှာ ဓာတ်ပုံတောင် လျှောက်ရိုက်ခဲ့သေးတယ်။

ဈေးသည် ဈေးဝယ် စုံလို့ရယ်

ချမ်းချမ်းစီးစီး ကိုယ်လုံးတီး (အရုပ်ကြီးကိုပြောတာပါ)

တကိုယ်တည်းသာ ငေးနေရှာ

ဘိုးဘိုးဘွားဘွား ဈေးဝယ်သွား

နတ်မြင်းပျံကြီး ပျော်ပျော်စီး

တဖြည်းဖြည်း ခရစ်စမတ်နားနီးလေ ရာသီဥတုက ဆိုးလေလားမသိပါဘူး။ ဒီအချိန်ဆို လူတွေက ဈေးဝယ်ထွက်ကြ၊ ခရီးထွက်ကြ၊ အပြင်အထွက်များတဲ့ အချိန်။ ဒီလိုအချိန်မှာ ရာသီဥတု တအားဆိုးတော့ လူတွေ ပိုပြီး ဒုက္ခရောက်ကြတယ်။ လူတွေတွင်မကပါဘူး၊ ငှက်ကလေးတွေလည်း ဒုက္ခရောက်ကြတာပဲ။ တချို့ငှက်တွေက ဆောင်းတွင်းဆို နွေးတဲ့ဒေသကို ပြောင်းကြပေမဲ့ ခိုကလေးတွေကတော့ ဝေးဝေးမပျံကြဘူး။ ခမျာများမှာ အအေးဒဏ်ကို ဒီအတိုင်းသာ ကြံ့ကြံ့ခံကြရရှာတယ်။

နှင်းဒဏ်ခံနေရတဲ့ ခိုကလေးနှစ်ကောင်
***
ခရစ်စမတ် ရုပ်ရှင်

ကျမတို့တူဝရီးကတော့ အိမ်ထဲမှာပဲ နွေးနွေးထွေးထွေးနေပြီး တယ်လီဗေးရှင်းကြည့်လိုက် အစားအသောက်စားလိုက် တရားနာလိုက် သီချင်းနားထောင်လိုက် နေနေကြတာပဲ။ စာမေးပွဲဖြေပြီး လူရောစိတ်ပါ ပင်ပန်းနေတဲ့ ကျမကို သနားလို့ထင်ပါရဲ့၊ ဦးရီးတော်က အလိုလိုက်ထားတယ်။ စာမသင်ပေးဘူး၊ ရုပ်ရှင်တွေပေးကြည့်တယ်။ ကျမအကြိုက်ပေါ့။ ပိတ်ရက်ရာသီဆိုတော့ တယ်လီဗေးရှင်းမှာလည်း ရုပ်ရှင်ဇာတ်ကားကောင်းတွေ လွှင့်တယ်။ ကျမတို့ဆီမှာ သင်္ကြန်ဆိုရင် သင်္ကြန်မိုး လွှင့်သလို ဒီမှာတော့ ခရစ်စမတ်ဆိုရင် A Christmas Carol ဆိုတဲ့ ဇာတ်ကား ပြလေ့ရှိတယ်။ ချားလ်စ်ဒစ်ကင်ရဲ့ ၀တ္ထုကို ရိုက်ထားတဲ့ ရုပ်ရှင်ပါ။ ကျမလည်း ဒီရောက်မှ ကြည့်ဖူးတယ်။ အဖြူအမည်း ခေတ်ကနေ အခုအချိန်ထိ အကြိမ်ကြိမ် ပြန်ရိုက်ရတဲ့ ရုပ်ရှင်ပါ။ အဲဒီထဲက ဇာတ်ကောင် Scrooge ကြီးက အကြင်နာတရားမရှိ၊ လောဘကြီးပြီး ကပ်စေးနည်းတဲ့ လူခွစာကြီးပေါ့။ ခရစ်စမတ်တွေ ဘာတွေလည်း သူမသိဘူး၊ သူသိတာ ပိုက်ဆံ၊ သူ့စီးပွါးရေးပဲ။ သူ့ဝန်ထမ်းကိုတောင် ခရစ်စမတ်ရက်မှာ ခွင့်မပေးချင်ဘူး၊ တညမှာ အဲဒီလူကြီးကို သရဲလေးကောင်က ပညာလာပေးကြတယ်။ တချို့လည်း ကြည့်ဖူးကြပါလိမ့်မယ်။ မကြည့်ဖူးသေးသူတွေလည်း ယူကျု့မှာ ရှာကြည့်လို့ရပါတယ်။ (ဒါက အမြည်းပါ)



***
ခရစ်စမတ် သီချင်း

တယ်လီဗေးရှင်းမှာ လွှင့်တဲ့ ခရစ်စမတ်သီချင်းတွေထဲက ဒီသီချင်းလေးကို ကျမ နှစ်သက်မိတယ်။ အန်ဒီဝီလျံဆိုထားတာပါ။ Silver Bells တဲ့။ နားထောင်ကြည့်ကြပါဦး။



Silver bells … silver bells
It’s Christmas time in the city
Ring-a-ling, hear them sing
Soon it will be Christmas day …

အားလုံးပဲ ချမ်းမြေ့ပျော်ရွှင်ကြည်နူးဖွယ် ခရစ်စမတ် ဖြစ်ပါစေရှင် ... ။
***
မေဓာဝီ
၂၃၊ ဒီဇင်ဘာ၊ ၂၀၀၉
၂၃း၁၀ နာရီ

Read More...

Tuesday, December 22, 2009

ပွဲတော်ချိန်

“မေ … ငါ အခုပဲ အိမ်က ထွက်ခဲ့တော့မယ်၊ နောက် ငါးမိနစ်ဆို တက်ခ်စီလာတော့မှာ၊ ၁၅ မိနစ်အတွင်း ဘူတာရုံရောက်မယ်”

မနက်စောစောစီးစီး ဖုန်းဆက်လာသူက အာဖရိကန်သူ မမဂျူလီပါ။ ဂျူလီဖုန်းဆက်တဲ့ အချိန်မှာ ကျမ အိမ်က ထွက်ဖို့ အဆင်သင့် ဖြစ်နေပြီ။ ပိုက်ဆံကို အမြဲတမ်း ချွေချွေတာတာ သုံးလေ့ရှိတဲ့ ဂျူလီတောင် ဒီကနေ့တော့ တက်ခ်စီနဲ့ ဘူတာရုံကို သွားမယ်ဆိုပဲ။ ကျမအိမ်နဲ့ ဘူတာကတော့ မိနစ် ၂၀ လောက် လျှောက်ရင် ရောက်တာမို့ ကျမကတော့ လမ်းပဲ လျှောက်သွားလိုက်တယ်။ ဘူတာရောက်တော့ ဂျူလီက ရောက်နှင့်နေပြီ။ ကျမတို့စီးမယ့် ရထားလာဖို့ ၁၅ မိနစ်လောက် လိုပါသေးတယ်။ ချမ်းချမ်းစီးစီး ဘူတာပလက်ဖောင်းက ထိုင်ခုံလေးမှာ ထိုင်ပြီး ဂျူလီနဲ့ ထွေရာလေးပါး စကားစမြည် ပြောရင်း စိတ်လှုပ်ရှားမှုကို ဖြေဖျောက်နေကြတယ်။

ဟုတ်တယ်။ ကျမတို့ နှစ်ယောက်လုံး စိတ်လှုပ်ရှားနေကြတယ်။ ပွဲတော်က ကျမတို့ကို ဆွဲဆောင် ဖမ်းစားထားတယ်လေ။ ပွဲတော်ကလည်း နှယ်နှယ်ရရမှ မဟုတ်ဘဲ၊ တနှစ်မှ နှစ်ကြိမ်သာ လုပ်တဲ့ပွဲ။ ဒီပွဲအတွက် လက်မှတ်ကို ပွဲမတိုင်ခင် နှစ်လလောက်ကြိုပြီး အွန်လိုင်းကနေ ၀ယ်ထားရတယ်။ ဂျူလီနဲ့ ကျမ တချိန်ထဲ အတူတူဝယ်တာတောင် ထိုင်ခုံနံပါတ် ကပ်လျက် မရဘူး။ ကြားထဲမှာ တယောက်ခြားသွားသေးတယ်။ ပွဲသွားမယ့်သူတွေ များသလား မများသလားဆိုတာ အဲဒါပဲ ကြည့်တော့။ ပွဲသွားမယ့် သူတွေများမယ့်သာ များတယ် ပွဲစဉ်တခုအတွက် ဈေးကလည်း မနည်းလှပါဘူး။ တရက်စာ လက်မှတ်တစောင်ကို စတာလင်ပေါင် ၆၄ ပေါင်၊ ကျမတို့က ပွဲစဉ် နှစ်ခုမို့ စုစုပေါင်း ၁၂၈ ပေါင် … ဆိုတော့ ဈေးမနည်းဘူး ဆိုရမယ် မဟုတ်လား။ ပြီးတော့ ပွဲက တခြားမြို့မှာ ကျင်းပတာမို့ အဲဒီကို သွားရတဲ့ ရထားခ အသွားအပြန်က ၆ ပေါင်နဲ့ ၇၀ ပဲနိ။ ရထားစီးရတာကတော့ သိပ်မကြာလှပါဘူး၊ မိနစ် ၂၀ သာသာ လောက်ပဲ။ ဟိုရောက်တော့ ဘူတာကနေ ပွဲကျင်းပမယ့် နေရာကိုသွားဖို့ တက်ခ်စီ ငှားရပြန်တယ်။ တက်ခ်စီခက ၈ ပေါင်။ နှစ်ယောက်မျှပေးရတာဆိုတော့ တယောက် ၄ ပေါင်ပေါ့။

(ပွဲကျင်းပမယ့် အားကစားရုံထဲမှာ စာဖတ်နေသော ဂျူလီ)

ပွဲကို မိုးလုံလေလုံ အားကစားခန်းမကျယ်ကြီးတခုမှာ လုပ်ပါတယ်။ ကျမတို့ ရောက်သွားတော့ ဘယ်သူမှတောင် မရောက်ကြသေးဘူး။ တကယ်တမ်း ပွဲစမှာက ၁၀ နာရီ၊ ကျမတို့ ရောက်သွားတာ ၈ နာရီ ၃၈ မိနစ်။ ပွဲကျင်းပမယ့် ခန်းမထဲ ၀င်ခွင့်မရသေးတာကြောင့် အပြင်ဘက် နားနေတဲ့ နေရာက ထောင့်ကျကျ ထိုင်ခုံတခုမှာ ထိုင်ရင်း စာအုပ်ထုတ်ဖတ်နေလိုက်တယ်။ (တကယ်တော့ ဂျူလီသာ စာဖတ်တာ၊ ကျမက ကင်မရာတလုံးနဲ့ သူ့ကို လိုက်နှောက်ယှက်နေတာပါ) တဖြည်းဖြည်းနဲ့ လူတွေ တဖွဲဖွဲ ရောက်လာကြ၊ နှုတ်ဆက်ကြ၊ ဟိုဟိုဒီဒီ မေးမြန်းကြမို့ အသံပလံတွေ ဆူညံလာတယ်၊ နားနေဆောင်အတွင်း လှုပ်လှုပ်ရှားရှား ဖြစ်လာတယ်။ အားလုံးက ပွဲတော်ကို မျှော်လင့်တကြီး စောင့်စားနေကြသူချည်းပါပဲ။

ဒီလိုနဲ့ ၉ နာရီ ၄၅ မိနစ်မှာ ခန်းမထဲ ၀င်ခွင့်ရကြောင်း ကြေငြာတယ်။ အားလုံး လက်မှတ်လေးတွေ အသီးသီးကိုင်ပြီး ခန်းမထဲ ၀င်လိုက်ကြတယ်။ ခန်းမကျယ်ကြီးထဲမှာ ကိုယ်ထိုင်ရမယ့် ထိုင်ခုံနေရာကို ရှာတော့ ကျမခုံက နောက်ဆုံးပဲ။ နောက်ဆုံးတန်းဆိုတော့ ကျမက ပိုသဘောကျပါတယ်။ ကျမနဲ့ တယောက်ခြားမှာတော့ ဂျူလီပေါ့။ အားလုံးနေရာယူပြီးချိန်မှာ အခန်းအနားမှူးက အစီအစဉ်ကို ကြေငြာတယ်။ သူ့အသံမကြားတချက် ကြားတချက်။ အစီအစဉ်ကို မသိချင်ဘူး။ ကျမတို့အားလုံး သိချင်စိတ် စောနေကြတာ … မကြာခင် စ-တော့မယ့် ပွဲ … ။
***
၁၀ နာရီ။
ပွဲစပြီ။
အသံတွေ တိတ်ဆိတ်သွားတယ်။
လူတွေအားလုံး ထိုင်ခုံမှာ ငြိမ်ငြိမ်လေးထိုင်နေကြပေမဲ့ စိတ်တွေ လှုပ်ရှားနေကြတယ်။ ရာသီက အေးပေမဲ့ ချွေးတွေပြန်နေကြတယ်။ နာရီကို တကြည့်ကြည့်နဲ့ အချိန်တွေ မြန်မြန်ကုန်ပြီး ပွဲပြီးသွားမှာလည်း စိုးရိမ်နေကြတယ်။ အသက်တောင် ၀၀ မရှူနိုင်ကြဘူး။ ခဏတဖြုတ် အပေါ့အပါးလည်း ထမသွားကြဘူး။ တစက္ကန့်, တမိနစ်တောင်မှ ဒီထိုင်ခုံက မခွါနိုင်ကြဘူး။
ဒီပွဲအတွက် ကြိုတင်ပြင်ဆင် ခဲ့ရတာ …
ဒီပွဲအတွက် ရင်ခုန် မျှော်လင့်ခဲ့ကြတာ …
ဒီပွဲအတွက် စိုးရိမ် ပင်ပန်းခဲ့ရတာ …
… … … … … …
… … … … … …
… … … … … …
၁ နာရီ ၁၅ မိနစ်။
ပွဲပြီးသွားပါပြီ။
ခန်းမထဲကနေ လူတွေ ရုံးစု ရုံးစု ထွက်လာခဲ့ကြတယ်။ တယောက်နဲ့တယောက် မေးကြ မြန်းကြ နှုတ်ဆက်ကြနဲ့။ ဂျူလီလည်း အနားရောက်လာတယ်။
“ဘယ်လိုလဲ …”
“ဒီလိုပဲ …”
ကျမတို့ အချင်းချင်း ပြောရင်း ရယ်လိုက်ကြတယ်။ ဟုတ်တယ် … ဘယ်လိုလဲ ဆိုတာ ကျမတို့ မပြောတတ်ဘူး။ ရယ်နေလိုက်တာ အကောင်းဆုံးပဲ မဟုတ်လား။
***
“ပွဲသွားကျော့ကျော့ .. ပွဲပြန်မော့မော့” တဲ့။ စကားပုံရှိပေမဲ့ ကျမတို့ ပွဲအသွားမှာလည်း မကျော့သလို ပွဲအပြန်မှာလည်း မမော့နိုင်ပါဘူး။ “ပွဲပြီး မီးသေ” ဆိုသလိုလည်း မီးမသေခဲ့ကြပါဘူး။ ပွဲရဲ့ ရလဒ်ကို တကယ်တမ်း သိရမှ … ကျမတို့ ပျော်နိုင် မော်နိုင်ကြမှာပါ။ ခုလောလောဆယ်တော့ ပွဲအပြီးမှာ အမြီးကလေးတွေ အသာကုပ်ပြီး ကျမတို့ အိမ်ပြန်ခဲ့ကြပါတော့တယ်။
***
မေဓာဝီ
၂၂၊ ဒီဇင်ဘာ၊ ၂၀၀၉
၁၃း၀၂ နာရီ
(ဒီဇင်ဘာ ၈ ရက် နှင့် ၁၄ ရက်တွင် ဖြေဆိုခဲ့သော စာမေးပွဲ အမှတ်တရ)

Read More...

Monday, December 21, 2009

ဟဒယ… ရွှင်မှ ရွှင်ရဲ့လား?

ငယ်ငယ်တုန်းက ရေဒီယိုနားထောင်ရင် ပုံပြင်လက်ဆောင်၊ ဇာတ်လမ်းပမာ နားဆင်စရာနဲ့ ဟဒယရွှင်ဆေး အစီအစဉ်တွေကို တမက်တမော နားထောင်ခဲ့ဖူးတယ်။
“မောင်ညီမလေးတို့ရေ …” အစချီတဲ့ ပုံပြင်လက်ဆောင် လာခါနီး အဖွင့်တီးလုံးစတာနဲ့ ရေဒီယိုနား အပြေးအလွှားသွားပြီး မော့နေပြီ။
“ဒီကနေ့ ဇာတ်လမ်းပမာ နားဆင်စရာ အခန်းမှာ …” ဆိုပြီး နိဒါန်းပျိုးသံကြားရင် ကစားတာတွေရပ်ပြီး ရေဒီယိုနားထောင်ဖို့ ပြင်ပြီ။
“ဟဒယရွှင်ဆေး တိုက်ကျွေးပါတော့မယ်ရှင် …” ဆိုရင်လည်း သိသိမသိသိ အလိုလို ပျော်နေပြီး ရေဒီယိုထဲက ရယ်သံတွေနဲ့အတူ လိုက်ရယ်မောဖို့ အဆင်သင့်ဖြစ်နေပြီ။

အဲဒီတုန်းကတော့ ဟဒယရွှင်ဆေးကဏ္ဍမှာ ပါဝင်တဲ့သူတွေ ဘယ်သူဘယ်ဝါ မသိပါဘူး။ အဖေပြောပြဖူးတာကတော့ သူတို့ခေတ်တုန်းက ဓာတ်ဆီ၊ ဓာတ်ဆန် (ဦး) လို့ ဆိုပါတယ်။ “ငါးဗျို့ .. ငါး … သံချောင်း တော်ရေ့” ဆိုတဲ့ ငါးရောင်းထွက်တဲ့ ဟာသကလည်း ခဏခဏ နားထောင်လို့ အလွတ်ရနေပေမဲ့ ရယ်သံကြားရင် လိုက်ရယ်မိတာပါပဲ။

ရေဒီယိုခေတ်ကနေ ရုပ်/သံ ခေတ်ရောက်လာပြန်တော့ ဆိုနီ၊ မိုးကျော်၊ ဇာဇာစမ်း တို့ရဲ့ ဟဒယရွှင်ဆေး အစီအစဉ်တွေကို စောင့်ကြည့်ခဲ့ရတယ်။ နောက်တော့ ဦးရွှေငါးတို့လို လူရွှင်တော်ကြီးတွေပါတဲ့ အငြိမ့်တွေ … ။ မင်းသမီးက ယိုးဒယားပြန် အမာစိန်တို့ ဆိုဗီယက်ပြန် နွဲ့နွဲ့စမ်းတို့ ထင်တယ်။ မင်းသမီးရဲ့ အက ကလည်း ညက်ညက်ညောညောနဲ့ ကြည့်လို့ကောင်း၊ လူရွှင်တော်ကြီးတွေကလည်း ၀ါရင့် သမ္ဘာရင့် ဆိုတော့ သမားရိုးကျ ပြက်လုံးတွေ ပြက်သည့်တိုင် သူတို့ အမူအရာတွေကြည့်ပြီး ရယ်ရတယ်။

နောက် … ဇာဂနာတို့ရဲ့ မိုးနတ်သူဇာ ခေတ်ကတော့ အငြိမ့်တခေတ် ပြောင်းသွားသလိုပါပဲ။ အငြိမ့်မကြိုက်တဲ့သူတွေတောင် အငြိမ့်ကို ကြည့်လာကြတယ်။ လူရွှင်တော်တွေရဲ့ ပြက်လုံးတွေကို လူတွေက ပိုပြီး စွဲမက်လာကြတယ်။ ပြက်လုံးတွေက ခေတ်ကို ထင်ဟပ်သလို ဆန်းသစ်တယ်၊ ခေတ်မီတယ်၊ သမားရိုးကျ ပြက်လုံးမျိုးတွေ မဟုတ်ဘူး။ လူတွေပါးစပ်ဖျားမှာ ပြက်လုံးထဲက စာသားတွေ ရေပန်းစားလာတယ်။ မင်းသမီးအက ကြည့်ဖို့ထက် လူရွှင်တော် ထွက်ချိန်ကို လူတွေက ပိုမျှော်လင့်ကြတယ်။

ဟာသဆိုတာကလည်း လူတွေရဲ့ ဟဒယနှလုံးကို ရွှင်ပြုံးစေတဲ့ အကောင်းဆုံး ဆေးတခွက်ပဲ မဟုတ်လား။ ညစ်ညူးမွန်းကျပ်နေတဲ့ ဘ၀အမောတွေကြားမှာ နေ့စဉ်နဲ့အမျှ ကျင်လည်နေကြရတော့ လွတ်လွတ်လပ်လပ် ရယ်မောချင်ကြတယ်။ ကြုံတွေ့နေရတဲ့ စိတ်ညစ်စရာ ဒုက္ခတွေကို ထိထိမိမိ သရော်ထားတဲ့ ဟာသပြက်လုံးတွေကို သိပ်သဘောကျကြတယ်။ ဒါကြောင့် မင်းသမီးရဲ့ အနုပညာထက် လူရွှင်တော်တွေရဲ့ ပြက်လုံးတွေကို ပိုပြီး နှစ်သက်ကြတာ မဆန်းပါဘူး။

ဒါပေမဲ့ လူရွှင်တော် ပြက်လုံးတိုင်း နှစ်သက်စရာလား … ။ စွဲမက်စရာလား … ။ ကျမတော့ မထင်မိပါဘူး။

မကြာသေးခင်က ကိုပေါရဲ့ဘလော့က “မရယ်ရသောပြက်လုံးများ” ဆိုတဲ့ပို့စ်ထဲမှာ ခေါက်ရိုးကျိုးနေတဲ့ ပြက်လုံးတွေ မရယ်ရတဲ့ အကြောင်း ရေးထားတာ ဖတ်လိုက်ရတယ်။ ဟုတ်တာပဲ။ တချို့ပြက်လုံးတွေက အစချီလိုက်တာနဲ့ နောက်ဘာလာမယ်ဆိုတာ ကြိုသိနေတော့ ရယ်စရာ သိပ်မကောင်းတော့ပါဘူး။ ရှေ့လူတွေ ထွင်ခဲ့တာကို နောက်က ထပ်မထွင်ဘဲ သံတူကြောင်းကွဲလောက်သာ ပြောင်းပြီး ယူသုံးနေကြတော့ ရိုးအီလာတော့ တာပေါ့။

ဒါ့အပြင် … မရယ်ရတဲ့ ပြက်လုံးတွေ ရှိပါသေးတယ်။
ဟိုးအရင်နှစ်တွေတုန်းက သီတဂူဆရာတော် မွေးနေ့အငြိမ့်မှာ မော့စ်တို့ပြက်တဲ့ ပြက်လုံးတွေ သိပ်ညစ်ညမ်းတယ်လို့ သိရတယ်။ ဗုဒ္ဓ၀င် ဇာတ်တော်တွေကိုပါ မဖွယ်မရာ ပြက်တဲ့အတွက် ဝေဖန်သံတွေ ကြားခဲ့ဖူးပါတယ်။ အဲဒီလို ပြက်လုံးတွေကျတော့ ခေါက်ရိုးကျိုး ဟာသတွေထက် ပိုဆိုးပါတယ်။ ညစ်ညမ်းပြက်လုံးတွေနဲ့ လူရယ်အောင် လုပ်တာကို သဘောမကျသလို အားလည်း မပေးချင်ပါဘူး။ ဒါပေမဲ့ အဲဒါကတော့ အပြင်အငြိမ့်ပွဲ ဆိုတော့ ရှိစေတော့ … ။

တနေ့က ကျမအစ်မကြီးနဲ့ စကားပြောဖြစ်တော့ သူက မြန်မာ့အသံ၊ မြ၀တီနဲ့ MRTV 4 မှာ လာတဲ့ ဟဒယရွှင်ဆေး အစီအစဉ်တွေအကြောင်း ပြောပြတယ်။
“မက်မဆုံးတဲ့ ပြက်လုံးများတို့ … စကားနပမ်းတို့ ဆိုပြီး နာမည်ပေးထားတယ်၊ ငါတို့ကတော့ အောက်မလွတ် ပြက်လုံးတွေလို့ပဲ ခေါ်တယ်၊ တကယ်ကို ညစ်တီးညစ်ပတ် ပြက်လုံးတွေပဲဟယ် … အဖေရှိနေရင်တောင် ငါတို့ ပိတ်ထားရတယ်၊ အဲဒီလို ညစ်ညမ်းတဲ့ ဟာသတွေကြည့်ပြီး ဘယ်လိုလုပ် ရယ်နိုင်မှာလဲ”

မောင်နဲ့နှမ သားနဲ့အမိ နားထောင်လို့ ကြည့်လို့မှ မသင့်တော်တဲ့ ပြက်လုံးတွေလို့ သူက ဆိုပါတယ်။
“အဲဒါတွေကို ဆင်ဆာလည်းမလုပ်ဘူး၊ တရားဝင် ပြခွင့်ပြုထားတယ် … အများဆုံး ရိုက်တဲ့သူက ဒါရိုက်တာ မောင်သီ၊ ပြီးတော့ လူရွှင်တော်တွေတွင် မကဘူး မင်းသား မင်းသမီးတွေကိုပါ လူပြက်လုပ်ခိုင်းပြီး အဲဒီလို ညစ်တီးညစ်ပတ်တွေ ပြောခိုင်းတာ”

ဘုရား … ဘုရား …
ကျမ ဘုရားသာ တ-မိတယ်။ ဆင်ဆာအဖွဲ့က ဘာတွေကို ဆင်ဆာလုပ်သလဲ မသိပါဘူး။ ဘာသာရေးနဲ့ ပတ်သက်ရင်လည်း အဓမ္မ၀ါဒီတွေ ဟောပြောတဲ့ တရားတွေ လွှင့်ခွင့် ပေးခဲ့တယ်။ အခုလည်း ဟာသပြက်လုံး … ၊ ရိုက်တဲ့လူကလည်း ဘာရည်ရွယ်ချက်နဲ့ ဒါမျိုးတွေ ရိုက်ကူး တင်ဆက်နေရတာလဲ၊ သရုပ်ဆောင်တဲ့ သူတွေကရော … ဒါမျိုး မပြောနိုင်ဘူး မငြင်းကြဘူးလား။ ပိုက်ဆံရရင်ပြီးရော ရိုက်ကြတာပဲလား။ မြန်မာ့အသံကလည်း မြန်မာ့ယဉ်ကျေးမှု … မြန်မာ့ယဉ်ကျေးမှု အော်နေပြီး ဒါမျိုး ညစ်ညမ်းဟာသတွေတော့ လွှင့်ခွင့်ပေးသလား။ နိုင်ငံရေးမပါရင် ပြီးရော ဆိုပြီး အောက်တန်းကျတဲ့ ဟာသတွေနဲ့ လူတွေကို ကလိထိုး ရယ်ခိုင်းနေတာကတော့ မဟုတ်သေးဘူးထင်ပါတယ်။

ကျမတို့ တအိမ်သားလုံးကတော့ ဒီအစီအစဉ်ကို စိတ်ပျက်ကြတယ်။ ရှုံ့ချကြတယ်။ တခြားလူတွေရော … ဒီပြက်လုံးတွေကို ရယ်ကြသလား၊ ကြိုက်ကြသလား … ကျမ မသိပါဘူး။ ဒါပေမဲ့ ဟာသ ပြက်လုံးတွေနဲ့ ပတ်သက်ပြီး စဉ်းစားကြည့်မိတယ်။ ညစ်ညမ်း စကားလုံးတွေ ပြောမှ ဟာသလား။ ဟာသကို ဟဒယရွှင်ဆေး လို့ ဘာလို့ ခေါ်တာလဲ။ ဟဒယရွှင်ဆေး ဆိုတာ စိတ်နှလုံးကို ရွှင်ပြုံးစေတဲ့ ဆေးမဟုတ်လား။ ခု ဒီဟာသတွေကို ကြည့်ပြီး တကယ်ရော ဟဒယ ရွှင်မှ ရွှင်ကြရဲ့လား။ တကယ်ပဲ စိတ်လက် ပေါ့ပါးသွားသလား။ ဒီလို ညစ်ညမ်းဆေးတွေ မှန်မှန် တိုက်ကျွေးပြီး လူတွေကို အာရုံထွေပြားအောင် သက်သက်မဲ့ မှိုင်းတိုက် ဖန်တီးနေကြတာများလား … ကျမ တွေးမိတွေးရာ တွေးနေမိပါတော့တယ်။
***
မေဓာဝီ
၂၁၊ ဒီဇင်ဘာ၊ ၂၀၀၉
နံက် ၁၀း၄၈ နာရီ

Read More...

Thursday, December 17, 2009

ရေးဖြစ်ခဲ့သော ကဗျာများ (၂)

ဒီကဗျာ (၃) ပုဒ်ကတော့ ပုံစံခြင်းမတူတဲ့ ကဗျာတွေပါ။ ပထမကဗျာကို ရေးဖြစ်တာကတော့ အောက်တိုဘာ ၃၁ ရက်နေ့က။ ဟိုနေရာ ဒီနေရာ လူတကာ တစ္ဆေခြောက်နေကြတဲ့ အချိန်ဆိုတော့ ကိုယ်လည်း “တစ္ဆေခြောက်တဲ့ ည” ဆိုပြီး ရေးဖြစ်သွားတယ်။ ဒေါက် .. ဒေါက်၊ ဖြောက် .. ဖြောက်၊ ချောက် ... ချောက် ဆိုပြီး ကာရန်တူ မြည်သံစွဲ စကားလုံးနဲ့ အစချီပြီး စမ်းရေးကြည့်တာပါ။

တစ္ဆေခြောက်တဲ့ည

"ဒေါက် … ဒေါက် …"
တံခါး ခေါက်သံ
ခြေသံဖျပ်ဖျပ်
လျှပ်တိုက်နင်းသွား
ဘယ်သူများလဲ
တွေးနေဆဲမှာ
အရိပ်မည်းနက်
ရုတ်တရက်မြင်
မှင်သက်မိ … ။

"ဖြောက် … ဖြောက်"
မိုးပေါက်မိုးစက်
အိမ်ခေါင်ထက်ဆီ
စီရီကြွေကျ
ပြတင်းဝမှာ
ဇာခန်းဆီးစ
တလွလွလွင့်
လေပင့်သက်ရှိုက်
ညင်သာတိုက်စဉ်
ပီပြင်မကွဲ
နားထဲကြားယောင်
“သွားရအောင်ပါ
လာလေ … လာကွယ့်”
ဆိုတဲ့စကား
နားထောင်မိ … ။

"ချောက် … ချောက် ..."
ရောက်လုပြီလား
နာရီများစွာ
ရွေ့လျားလည်ဆဲ
ကုန်ခဲလွန်းလှ
သန်းခေါင်ည၀ယ်
ကြယ်ရိပ်မလင်း
လမင်းမရှိ
မှုန်တိမှုန်မွှား
ဝိုးတ၀ါးတွင်
မြင်ယောင်နေမိ
ထိုသည့်အရိပ်
တိတ်တိတ်လေလား
အနားတိုးကပ်
စိမ်းသက်ရနံ့
ဝေ့လွင့်ပျံ့ကာ
ကိုယ်ပေါ်မှာလည်း
ချည်နှောင်တည်းပတ်
သက်ရှူခက်နေ
အို … တစ္ဆေ လား …
မှားထင်မိ ... ။
***
၃၁၊ အောက်တိုဘာ၊ ၂၀၀၉
ည ၁၀း၅၃ နာရီ
***
(၅)
တစ္ဆေခြောက်ခံရပြီး နောက်တညမှာပဲ နောက်ထပ် ကဗျာတပုဒ် ရေးဖြစ်တယ်။
ကျမက ညတွေကို စိတ်ဝင်စားတယ်။ ညနဲ့ ဆိုင်တဲ့ ကဗျာတွေလည်း မကြာမကြာ ရေးခဲ့ဖူးတယ်။ အဲဒီနေ့ကတော့ ပျောက်သွားတဲ့ ညတည အကြောင်းရေးဖြစ်ခဲ့တယ် ဆိုပါတော့။ ကာရန်မပါလို့ ကဗျာမဟုတ်ဘူးဆိုလည်း ပျောက်ဆုံးသွားတဲ့ညဟာ ကဗျာမဟုတ်တဲ့ စာစု တချို့လို့သာ ဆိုကြပါစို့ရဲ့။

ပျောက်ဆုံးသွားတဲ့ ည

မကြားရတဲ့ အသံတွေ
ဆိတ်ညံနေတဲ့ ညထံ
ရောက်သွားတယ် … ။

မှားယွင်းနေတဲ့ အမှန်တရားအတွက်
ပေးဆပ်ရတဲ့ ညက
ခြောက်ခြားဖွယ် … ။

တည်မြဲနေတဲ့ မရှိခြင်းများ
ထင်ရှားနေတဲ့ ညတည
ပျောက်သွားတယ် … ။
***
၁၊ နိုဝင်ဘာ၊ ၂၀၀၉
၁၂း၄၄ နာရီ
***
နောက်တပုဒ် ကတော့ ကိုဟယ်ရီရဲ့ “ကြွေ” ကဗျာကိုဖတ်ပြီး ပြန်ရေးဖြစ်ခဲ့တဲ့ အချိုး ကဗျာလေးပါ။ ကိုဟယ်ရီက အဲဒီကဗျာကို ဖေ့စ်ဘွတ်ထဲမှာတင်တော့ ကျမက ကွန်မန့်အနေနဲ့ ရေးလိုက်တာကို သူက သဘောကျပြီး သူ့ဘလော့မှာ တင်ခဲ့တယ်။ လောကအလှက ဒေါ်လေးဟနစံက “လွင့်” လို့ ခေါင်းစဉ်တပ်ပြီး လောကအလှမှာ ပြန်လည် ဖော်ပြပေးခဲ့ပါတယ်။

လွင့်

မမှန်းသာ
ပန်းကဗျာ သီကာကုံး
မမုန်းပါနှင့်။

အရှင့်ထံ...
ခွင့်ပန်လွှာ ကဗျာပန်းကို
အသာလှမ်းကာ ပေးအပ်လည်း
ပြေးထွက်သူ ရှောင်ခွါလို့
ယောင်ချာချာ မျှော်တမ်းရှိုက်
လွမ်းလှိုက်လေလွင့် ... ။
***
၆၊ နိုဝင်ဘာ၊ ၂၀၀၉
ည ၈ နာရီ
***
နောက်ထပ် ရေးဖြစ်တာတွေ ရှိနေပါသေးတယ်။ ကျောင်းစာဖတ်နေရတယ် ဆိုပြီး ကဗျာတွေချည်း ရေးနေမိတာတော့ မတတ်နိုင်ဘူးရှင်။ ခေါင်းထဲရောက်လာတဲ့ အတွေးတွေကို မပျောက်ပျက်စေချင်လို့ စာလုံးလေးတွေအဖြစ် ချရေးမိလိုက်တာပါပဲ။ :)
***
မေဓာဝီ
၁၇၊ ဒီဇင်ဘာ၊ ၂၀၀၉
နေ့ ၁၁း၃၀ နာရီ

Read More...

Wednesday, December 16, 2009

ရေးဖြစ်ခဲ့သော ကဗျာများ

ပြီးခဲ့တဲ့ စက်တင်ဘာကတည်းက ကျောင်းပြန်ဖွင့်လို့ စာတွေပိနေတာက တကြောင်း၊ ဘလော့မှာ ပို့စ်အသစ်တင်ရင် ဦးရီးတော်နား ပေါက်ကြားသွားမှာ စိုးရိမ်တာကတကြောင်း၊ စာမေးပွဲနီးလို့ လူရော စိတ်ပါ ပင်ပန်းနေတာကတကြောင်း … စတဲ့ စတဲ့ အကြောင်းကြောင်းတို့ကြောင့် ပို့စ်အသစ် မတင်ဘဲ ရပ်ထားခဲ့တာပါ။ ပို့စ်အသစ် မတင်ဖြစ်ပေမဲ့ မရေးရမနေနိုင်လို့ ကဗျာအတိုအစ လေးတွေ ရေးနေဖြစ်ခဲ့တယ်။ ရေးဖြစ်ခဲ့တဲ့ ကဗျာတွေကိုလည်း ပို့စ်အနေနဲ့ မတင်ဘဲ ဘေးနားက ဆိုဒ်ဘားမှာဘဲ ရသေ့စိတ်ဖြေ ရေးထည့်ထားဖြစ်တယ်။ (ကိုယ့်အကြောင်းနဲ့ ကိုယ်ပါ။) ခုတော့ စာမေးပွဲအပြီး ကျောင်းခဏပိတ်ချိန်မို့ စာရေး ကဗျာရေး ပို့စ်အသစ်တင်တာကို လူကြီးမိဘများ နားလည် ခွင့်လွှတ်မယ် ထင်တာကြောင့် ရေးပြီးသား ကဗျာလေးတွေကို ပျောက်ပျက်မသွားရအောင် ဒီမှာ ပြန်စုပြီး တင်လိုက်ပါတယ်။ ဖတ်ပြီးသားဆိုလည်း အားနာပါနာနဲ့ ထပ်ဖတ်ပေးကြပါဦးရှင်။
***
(၁)
ဒီကဗျာကို မရေးခင်အချိန်က ကျမစိတ်ထဲ တစုံတယောက်ရဲ့ ပယောဂကြောင့် ပူလောင် လှုပ်ရှားနေခဲ့တယ်။ “ငါ” ဆိုတဲ့ အတ္တနဲ့ မာန်မာနတွေ၊ “ငါ့ကို ဒီလိုလုပ်ရင် ငါကလည်း …” ဆိုတဲ့ တုန့်ပြန် ကလဲစားချေချင်တဲ့ ဒေါသ ၊ အာဃာတ စိတ်ရိုင်းတွေနဲ့ ပူလောင်နေတဲ့ စိတ်ကို ဘယ်လို ဖြေဖျောက်ရမလဲ စဉ်းစားတော့ ကိုယ်တိုင် ခဏခဏရေးနေမိတဲ့ “မေတ္တာ” ဆေးကို ပြေးမြင်မိပါတယ်။ ဒါနဲ့ ထိုသူကို မျက်စိထဲ မြင်ပြီး မေတ္တာပို့ ဆုတောင်းတယ်။ နေ့ရော ညရော အချိန်တိုင်း ဆုတောင်းပြီးနောက်မှာ ကျမစိတ်တွေ အေးချမ်းသွားတယ်။ ပူလောင်နေတဲ့ ဒေါသတွေနဲ့ ထောင်လွှားနေတဲ့ မာန်မာနတွေ မရှိတော့ဘူး။ ဒါနဲ့ပဲ ဒီကဗျာလေးကို ချရေးခဲ့ဖြစ်ပါတယ်။ ကိုယ့်ကိုယ်ကိုယ် သတိပေးထားတဲ့ ကဗျာလေးပါ။ သန္နိဋ္ဌာန် … တဲ့။

သန္နိဋ္ဌာန်

မဟုတ်မကြံ၊ မမှန်မဆို
အပိုမချဲ့၊ ကဲ့ရဲ့မပြော
ဒေါသမပွါး၊ အမှားကင်းကင်း
စကားတင်းရှောင်၊ မာန်မထောင်လွှား
မေတ္တာထားကာ၊ လှည့်စားခြင်းဖျောက်
မကောက်မကျစ်၊ မညစ်မပတ်
မဖျက်မဆီး၊ အပူမီးခွါ
ချမ်းမြေ့ပါရန်၊ သန္နိဋ္ဌာန်သည်
မြဲမြံတည်တံ့ ခိုင်စေသောဝ် … ။ … ။
***
၆၊ ၉၊ ၂၀၀၉
၂၁း၂၀ နာရီ
***
(၂)
နောက်တပုဒ်ကတော့ မြန်မာပြည်ကို ခွဲခွါခဲ့တာ နှစ်နှစ်ပြည့်တဲ့ နေ့အတွက် ရေးဖြစ်ခဲ့တဲ့ ကဗျာလေးပါ။ လွန်ခဲ့တဲ့ ၂-နှစ် ၂၀၀၇ ခုနှစ်၊ အောက်တိုဘာ ၆-ရက်နေ့က ချစ်သောသူများကို နှုတ်ဆက်ပြီး အေးစက်စက် အင်္ဂလန်မြေမှာ အကျွမ်းမ၀င်တဲ့ စာတွေကို သင်ဖို့ ယောင်ချာချာနဲ့ ထွက်လာခဲ့ရတယ်။ ဘယ်လိုပဲ အဆင်ပြေအောင် ၀ိုင်းဝန်းထောက်ပံ့ ကြည့်ရှုကြပေမဲ့ ကိုယ့်ပြည် ကိုယ့်ရွာ ကိုယ့်ဌာနေနဲ့ မိဘတွေကိုတော့ဖြင့် လွမ်းမိတာပါပဲ။ အထူးသဖြင့် မိုးတွေတစွေစွေ ရွာနေတဲ့ အချိန်မျိုးတွေမှာပေါ့ … ။ ဒီလိုနဲ့ မိုးတွေစွေတဲ့ နေ့တနေ့မှာ ဒီကဗျာလေး ရေးဖြစ်ခဲ့ပါတယ်။ လွမ်းလို့ ရေးတဲ့ ကဗျာမို့ လွမ်းတယ်လေ့ လို့ ခေါင်းစဉ်ပေးထားပါတယ်။



လွမ်းတယ်လေ့

နေမင်းသူရိန် ရောင်မထိန်
ညိုတိမ်အုံ့ဆိုင်း ကွယ်ကာသိုင်း
မှိုင်းတယ်လေ့ … မှိုင်းတယ်လေး။

တောင်ရိုးတခွင် တိမ်ခိုးဆင်
မိုးမျှင်မိုးဖွဲ … ရွာမစဲ
သဲတယ်လေ့ … သဲတယ်လေး။

လေပြင်းကချွေ လှိုင်းကမွှေ
ဒီရေကတိုး ညဥ့်ယံမိုး
ဆိုးတယ်လေ့ … ဆိုးတယ်လေး။

ခန်းဆောင်အလယ် နှမငယ်
အတွေးနယ်ချဲ့ ရာသီဘွဲ့
ဖွဲ့တယ်လေ့ … ဖွဲ့တယ်လေး။

မှန်ပြတင်းမှာ ကြွေဆင်းလာ
ဒေ၀ါပုလဲ မျက်ရည်တွဲ
ဝဲတယ်လေ့ … ၀ဲတယ်လေး။

နှမရှိုက်သံ နရီမှန်
သည်းထန်ငိုတမ်း မျှော်ရည်မှန်း
လွမ်းတယ်လေ့ … လွမ်းတယ်လေး။
***
၆၊ အောက်တိုဘာ၊ ၂၀၀၉
ခွဲခွါခြင်း ၂-နှစ်ပြည့်
***
(၃)
ဒီကဗျာကတော့ နာရီ တနာရီ နောက်ဆုတ်ရတဲ့ အောက်တိုဘာ ၂၅-ရက် နေ့က ရေးခဲ့တဲ့ ကဗျာလေးပါ။ နာရီပြောင်းပြီးနောက်မှာ နေ့တာက တဖြည်းဖြည်း တိုသွားမယ်၊ အမှောင်ထဲမှာ နေရတဲ့ အချိန်က ပိုပိုများလာမယ်၊ အဲဒီတော့မှ သဘာဝ အလင်းရောင်ကို ပိုတန်ဖိုး ထားတတ်မိလာတယ်။ အဲဒီလို နေ့မျိုးဆို အမှတ်တရ ကဗျာ သို့မဟုတ် စာတပုဒ်ပုဒ် ရေးနေကျမို့ ရေးလိုက်မိပါတယ်။

အမှောင်ထဲက မျက်ရည်

နံနက်ခင်း
အလင်းမှိန်သွဲ့
အေးတဲ့ရာသီ
နာရီကိုလှည့်
နေ့ရဲ့လက်တံ
နောက်ပြန်ကာပြောင်း
ဆောင်းဦးဝင်စ
ထိုကာလ…

လေပွေရမ်း
ပက်ဖြန်းမိုးစက်
သူခြွေဖျက်သော်
ပင်ထက်ပေါ်မှ
ညိုရော်ဝါပြောင်း
ရွက်ဟောင်းများကြွေ
မြေပေါ်ကိုခ
သဘာဝ …

ရှင်နေမင်း
အလင်းမဖြာ
တိမ်လွှာအကြား
ခိုဝင်သွားကာ
စိတ်နာသယောင်
သူပုန်းရှောင်သည်
အမှောင်လောက
မျက်ရည်ကျ … ။
***
လောလောဆယ်တော့ ဒီ ၃-ပုဒ် အရင် တင်လိုက်ပါတယ်။
နောက်မှ ဆက်တင်ပါဦးမယ်။
***
မေဓာဝီ
၁၆၊ ဒီဇင်ဘာ ၂၀၀၉
၆း၃၀ နာရီ

Read More...

Tuesday, December 15, 2009

သွေ့ ...

နေ့ …
တရွေ့ရွေ့ပြောင်း
ရာသီဟောင်းလည်း
မပြောင်းလဲတမ်း
လွမ်းမြဲလွမ်း၍
အလွမ်းတွေပြည့်
ထိုတနေ့ … ။

ဝေ့ …
မြူးမြူးကွေ့ကွေ့
လေရူးဝှေ့သော်
ပင်ယံပေါ်မှ
ဝါရော်ရင့်ဟောင်း

ရွက်ညောင်းကြွေ၍
မြေမှာဝေ့ … ။

ငွေ့ …

မတွေ့မမြင်
နှစ်ကိုယ်ယှဉ်ကာ
ကိုယ်ထင်မပြ
မကြင်ရလဲ

ရင်မှာစွဲမွေ့
သူ့ကိုယ်ငွေ့ … ။

သွေ့ …
နေ့နေ့ညည
မေ့ဖျောက်ရခက်
ပင့်သက်ရှိုက်ငင်
ငိုချင်ပြီလား
ထိမ်းသိမ်းထားရင်း
ရင်တွင်းမောလျ
သောကပူ၍
ပန်းတွေသွေ့ … ။ … ။
***
မေဓာဝီ
၁၅၊ ဒီဇင်ဘာ၊ ၂၀၀၉
၉း၂၀ နာရီ

Read More...

Saturday, October 03, 2009

ဒီအချိန်ဆို ... (၃)

ဒီအချိန်ဆို ...
တိမ်ညိုကိုခွင်း
ဖိုးလမင်းလျှင်
ထိန်လင်းထွန်းပ
ကိုယ်ထင်ပြလျက်
ပွဲတော်ရက်ကို
အကြိုထွက်ကာပင် ရှိစေချင်သည်။

ဒီအချိန်ဆို ...
ရောင်ရှိန်လျှံညီး
ထွန်းဆီမီးဖြင့်
မြို့ကြီးရွာငယ်
အသွယ်သွယ်မှာ
တကယ်ဖြာဝင်း
လင်းလင်းထင်ထင် မြင်စေချင်သည်။

ဒီအချိန်ဆို ...
ရွှေအိုရောင်လွှမ်း
စေတီနန်းမှာ
ရဟန်းသံဃာ
ပို့မေတ္တာဖြင့်
သာယာဝေဖြာ
မင်္ဂလာပြည့် ကြားစေ့ချင်သည်။

ဒီအချိန်ဆို ...
မြို့တော်အိုမှာ
ရန်ပြိုကွယ်ပ
ဘေးမခဘဲ
သောကခပ်သိမ်း
ချုပ်ပျောက်ငြိမ်းကာ
ချမ်းသာပျော်ရွှင် ဖြစ်စေချင်သည်။

ဒီအချိန်ဆို ...
ပွဲတော်ကိုလွမ်း
အိမ်ကိုတမ်းတ
မျှော်မှန်းဆရင်း
မိဘဆွေမျိုး
လက်စုံမိုးလျက်
ရှိခိုးကန်တော့
အပြစ်လျော့ကြောင်း
ကျွန်ဆုတောင်းကာ
ဌာနေဟောင်းကို အောက်မေ့သည် … ။ … ။
***
မေဓာဝီ
၃၊ အောက်တိုဘာ၊ ၂၀၀၉
သီတင်းကျွတ်လပြည့်နေ့
၀၈း၁၉ နာရီ

ဒီအချိန်ဆို (၁)
ဒီအချိန်ဆို (၂)

Read More...

Thursday, September 10, 2009

ဘယ်တော့မှ မမေ့ဘူး စက်တင်ဘာ

ဘယ်တော့မှ မမေ့ဘူး စက်တင်ဘာ …
ကုန်လွန်ခဲ့တဲ့ ရက်ပေါင်း ခုနစ်ရာ ဆိုတာ
အတိတ်တွေလား … သမိုင်းတွေလား …
အရိုင်းဆန်လွန်းတဲ့ အဖြစ်အပျက်တွေကြောင့်
လှိုင်းထန်ခဲ့ရတဲ့ နေ့ရက်တွေပေါ့ …
ဘယ်တော့မှ မမေ့ဘူး စက်တင်ဘာ … ။

အဲဒီနေ့တွေမှာ …
စက်တင်ဘာရဲ့ တိမ်တိုက်တွေ အရည်ပျော်ကျခဲ့တယ်။
စက်တင်ဘာရဲ့ မိုးရေစက်တွေ ခါးသက်ခဲ့တယ်။
စက်တင်ဘာရဲ့ နေမင်းတောင် အလင်းရောင် မပေးနိုင်ခဲ့ဘူး။
စက်တင်ဘာရဲ့ လေပြင်းက သစ်ရွက်တွေကို တစစီ ခြွေချခဲ့တယ်။
စက်တင်ဘာရဲ့ ညကောင်းကင်မှာ လမင်းလည်း မသာနိုင်ခဲ့။
စက်တင်ဘာရဲ့ ကြယ်ပြာတအုပ်ကတော့ မှိတ်တုတ်တုတ် မှိန်ပျ …
စက်တင်ဘာရဲ့ ပန်းအလှလေးတွေလည်း နွမ်းလျခဲ့ရ …
ဘယ်တော့မှ မမေ့ဘူး စက်တင်ဘာ … ။

ဒီလိုနဲ့ပဲ …
စက်တင်ဘာရဲ့ အနက်ရောင်ထက်မှာ အဖြူရောင်တွေ ဖုံးလွှမ်းခဲ့ပြန်တယ်။
စက်တင်ဘာရဲ့ အဖြူရောင်တွေက အ၀ါရောင်အဖြစ် ပြောင်းလဲလို့သွား၊
စက်တင်ဘာရဲ့ အ၀ါရောင်တွေက အပြာရောင်သံစဉ်တွေ ကျူးရင့် … ကမ္ဘာအနှံ့ ပျံ့လွင့်ခဲ့ပေမဲ့
စက်တင်ဘာရဲ့ ကံကြမ္မာကို အစိမ်းရောင်တွေက ကြီးစိုးလို့ သွားကြ
တစတစနဲ့
စက်တင်ဘာရဲ့ နေ့စွဲမှာ အနီရောင်နဲ့ ကမ္ပည်းထိုးခဲ့ရပေါ့ …
ဘယ်တော့မှ မမေ့ဘူး စက်တင်ဘာ … ။

စက်တင်ဘာရေ …
ကမ္ဘာမကြေ သီချင်းကို သံပြိုင် သီဆိုခဲ့ကြတာ သူငယ်တန်းကတည်းကပါ။
ဒါပေမဲ့ …
တရားမျှတ လွတ်လပ်ခြင်းနဲ့ မသွေ … “တို့ပြေ” ဖြစ်ဖို့ …
ဘယ်လိုကြိုးကုတ် အားထုတ်ရမလဲ ဆိုတာ … ခုထိ မသိခဲ့ပါ စက်တင်ဘာ။
သစ္စာတွေ ပြုခဲ့ … မေတ္တာတွေ စုခဲ့ကြပေမဲ့
ကုမရတဲ့ ဒဏ်ရာကို တိုင်းသူပြည်သား လူအများတို့
ခံစားနေရတာ နှစ်ချို့ခဲ့ပေါ့ …
ဘယ်တော့မှ မမေ့ဘူး စက်တင်ဘာ … ။

အဲဒီနေ့တွေမှာ ...
စက်တင်ဘာရဲ့ ပေါက်ကွဲသံတွေ လျှံခဲ့တယ်။
စက်တင်ဘာရဲ့ ငိုရှိုက်သံတွေ ညံခဲ့တယ်။
စက်တင်ဘာရဲ့ ခြောက်လှန့်သံတွေ ထန်ခဲ့တယ်။
စက်တင်ဘာရဲ့ ကြွေးကြော်သံတွေ ကျန်ခဲ့တယ် …
ကျန်ခဲ့တယ် ... ကျန်ခဲ့တယ် … ကျန်ခဲ့ပါတယ် စက်တင်ဘာ …
ရင်ထဲမှာ ... နာ … လို့ …
ငါလေ ...
ကမ္ဘာမကြေဘူး ... စက် တင် ဘာ … ။ … ။
***
မေဓာဝီ
၁၀၊ စက်တင်ဘာ၊ ၂၀၀၉
၁၆း၂၇ နာရီ

Read More...

Thursday, September 03, 2009

သုံးနှစ် - သုံးရက်

သုံးနှစ်ပြည့် ပို့စ်တင်ပြီးကတည်းက ရှေ့ဆက် ဘလော့ဖို့ သင့် မသင့် ကျမ စဉ်းစားနေတာ ခုထိ ဆုံးဖြတ်လို့ မရသေးဘူး။ ကွန်မန့်တွေထဲမှာတော့ ကျမကို အားပေးကြပါတယ်။ သုံးနှစ်ဆိုတာ ဘာရှိသေးလို့လဲ … တချို့ဆို ၇-နှစ်၊ တချို့က ၈-နှစ်၊ တချို့ကတော့ ၅-နှစ် စသဖြင့်ပေါ့ … စောင့်ခဲ့ပြီးမှ လက်တွဲခဲ့ကြတာလို့ ဆိုကြပါတယ်။ အဲဒီလောက် နှစ်တွေကတော့ ကျမက ပျင်းပါတယ်၊ ကျမကိုယ်တိုင် ၁၂ နှစ်တိတိ ကြာရှည် မြဲမြံခဲ့ပြီး နောက်မှ လက်တွဲဖြုတ်ခဲ့တဲ့ အတွေ့အကြုံလည်း ရှိဖူးခဲ့တာကိုး။ :) ဘာပဲဖြစ်ဖြစ် ကျမကို စိတ်ဓာတ်ခွန်အား ဖြစ်စေဖို့ အားပေးကြသူတွေကို ကျေးဇူးအများကြီးတင်ပါတယ်။

နောက်ထပ် ကျေးဇူး တင်ရတာက ... ကိုရန်အောင်ပါ။ ကျမ ဘလော့ကို ခုလို အခြေအနေဖြစ်အောင် အချိန်ကုန်ခံပြီး ပြင်ဆင်မွမ်းမံပေးတဲ့ ကိုရန်အောင်ကို အထူးကျေးဇူးတင်ပါတယ်။ အနက်ရောင်နောက်ခံ ကျမဘလော့ကို ကိုသက်ဦးက အရောင်ပြောင်းခိုင်းနေတာ နှစ်နဲ့ချီကြာမြင့်နေပါပြီ။ ကျမက အနက်ရောင်ကြိုက်လို့ မပြောင်းဘဲ ပေနေခဲ့တယ်။ ဒီကြားထဲ တခြားသူတွေ ပြောကြပေမဲ့ ကျမ မပြင်ခဲ့ဘူး။ နောက်ဆုံး ပန်ဒိုရာပြောမှ ပြင်ဖို့ စိတ်ကူးခဲ့တယ်။ စမ်းလုပ်ကြည့်ပြီး ဆက်မလုပ်တတ်တာနဲ့ ဒီတိုင်း ထားထားရင်း တရက်တော့ ကိုရန်အောင်က လုပ်ပေးမယ်လို့ လိုလိုချင်ချင် ပြောပြီး လုပ်ပေးတာကြောင့် ခုလို လူတလုံး သူတလုံး ဖြစ်ခဲ့တာပါပဲ။

ဒါကြောင့် ကျမဘလော့ကို အစဉ်တစိုက် ဖတ်ရှုသူများ၊ ခဏတဖြုတ် ဖတ်ရှုသူများ၊ မှတ်ချက်လေးတွေ ချီးမြှင့် ပေးကြသူများ၊ ကောင်းနိုးရာရာ အကြံဉာဏ်ပေးကြသူများ၊ ဝေဖန်ထောက်ပြ ဆုံးမကြသူများ အားလုံး အားလုံးကို ကျေးဇူးတင်ကြောင်း ပြောရင်းနဲ့ ... အသိပေးချင်တာလေး ပြောပါရစေ။
***
အခု ကျောင်းပြန်ဖွင့်ဖို့ ရက်ပိုင်းသာ လိုတော့တဲ့ အချိန်မှာ ဦးရီးတော်ရဲ့ စာသင်နည်း စနစ် ပြောင်းသွားပြန်ပါတယ်။ အရင်ကလို တီဗီက သတင်းတွေ မဖတ်ခိုင်းတော့ဘူး။ လာမယ့် ဒီဇင်ဘာမှာ ဖြေရမယ့် Law ဘာသာရပ်ကို စပြီး သင်ပေးပါတယ်။ သိတဲ့အတိုင်း ကျမက အင်္ဂလိပ်စာ ညံ့ရတဲ့အထဲ Law ဘာသာရပ်မှာ သုံးနှုန်းထားတဲ့ ဝေါဟာရတွေရဲ့ အဓိပ္ပါယ်က သာမန်သုံးရိုးသုံးစဉ်လို မဟုတ်တော့ စာလုံးတိုင်းကို အဘိဓာန်ထဲမှာ ရှာနေရတော့တယ်။ အခန်းပေါင်း ၁၃ ခန်းကို ကျောင်းမဖွင့်ခင် ဦးရီးတော်က ကျမနားလည်အောင် ဖတ်ပေးပြီး ရှင်းပြပေးမယ် ဆိုတော့ ကျမမှာ အချိန်အားရယ်လို့ သိပ်မရှိတော့ပါဘူး။ စနေ တနင်္ဂနွေ ပိတ်ရက်တွေမှာလည်း အရင်လို ဟိုဟိုဒီဒီ လျှောက်မသွားနိုင်တော့ဘူး။ ဟင်းချက်တာတောင် အချိန်ကုန် သက်သာအောင် တခါတည်း အများကြီးချက်ပြီး ဖရီဇာထဲ ထည့်သိမ်းထားပြီး နည်းနည်းချင်း ထုတ်စားဖို့ ဦးရီးတော်က ညွှန်ကြားပါတယ်။

တစက္ကန့် တမိနစ် အချိန်ကလေးကိုတောင် အလဟဿ မဖြစ်စေချင်တဲ့ ဦးရီးတော်ရဲ့ စေတနာကို ကျမ တန်ဖိုးထား လေးစားရမယ်လို့ နားလည်ပါတယ်။ ဒါပေမဲ့ တဖက်မှာ စဉ်းစားရပြန်တာလည်း ဘလော့ကို ရှေ့ဆက် မရေးဖြစ်ဘူးဆိုရင် … ဒါမှမဟုတ် ကြိုကြား ကြိုကြားပဲ ရေးဖြစ်တော့မယ် ဆိုရင် … ကျမ တင်လက်စ စာအုပ် နှစ်အုပ်က ခေါင်းပေါ်မှာ ၀န်ထုတ် ၀န်ပိုးလို ရှိနေပြန်ပါတယ်။ ဟိုးတုန်းက တစိုက်မတ်မတ် တင်ခဲ့တဲ့ ကိုပြူးကျယ်သို့ ပေးစာဟာ မပြီးခင် ရပ်လိုက်ရတယ်၊ အခုလည်းပဲ ကဗျာသင်္ဂဟမေဒနီနဲ့ သျှင်ဥတ္တမကျော် တောလားက တိုးလို့တန်းလန်း မပြီးသေးဘူး။ ကဗျာသင်္ဂဟမေဒနီကတော့ နည်းနည်းချင်း ရိုက်နေတာမို့ မပြီးနိုင်သေးပေမဲ့ သျှင်ဥတ္တမကျော် တောလားကတော့ အားလုံးရိုက်ပြီးသားပါ။ တခါတည်း အကုန်တင်လိုက်ရင် ရသော်ငြား ကျမရဲ့ ထုံးစံအတိုင်း တပတ်ကို သူနဲ့ဆိုင်တဲ့ ပို့စ် တခုလောက်သာ တင်ချင်တယ်။ ဆက်တိုက် တခါတည်း မတင်ချင်ဘူး။ ဒါနဲ့ပဲ မကြာသင့်ဘဲ အချိန်တွေက ကြာနေခဲ့တာပါ။ ဘယ်လိုပဲဖြစ်ဖြစ် ကျမစိတ်ထဲမှာ ဒီစာအုပ် နှစ်အုပ်ကိုတော့ ပြီးအောင် တင်ပေးချင်တဲ့ ဆန္ဒက ပြင်းပြနေခဲ့တယ်။
***
မနေ့ကတော့ ကျမ ဆုံးဖြတ်ချက် ချနိုင်မယ့် ကွန်မန့်တခု ၀င်လာပါတယ်။

Tyne has left a new comment on your post "မြန်မာရှေးစာဆိုတို့၏ ကဗျာများ (နိဒါန်း)":

အမရေ အမစာအုပ်နဲ့ တူတူပဲလားတော့ မသိဘူး၊ မြန်မာအီးလိုင်ဘရီ မှာတွေ့တယ်။ ဒီစာအုပ်က ပိုအိုပုံပေါက်တယ်။ အမ အမှတ်တရ သိမ်းထားချင် သိမ်းထားလို့ရအောင် ကျွန်တော် လင့်တင်ပေးလိုက်တယ်။

အဲဒီလင့်ခ်အတိုင်း သွားပြီး ဒေါင်းလုတ်ယူကြည့်လိုက်တော့ ကဗျာသင်္ဂဟမေဒနီ ပထမအကြိမ်ထုတ်တဲ့ စာအုပ် ဖြစ်လို့နေပါတယ်။ ၁၉၀၉ ခုနှစ်က ထုတ်ထားခဲ့တဲ့ စာအုပ်ပါ၊ နှစ်ပေါင်း ၁၀၀ ကြာပါပြီ။ ကျမကိုးကားတဲ့စာအုပ်က ၁၉၆၆ ခုနှစ်ကထုတ်တာဆိုတော့ ဒီစာအုပ်က ပိုပြီး ရှေးကျပါတယ်။ အဲဒီစာအုပ်ကလေး ebook အနေနဲ့ ရှိနေတာ ကျမ အလွန်အံ့သြသလို ၀မ်းလည်း သာမိပါတယ်။ ကျမအနေနဲ့လည်း ဒီစာအုပ်ကို ဆက်လက် ရိုက်ပြီး တင်စရာမလိုတော့တာမို့ ခေါင်းလည်း အင်မတန် ပေါ့သွားပါတယ်။ လိုချင်တဲ့သူများ ဒီလင့်ခ်မှာ သွားယူနိုင်ပါတယ်။ မြန်မာအီးလိုင်ဘရီက တင်ထားတာပါ။ ၂၄.၈ မက်ဂါဘိုက် ရှိပါတယ်။ တကူးတက လင့်ခ်လေး လာပေးတဲ့ Tyne ကို ကျေးဇူးတင်ပါတယ်။

ထိုနည်းတူစွာ သျှင်ဥတ္တမကျော်တောလား ဟာလည်း ကျမကိုးကား ဖော်ပြတဲ့ စာအုပ်အတိုင်း မြန်မာအိုင်အက်စ်ပီမှာ တင်ထားတာကို တလောက ကိုပရင့်စ်ညွှန်းလို့ သိခဲ့ရပါတယ်။

ဆိုတော့ … ကျမအတွက် ၀န်လေးနေမိတဲ့ ဒီစာနှစ်အုပ်ဟာ ebook အနေနဲ့ ရှိနေတာမို့ ကျမအနေနဲ့ ဆက်လက်ဖော်ပြဖို့ တာဝန် ကင်းသွားပါပြီ။ ဒါကြောင့်မို့ ဘလော့မှာလည်း အရင်လို စဉ်ဆက်မပြတ် ပို့စ်တွေ တင်ချင်မှ တင်ပါတော့မယ်။ လုံးဝကြီး မတင်တော့ဘူးလို့လည်း သံယောဇဉ်ပြတ်စွာ မဆိုနိုင်သေးပါဘူး။ ကိုယ့်အနာဂတ်ကို ကိုယ်မပိုင်တဲ့ အခြေအနေမှာ ရှေ့ကို ဘယ်လိုဖြစ်လာဦးမယ်ဆိုတာ ကြိုတင်မသိနိုင်တာကြောင့် လောလောဆယ်မှာ လော (Law) တွေနဲ့ နပန်းလုံးရင်း ကျောင်းဖွင့်ရက်ကို ကြိုနေမှာ ဖြစ်ပါကြောင်း အားလုံးကို အသိပေးအပ်ပါတယ်ရှင်။
***
မေဓာဝီ
၃၊ စက်တင်ဘာ၊ ၂၀၀၉
တော်သလင်းလပြည့်နေ့
၁၃း၄၂ နာရီ

Read More...

Sunday, August 30, 2009

သုံးနှစ် … သုံးမိုး

ရှေးတုန်းက လူပျို အပျိုချစ်ကြ ကြိုက်ကြရင် တယောက်နဲ့ တယောက် သုံးနှစ် သုံးမိုး စောင့်ကြည့်ပြီးမှ အိမ်ထောင်ရက်သား ပြုကြတယ်ဆိုပဲ။ သုံးနှစ် သုံးမိုးဆိုတဲ့ အချိန်ကာလက တယောက်အကြောင်း တယောက် အတော်အတန် တီးမိခေါက်မိ သိနိုင်ကြတယ် ထင်ပါရဲ့။ ဒီသုံးနှစ်အတွင်း ပိုပြီးတော့လည်း သံယောဇဉ် ရှိကောင်းရှိနိုင်သလို စိတ်ပျက်လက်ပျက် ဖြစ်ပြီးလည်း ခွါပြဲသွားကြနိုင် ပါသေးတယ်။

တကယ်တမ်း သုံးနှစ်ဆိုတဲ့ အချိန်ဟာ ကြာတယ်လို့ ဆိုရင်လည်း ရနိုင်သလို လက်ဖျစ်တတွက်လောက် မြန်တယ်လို့လည်း ဆိုနိုင်ပါတယ်။ ဒီကနေ့တော့ ကျန်ခဲ့တဲ့ သုံးနှစ်တာကာလကို ကျမ လည်ပြန် လှည့်ကြည့်မိတယ်။

လွန်ခဲ့တဲ့ သုံးနှစ် ၂၀၀၆ သြဂုတ်လ ၃၀ ရက်။
***
ကြောင်ဆိုးလေး ဂါးဖီးနဲ့ ဒီဘလော့ကို စဖွင့်ခဲ့တယ်။ ကျမက ငပျင်းဆိုတော့ ဘ၀ကို ခက်ခက်ခဲခဲ မဖြတ်သန်းချင်ဘဲ သူ့လို အေးအေးလူလူ နှပ်နေချင်တဲ့ ရည်ရွယ်ချက်နဲ့ပေါ့။ အစကတော့ ဘာရယ်မဟုတ် ပျင်းလို့၊ သူများလုပ်တာ အားကျလို့၊ မလုပ်ဖူးတာ စမ်းလုပ်ကြည့်ချင်လို့၊ ကိုယ်ရေးတဲ့ စာတွေ သူများဖတ်စေချင်လို့ ဆိုတဲ့ ရောက်တတ်ရာရာ ရည်ရွယ်ချက်တွေနဲ့ ဘလော့ကို စခဲ့ပေမဲ့ တဖြည်းဖြည်း အချိန်တွေကြာလာတာနဲ့အမျှ ဘလော့က ကျမကို လွှမ်းမိုးလာတော့တယ်။

နေ့တိုင်း ထမင်းမစားဘဲ မနေနိုင်သလို နေ့တိုင်း စာမရေးဘဲ မနေနိုင်တဲ့ ကျမ …
ဘလော့ပေါ်မှာ တွေးမိသမျှတွေ ရေးခဲ့တယ်။
ဘလော့ပေါ်မှာ ပုဂ္ဂလိက ခံစားချက်တွေလည်း ရေးခဲ့တယ်။
ဘလော့ပေါ်မှာ ဟိုဟိုဒီဒီ ဝေဖန် လေကန်ခဲ့ဖူးတယ်။
ဘလော့ပေါ်မှာ သူများမကြိုက်တာတွေလည်း လုပ်ခဲ့ဖူးတယ်။
ဒါကြောင့်လည်း …
ဘလော့ပေါ်မှာ လူသိရှင်ကြား အဆဲခံခဲ့ရဖူးပါတယ်။

ဒီလိုနဲ့ …
ဘလော့ကြောင့် ချစ်ခင်သူ မိတ်ဆွေ သူငယ်ချင်းများ တိုးပွါးခဲ့သလို …
ဘလော့ကြောင့် မုန်းတီးသူ ညှိုးသူ ရန်ဘက်များ ပေါ်ပေါက်ခဲ့တယ်။
ကျမက ဘလော့ကို ဖန်တီးခဲ့တယ်။
ဘလော့က ကျမဘ၀ကို ပြန်လည် ဖန်တီးခဲ့ပြန်တယ်။

ကိုယ့်ကိုယ်ကို အဟုတ်ကြီး မှတ်ပေမဲ့ လူကဲခတ်ညံ့တဲ့ ကျမက …
ပြုံးရယ်တာလား လှောင်ရယ်တာလား … နားမလည်ခဲ့။
လက်ခုပ်သံလား တောထုတ်သံလား … မခွဲခြားတတ်ခဲ့။
အားပေးသံလား ကဲ့ရဲ့သံလား … မစဉ်းစားတတ်ခဲ့။
မြှောက်ပင့်တာလား ရိုက်ချတာလား … မကွဲပြားခဲ့။
တွဲကူမယ့်လက်တွေလား ဆွဲချမယ့်လက်တွေလား … မသိနိုင်ခဲ့။
ဟုတ်တယ် …. ကျမ မသိတဲ့ မသိခြင်းတွေ … အများကြီးလေ။

ဒီလိုနဲ့ ခပ်အအ ကျမဟာ …
အရောင်လင်းတိုင်း အလင်းရောင် မဟုတ်ဘူးဆိုတာ … တဖြည်းဖြည်း သဘောပေါက်ခဲ့တယ်။

အဲဒီအချိန်မှာတော့ … ကျမရဲ့ အနက်ရောင်ဘလော့လေးဟာ အဖြူရောင် ဗလာ စာမျက်နှာ ဖြစ်ခဲ့ရတယ်။ ကျမသည်လည်း ချစ်သောသူများနဲ့ ခွဲခွါ … ကွဲကွာ … ဝေးရာအရပ်မှာ နာကြင်ခြင်းတွေ ခါးသီးမှုတွေ မျက်ရည်တွေ ပြည့်လျှမ်းပြီး အကြင်နာတွေ မေတ္တာတရားတွေ အေးခဲနေခဲ့တဲ့ ဥရောပရဲ့ ဥတုကြမ်းမှာ အမေ့အိမ်ကို လွမ်းခဲ့ရတယ်။
***
ဘလော့သာ မရေးခဲ့ရင် … လို့ ကျမတွေးကြည့်မိတော့ …

ဘလော့သာ မရေးခဲ့ရင် … ဒီအချိန်မှာ ဒီနေရာ ဒီဒေသကို ရောက်နေမှာ မဟုတ်ဘူး။
ဘလော့သာ မရေးခဲ့ရင် … ချစ်သူတွေနဲ့လည်း ကွေကွင်းရမှာ မဟုတ်ဘူး။
ဘလော့သာ မရေးခဲ့ရင် … မုန်းသူတွေလည်း ခုလောက်များမှာ မဟုတ်ဘူး။
ဘလော့သာ မရေးခဲ့ရင် … ဘ၀ဆိုတာကို သေချာသိဦးမှာ မဟုတ်ဘူး။
ဘလော့သာ မရေးခဲ့ရင် … လူတွေရဲ့အတွင်းစိတ်ကို ခုလောက်သိဖြစ်မှာ မဟုတ်ဘူး။
ဘလော့သာ မရေးခဲ့ရင် … ရေသာခို လှေကြုံစီး အပျင်းကြီး နေဖြစ်ဦးမယ်။
ဘလော့သာ မရေးခဲ့ရင် … အပြောင်းအလဲ သိပ်မရှိတဲ့ သမားရိုးကျဘ၀မှာ နိစ္စဓူဝ ကျင်လည်နေရဦးမယ်။
ဘလော့သာ မရေးခဲ့ရင် … … … … ...
ဘလော့သာ မရေးခဲ့ရင် … … … … … …
ဘလော့သာ မရေးခဲ့ရင် … … … … … … …

တကယ်ပါ … ဘလော့က ကျမဘ၀ကို ဖန်တီးသွားခဲ့တာ။
***
ခုဆို ဘလော့နဲ့ ပတ်သက်ခဲ့တာ သုံးနှစ်သုံးမိုး တိုင်ခဲ့ပြီ။
ဒီကြားထဲ ခဏတဖြုတ် ဥပေက္ခာပြု လျစ်လျူရှုထားခဲ့ရတယ်။
နောက်တော့လည်း မိဘ ဆွေမျိုးတွေ သဘောမတူတဲ့ ကြားက ယောင်လည်လည်နဲ့ အနားသွားကပ်၊ တပုဒ်စ နှစ်ပုဒ်စ ပြန်တင် … အဲဒီလိုနဲ့ မခွဲနိုင် မခွါရက် ပြန်ပတ်သက် မိပြန်တယ်။ လူကြီးတွေ မကြိုက်တာ လုပ်နေရတာမို့ တခါတခါ ဘလော့ရေးရတာ ပြစ်မှုတစုံတရာ ကျူးလွန်နေရသလိုပဲ စိတ်ထဲ ထင်မိပါတယ်။ ကိုယ့်ဘ၀ ကိုယ်မပိုင်သေးတဲ့ အချိန်မို့ ဘလော့ကို စိတ်ရှင်းလက်ရှင်းနဲ့ လွတ်လပ်စွာ ရေးသားခွင့် ကျမမှာ မရှိပါဘူး။ ကျမ ရှုံးနိမ့်မှုတွေနဲ့ ကြုံတွေ့ရတဲ့အခါ ဘလော့ကြောင့်လို့ ဘလော့ကို လက်ညှိုးထိုးမှာလည်း စိုးရိမ်မိတယ်။

သုံးနှစ် သုံးမိုးကြာပြီဆိုတော့ … ကျမ ဘာလုပ်ရမလဲ ဆိုတာ ဆုံးဖြတ်ရမယ့် အချိန်ရောက်လာပြီလို့ တွေးမိတယ်။ ဘလော့ကို ကျမ လက်တွဲရမလား … ဒါမှမဟုတ် … လက်တွဲ ဖြုတ်ခဲ့ရမလား။
တကယ်တမ်း ကျမ မလုပ်ရက် … မလုပ်ချင် … မလုပ်နိုင်ပါဘူး။
ဒီဘလော့လေးဟာ ကျမရဲ့ ဘ၀၊ ကျမရဲ့ အဖော်၊ ကျမရဲ့ ရဲဘော်ရဲဘက်။
ကျမ သူ့ကို မစွန့်ပစ်ခဲ့နိုင်ပါဘူး။

ရင်ထဲက ဖြစ်ပေါ်လာတဲ့ ခံစားချက်တွေကို စာလုံးလေးတွေ တလုံးချင်းစီနဲ့ သီကုံးရေးဖွဲ့ တည်ဆောက်ခဲ့ရတဲ့ ဒီစာမျက်နှာလေးကို ကျမ ကျောခိုင်း မထားခဲ့ရက်ဘူး။ ဘယ်သူမှမသိအောင် နာမည်တခု သပ်သပ်နဲ့ ပြောင်းရေးဖို့ စဉ်းစားမိပါသေးတယ်။ ဒါလည်း ကျမစိတ်ထဲ သိပ်အဆင်မပြေဘူး။ ကျမ မလုပ်ချင်ဘူး။ ခုချိန်ထိ ကျမ ဆုံးဖြတ်ချက် မချနိုင်ဘဲ တွေဝေနေမိတယ်။
ကျမ ဘာလုပ်ရမလဲ …. …. …. ။
***
သုံးနှစ်သုံးမိုးထိ တည်တံ့အောင် တစတစ တည်ဆောက်ခဲ့ရတယ်။
သုံးနှစ်သုံးမိုးအချိန်အတွင်း ပြုံးပျော် ကြည်နူးခဲ့ရသလို ညစ်ညူး ငိုကြွေးခဲ့ရတယ်။
သုံးနှစ်သုံးမိုးကာလမှာ အခက်အခဲတွေ အတူတူ ကျော်ဖြတ်ခဲ့ကြတယ်။
သုံးနှစ်သုံးမိုး … … …
.… .… …. …. …. .…
ကြာခဲ့ပါပြီ … … … ။
***
မေဓာဝီ
၃၀၊ သြဂုတ်၊ ၂၀၀၉
၅း၂၄ နာရီ

(ကျမ ဘလော့ ၃-နှစ်ပြည့် အမှတ်တရနဲ့ ကိုဟယ်ရီတက်ဂ်တာကို ပေါင်းပြီးရေးလိုက်ပါတယ်။)

ရေးခဲ့ဖူးတဲ့ အမှတ်တရလေးတွေ …
(၁) ခြေလှမ်း ၃၀၀ပြည့်
(၂) အခါလည်အတွေး (တနှစ်ပြည့်)

Read More...

Friday, August 28, 2009

အရိပ်

အိုဘယ့် ငွေလမင်း
ရေလွှာပေါ်မှာလင်း
ပင်လယ်ရေသောက်ဆင်း။ ။

Read More...

Wednesday, August 26, 2009

မြန်မာရှေးစာဆိုတို့၏ ကဗျာများ (၇)

ဒီတပတ် အပိုင်း (၇) မှာ အချုပ်တန်းဆရာဖေ ရေးဖွဲ့သီကုံးတဲ့ သံဝေဂတေးထပ်များကို ဆက်လက်ဖော်ပြပါမယ်။ တေးထပ်များကို မဖော်ပြခင် ကဗျာ့ဥပဒေခန်းမှာပါတဲ့ အလင်္ကာဒေါသ ၃-မျိုး အကျဉ်းကို ဦးစွာ ဖော်ပြလိုက်ပါတယ်။
***
အလင်္ကာဒေါသ ၃-မျိုး အကျဉ်း

အဗ္ဘန္တရသရက် ဥပမာတင်ပြချက်နှင့်အညီ အထက်စီစဉ်ခဲ့ရင်း က၀ိလက္ခဏာ မာတိကာတို့တွင် -
ပဒ, ၀ါကျ၊ ၀ါကျတ္ထ၌၊ ဒေါသပြစ်ရောက်၊ ရှစ်, ကိုး, ခြောက်များကို၊ ကြောက်ရွံ့ ရှောင်ဖယ်ကြရမည် ဟူသည်ကား -

၁။ ပဒဒေါသ ၈-ပါး
(က) ၀ိရုဒ္ဓတ္ထန္တရဒေါသ
(ခ) အဓျတ္ထဒေါသ
(ဂ) ကိလိဋ္ဌဒေါသ
(ဃ) ၀ိရောဓိဒေါသ
(င) နေယျဒေါသ
(စ) ၀ိသေသနာပေက္ခဒေါသ
(ဆ) ဟီနတ္ထကဒေါသ
(ဇ) အနတ္ထကဒေါသ
ဟူ၍ ပဒဒေါသ ရှစ်ပါးတည်း။

၂။ ၀ါကျဒေါသ ၉-ပါး
(က) ဧကတ္ထဒေါသ
(ခ) ဘဂ္ဂရီတိကဒေါသ
(ဂ) ဗျာကိဏ္ဏဒေါသ
(ဃ) ဂါမ္မဒေါသ
(င) ယတိဟီနဒေါသ
(စ) ကမစ္စုတဒေါသ
(ဆ) အတိဝုတ္တဒေါသ
(ဇ) အပေတတ္ထဒေါသ
(ဈ) သဗန္ဓဗရုသဒေါသ
ဟူ၍ ၀ါကျဒေါသ ကိုးပါးတည်း။

၃။ ၀ါကျတ္ထဒေါသ ၆-ပါး
(က) အပက္ကမဒေါသ
(ခ) သြစိတြဟီနဒေါသ
(ဂ) ဘဂ္ဂရီတိဒေါသ
(ဃ) သ-သံသယဒေါသ
(င) ဂါမ္မဒေါသ
(စ) ဒုဋ္ဌာလင်္ကတိဒေါသ
ဟူ၍ ၀ါကျတ္ထဒေါသ ခြောက်ပါးတည်း။

(ဒေါသတခုချင်းစီအတွက် ရှင်းလင်းထားချက်ကိုတော့ ရှေ့တပတ်မှ ဆက်လက် ဖော်ပြပါမယ်။)
***
အချုပ်တန်းဆရာဖေဆို သံဝေဂတေးထပ်

(၁)
ထုံးရွှေရောင် နှောင်မကြော့ချင်ဘူ့း၊ တောင်တမော့ ဗွေစွန်။ မျှောင်ကတော့ ဟေ၀န်မှာ၊ မြေသလွန် စက်ကိန်း။ ကျင့်ခြိုးခြံ ဖြေဖျော်တယ်၊ နေရာတော် တောသစ်ရွက်စိမ်း။ ။ ပင်စကားဝါ့ ရိပ်သာမှာ၊ အ၀ိဇ္ဇာဖျောက်သိမ်း။ တသိက္ခာ စောင့်ထိန်းလို့၊ တယောက်ငြိမ်းကြံစည်။ ကမ္မ၀ါ ရွှေစာထမ်းပါလို့၊ ခေမာလမ်း ကူးလိုက်ပါတော့မည်။ ။ ဆွတ်လှမ်းလို့ ကျွတ်တမ်းကိုရည်တယ်။ ၀တ်ပန်းထည် ဆင်သစ်နှင့်။ ကြင်ချစ်သူ ဖော်မခေါ်၊ မြန်းချင်ပေါ့နော်။ မေတ္တာသွန်းတဲ့ ငယ်ကျွန်းဖော်ငယ်၊ အလွန်းတော် ပြေရစ်ရှာတော့လေး။

(၂)
လောကဓံ ပြည်ဓလေ့ကို၊ သည်ယနေ့သိမ်းမည်။ ကြည်မမွေ့ကိန်းနယ်ကို၊ ငြိမ်းလွယ်အောင် ကြံပေါ့။ သူတော်မြတ် ခန္တီဝါလို၊ စံမှီရာ ယွန်းစို့ အသော့။ ။ သင်္ခါရဖြစ်ပျက် မှောင်ကို၊ နှစ်သက်ပေါင် တန်တော့။ သစ်နက်ရောင် ဖန်ဝါပျော့နှင့်၊ ကန္တာကြော့ ရိပ်လယ်။ ခင်လေးမောင် စေနာထူးပါလို့၊ ခေမာကူး ကြည်လိုက်ပါတော့မယ်။ ။ သိုဝှက်လို့ ကိုယ်တွက်ရွယ်တယ်၊ ဖိုလ်မဂ်ကွယ် ရည်စူးလို့။ ကြည်နူးတဲ့ ဘာဝနာ၊ ပွါးချင်တော့သာ။ ၀ဋ်ကိန်းက လွတ်ငြိမ်းခွါတယ်၊ ဒွတ္တိံသာ မြဲချင်ပေါ့လေး။

(၃)
နန်းသပြေပင်ညွန့်နှင့်၊ စမ်းရေကွန့်ရိပ်ပြန်။ ပန်းဟေ၀န့် ဗိမာန်၊ အဓိဋ္ဌာန် တင်မြန်း။ ပင်လုံးကျွတ် ပွင့်ဝေဖြာတယ်၊ ဧကစာသုံးတဲ့ သင်္ခမ်း။ ။ မြတ်နွယ်ညွန့် တည်မရာမှာ၊ လှည့်လက်ျာ ခွေမြန်း။ စည့်မျက်နှာ မြေကြငှန်း ငယ်သို့၊ ချွေမြန်းလို့ စိတ်သာ။ တင်စလွယ် ဆင်ခြယ်သ၊ အဋ္ဌင်္ဂ သုံးဆောက်တည်ကာ။ ။ တကိုယ်မွေ့ ဆိတ်ငြိမ်ရာဝယ်၊ နိဗ္ဗိန္ဒာ ကြည်ဇောနှင့်။ သည်တောမြိုင်ဝေပူ၊ ပန်းစုံကကြူ။ ကမ္မဋ္ဌာန်းရ အုတ်ဂူမှာ၊ ရုက္ခမူ ပျော်ဆုံးပလေး။

(၄)
နှစ်ကိုယ်တူ ကြံရာကျအောင်၊ ကန္တာရ လှမ်းမယ်။ ဖလ်ကြာကြွ နန်းလယ်မှာ၊ စံမြန်းတယ် မမွေ့။ မူခြားလို့ ဂူအားကို ရှာမယ်၊ လူပါးရာ မြန်းစို့ တမေ့။ ။ သံသာရ ရဟတ်နယ်ကို၊ ပြတ်ချင်တယ် ယနေ့။ မေပါလျှင် ချွေတာလို့ ရွေ့နိုင်ရဲ့၊ သေလာကွေ့ မြိုင်လယ်။ နိဗ္ဗူကို စိတ်တူကြွရအောင် ဘိက္ခူမ လုပ်ပါတော့ကွယ်။ ။ ပုတီးနှင့် ခရီးလယ်မှာ၊ ပြီးစလွယ် ဟန်သိမ်းလို့။ ဖန်ပိန်းကြော့ နံ့သာနီလွင်၊ လဲစို့ ခင်ခင်။ ခိုင်တကြော့ နဂိုရ်ယဉ်ငယ်၊ မငြိုငြင် စမ်းပါနှင့်လေး။

(၅)
နှစ်ကိုယ်တူ ဆံချလို့၊ ကြံကြစို့ သက်လယ်။ သံသာရစက်နယ်ကို၊ ထွက်လွယ်အောင် ရည်စူး။ ချစ်တဲ့ဘေ စိတ်တူညီလျှင်၊ ဘိက္ခူနီ လုပ်ခဲ့ ကျော့မှူး။ ။ ဘ၀တိုင်း တသာကီရယ်၊ ပါရမီဆုထူး။ ညာမဒီ ချစ်ဦးနှင့်၊ ကျူးရင့်ကာ နှစ်ကိုယ်။ နိဗ္ဗာန်တိုင် စိတ်သန်မှု၊ ဓိဋ္ဌာန်ပြု တောင်းဆုပန်ဆို။ ။ သမ္ဘူလနုပျိုလို၊ ကုသိုလ်တော်တရားနှင့်။ လင်သားဝတ် ဤငါးဖြာ၊ မြဲပမကွာ။ ဖေချစ်တဲ့ ခင်ကညာရယ်၊ ရည၀ါ ခိုအောင်းစို့လေး။

(၆)
သလွန်တော် ဂမုန်းပွင့်မှာ၊ ကုံးဆင့်ဆင့် ပြုကာ။ အုံးစွင့်စွင့်နုစွာဝယ်၊ ယုဇနာ ရှိန်ကြွေ့။ ရွှေညဥ့်ရုံ လွန်ဆန်းပွေတယ်၊ ဇွန်ပန်းငွေ ဖြန်းရွေ့သိမ်မွေ့။ ။ အိပ်ရာတော် သတ်မွှေးထုံတယ်၊ နတ်သွေးလှုံဓလေ့။ မြတ်လေးငုံ အပြေ့နှင့်၊ ပြကတေ့မူရာ။ ခြင်ရံတော် တကယ်ဆန်းငယ်က၊ စပယ်ပန်း လှပ်လှပ်သာဖြာ။ ။ သဇင်ပန်း မုတ်သီဟာမှာ၊ ဇီဇ၀ါ တန်တိုင်းနှင့်။ ကသိုဏ်းကျ ဂန္ဓမာ တောင်ရံ၊ နှင်းရီမြကန်။ ။ ကျောက်စိမ်းမြ ဒီဃာရံကို၊ ညီလာခံ ကွန့်မယ်ပလေး။
***
အချုပ်တန်းဆရာဖေရဲ့ သံဝေဂ တေးထပ်တချို့ထဲမှာ တောထွက်တာတောင် အဖော်လေးနဲ့မှတဲ့။ အင်းလေ … ဒါကြောင့်လည်း သူတော်ကောင်း သူမြတ်လောင်းတွေအတွက် ပါရမီဖြည့်ဘက်က အရေးကြီးပေတာကိုး။ နိဗ္ဗာန်ကို တယောက်ထဲ သွားရမှာ ပျင်းတဲ့ အတောင်နှစ်ဆယ်ဝတ်တွေ ဆရာဖေ့ တေးထပ်လေးတွေ ဖတ်ပြီး ကျေနပ်နှစ်သက်ကြမယ် ထင်ပါရဲ့။
***

မေဓာဝီ
၂၆၊ သြဂုတ်၊ ၂၀၀၉
၉း၅၃ နာရီ

Read More...

Friday, August 21, 2009

စာမျက်နှာ အသစ်

နိဒါန်း
(၀း၁)

တခုသော မိုးဥတု၏ မိုးဖွဲဖွဲကျနေသည့် နံနက်ခင်း တခုမှာ အဖေနဲ့ အမေက ထိုစာအုပ်လေးကို သူ့အား လက်ဆောင်ပေးခဲ့သည်။ စာအုပ်ကလေးက အသစ်စက်စက်၊ ဘာတခုမှ ရေးမထားရသေး။ ဖြူစင် သန့်ရှင်းပြီး ချောမွေ့ ကောင်းမွန်သော စာရွက်သားဖြင့် ပြုလုပ်ထားသည့် စာအုပ်ကလေး။ ထိုစာအုပ်လေး၏ ထူးခြားချက်က တချို့စာအုပ်တွေလို စာမျက်နှာ မည်ရွေ့မည်မျှ ပါသည်ဟု ရေးထိုးမထား။ မည်သည့်အချိန်မှာ စာမျက်နှာတွေ ကုန်ဆုံးသွားမည် ဆိုသည်ကို မသိနိုင်။ ထိုနည်းတူစွာ မည်သည့်အချိန်မှာ စာအုပ်ကလေး ရုတ်တရက် ပျက်စီးဆုတ်ပြဲ သွားမည်ကိုလည်း မည်သူ တဦးတယောက်မျှ သိနိုင်စွမ်း မရှိ။ ထိုစာအုပ်ကလေးကား သူ၏ အသက် ရှင်သန်နေသရွေ့ ရေးမှတ်နေရမည့် စာအုပ်ကလေးပင်တည်း။
***
(၁း၁)

မသိတတ် နားမလည်တတ်စဉ်ကတော့ အမှုမဲ့ အမှတ်မဲ့နှင့်ပင် စာမျက်နှာ အသစ်လေးတွေ တဖျတ်ဖျတ် လှန်လှောခဲ့မိ၏။ စာမျက်နှာ အဟောင်းလေးတွေ မည်သို့မည်ပုံ ကျန်ရစ်ခဲ့မည် ဆိုသည်ကို မစဉ်းစားတတ်၊ မစဉ်းစားမိခဲ့။ သေချာသည်ကတော့ …
ထိုစာအုပ်လေးထဲမှာ ငိုကြွေးခဲ့ဖူးမည်။
ထိုစာအုပ်လေးထဲမှာ ရယ်မောခဲ့ဖူးမည်။
ထိုစာအုပ်လေးထဲမှာ အလိုမကျ ဖြစ်ခဲ့ဖူးမည်။
ထိုစာအုပ်လေးထဲမှာ တင်းတိမ် ရောင့်ရဲခဲ့ဖူးပေမည်။

***

(၁း၂)

တဖြည်းဖြည်း သိတတ် နားလည်တတ်သည့် အရွယ်ကို ရောက်လာတော့ ထိုစာအုပ်လေး၏ စာမျက်နှာတွေ ပေါ်မှာ ရောက်တတ်ရာရာတွေ ရေးခြစ်တတ်လာသည်။ စာလည်း မမည်၊ ပုံလည်း မပီ။ နောက်တော့ ၀လုံးလေးတွေ၊ ကကြီး ခခွေး စာလုံးလေးတွေ။ ပြီးတော့ ပန်းပုံ, အိမ်ပုံ, တောင်တန်းနှင့် ပင်လယ်ပုံ စသည်ဖြင့် စိတ်ကူးတည့်ရာ ရေးခြစ်တတ်လာခဲ့သည်။ ခက်သည်က ထိုစာအုပ်ကလေးထဲတွင် ရေးခြစ်ခဲ့သမျှတို့ကို ခဲဖျက် မင်ဖျက် စသည်တို့ဖြင့် ပြန်လည် ဖျက်၍ ပြင်၍မရ။ ရေးခဲ့သမျှ ပုံတွေ စာတွေ အရုပ်တွေက စာမျက်နှာများထက်တွင် စွဲထင် ကျန်ရှိနေသည်ချည်း။ သို့တိုင်လျက် သူကလည်း ဂရုတစိုက် မရှိလှ။ အမှားတွေ အမှန်တွေ၊ အကောင်းတွေ အဆိုးတွေ၊ သုခတွေ ဒုက္ခတွေ၊ စိတ်ကူးယဉ်မှုတွေ လက်တွေ့ကျမှုတွေ၊ ရေးချင်သလိုရေး၊ ခြစ်ချင်သလို ခြစ်ဖြင့် စာမျက်နှာလေးတွေက ညစ်ပတ် ပေရေ၍လည်း နေတတ်သေးသည်။
***
(၂း၁)

ညစ်ပေနေသော စာမျက်နှာလေးတွေကို မှတ်မှတ်ထင်ထင် ရှိလာသည့် နောက်မှာတော့ စာမျက်နှာ အသစ်တခု စတင် ဖွင့်လိုက်ပြီဆိုလျှင် …

“ဖျက်မရ ပြင်မရတဲ့ ဒီစာအုပ်ရဲ့ စာမျက်နှာ အသစ်ကလေးမှာ အခုကစပြီး ကောင်းကောင်းရေးမှ ဖြစ်မယ်”

ဟု နောင်တရသည့်နှယ် တွေးမိတတ်သော်လည်း ရေးရင်းခြစ်ရင်း စာမျက်နှာ လေးပုံတပုံလောက် မကုန်ခင်မှာပင် ဖြစ်သလိုတွေ ရေးခြစ်မိပြန်သည်။ ထိုသို့ပင် သူ၏ “အခု” များသည် တရွေ့ရွေ့ ရွေ့လျောရင်း စာမျက်နှာ အသစ်ပေါင်း များစွာ ဖြတ်သန်း ကုန်လွန်ခဲ့ရလေ၏။
***
(၂း၂)

စာမျက်နှာလေးတွေ တရွက်ပြီး တရွက် တလှပ်လှပ် ကုန်သွားတိုင်း နောက်မှာကျန်ခဲ့သည့် စာရွက်တွေက ညစ်နွမ်းနွမ်း ပန်းလျလျဖြင့် မလှမပ။ ဟိုးပထမဆုံး စာမျက်နှာလေးကတော့ မှိန်ပျပျ ကျန်ခဲ့ပြီ။ ပြင်မရ ဖျက်မရသော စာမျက်နှာ အဟောင်းလေးတွေမှာ ဟိုးအစက စပြီး ပြန်ရေးသား၍ ရလျှင် အကောင်းသားဟု တခါတလေလည်း စိတ်ကူးယဉ်မိသေးလေသည်။ မရမှန်းသိလျက် လိုချင်တမ်းတ တတ်ပေမဲ့ စာရွက်တွေ ပေါ်မှာ သပ်ရပ်လှပစွာ ရေးသားဖို့ကိုတော့ဖြင့် တွန့်ဆုတ် နှောင့်နှေးနေဆဲ။
***
(၃း၁)

တခါတရံ စာမျက်နှာထဲက စာကြောင်းတွေပေါ်မှာ စိတ်လေလွင့်ခဲ့မိသည်။
တခါတရံတော့ ထိုစာကြောင်းတွေပေါ်မှာ မှတ်သားစရာ စာလုံးလေးတွေ စီရရီ။
တခါတရံလည်း အများအကျိုးရှိလေမလားဟု ရေးခြစ်မိသော လူမသိ သူမသိ စာလုံးတချို့။
တခါတရံမှာဖြင့် စာလုံးလေးတွေ မရေးမီ မိမိကိုယ်ကို ဆင်ခြင်သုံးသပ်ကာ အမှားကင်းအောင် အားတင်း ရေးခဲ့မိသည်။
တခါတရံမှာကား ….
ဗလာဖြစ်ကာ လစ်ဟာနေသော စာကြောင်း အချို့ … ။
…. …. …. …. ….
…. …. …. …. ….
…. …. …. …. ….
***
(၃း၂း၁)

သို့ဖြင့် စာအုပ်ကလေးကို ပိုက်၍ မိသားစုနှင့် ဝေးရာကို ရောက်ခဲ့ရပြန်သည်။ သူနှင့် မလျောက်ပတ် လှစွာသော ပညာရပ်တွေကို သင်ယူရင်း ၀န်းကျင်အသစ်မှာ သူစိမ်းတရံဆန်တွေနှင့် ဆက်ဆံရပြန်၏။ နွေးထွေးသည့် မိဘရင်ခွင်၊ နားလည်ပေးမည့် မိသားစု၊ မိမိ ကျွမ်းကျင်သော အမှုကိစ္စများကို စွန့်လွှတ်၍ အသစ်တဖန် ပြန်စရသည့် ဘ၀က မချောမွေ့လှ။

သတိထား ကြည့်ရှုမိစဉ်မှာတော့ အဖေနှင့် အမေ လက်ဆောင်ပေးခဲ့စဉ်ကလို စာအုပ်ကလေးက ဖြူစင် ချောမွေ့ မနေတော့။ ညိုညစ်ညစ် စာရွက်သားတွေက ကြမ်းရှရှ။ နာကြင်မှု၊ ၀မ်းနည်းမှု၊ လွမ်းတ-မှု။ အားငယ်မှု … တွေဖြင့် ပြည့်နှက်နေပြီလား။ ရေးသားမိသော စာလုံးများက ခပ်သော့သော့။ ဒဏ်ရာ ဒဏ်ချက် များစွာ အစွန်းအထင်း များစွာဖြင့် စာတအုပ်လုံး ပိန်းကြမ်း၍ နေချေပြီ။
***
(၃း၂း၂)

စာအုပ်ကလေးက တ၀က်ကျိုးလုပြီထင့်။ တစတစ ဟောင်းနွမ်း၍ လာပြီ။ တခါတရံလည်း ရေးရင်းသားရင်း ဆက်မရေးချင်တော့ လောက်အောင် ငြီးငွေ့မိပြန်၏။ နောက်တခါ စာမျက်နှာ အသစ် ပြောင်းချိန်ထိ ဒီစာအုပ်ကလေးက ခံပါဦးမလားဟုလည်း တွေးမိသည်။ စာအုပ်ကလေး ရုတ်တရက် ပျက်စီးသွားမည်လား … စာမျက်နှာတွေ ကုန်ဆုံးချိန် ရောက်လုနီးပြီလား … ဒါမှမဟုတ် မိမိကိုယ်တိုင်ပင် နွမ်းလျလျ စာမျက်နှာများကို အဆုံးသတ်ဖြစ်မည်လား … ကြိုတင်မသိနိုင်သော အရာများကို စဉ်းစားတွေးတောရင်း အိပ်ပျက်ခဲ့ရသည့် ညဥ့်တာရှည်တို့က များပြားလှစွာ။
***
(၃း၂း၃)

နေ့သစ် ပြောင်းပြီ။
စာမျက်နှာ အသစ်တရွက်ကို ဖျတ်ခနဲ လှန်လိုက်မိသည်။
သြဂုတ်လ၏ မိုးရေစက်များက အိမ်ခေါင်မိုးပေါ် တဖြောက်ဖြောက် … ။
ကြမ်းတမ်းစွာ တိုက်ခတ်နေသည့် လေ၏ အသံက တ၀ှီးဝှီး မြည်ဟည်းနေသည်။
သစ်ပင်တွေက လေလာတိုင်း ရည်ရွယ်ချက်မဲ့စွာ ယိမ်းထိုး လှုပ်ယမ်း နေကြ၏။
မီးခိုးခေါင်းတိုင် ထဲမှာ ခိုတကောင်က ညည်းတွားလျက်။
နေ့သစ်က ခါတိုင်းကဲ့သို့ပင် မထူးခြား။

ညဥ့်ဦးက ဖျော်ထားသော ဘလက်ကော်ဖီ ခါးခါးတခွက်ကို တကျိုက် မော့လိုက်သည်။
အနက်ရောင်ကျကျ ကော်ဖီတခွက်က အေးစက် ခါးသက်လျက်။
ဘ၀သည်လည်း ထိုသို့ပင်လေလား။
ခါးသီးမှု အနက်ရောင်တွေကို သောက်မျိုနေရသည့် အဖြစ်က ရုန်းထွက်ချင်လှပြီ။
တခါတလေတော့လည်း ကျေးဇူးတရားတွေနှင့် ဝေးရာကို ပြေးချင်ပါသည်။

အစွန်းအထင်းမဲ့ စာမျက်နှာအသစ်ကို ခပ်တွေတွေ ငေးကြည့်နေမိသည်။
ထို့နောက် … စာမျက်နှာ အသစ်မှာ စာလုံး အနည်းငယ် စတင် ရေးသားလိုက်၏။

“ကျေးဇူးတင်ပါတယ် အမေ နဲ့ အဖေ …”
***
နိဂုံး

(xးx)

စာမျက်နှာက သစ်သော်လည်း စာအုပ်ကလေးက အိုမင်း ရင့်ရော်၍နေပြီ။
ဘ၀ဆိုသည်မှာ တိုတောင်းလှသည်။
ဘယ်အချိန် ဘယ်ကာလ အဆုံးသတ်မည် မသိနိုင်။
မည်သို့ပင်ဖြစ်စေ …
ထိုစာအုပ်လေး မကုန်ဆုံးမချင်း စာမျက်နှာအသစ်များ ဖြတ်သန်း ကျော်လွှား နေရဦးမည်တည့်။
***

မေဓာဝီ
၂၁၊ သြဂုတ်၊ ၂၀၀၉
၀၀း၀၀ နာရီ

Read More...

Wednesday, August 19, 2009

မြကန်သာတို့ တည်ရာမြေ ...

မြကန်သာ
တောင်ကျချောင်းတေး
ရေ၀င်ပြေးလှည့်
ရေအေးကြည်စွာ
ကန်ပိုင်မာလျက်
*ကြာပေါင်းထုံထုံ
ငှက်မျိုးစုံသည်
ဘုံဝတိံသာ
နန္ဒာပေလော
တူစွ ဟုတ္တာ။ ... ။
***
ဒီခရီးကို သွားရမယ်ဆိုတော့ မသွားခင်ကတည်းက ကြိုတင်ပြီး ရင်ခုန်နေမိတယ်။ သွားရမယ့် ခရီးက သိပ်တော့ မနီးလှပါဘူး။ Cumbria နယ်မြေက Lake District လို့ ခေါ်တဲ့ အရပ်ဒေသပါ။ တောင်တွေ ၀န်းရံထားတဲ့ အလယ်မှာ သဘာဝ ဖြစ်တည်နေတဲ့ ရေကန်တွေ အများကြီး တည်ရှိရာ အရပ်ဒေသမို့ ... "မြကန်သာတို့ တည်ရာမြေ" ... လို့ ကျမက အမည်ပေးထားမိပြီး ငယ်ငယ်က သင်ရတဲ့ မြကန်သာ ကဗျာလေးကို စိတ်ထဲ ရွတ်ဆို နေမိပါရဲ့။

The Lakeland Poets စာအုပ်ထဲက Cumbria ဒေသရဲ့ သရုပ်ဖော် ပန်းချီမြေပုံ

Lake District ကို စပြီးရင်းနှီးခဲ့ရတာက William Wordsworth ကြောင့်ပါ။ ဒီရောက်ကတည်းက daffodil တွေပွင့်ချိန်ဆို ကျမက တချိန်လုံး W. Wordsworth အကြောင်းပြောနေတော့ ကျမအမက ဒီစာအုပ်ကလေး ၀ယ်ပြီး ကျမကို လက်ဆောင်ပေးခဲ့တယ်။

The Lakeland Poets စာအုပ်က Lake District က ကဗျာဆရာတွေရဲ့ ကဗျာတွေကို စုစည်းထားတဲ့ စာအုပ်ပါ။ ကဗျာဆရာတွေရဲ့ အတ္ထုပ္ပတ္တိတွေ၊ သရုပ်ဖော် ပန်းချီတွေ ဝေေ၀ဆာဆာပါတဲ့ ဒီစာအုပ်ကို ဖတ်ပြီးတော့မှ W.Wordsworth ရဲ့ ဇာတိဟာ Lake District မှာလို့ သိခဲ့ရတယ်။ သူတို့ရေးဖွဲ့ထားတဲ့ ကဗျာတွေကို ဖတ်ပြီးတော့ အဲဒီနေရာကို သွားချင်စိတ် ပိုပြင်းပြခဲ့ရပေါ့။
***
ဒီလိုနဲ့ ၁၈၊ သြဂုတ်၊ ၂၀၀၉၊ အင်္ဂါနေ့ မနက် ၈ နာရီ ၂၂ မိနစ်မှာ အိမ်ကစထွက်ခဲ့ကြတယ်။ ကျမတို့ ဘက်ကတော့ ရာသီဥတု သာသာယာယာပါပဲ။ အပူချိန်တက်မယ်လို့လဲ မိုးလေ၀သက ပြောထားတယ်။ ဒါပေမဲ့ Cumbria နယ်ထဲ ၀င်တော့ ရာသီက စပြီး မှိုင်းပျပျ ဖြစ်လာပြီ။ မိုးလည်း ခပ်ဖွဲဖွဲရွာတယ်။ တောင်အနိမ့်အမြင့် ပေါ်မှာ သွယ်တန်း ဖောက်လုပ်ထားတဲ့ လမ်းတွေပေါ် ဖြတ်ပြီး ကားလေးက တရိပ်ရိပ်ပြေးနေတယ်။ တောင်ခိုးတွေက တဝေေ၀ ... ။

တောင်တန်းတွေအဆုံး ... ရေကန်ကြီးတကန်ကို ဗြုန်းဆို မြင်လိုက်ရတယ်။ ၀င်ဒါမီယာ ရေကန်သာတဲ့ ... ။ ၀င်ဒါမီယာကို ရောက်တော့ နေ့လည် ၁၂ နာရီ သာသာရှိနေပြီ။

ဝင်ဒါမီယာ ရေကန်

ဝင်ဒါမီယာ ရေကန်ထဲမှာ ရွက်လှေငှါးစီးချင်ရင် ...

စနေတနင်္ဂနွေ မဟုတ်ပေမဲ့ ကလေးတွေ ကျောင်းပိတ်ရက်မို့ လူတွေ စည်ကားနေတယ်။ ဘဲတွေ ငန်းတွေကို အစာကျွေးလို့ရတယ်။ ကန်တပတ် သင်္ဘောစီးချင်ရင်လဲ ဒီနေရာမှာ စီးလို့ရပါတယ်။

ရေပျော်ငှက်တို့ ခိုနားရာ
ဝင်ဒါမီယာ ကန်တော်သာ

ရ-ရထားကြီး ပျော်ပျော်စီး

တောင်တန်းတို့ အသွယ်သွယ်
ကမ်းစပ်က လှေငယ်
ငှက်ကလေးများ ခိုနားနေတယ် ...

ဝင်ဒါမီယာရေကန်က နာမည်အကြီးဆုံး လူအစည်ကားဆုံးပါ။ ၀င်ဒါမီယာကို နှုတ်ဆက်ပြီး Ullswater (အောလ်စ်ဝေါတား) ရေကန်ဘက်ကို ဆက်သွားကြပါတယ်။ Ullswater ရဲ့ ပုံစံက ရှည်ရှည်သွယ်သွယ်၊ ရေကန်ဘေးတလျှောက် ကားလမ်း ဖောက်ထားတာမို့ ကားပေါ်ကနေ ရေကန်ရဲ့ အလှကို မြင်ရတယ်။ လမ်းတလျှောက်မှာ ကားရပ်နားဖို့ နေရာလေးတွေ မကြာမကြာ တွေ့ရတယ်။

Ullswater ရေကန်

Among the mountains were we nursed, loved Stream!
Thou near the eagle's nest - within brief sail,
I, of his blod wing floating on the gale,
Where thy deep voice could lull me! Faint the beam
(To the River Derwent - W. Wordsworth)

One, the fairest of all rivers, loved
To blend his murmurs with my nurse's song,
And from his alder shades and rocky falls;
And from his fords and shallows, sent a voice
That flowed along my dreams. For this, didst thou
(The Prelude - W. Wordsworth)
Yet once again do I behold the forms
Of these huge mountains, and yet once again
Standing beneath these elms, I hear thy voice,
Beloved Derwent, that peculiar voice
Heard in the stillness of the evening air
Half-heard and half-created.
(The voice of the Derwent - W. Wordsworth)

Ullswater ရေကန်ဆီကို ဆင်းရာ ကျောက်လှေခါး လမ်းကလေး

တောင်တန်း၊ ကျောက်ဆောင်၊ သစ်ပင်
ရေစီးသံတို့ တလွင်လွင်
အေးချမ်းတဲ့ အရပ်ဒေသပင် ...

Upon the mountain's edge with light touch resting,
There a brief while the globe of splendour sits
And seems a creature of the earth; but soon
More changeful than the Moon.
(A Sunset - Samuel Taylor Coleridge)
***
အိမ်ကိုပြန်ပြီ။
ကန်တော်သာများကို ကျောခိုင်းပြီး ... ။
အပြန်လမ်းမှာ သီချင်းလေးတွေ ညည်းဆိုရင်း ... ည ၉ နာရီမထိုးခင်လောက် အိမ်ပြန်ရောက်ခဲ့တယ်။
မျက်စိထဲမှာတော့ တောင်တွေ ကာရံထားတဲ့ အလယ်က ရေကန်တွေရဲ့ မြင်ကွင်း ကပ်ငြိတွယ်တာ ပါလာဆဲ။
***
မေဓာဝီ
၁၉၊ သြဂုတ်၊ ၂၀၀၉
၁၂း၄၁ နာရီ

ရည်ညွှန်း။ ။ အင်္ဂလိပ် ကဗျာများကို The Lakeland Poets စာအုပ်မှ ယူထားပါသည်။

အမှားပြင်ဆင်ချက်။ ။
* မြကန်ကဗျာမှာ ကျန်ခဲ့တဲ့ စာကြောင်းလေးတွေ ထပ်ဖြည့်ထားပါတယ်။
အမှန်ကို ပြန်ပြင်ပေးသူ ကိုဟယ်ရီကို ကျေးဇူးတင်ပါတယ်ရှင်။
(၂၀၊ သြဂုတ်၊ ၂၀၀၉)

Read More...

Monday, August 17, 2009

သျှင်ဥတ္တမကျော် တောလား (၄)

သျှင်ဥတ္တမကျော်၏ ဆယ့်နှစ်ရာသီတောလား ရတု

(၄)
တထာဂတ၊ နှိုင်းဆမမြော်၊ မြတ်ရှင်တော်ကို၊ ပူဇော်ကြရာ၊ အကြောင်းမှာကား၊ ရာသီသမိုက်၊ နွေစရိုက်ဝယ်၊ လေလိုက်သာမော၊ ညှာကြောခိုင်လျော့၊ မြိုင်ကြော့ကြော့မှာ၊ လျော့ကေသာရစ်၊ ရထည်သစ်ကို၊ စနစ်ခေါက်လွင်၊ သမိုက်ဆင်သည်၊ ဘယ်တင်သိုင်းရစ်၊ လှုံထည်သစ်နှင့်၊ နတ်စစ်ကညာ၊ မေခလာလျှင်၊ နန္ဒာသူဇ၊ သုနန္ဒနှင့်၊ စိတြမှန်ကူ၊ ဘုံမြင့်သူတို့၊ နှိုင်းတူဘက်ကင်း၊ တရားမင်းကို ၀ပ်စင်းခယ၊ ပူဇော်ကြ၏၊ ဟေမမြိုင်ခွင်၊ ပျော်မြူးရွှင်သည်၊ သမင်ဒရယ်၊ ယုန်ငယ်စိုင်ဆတ်၊ သုံးလူ့နတ်ကို၊ ဦးညွတ်ကြရာ၊ ဟိမ၀ါဝယ်၊ ပါဏာတိပါတ်၊ ငှက်ခတ်သမား၊ မုဆိုးများလည်း၊ လေးမြားထမ်းကာ၊ တောလည်လာသော်၊ မြတ်စွာသုံးလူ့၊ သဗ္ဗညုကို၊ ဖူးလိုညွှတ်ခ၊ စည်းဝေးကြသည်၊ ဘုမ္မရုက္ခာ၊ အာကာသဓာတ်၊ မိုးနတ်မကျန်၊ ဂုမ္ဘဏ်မကြွင်း၊ ဂဠုန်မင်းနှင့်၊ လေးစင်းအဏ္ဏ၀ါ၊ အာဏာစိုးနှိမ်၊ ရေနန်းအိမ်က၊ နာဂိန္ဒရ၊ ပနန္ဒနှင့်၊ စသည်များစွာ၊ နတ်သူရာတို့၊ ထိန်ဝါသန့်ရှင်း၊ ကိုယ်ရောင်လင်းပ၊ ၀ပ်စင်းကြ၍၊ သကျရှင်တော်၊ သုံးလူ့ဘော်ကို၊ ပူဇော်ညွတ်လာ၊ နတ်ကညာအား၊ စိတ်မှာစွဲကပ်၊ ငှက်ခတ်မုဆိုး၊ အာရုံကိုး၍၊ မြတ်နိုးကြင်နာ၊ ၀မ်းမြောက်စွာနှင့်၊ ပျူငှါသစ်ဆန်း၊ ကြော့ကြငှန်းမှာ၊ တော့သန်းရွေလယ်၊ တဘုန်းမယ်တို့၊ ရွှေကြယ်ရံခ၊ စန်းငွေလသို့၊ ဘ၀တင့်လှိုင်း၊ မြတနှိုင်းသို့၊ ဘက်ဆိုင်းအကုန်၊* တက်လှိုင်းပုံသည်၊ ၀သုန်ရေက၊ ရှိသမျှကို မကမကန်၊ အတန်တန်နှင့်၊ ပြန်ပြန်လှယ်လှယ်၊ ကြင်ရေးချယ်ခဲ့၊ ဆယ်လှော်စံသိန်၊ ဉာဏ်ဖြင့်ချိန်လျက်၊ ဘယ်ခါသက်အံ့၊ အမြွက်သံရှင်၊ သိလိုချင်ခဲ့၊ ကေရှင်မာလာ၊ ထုံဂန္ဓာဝယ်၊ မိလ္လာရည်ရွက်၊ တာသူ့ဘက်မှာ၊ အသက်ပဏ္ဏာ၊ သဆက်ရာလည်း၊ မဟာဇောတိရသ်၊ လောကဓာတ်ဝယ်၊ မျက်မြတ်ရည်မှန်၊ ဘိုးနဂ္ဃံသို့၊ ဖန်ဉာဏ်ယူဆင်၊ တင့်ရေးအင်ကို၊ တွေးထင်ရော်ရမ်း၊ ခက်လွန်လွန်းစွ၊ ထက်စွန်းဘုံပျံ၊ ယုန်ဗိမာန်ကို၊ လက်တံလှမ်းချီ၊ ဖမ်းမမှီသို့၊ မြင့်သီဝေးမြှော်၊ ထင်ရေးရော်၍၊ တော်ညာဝင်ကို၊ လွမ်းရေးပိုခဲ့၊ မြင့်မိုရ်မဏ္ဍလာ၊ ၀တိန်ချာဝယ်၊ တိမ်ပြာကိုးမှတ်၊ ရိုးမည်နတ်လည်း၊ အမြတ်ကျော်ခေါင်၊ ကောဝိညောင်က၊ လွမ်းအောင်သာလင့်၊ ဗျာပွားဆင့်လိမ့်၊ သက်ပင့်ဆွတ်ချိမ့်၊ ကြင်သည်းငြိမ့်မျှ၊ ရွှေအိမ့်ပရမေ၊ လှလွန်းဆွေသာ၊ နောင်ကိုးရာဟု၊ စိတ်မှာမပြယ်၊ အာရုံခြယ်လျက်၊ ရှုဘွယ်တပုံ၊ ယဉ်မျိုးစုံခဲ့၊ ကိုးဂုဏ်လူ့ဆွေ၊ အစိန္တေ၏၊ ခြောက်ထွေရောင်လျှပ်၊ ဣဒ္ဓိပါဒ်ဖြင့်၊ ငှက်ခတ်သမား၊ လူတလွှားတို့၊ မြင်ငြားကုန်ကြ၊ ပီတိကြွ၍၊ လွှတ်ထလေးမြား၊ ကွယ်ရာထားလျက်၊ ဘုရားရှင်ဘုန်း၊ လျှိုးပုန်းရွံ့ကြောက်၊ တောတလျှောက်၌၊ နတ်လျောက်နတ်မှာ၊ သုံးလူ့ချာကို၊ သဒ္ဓါလှုလှု၊ ပူဇော်မှုဖြင့်၊ တောထုတောင်ရိုး၊ ပျပ်ဝပ်ကျိုးသည်။ ။ မုဆိုးချုံက လ,ချောင်းတည်း။
***

A crowd of worshippers hail the great superman. It is summer. In the delightsome forest realm the whistling wind rocks the leaves and branches to and fro.
Megala, Nanda, Thuza and Thunanda bend their aureoled brows at the feet of the righteous King. The tresses of these high-born fairy forms are loosened in sweet disorder and their spotless saris are bravely thrown about their snowy shoulders.
The deer and the hare that gambol and bound in the woodland join the adoring throng. Hunters of fur and feather while roving in the forest approach the Sage. Their hearts spring up in adoration.
The fairy inhabitants of the earth and air and water and wood appear in radiant forms and fall on their faces before the superman.
The sight of the worshipping goddesses thrills the huntsmen with passion and pleasure. The strange ways of the divine-galaxy are full of sex and the spell of sex. They call to mind princesses who move about in the place attended by a train of million maids. They shine clear as the fair bosom of the silver moon engirt by stars of gold. Resplendent as an emerald that darts its luster in a flood of light, they eclipse all that is fair on earth and in water.
The simple swains wonder when the celestial beauties would open their hearts and utter their loves in silvery accents. The love-smitten company lay their lives lowly at the feet of the goddesses as if for priceless gems. Is it worth their while? One may doubt and doubt. But who can tell? They are like those that think to lay hold of the moon with their pigmy hands. This dismal fact flashes upon their faint minds. Mayhap the god of the skies seated on Meru’s brow has inspired in them a hopeless passion. Thus they fondly surmise.
The ravishing looks of the goddesses catch their breath away and put their hearts in a flutter. They still dream of their brides-to-be with winsome airs and graces. The gladful light of the six rays flashing forth from the great Sage dispels their wistfulness. They lay aside their bows and arrows and in utter faith gaze towards Him with adoration together with the fairy worshippers.
***
ဒီနေ့တော့ အသစ်ရေးရမှာ စိတ်မပါသေးလို့ သျှင်ဥတ္တမကျော် တောလားပဲ တင်လိုက်ပါတယ်။ ရာသီဥတု ကောင်းရင် နက်ဖန်ခရီးတခု သွားဖို့ရှိပါသေးတယ်။ ကဗျာစာဆို William Wordsworth ရဲ့ ခြေရာများ ရှိသော အရပ်ဒေသကိုပါ။ သွားဖြစ်ရင်တော့ ပုံလေးတွေနဲ့ ခရီးသွားမှတ်တမ်း ပို့စ်တပုဒ်လောက် တင်ဖြစ်မယ် ထင်တာပါပဲ။
***
မေဓာဝီ
၁၇၊ သြဂုတ်၊ ၂၀၀၉
၆း၃၀ နာရီ

အမှားပြင်ဆင်ချက်။ ။
* ဘက်ဆိုင်းအကုန် ဖြစ်ရမည့်အစား ဘက်ဆိုင်းအကုတ်ဟု မှားရိုက်ထားသည်ကို ပြန်ပြင်ဆင်ထားပါသည်။
အမှားပြင်ပေးသော ဆရာတော် ဦးဥတ္တရဉာဏကို ကျေးဇူးတင်ပါသည် ဘုရား။

Read More...

Sunday, August 16, 2009

ဒီတပတ် စနေခရီးစဉ်

Oxford, Shakespeare, Warwick ...
***
၁၅၊ သြဂုတ်၊ ၂၀၀၉
နံနက် ၉နာရီ ၁၆ မိနစ်

အိမ်ကစထွက်ချိန်မှာ ရာသီကအုံ့ပျပျ။ အေးတော့ မအေးလှပါဘူး။ ကားထဲမှာ မိုးကုတ်ဆရာတော်ကြီး ဟောကြားတဲ့ သစ္စာအနက် ၁၆-ချက် တရားတော်က ပျံ့လွင့်လို့။ လမ်းမှာမိုးဖွဲဖွဲ ခဏတဖြုတ်ရွာတယ်။ တလမ်းလုံး ကားလမ်း အပိတ်အဆို့မရှိ၊ ချောချောမောမောပါပဲ။ တရားနာလိုက် စကားစမြည်ပြောလိုက်နဲ့ တူဝရီးနှစ်ယောက် အောက်စ်ဖို့ဒ်ရောက်တော့ ၁၁ နာရီ သာသာရှိပြီ။

အောက်စ်ဖို့ဒ် ဗုဒ္ဓ၀ိဟာရ ကျောင်း။ အသစ်ပြောင်းထားတာ သိပ်မကြာသေးဘူး။ ကျောင်းဟောင်းထက် နေရာထိုင်ခင်း ပိုပြီးကျယ်ပါတယ်။

ဗုဒ္ဓရုပ်ပွါးတော်ကို သဒ္ဓါကြည်ညို ရိုသေစွာ ရှိခိုးကန်တော့ခဲ့တယ်။

ဆွမ်းစားချိန်။
ဆရာတော် ဒေါက်တာဦးဓမ္မသာမိ၊ တိပိဋကတ် ဆရာတော် ဦးဂန္ဓမာလာနဲ့ သံဃာတော်များ ဆွမ်းဘုဉ်းပေးစဉ်။
သံဃာများ အားလုံး သပိတ်နဲ့ ဘုဉ်းပေးကြပါတယ်။ ဆွမ်းကပ်မယ့်လူတွေ တန်းစီပြီး ဆွမ်း၊ ဆွမ်းဟင်းတွေကို သပိတ်ထဲ ထည့်လောင်းကြရတယ်။

"ဘုန်းကြီး ဆွမ်းစားနေတုန်း ဓာတ်ပုံရိုက်ရင် ၅ ပေါင် ပေးရမယ်" မိုက်ခရိုဖုန်း နဲ့ ဘုန်းဘုန်းက နောက်တယ်။

ဒုလ္လဘ၀တ်တဲ့ ကိုရင်လေးတွေနဲ့ ယောဂီကလေးများ။
အငယ်ဆုံး ကလေးမလေးက အသက် ၈-နှစ်တဲ့။ မြန်မာလို သိပ်မပြောတတ်ပါဘူး။ ဦးဓမ္မသာမိက ကလေးတွေ နားလည်လွယ်တဲ့ စကားမျိုးနဲ့ တရားပြပါတယ်။ ကလေးတွေကိုလည်း မေးချင်တာ မရှင်းတာရှိရင် မေးဖို့ ဆွေးနွေးဖို့ အခွင့်ပေးတယ်။ အားလုံး အချိန်ဇယား အလိုက် တရားထိုင်ကြရတယ်။
"ဒီမှာ တရားထိုင်ရတာ ဘယ်လိုနေလဲ" လို့ ကလေးမလေးကို မေးကြည့်တော့ ...
"good, nice and peaceful" လို့ ဖြေတယ်။ နောက်တပတ် ဆက်နေဦးမယ်တဲ့။ ကြည်နူးစွာ သာဓုခေါ်မိပါတယ်။

စာကြည့်ခန်း/တိုက်။
အင်္ဂလိပ်၊ မြန်မာ၊ ပါဠိ၊ ထိုင်းဘာသာ စာပေကျမ်းဂန်တွေ တပုံတပင်။
စားသောက်ပြီး အားလုံး တရားထိုင်ရတယ်။ သိပ်တော့မကြာလှဘူး။ ၁၅ မိနစ်လောက်ပဲ ထင်ပါရဲ့။ ဆရာတော် ဦးဓမ္မသာမိက အင်္ဂလိပ်ဘာသာနဲ့ တရားချီးမြှင့်တယ်။ ပြီးတော့ ဦးဂန္ဓမာလာက မြန်မာလို တရားဟောပါတယ်။ တရားနာအပြီး ညနေ ၃ နာရီခွဲ လောက်မှာ အောက်စ်ဖို့ဒ်က ပြန်လာခဲ့ကြတယ်။
***
Sheakspeare Country

ရှိတ်စပီးယားရဲ့ ဇာတိဖြစ်တဲ့ Stradford upon Avon အရပ်ကို ခရီးဆက်ကြတယ်။ မြို့ဟောင်းကလေးမှာ အဖြူအမဲ ရှေးအိမ်ဟောင်းလေးတွေကို ခုထိ မပျက်စီးအောင် ထိမ်းသိမ်းထားကြတာ ချီးကျူးစရာ။

ဒါက ရှိတ်စပီးယား ဇာတိချက်ကြွေ အိမ်ဂေဟာ။ အိုမင်း ယိုယွင်းနေပြီ။ ဒါပေမဲ့ ကျားကန်ရင်း လာရောက် ကြည့်ရှုသူတွေကို ဆွဲဆောင်မှု ပေးနေဆဲ။

သက္ကရာဇ် ၁၅၆၄ ခု ဧပြီလမှာ မွေးဖွားပြီး ၁၆၁၆ ဧပြီလမှာပဲ ကွယ်လွန်ခဲ့သူ ကမ္ဘာကျော် စာရေးဆရာ ၀ီလျံရှိတ်စပီးယားရဲ့ အငွေ့အသက်တွေ ဒီအိမ်ကလေးမှာ ရှိနေဆဲလား။ တွေးနေရင်း မြန်မာပြည်က ဦးပုညကို သတိရမိတယ်။ စလေဆရာကြီးရဲ့ ဇာတိမှာရော သူနဲ့ပတ်သက်တဲ့ အမှတ်တရ ဘာများရှိပါလိမ့်။

ပတ်ဘလစ် လိုင်ဘရီ ... တဲ့။ ရှေးဆန်ဆန် ချစ်စရာလေးမို့ အမှတ်တရ ပုံရိုက်ခဲ့တယ်။

အပြင်က ရှေးဆန်နေပေမဲ့ အတွင်းမှာတော့ ခုလို မြင်ရတယ်။

ရှိတ်စပီးယားရဲ့ ပြဇာတ်တွေ ကပြဖျော်ဖြေရာ ပြဇာတ်ရုံအနီး။ ပြဇာတ်ရုံက ပြုပြင်ဆဲမို့ ပုံမရုိုက်ခဲ့တော့ဘူး။

ငန်းတို့ ပျော်ရာ ရေကန်သာ။

ရှိတ်စပီးယား ကြေးရုပ်၊
ကဗျာ၊ စာပေ၊ ပြဇာတ်တွေ ဖန်တီးခဲ့သူ ပြောင်မြောက်တဲ့ အနုပညာရှင် ရှိတ်စပီးယားဆိုတာ ... သူကိုး။

ရှိတ်စပီးယားရဲ့ ဇာတ်ကောင်တယောက် ... Lady Macbeth.
သူ့အကြောင်းက ခုလို ...
Lady Macbeth, wife to the protagonist in Macbeth, is a central character who conspires with her husband to murder Duncan. She later goes mad and dies, possibly through suicide.

ဒါကနောက်ဇာတ်ကောင် Falstaff တဲ့။
Sir John Falstaff is a central character of Henry IV, Part 1, Henry IV, Part 2, and The Merry Wives of Windsor. In the Henry plays, he is "bad angel" to prince Hal, and is eventually rejected by him. He is the lecherous gull of the title characters in Merry Wives. His death is reported in Henry V, although he is not a character in that play. He is perhaps the most famous supporting role in all of Shakespeare.
အရိုးခေါင်းကြီး ကိုင်ပြီး တွေးနေသူက Hamlet.
Prince Hamlet is the central character of Hamlet. He is a prince of Denmark, called on to avenge his father's (Old Hamlet's) murder by Claudius.
***
ရှိတ်စပီးယား ဇာတ်ကောင် အရုပ်တွေမော့နေတာနဲ့ နောက်ကျနေပြီ။ Warwick castle သွားဖို့ အချိန်မရှိတော့ဘူး။ နောက်တခေါက်မှ အချိန်ပေးပြီး အထဲဝင်ကြည့်တော့မယ်။ အခုတော့ အဝေးကပဲ ... ။

***

သူ့တိုင်းပြည်မှာ ရာဇ၀င်ရှိသလို ကိုယ့်တိုင်းပြည်မှာလည်း ရှိတာပဲ။
သူ့တိုင်းပြည်မှာ ပညာရှင်ရှိသလို ကိုယ့်တိုင်းပြည်မှာလည်း ရှိတာပဲ။
ဒါပေမဲ့ ... ဘာကြောင့်များ ...
ကိုယ့်တိုင်းပြည်မှာ ... ... ...
.... .... .... .... .... .... .... ....
.... .... .... .... .... .... .... ....
.... .... .... .... .... .... .... ....
တွေးရင်း တွေးရင်း အတွေးကမဆုံးနိုင်။
ဒီလိုနဲ့ အိမ်ပြန်ရောက်တဲ့ထိပေါ့။
***
မေဓာဝီ
၁၆၊ သြဂုတ်၊ ၂၀၀၉
၈း၀၀ နာရီ

(၀န်ခံချက်။ ။ ရှိတ်စပီးယား ဇာတ်ကောင်များအကြောင်းကို ၀ီကီမှ ယူပါတယ်)

Read More...