Sunday, November 03, 2019

၅၅ နှစ်ပြည့် မင်္ဂလာ ...

 

တရံရောအခါက
ဘဝသစ်ပင်ရဲ့အထက်
အချစ်သစ်ကိုင်းလေး ပေါ်မှာ
ခိုနားခဲ့ကြတဲ့ ငှက်ကလေး နှစ်ကောင်ရှိသတဲ့။

လေထန် မိုးသည်း မုန်တိုင်းထဲမှာ
အတောင်ချင်းယှက် လက်ချင်းတွဲ
အခက်အခဲ ဟူသမျှ
အတူတကွ ဖြေရှင်းကာ
ကျော်ဖြတ်ခဲ့ကြတဲ့ နှစ်များ
ရှည်လျားတွက်စစ်ကြည့်ရင်
၅၅ နှစ် တိုင်ခဲ့ပြီ ... တဲ့။

ချွေးစက် သွေးစက်
နို့ရည်စက်တွေ အရင်းပြုပြီး
ရင်မှထုဆစ်တဲ့ သားသမီးတွေအတွက်
တသက်တာ ပေးဆပ်ခဲ့ရင်း
တဖြည်းဖြည်း ကြီးပြင်းလာခဲ့တဲ့အခါ ...
... ... ...
... ... ...
... ... ...
ခိုလှုံရာ သစ်ပင်ကြီးလည်း အိုမင်း
နားနေရာ သစ်ကိုင်းကလေးလည်း ယိုယွင်း
ဒါပေမဲ့ ...
သူတို့နှစ်ဦးကတော့
အချင်းချင်း .... ဖေးကူရင်း
အချင်းချင်း ... တွေးပူရင်း
အချင်းချင်း ... ထွေးယူရင်း
မျှော်လင့်ခြင်း မနက်ဖြန်အတွက်
ဆက်လက်ရှင်သန်နေကြသတဲ့။
***
မေဓာဝီ
03 Nov 19
00.03

နိုဝင်ဘာလဟာ ကျမတို့ မိသားစုအတွက် အမှတ်တရတွေ ပြည့်နေတဲ့ လတလပါ။ ၁၉၆၄ ခုနှစ် နိုဝင်ဘာ ၃ ရက်နေ့က အဖေနဲ့ အမေရဲ့ ဘဝအစ ... ။ အခုဆို ၅၅ နှစ် ပြည့်ခဲ့ပါပြီ။ ဒီလိုနေ့မှာ မိဘနှစ်ပါးနဲ့ အတူရှိခွင့်ရတာ အလွန်ကို ဝမ်းသာ ကြည်နူး ပီတိ ဖြစ်ရပါတယ်။ အင်မတန်ကုသိုလ်ထူးတယ်လို့လည်း မှတ်ယူမိ ပါတယ်။ 

ငှက်ကလေးတွေကို ချစ်တဲ့ အမေ့အတွက် ငှက်ကလေး နှစ်ကောင်ပုံ ဆွဲပြီး ကဗျာလေးရေးရင်း မျက်ရည်ကျရ တယ်။ ဆပ်လို့မကုန်တဲ့ ကျေးဇူးတရားတွေ အနှိုင်းမဲ့ မေတ္တာတရားတွေ အတွက် ... ကဗျာတပုဒ် ပန်းချီတချပ်နဲ့ ဘယလုံလောက်ပါ့မလဲ။ မပြန်ခင် ကျန်နေတဲ့ ရက်လေးတွေ ... အတူနေရတဲ့ အခိုက်အတံ့မှာ မိဘနှစ်ပါးကို ဝတ်ကြီးဝတ်ငယ် ပြုစုခြင်းနဲ့ပဲ ...ပေးဆပ်နိုင်တာ ခွင့်လွှတ်ပါတော့။ 

Read More...

Tuesday, October 29, 2019

မင်္ဂလာ အရှိဆုံး ...


  ***
မနက်ခင်း
နေမင်းကတောက်ပတယ်။
.
 
သစ်ပင်အထက် ဆင်းတက်ပြေးလွှား
ရှဉ့်ညိုလေးများရယ် ...
​.
 
ရေကန်သာထဲ လူးလာကူးသွား
ဘဲကလေးများရယ် ...
.
 
မြက်ခင်းစိမ်းပေါ် နှစ်ဖော်ယှဉ်လျက်
အစာရှာထွက်တဲ့ ကြိုးကြာငှက် မောင်နှံရယ် ...
.
 
သစ်ကိုင်းကြီးပေါ် အဖော်မပါ
တကောင်သာတည်း ထီးထီးကြီးရပ်
သိန်းငှက်ကြီးရယ် ...
ဘယ်သူတွေ ဘယ်လောက်ပဲ လှပပါစေ ...
ဘယ်အရာတွေ ဘယ်လောက်ပဲ သာယာပါစေ ...
.
 
 အမေ့ရဲ့ ပြုံးနေတဲ့ နှုတ်ခမ်း
အဖေ့ရဲ့ သွက်နေတဲ့ ခြေလှမ်းတွေက
အားလုံးထက် သာ
မင်္ဂလာအရှိဆုံး ဖြစ်တယ်။
***

 မေဓာဝီ
29 Oct 19
11.02

Read More...

Saturday, October 26, 2019

လိပ်ပြာ

 
ပန်းပွင့်အထက်
ဆင်းသက်မနား
ခြေသွားလမ်းမှာ
နေရာမှား၍ နားခဲ့သည်။
***
မေဓာဝီ
၂၆ အောက်တိုဘာ ၂၀၁၉
၁၁း၁၈

Read More...

Thursday, October 24, 2019

နံနက်ခင်း၏ မနှင်းဆီ


 ***
နှင်းဆမ်းသည့်ပန်း
လန်းသည့် တပွင့်
ဝင့်သည့် တဖူး
ခူးမဆွတ်သာ ...
ဝါသော နှင်းဆီ
ကြည်သော နှလုံး
ပြုံးသော နှုတ်ခမ်း
နမ်းခွင့် တရှိုက်
လှိုက်၍ရင်ခုန်
ကြုံခဲ့သည်။
***
မေဓာဝီ
24.10.19
10.35

Read More...

Monday, October 21, 2019

နံနက်ခင်းကို ဆောင်ကြဉ်းခွင့်ပြုပါ


 ***
ဒီနံနက်ခင်းမှာ သတင်းကောင်းတခုနဲ့
နိုးထလာခဲ့တယ်။
မနက်စာပြင် ဆွမ်းတော်တင်ချိန်မှာ
အဖေက စာဖတ် - အမေက ဘုရားရှိခိုး
အဆိုးတွေ ဖယ်ခွာစေကြောင်း
ဆုတွေတောင်းကောင်း တောင်းလိမ့်မယ်။
စားသောက်ပြီး လမ်းလျှောက်ထွက်
မြက်ခင်းစိမ်း နဲ့ ရေကန်ပြာ
ဘဲလေးတွေနဲ့ ကြိုးကြာ
သာယာတဲ့ ရှုခင်း
လမ်းးလျှောက်ရင်း ငေးမော ...
ကျောခိုင်းရမှာ နှမြောနေမိသေး။
နံနက်ခင်း နေမင်းက မပူပြင်း
နံနက်ခင်း လေညင်းတဝ ရှူသွင်း
ငြိမ်းချမ်းခြင်း တခဏ
ကိုယ့်ဒေသဆီ ထုပ်ပိုးသယ်ယူလို့မရတဲ့
သဘာဝရဲ့ လက်ဆောင်များ
စံစားရင်း ... ခံစားရင်း
နံနက်ခင်းကို ဆောင်ကြဉ်းသွားချင်တယ် ... ။
***
မေဓာဝီ
21.10.19
09.48

Read More...

Friday, July 19, 2019

အမေ ... သို့ ...

အမေ ... သို့ ... 


 လက်ဆယ်ဖြာမိုး
ဦးနှိမ်ချိုး၍
ရှိခိုးနေသော
အမေအို ... ။
.
ဖခင်ကိုယ်စား
တိုင်းပြည်အားကို
ညည်းတွားခြင်းကင်း
ထမ်းဆောင်ခြင်းဖြင့်
လက်ကမ်းဆင့်သည့် အမေအို။
.
အမေ့ရင်ထဲ
သောကဖွဲမီး
ဖိစီးတောက်လောင် နေမည်လော။
.
မငြိမ်းချမ်းသေး
တိုင်းပြည်ရေးတွက်
ရတက်မအေး နေသလော။
.
တိုင်းပြည့်ကြမ္မာ
ကိုယ့်ကြမ္မာဟု
ခံကာ ခါးစီး
အားမာန်ကြီးသည့်
တိုင်းပြည့်အမေ
တွေ့မြင်လေတိုင်း
ကြမ္မာရိုင်းကို
အတိုင်းမသိ မုန်းမိသည်။
***

 မေဓာဝီ
19.07.19
11.12

Read More...

Monday, May 27, 2019

အိပ်ပျော်နေတဲ့ ကြောင်ကလေး



အိပ်ပျော်နေတဲ့ ကြောင်ကလေး
***
ကြောင်ကလေးက အိပ်ချင်ပြီ၊
ဂျီကျလို့ အော်မြည်။
မီ မီ မီ ဒီလာခဲ့၊
စာဖတ်လှည့်ပါကွယ့်။
စာဖတ်ပျင်းတယ် အိပ်တော့မယ်၊
မတားနဲ့တော့ကွယ်။
စာအုပ်တွေ ပုံကာပေး
ကြောင်လေးအိပ်လို့ကွေး။
***
မေဓာဝီ
27.05.19
21.51

Read More...