Friday, April 28, 2017

စာ ... ဗျို့ ... စာ


***
မီးခိုးပြာရောင် ယူနီဖောင်းဝတ် လူတယောက်ဆီက စက်ဘီးဘဲလ်သံလေးနဲ့ စာ ဗျို့ စာ ... ဆိုတဲ့ အသံ ... မကြားရတာ အတော်ကြာခဲ့ပြီပေါ့ ... ။
.
ငယ်ငယ်က နွေကျောင်းပိတ်ပြီဆိုရင် သူငယ်ချင်းတွေဆီကို စာတွေရေးပြီး ပို့ကြရတယ်။ နယ်မှာနေတဲ့ ချစ်ခင်ရတဲ့ မောင်နှမ ဝမ်းကွဲတွေနဲ့ စာတွေ အပြန်အလှန် ရေးကြရတယ်။ ရန်ကုန်မြို့တွင်းပဲ ဖြစ်ဖြစ် နယ်အဝေးပဲ ဖြစ်ဖြစ် တယောက်နဲ့ တယောက် မတွေ့နိုင်ကြချိန်မှာ စာရေးပြီးသာ ဆက်သွယ်ကြရတာပေါ့။ အိုက်စပ်စပ်နဲ့ ငြီးငွေ့ဖွယ်ကောင်းတဲ့ နွေနေ့လည်ခင်းတွေမှာ စာပို့သမားရဲ့ စက်ဘီးဘဲလ်သံဟာ အင်မတန် သာယာတာကလား။ ကိုယ့်နာမည်တပ်ထားတဲ့ စာတစောင်တလေ ပါလာလို့ကတော့ အဲဒီနေ့ဟာ ပျော်စရာကောင်းတဲ့ နေ့အဖြစ် ဒိုင်ယာရီထဲ ရေးမှတ်ထားရတော့တာပဲ။ 


ကိုယ့်ဆီစာလာပြီးတော့ ကိုယ်ကတဖန် စာပြန်ရမယ့် အလုပ်တခု တိုးလာပါတယ်။ စာရေးစက္ကူ၊ စာအိတ်၊ တံဆိပ်ခေါင်းဆိုတာတွေကို ကိုယ့်မုန့်ဖိုးလေးတွေနဲ့ ဝယ်ထားရတာပေါ့။ စာအိတ်ကလေးကို ကော်သုတ် ပိတ်၊ တံဆိပ်ခေါင်းလေး ကပ်ပြီး အိမ်နားက စာတိုက်ပုံးနီနီလေးထဲ ကိုယ့်စာလေး ထည့်ပြီးသွားချိန်မှာ ပြီးပြည့်စုံတဲ့ ခံစားချက်မျိုးနဲ့ ကြည်နူးလို့ပေါ့။ နောက်တခါ လာမယ့်စာကိုလည်း အဲဒီနေ့က စပြီး မျှော်လို့ရပြီလေ။ 
.
.ဒီနှစ် နွေရာသီ သင်တန်းက level 4 တွေရဲ့ ပြဋ္ဌာန်းစာအုပ်မှာ penfriend သို့ ပေးစာ သင်ရတဲ့အခါ penfriend ဆိုတာ ဘာလဲ မပြောပြခင် အင်တာနက် အီးမေးလ် မရှိတဲ့ ဟိုခေတ်က စာပေးစာယူ လုပ်ကြရတဲ့ အကြောင်းလေး အရင် ပြောပြရတယ်။ Penfriend လို့ပြောရင် ဒီခေတ်လူငယ်တွေ သိပ်သိကြတော့မယ် မထင်ဘူး။ ကလေးတွေဆို ပိုဝေးတာပေါ့။ သူတို့လေးတွေ သိတာက ဖေ့စ်ဘွတ် မိတ်ဆွေလို အွန်လိုင်း မိတ်ဆွေတွေလောက်သာပဲ မဟုတ်လား။
.
Penfriend ဆိုတာကတော့ အခုအွန်လိုင်းမိတ်ဆွေတွေလိုပါပဲ။ အပြင်မှာ မမြင်ဖူးဘဲ နေ့စဉ်ထုတ်သတင်းစာတွေ၊ အပတ်စဉ်ထုတ်၊ လစဉ်ထုတ် မဂ္ဂဇင်းတွေမှာပါတဲ့ မိတ်ဆက်ကဏ္ဍကနေ စာပို့ မိတ်ဆက်ရင်း ခင်မင်ရင်းနှီးသွားကြတဲ့ မိတ်ဆွေတွေ ဆိုပါတော့။ နေထိုင်ရာ မြို့ ရွာ ဒေသ နိုင်ငံ တူချင်မှ တူမယ် အသက်အရွယ် အတန်းပညာ တူချင်မှ တူမယ် ပေါ့။ ကျောင်းသားလေးတွေကို အဲဒီအကြောင်း ပြောပြတော့ သူတို့မှာ တအံ့တသြကို ဖြစ်လို့။
.
နည်းပညာတွေ တစတစ တိုးတက်လာတာနဲ့ အမျှ penfriend ခေတ်က ကုန်သွားသလို စာတိုက်ကနေ စာပို့ကြတဲ့ အလေ့အထလေးတွေလည်း ပျောက်ကွယ်လု ဖြစ်လာပါတော့တယ်။ မွေးနေ့ဆုတောင်းကတ်တွေ၊ ခရစ်စမတ်နဲ့ နှစ်သစ်ကူး ဆုတောင်း ကတ်လေးတွေ၊ ကိုယ်ရောက်ရာ ဒေသရဲ့ အမှတ်တရ ပို့စ်ကတ်တွေ စာတိုက်ကနေ ပို့ကြတဲ့ အလေ့အထဆိုတာလည်း မရှိသလောက် ဖြစ်သွားပါပြီ။ စာပို့သမားဆီက တဆင့် ကိုယ့်နာမည်နဲ့ တကူးတက လာမယ့်စာဆိုတာ အရင်လို မျှော်စရာမလိုတော့ဘူး။ စာတိုက်ကြီးက မဟုတ်တဲ့ တခြား စာပို့ဝန်ဆောင်မှုတွေကနေ တခါတရံ ရောက်လာတဲ့ စာအုပ် ပါဆယ်လောက်ပဲ ရှိပါတော့တယ်။ 

UK က ကျေးရွာစာတိုက်လေး

လွန်ခဲ့တဲ့ ဆယ်နှစ်ဝန်းကျင် အင်္ဂလန်မှာ နေတုန်းကတော့ ကိုယ့်အတွက် လာတဲ့ စာဆိုလို့ ကိုယ့်နာမည်နဲ့ ဘဏ်က တလတခါ ပို့ပေးတဲ့ စတိတ်မန့်ရယ်၊ ကျောင်းကလာတဲ့ ကြေငြာချက် အသိပေးချက် စာတွေရယ်၊ ကြော်ငြာတချို့ရယ်ပဲ ရှိပါတယ်။ သူငယ်ချင်းတွေနဲ့က အီးမေးလ် ဖုန်း စတာတွေနဲ့ အလွယ်တကူ ဆက်သွယ်နိုင်နေမှတော့ အလုပ်ရှုပ်တဲ့ စာပို့ စနစ်ကို ဘယ်သူက တကူးတက လုပ်တော့မှာတဲ့လဲ။ ဒါတောင် ကျောင်းက အဆိုင်းမန့်ကို စာတိုက်က ပို့ခိုင်းသေးတယ်။ စာတိုက်သွားဖို့ပျင်းတဲ့ ကျွန်မက စာရွက်တွေကို စကန်ဖတ်ပြီး အီးမေးလ်နဲ့ ပို့လိုက်တယ်၊ ပြီးရော။
.
ကိုယ်ကသာ အလုပ်ရှုပ်မခံချင်ပေမဲ့ တချို့ အင်္ဂလိပ် အမျိုးသမီး အမျိုးသားကြီးတွေဟာ ခုချိန်ထိ စာတိုက်ကနေ စာတွေ ပို့စ်ကတ်တွေ၊ မွေးနေ့ဆုတောင်း ကတ်လေးတွေ ပို့နေကြတုန်းပါပဲ။ ဦးရီးတော်ရဲ့ လူနာတွေပို့ပေးတဲ့ ပို့စ်ကတ်လေးတွေ ခရစ်စမတ် နဲ့ နှစ်သစ်ကူးဆို အိမ်က မီးလင်းဖိုအပေါ်မှာ တန်းစီတင်ထားနေကျ။
.
အဲဒီလိုလေးတွေ မြင်ရင်တော့ ကြည်နူးရပါတယ်။ တကယ်တော့ အီးမေးလ် ကလစ်တချက်၊ မက်ဆေ့ခ်ျ လက်ညှိုးလေး တဖိထက် စာတိုက်ကနေ ရောက်လာတဲ့ စာလေး တစောင်ဟာ ကိုယ့်အပေါ် အလေးအနက် ထားမှုကို ပိုပြီးပေါ်လွင်စေပြီး ပျော်ရွှင်မှုကို ဖြစ်စေတာပေါ့နော်။

အကောင်းဆုံး ဆုရ

အပေါ်က ပြောခဲ့တဲ့ level 4 ကျောင်းသားလေးတွေရဲ့ penfriend သင်ခန်းစာမှာ penfriend ဆီ စာရေးဖို့ တကယ့် စာအိတ် တံဆိပ်ခေါင်း စာရေးစက္ကူနဲ့ ရေးခိုင်းပြီး အကောင်းဆုံးရေးနိုင်သူကို အမှတ်တရ ဆုချီးမြှင့်မယ်လို့ ပြောထားတော့ အပြိုင်အဆိုင် ရေးကြပါတယ်။
.
စာသာရေးတတ်တာ စာတိုက်က စာပို့တဲ့ ကိစ္စမျိုးနဲ့ မရင်းနှီးတဲ့ ကလေးတွေမို့ တချို့က တံဆိပ်ခေါင်း မဝယ်တတ်ဘူး။ တချို့ကလည်း အခွန်တံဆပ်ခေါင်း ကပ်ထားတယ်။ သူတို့လေးတွေကို စာအိတ်မှာ နာမည် လိပ်စာ စသဖြင့် ဘယ်လိုရေးရတယ် ဆိုတာက အစ ပြောပြရတယ်။ မနေ့ညက သူတို့စာလေးတွေ ထိုင်ဖတ်၊ အမှတ်ပေးပြီး ဒီကနေ့ ဆုပေးတော့ ကလေးတွေ ပျော်ကြတာပေါ့။

ကျွန်မကတော့ သူတို့စာအိတ်လေးတွေကို ဖတ်ရင်း ကြည့်ရင်း ငယ်ငယ်က မောင်နှမဝမ်းကွဲတွေ၊ သူငယ်ချင်းတွေနဲ့ အပြန်အလှန် စာရေးခဲ့ကြချိန်တွေရယ် ... နေ့လည်နေ့ခင်း မျှော်ခဲ့ရတဲ့ စာဗျို့ စာ ... ဆိုတဲ့ အသံရယ်ကို ပြန်လည် လွမ်းဆွတ် နေမိပါတော့တယ်။
***
မေဓာဝီ
၂၈ ဧပြီ၊ ၂၀၁၇

Read More...

Wednesday, April 05, 2017

လာဗင်ဒါအရပ်က ကမ်းခြေလမ်း (၄) နိဂုံး


(၈)

အဲဒီအိမ်ကလေးမှာ နေခဲ့တဲ့ကာလတလျှောက် ကြည်နူးခဲ့ရချိန်လေး ကတော့ သူ့ အလုပ်အားရက်မှာ အိမ်နားက Kallang မြစ်ကမ်း နံဘေးဆီ လေညင်းခံ လမ်းလျှောက်ကြချိန်ကလေးပါပဲ။ မြစ်ကမ်းနားက မြက်ခင်းလေးပေါ် ထိုင်ပြီး နှစ်ယောက်သား စကားစမြည်ပြော၊ ယူလာတဲ့ စားသောက်စရာလေးတွေစား၊ မြစ်ရေပြင်ထဲက လှေလေးတွေ ... ငါးမျှားနေသူတွေ ... အပြေးလေ့ကျင့်နေသူတွေကို ငေးမော ... အဲဒီ အချိန်လေးတွေ ကုန်သွားမှာကို နှမြောနေမိတယ်။
.

သာယာလှပတဲ့ အပမ်းဖြေနေရာ ဖြစ်နေတဲ့ Kallang မြစ်ကမ်းခြေဟာ တချိန်က ရွှံ့ညွန်တွေ ထူထပ်ပြီး ညစ်ထေးတဲ့ မြစ်ရေတွေ စီးဆင်းခဲ့တယ်ဆိုတာ မယုံနိုင်စရာပါပဲ။ လူတွေရဲ့ စွမ်းအားဟာ တစုံတရာကို ပျက်စီးအောင် ဖျက်ဆီးနိုင်သလို ကောင်းမွန်အောင်လည်း တည်ဆောက်ယူလို့ ရတယ်ဆိုတာကို မြစ်ကမ်းနံဘေးမှာ ထိုင်ငေးရင်း တွေးခဲ့ဖူးတယ်။
.

သူများတွေထက် အနှစ် ၂၀ လောက် နောက်ကျပြီးမှ ဘဝတခု အတူတကွ တည်ဆောက်ခဲ့ရသူတွေမို့ အတူနေရချိန်လေးတိုင်းဟာ အဖိုးတန်လှပါတယ်။ နှစ်ယောက်လုံးက စာပေချစ်မြတ်နိုးသူတွေ ဖြစ်နေတာ၊ အပေါ်ယံ ရွှေမှုန်ကြဲတဲ့ ပကာသနတွေကို မနှစ်သက်တာ၊ ရှော့ပင်ထွက်ရတာကို ဝါသနာမပါတာ ... နိုင်ငံရေး ဘာသာရေး စာပေရေးရာ အယူအဆချင်း တော်တော်များများ တူကြတာတွေကို ကြည့်ရင် များသောအားဖြင့် စိတ်သဘောချင်း တိုက်ဆိုင်တယ် ဆိုနိုင်ပေမဲ့ ကြီးပြင်းခဲ့တဲ့ ပတ်ဝန်းကျင်နဲ့ နေထိုင်မှုစရိုက်ချင်း မတူကွဲလွဲမှုလေးတွေလည်း အထိုက်အလျောက်တော့ ရှိကြတာပါပဲ။ ဒါတွေကို နားလည်စွာ သည်းခံ ညှိနှိုင်းရင်း နှစ်ယောက်သား အတိုးအလျှော့ လုပ်ပြီး နေကြရပါတယ်။
.

သူက သဘောကောင်းပြီး လူချစ်လူခင်များပေမဲ့ တချို့ကိစ္စတွေမှာ အားမနာဘဲ စာအုပ်ကြီးအတိုင်း တွေးတတ် လုပ်တတ်သူမို့ တခါတလေတော့ စိတ်ညစ်ရတယ်။ သူကလည်း စိတ်ကောက် ဂျီကျ ဇီဇာကြောင်တတ်တဲ့ ဇနီးသည်ကို တခါတလေ စိတ်ညစ်မှာပါပဲ။
.
ဘယ်လိုပဲဖြစ်ဖြစ် တယောက်နဲ့ တယောက် ညှိနှိုင်းရင်း သည်းခံရင်း နားလည်မှုတွေနဲ့ နေ့ရက်လေးတွေ ဖြတ်သန်းခဲ့တာ ခုဆိုရင် ၂ နှစ်နဲ့ တစ်လ ရှိခဲ့ပါပြီ။ တနှစ် တလပြည့်တုန်းက ရေးခဲ့သလိုပဲ သူ့ဆီလိုက်လာတဲ့ နေ့ကစပြီး အရာရာကို ရောင့်ရဲ သည်းခံနိုင်အောင် စိတ်ကိုပြင်ဆင်ထားခဲ့တာမို့ အထိုက်အလျောက်တော့ ခံနိုင်ရည် ရှိနေခဲ့ပါပြီ။
***
(၉)

တနေ့က ရောက်ခဲ့တဲ့ ဂျာနယ်ကျော်မမလေး နှစ် ၁၀၀ ပြည့်အခမ်းအနားမှာ သူလိုလူ ဆိုတဲ့ စာအုပ်ကလေး ထပ်ဝယ်ဖြစ်ခဲ့တယ်။ အဲဒီစာအုပ်ကလေးကို စပြီး ဖတ်ခဲ့မိချိန်က ဆယ်ကျော်သက်အရွယ်။ အကြိမ်ကြိမ် အထပ်ထပ် ဖတ်ရင်း သူလိုလူဟာ ဆယ်ကျော်သက် မိန်းကလေးတယောက်ရဲ့ ဖတ်စာ ဖြစ်ခဲ့သလို စိတ်ကူးယဉ်စရာလည်း ဖြစ်ခဲ့တယ်။
.

ဂျာနယ်ကျော်ဦးချစ်မောင်ကို အထင်ကြီး လေးစားသလို ဂျာနယ်ကျော် မမလေးကိုတော့ မိန်းမသားချင်းမို့ ပိုပြီး ကရုဏာသက် လေးစား ချစ်ခင်မိတယ်။ ဘယ်တော့မှ မမေ့နိုင်တဲ့ အခန်းကတော့ ဒေါ်မမလေး ထမင်းတရက် အငတ်ခံခဲ့ရတဲ့ နေ့ပါပဲ။ ငယ်ငယ်ကတည်းက ခုချိန်ထိ အဲဒီအခန်း ဖတ်တိုင်း ရင်ထဲမှာ ကြေကြေကွဲကွဲ ခံစားခဲ့ရတယ်။
.

ဒါကြောင့် အခက်အခဲတွေ ဘယ်လောက်ကြုံကြုံ ဒေါ်မမလေးလို ထမင်းတော့ အငတ်မခံဖူးသေးဘူးမို့ အများကြီး သာသေးတယ်လို့ စိတ်ကို အားတင်းထားဖြစ်တယ်။ အသိပညာ အတတ်ပညာမှာ ဂျာနယ်ကျော် မမလေးကို မယှဉ်နိုင်ပေမဲ့ ခင်ပွန်းသည် အပေါ်ထားတဲ့ ချစ်ခြင်းမေတ္တာမှာတော့ ယှဉ်နိုင်ချင်မိပါတယ် ... ။
.
သူ့အပေါ် ထားရှိတဲ့ ချစ်ခြင်းမေတ္တာတွေနဲ့ သူ့ ရင်ကို နွေးထွေးစေချင်တယ်၊ သူ့စိတ်ကို အေးမြစေချင်တယ် ... သူ့ ဂုဏ်ရောင်တွေ လင်းလက်တောက်ပ စေချင်တယ်။ တခြားဘာမှ သူ့ဆီက မလို ... မတောင်းဆိုချင်ပါဘူး ... ဒါတွေကို သူ သိရင် ပြီးတာပါပဲ။
***
(၁၀)

လာဗင်ဒါအရပ် ကမ်းခြေလမ်းက အိမ်ကလေးမှာ စတင်ခဲ့ကြတဲ့ နှစ်ယောက်ဘဝဟာ ခုချိန်ထိ အတူကြာရှည် နေထိုင်ခွင့် မရခဲ့သေးပါဘူး။ အတိတ်ဘဝ ကံကြောင့် ပိယေဟိ ဝိပ္ပယော ကြရတာမို့ အနာဂတ်မှာ အတူ ဆုံနိုင်အောင် တတ်နိုင်သလောက် ကုသိုလ်အတူ ပြုကြမယ်လို့ သဘောတူထားကြပါတယ်။ ဘဝဆက်တိုင်း မခွဲမခွါဖို့ဆိုတာ သဒ္ဓါ၊ သီလ၊ စာဂ၊ ပညာ ... အတူတူ ညီမျှပါမှ ဖြစ်နိုင်မှာ မဟုတ်လား။ 
.

လောလောဆယ် နှစ်ယောက်အတူ မနေနိုင်ခင်မှာ သူ့ကို ခုလိုကဗျာလေး ရေးပေးခဲ့ဖူးတယ်။
.
“သို့ ... / မှ ... ချစ်သူ ...”
.
သတိရရင်
ကောင်းကင်ကို မော့ကြည့်
တိမ်တွေလို ရှိနေမှာ ... ။
.
နီးတခါ ဝေးတလှည့်
အတူရှိခဲ့တဲ့ နေ့များ
အားတဲ့အခါ လွမ်းနေပါ ... ။
.
ပြက္ခဒိန်တခုဟောင်း
ရက်မှ နှစ် ပြောင်းသွား
အမှတ်တရနေ့များကို သတိရပါ ... ။
.
အလုပ်ခွင်မှာ ဂရုစိုက်
အိပ်ငိုက်ရင် သီချင်းဆို
စိတ်ကို ပျော်အောင် ထားပါ ... ။
.
ပြန်ဆုံစည်းမယ့်ရက်
လက်ချိုးရေတွက်ကာ
စိတ်ကူးနဲ့ ကြည်နူးပါ ... ။
.
သတိရရင် ...
မြေပြင်ကို ငုံ့ကြည့်
အရိပ်ကလေးလို ရှိနေမှာ ... ။ 
***
ချစ်တဲ့
မေ

***
ပြီးပါပြီ။

မေဓာဝီ
၅ ဧပြီ ၂၀၁၇
(၂ နှစ်တလ မင်္ဂလာ  အမှတ်တရ)

Read More...

Tuesday, April 04, 2017

လာဗင်ဒါအရပ်က ကမ်းခြေလမ်း ... (၃)


(၆)


လန်းခဲ့တဲ့ ကံ့ကော်ပန်းလေး
နွမ်းလို့ သွားတဲ့အခါ …
လွမ်း မလား
ပန်း … တရားနဲ့သာ ဖြေ … ။
***
အဲဒီတုန်းက အိမ်ကကံ့ကော်ပင်ကြီးမှာ ပန်းတွေပွင့်နေခဲ့တယ်။ စင်္ကာပူကိုသွားဖို့ လေဆိပ်ဆင်းမယ့်မနက် ကံ့ကော်ပင်ကြီး အောက်မှာ ထိုင်နေတုန်း … အိမ်က မိန်းကလေးတယောက်က ကံ့ကော်ပန်းလေးတပွင့် ခူးပြီးလာပေးတယ်။ အစိမ်းရင့်ရောင် အရွက်လေး နှစ်ရွက်၊ ဖြူလွနေတဲ့ ပွင့်ဖတ်လေးတွေ ခြံရံထားတဲ့ အလယ်မှာ အဝါရောင် ဝတ်ဆံမွမွလေးတွေနဲ့ ကံ့ကော်ပန်းပွင့်လေးဟာ မထိရက် မကိုင်ရက် မနမ်းရက်စရာ ကောင်းလောက်အောင် နုပျို လှပ လန်းဆန်းလို့ … ။
.

ကြည့်လေ … ကံ့ကော်ပန်းလေးဟာ သနပ်ခါး ပါးကွက်ကျားလေး လူးထားတဲ့ အဖြူအစိမ်းဝတ် ကျောင်းသူလေး တယောက်နဲ့ မတူဘူးလား။ ပျိုမြစ်ခြင်း၊ လတ်ဆတ်ခြင်း၊ ဖြူစင်ခြင်းတွေ ထုံသင်းနေတဲ့ ပန်းကလေး … ။ ပန်းလေးတွေကို ချစ်မြတ်နိုးပေမဲ့ ပန်းမပန်တတ်သူမို့ ပန်းကလေးကို အင်္ကျီရင်ဘတ်မှာ ဖွဖွထိုးပြီး ခရီးစဉ်တလျှောက် တပါတည်း ခေါ်လာခဲ့ပါတယ်။
.
ဘယ်လောက် လန်းဆန်းတဲ့ ပန်းလေးပဲဖြစ်ပါစေ … တချိန်ချိန်မှာတော့ နွမ်းရမှာ သဘာဝပါပဲ။ မနက်ခင်းတုန်းက လန်းဆန်းလှပပါတယ် ဆိုတဲ့ ကံ့ကော်ပန်းပွင့်လေးဟာ အချိန်တွေကြာလာတာနဲ့ အမျှ တစတစ ညှိုးနွမ်း သွားတော့တယ်။ နွမ်းနေပေမဲ့ ရနံ့လေး သင်းပျံ့နေဆဲ ကံ့ကော်ပန်းလေးကို လွှင့်မပစ်ရက်လို့ အခန်းထဲက စားပွဲလေးပေါ် တင်ထားလိုက်တယ်။
.

ဒီလိုနဲ့ တဖြည်းဖြည်း ပန်းကလေးဟာ ညှိုးရာက ရော်၊ ရော်ရာက နွမ်း၊ နွမ်းရာက ခြောက်သွားပါတော့တယ်။ ညှိုးရော် နွမ်းခြောက်နေတဲ့ ပန်းခြောက်ကလေးကို ကြည့်ပြီး ဟိုအရင် စိုပြေလန်းဆန်းခဲ့တဲ့ ဘဝကို ပန်းကလေးများ တမ်းတ လွမ်းဆွတ်နေမလားရယ်လို့ စိတ်ကူးယဉ် တွေးနေမိသေးတယ်။ ဒါကြောင့်လည်း ဟိုအစမှာပါတဲ့ ကဗျာလေး ရေးမိသွားတာပါ။
.
ပန်းလေးကို တရားနဲ့သာ ဖြေ ... လို့ ရေးခဲ့သူ ကိုယ်တိုင်က တရားနဲ့သာ ဖြေခဲ့ရတဲ့ နေ့တွေကို ကိုယ်တိုင်ကိုယ်ကျ ကြုံခဲ့ရတဲ့အခါ … ခြောက်နွမ်းသွားတဲ့ အဲဒီကံ့ကော်ပန်းလေးကို သတိရမိပါတယ်။ ဘဝမှာ ပိုင်ဆိုင်ခွင့်ရတဲ့ ကံ့ကော်ပွင့်တွေထဲ … အဲဒီကံ့ကော်တပွင့်ကိုတော့ အမြဲမှတ်မှတ်ရရ ရှိနေဦးမှာပဲ။
***
(၇)
စင်္ကာပူနိုင်ငံ စရောက်တဲ့ ပထမဆုံးညဟာ ဘယ်တော့မှ မမေ့နိုင်စရာပါ။ ခေါင်းအုံးလေး တလုံးကို နှစ်ယောက်အတူ အုံးခဲ့ရတယ်လို့ ဆိုရင် ရိုမန်တစ် ဖြစ်အောင် ဒါမှမဟုတ် ဇာတ်နာအောင် ပြောတယ်လို့ ထင်ကြပါလိမ့်မယ်။ တကယ့်ဘဝက အဲဒီလိုပါပဲ။ ရောက်ရောက်ချင်း ခေါင်းအုံးအသစ် မဝယ်ဖြစ်လို့ ခေါင်းအုံးလေးတလုံးကို တယောက်တဝက် မျှပြီး အုံးခဲ့ရတယ်။
.
ရောက်ရောက်ချင်း အခန်းထဲမှာ အဲကွန်းဖွင့်လို့ရအောင် by pass လုပ်မယ်ဆိုပြီး သူ ပြောခဲ့တာဟာ တကယ်က timer ဆီ အဝင်ကြိုးကို ဖြုတ်ပြီး ပလပ်မှာ တိုက်ရိုက် ထိုးလိုက်တာပဲ။ အဲဒီရဲ့ အကျိုးဆက်ကတော့ သူကြီးမိန်းကလေးဟာ အဲကွန်း ပလပ်တအုံလုံးကို အဖြုတ် အတပ် မလုပ်နိုင်အောင် တိပ်နဲ့ ပိတ်လိုက်ပါတော့တယ်။
.


စိတ်မွန်းကျပ်ခဲ့ရတဲ့ နေ့တွေဟာ ဒိုင်ယာရီထဲ မှတ်တမ်းတင်ထားစရာ မလိုဘဲ ဦးနှောက်ထဲ စွဲမြဲနေအောင် မှတ်မိနေပါတယ်။ တိုက်ခန်းလေးထဲမှာ တစိမ်းတရံစာတွေနဲ့အတူ စုပေါင်းနေရတဲ့ ဘဝကို ဒုက္ခလို့ဆိုရင် နေရေးထိုင်ရေး ဒီထက် ခက်ခဲသူတွေက ရယ်ကြမှာပေါ့။ ကိုယ်လိုလူတွေ စင်္ကာပူမှာ အများကြီးလေ။ ဒီအခန်းလေး ငှားခက တလကို စင်းဒေါ်လာ တစ်ထောင့်တစ်ရာ ဆိုတော့ ရင်ဘတ်ဖိရပြန်တယ်။ မြန်မာပြည်မှာဆိုရင် .... ဒီငွေနဲ့ တအိမ်လုံး ငှားလို့ရတယ်လို့ နှိုင်းယှဉ်မိပြန်ရော။
.
ရေချိုးခန်း အိမ်သာ မီးဖို ရေခဲသေတ္တာ အဝတ်လျှော်စက် စတဲ့ ပစ္စည်းတွေကို အများနဲ့ အတူ တွဲသုံးရတာလည်း စစချင်း အထာမကျပါဘူး။ စိတ်ပျက်စရာ ကောင်းလိုက်လေခြင်း၊ အနေရ ခက်ပါဘိ လေခြင်းလို့ မကြာခဏ ညည်းညူနေမိတယ်။ ဒီလိုတွေ ညည်းညူနေတော့ သူလည်း စိတ်ပင်ပန်းမှာပါပဲ။ ဒါပေမဲ့ ဇနီးဖြစ်သူကို တတ်နိုင်သလောက်တော့ ပျော်အောင် ထားရှာပါတယ်။ ဟိုဟိုဒီဒီ လိုက်ပို့ပေး၊ စားချင်မယ် ထင်တာလေးတွေ ဝယ်ကျွေးနဲ့ပေါ့။
.

အိမ်မှာ စိတ်ကျဉ်းကျပ်တာက လွဲလို့ သူနဲ့အတူ ရှိချိန်တွေဟာ ကြည်နူးစရာပါ။ သူ အလုပ်နားတဲ့ နေ့တွေမှာ လိုအပ်တဲ့ အသုံးအဆောင် ပစ္စည်းလေးတွေ အတူတူထွက်ဝယ်ကြ၊ ဈေးသွား ချက်ပြုတ် စားသောက်ကြ၊ ညနေခင်းလေးတွေ အပျင်းပြေ လမ်းလျှောက်ကြပေါ့။ သူက လာဗင်ဒါအရပ်ကို ခုမှရောက်ဖူးသူမို့ ဘယ်ဆိုင် ဘယ်နေရာမှာ ရှိတယ်ဆိုတာ စစချင်း မသိသေးပါဘူး။ အိမ်ကနေ လာဗင်ဒါဘူတာကို သွားရင်တောင် ခဏခဏ လမ်းမှားနေ တတ်သေးတာ။ ဟိုဘက် သွားမလို ဒီဘက်သွားမလိုနဲ့ လုပ်တော့ အစက သူနောက်နေတယ် ထင်ပြီး စိတ်တိုရသေးတယ်၊ နောက်မှ သူတကယ်မသိတာပဲ ဆိုပြီး နှစ်ယောက်သား ရယ်ကြရတယ်။
.
ကျဉ်းကျပ်တဲ့ အခန်းလေးမှာ တခုတည်းသော စိတ်အေးချမ်းရာ နေရာလေးကတော့ ဧည့်ခန်းက ဘုရားစင်လေးရှေ့မှာပါပဲ။ အတူနေသူတွေ အားလုံး အလုပ်သွားကြပြီဆိုရင် ဘုရား ဝေယျာဝစ္စတွေ လုပ်ရင်း … ဘုရားရှိခိုးရင်း … တရားနာရင်း ငြိမ်းချမ်းမှုကို ရှာခဲ့ရတယ်။
.

လောကဓံဆိုတာ အကောင်း အဆိုး နှစ်မျိုးလုံး ရှိတာပဲလေ။ ဒါပေမဲ့ အကောင်းတွေနဲ့ တွေ့ဆုံချိန်မှာ လောကဓံ ခံနေရပါလားလို့ မတွေးမိတဲ့သူ များပါတယ်။ အဆိုးနဲ့ကြုံမှ လောကဓံလို့ ထင်နေကြတယ်။
.
ဒီလိုတွေးလိုက်တော့ အတော်လေး နေသာ ဖြေသာ သွားပါတယ်။ လန်းခဲ့စဉ်ကဘဝကို မလွမ်းဘဲ တရားနဲ့ဖြေခဲ့ရတဲ့ နေ့လေးတွေ တနေ့ပြီးတနေ့ ကုန်ဆုံးသွားတဲ့ အခါ လာဗင်ဒါအရပ် ကမ်းခြေလမ်းက အိမ်ကလေးဟာ တဖြည်းဖြည်း နေပျော်လာပါတော့တယ်။
***
မေဓာဝီ
4/4/2017
23:34

Read More...

Monday, April 03, 2017

လာဗင်ဒါအရပ်က ကမ်းခြေလမ်း ... (၂)

(၄)

ဓာတ်လှေခါးကထွက်ပြီး ညာဘက်ချိုးတော့ အိမ်ခန်းလေးဆီ ရောက်ပါတယ်။ အခန်းလေးက သစ်သားတံခါးရော သံတခါးပါ သော့တွေ ခတ်ထားတယ်။ သူကိုယ်တိုင်လည်း ဒီနေ့မှ ဒီအခန်းလေးကို ပြောင်းနေရမှာမို့ သူ့မှာ အခန်းသော့ မရှိပါဘူး။ သူ့ပစ္စည်းတချို့က ကြိုရောက်နေပေမဲ့ အရင်လူတွေ မထွက်သေးလို့ ဝင်မရခဲ့တာပါ။ အိမ်ခန်း အားလုံးကို တာဝန်ယူ စီမံငှားရမ်းရတဲ့ (စင်္ကာပူအခေါ် အိမ်သူကြီး) မိန်းကလေးက မြန်မာပြည် ခဏပြန်နေလို့ သူ့အခန်းဖော်ကို တာဝန်လွှဲပေးထားချိန်ပေါ့။
.
သူ ဖုန်းဆက်လိုက်တော့ တာဝန်ရှိတဲ့ မိန်းကလေး ရောက်လာပြီး သော့ဖွင့်ပေးပါတယ်။ ဝင်ဝင်ချင်း ဧည့်ခန်းရဲ့ ဘယ်ဘက်က ဘုရားစင်လေးကို မြင်လိုက်ရတဲ့ အခိုက် အလွန်ကျေနပ်သွားတယ်။ ဘုရားစင်မှာ ပန်း ရေချမ်း ရောင်ခြည်တော် လျှပ်စစ်မီးတွေ အပြည့်အစုံ ရှိနေတယ်။ နှစ်ယောက်အတူ စာမူခရတဲ့ ငွေလေးနဲ့ မြန်မာပြည်က ဝယ်လာတဲ့ ကြေးဆင်းတု ဘုရားကို ဒီဘုရားစင်လေး ထက်မှာ ပူဇော်ထားရမယ် လို့တွေးရင်း ကြည်နူးနေမိတယ်။
.
နှစ်ယောက်သားရဲ့ စာမူခငွေလေးတွေနဲ့ ဝယ်လာတဲ့ ဗုဒ္ဓရုပ်ပွါးတော်
 .
ညာဘက်မှာ ထမင်းစားပွဲနဲ့ ကုလားထိုင်လေးတွေ ချထားတယ်။ အဲဒီနောက်က မီးဖိုခန်း။ ဧည့်ခန်းကနေ ကော်ရစ်ဒါလေးအတိုင်း တည့်တည့်ဝင်သွားရင် ဘယ်ဘက်မှာ အိပ်ခန်းတစ်ခန်း ညာဘက်မှာတစ်ခန်း တည့်တည့်မှာ တခန်းရှိတယ်။ သူက ညာဘက် အခန်းတံခါးရှေ့မှာ ရပ်ပြီး "ဒီ အခန်းပဲ" လို့ ပြောပြောဆိုဆို သော့လေး လှည့်ဖွင့်လိုက်တယ်။
.
တံခါးလေး အလှပ်မှာ ဘာမှမရှိတဲ့ အခန်းလေးက ကြိုဆိုတယ်။ ဘာမှမရှိဘူး ဆိုပေမဲ့ အံဆွဲပါတဲ့ အဝတ်ဘီရို သုံးလုံး (အရင်က လူ သုံးယောက်နေသွားလို့)၊ နှစ်ယောက်အိပ် ခုတင်တလုံး၊ ခေါက်စားပွဲငယ်လေး တလုံးနဲ့ ခေါက်ကုလားထိုင်တလုံးရှိပါတယ်။ စားပွဲလေးပေါ်မှာ လျှပ်စစ် မီးအိမ်ငယ်လေး တခုတင်ထားတယ်။ ခြေရင်းဘက်ကျကျ ထောင့်မှာရှိတဲ့ ပြတင်းပေါက်တခြမ်းက လေအေးပေးစက် အထောင်လေးတပ်ထားလို့ တဝက်ပိတ်နေတယ်။ မျက်နှာကျက်မှာ မီးချောင်းတချောင်းနဲ့ တွဲလောင်းကျနေတဲ့ ပန်ကာအိုလေးတခု။
.

လေဝင်လေထွက်မရှိတော့ အခန်းထဲမှာ မွန်းကျပ်လာတယ်။ လေအေးပေးစက်ကို ဖွင့်တော့ မလည်ဘူး။
.
"အဲကွန်းက ည ၇ နာရီမှ လာမှာ ပန်ကာဖွင့်လို့ရတယ်နော်" လို့ သော့လာပေးတဲ့ မိန်းကလေးက ပြောပြီး ပန်ကာခလုတ်လေး ဖွင့်ပေးသွားတယ်။ အခန်းကျဉ်းလေးထဲမှာ မျက်နှာကျက်ပန်ကာ တဝီဝီအသံကြောင့် မူးနောက်ပြီး ချွေးစေးတွေ ထွက်လာတယ်။ တဝက်ပဲ ဖွင့်လို့ရတဲ့ ပြတင်းပေါက်မှန်ကို ဖွင့်ကြည့်တယ်။ ပြတင်းပေါက်က နောက်ဖေးဘက် တိုက်ကြားဖြစ်နေတော့ လေမဝင်ဘူး။
.

သူက လေအေးပေးစက်ခလုတ်ကို သွားကြည့်ပြီး

"timer လုပ်ထားတာ ကိစ္စမရှိဘူး by pass လုပ်လိုက်မယ်"
.
ဟိုလုပ်ဒီလုပ်နဲ့ ခဏနေတော့ လေအေးပေးစက် ထလည်လို့ ပျော်သွားတာပဲ။ သူ့ကိုလည်း အထင်တွေ ကြီးသွားလိုက်တာ။ လေအေးပေးစက် ဖွင့်လို့ရပေမဲ့ နှစ်ယောက်သား အေးအေးလူလူ မနားနိုင်ပါဘူး။ ပစ္စည်း ပစ္စယတွေ သိမ်းဆည်း နေရာတကျ ထားရသေးတယ်။ ဘီရိုသုံးလုံးရှိလို့ တော်ပါသေးတယ်။ သူတလုံး ကိုယ်တလုံး၊ နှစ်ယောက်ပစ္စည်းတွေ စုထည့်ဖို့က တလုံး။
.
"စားပွဲလေးက သေးလိုက်တာ …" လို့ ညည်းပြောလေး ပြောမိတော့ သူက
"တချို့အိမ်တွေဆို စားပွဲတောင် မပေးဘူး၊ လက်ပ်တော့ကို အဝတ်သေတ္တာပေါ် တင်ပြီးသုံးရတာ" တဲ့။ ဖြစ်မှဖြစ်ရလေ … ။
.
"အင်း … … " လို့ သံရှည် သက်ပြင်းချရင်း ထုံးစံအတိုင်း ... အင်္ဂလန်မှာဆိုရင် လို့ အစချီ နှိုင်းယှဉ်ပြောဆို ကွန်ပလိန့် လုပ်နေမိတယ်။ သူကတော့ "အေးပါကွာ ဒီမှာတော့ ဒီလိုပဲလေ သည်းခံပြီးနေပါ မေရယ်…" လို့ သနားစဖွယ် ပြောရှာတယ်။
.
စင်္ကာပူရဲ့ လူနေမှုစနစ် ပုံစံအကြောင်း ဘာမှမသိဘဲ လိုက်လာမိတာမို့ ရောက်ရောက်ချင်း ကြုံရတဲ့ အချိန်ဇယားနဲ့ လေအေးပေးစနစ်ရယ်၊ စားပွဲသေးသေးလေးနဲ့ ပန်ကာအိုကြီးရယ်၊ တဝက်ပိတ်နေတဲ့ လမ်းကြားပြတင်းပေါက်ရယ်ဟာ အင်မတန် စိတ်ပျက်စရာလို့ ထင်နေမိတာပေါ့။ ရှေ့လျှောက် ဒီ့ထက်ဆိုးတာတွေ ကြုံရဦးမယ်ဆိုတာ ယောင်လို့တောင် မတွေးခဲ့မိဘူး။
***
(၅)

တကယ်တော့ စင်္ကာပူမှာ လေအေးပေးစက် အချိန်ဇယားနဲ့ သုံးရသလိုမျိုး အပူပေးစက် အချိန်ဇယားနဲ့ပေးတာကို အင်္ဂလန်မှာတုန်းကလည်း ကြုံခဲ့ဖူးပါတယ်။ ရောက်ခါစ ပထမဆုံး တက်တဲ့ ကျောင်းမှာ ကျောင်းအိပ်ကျောင်းစား နေခဲ့ရတုန်းကပါ။ အဲဒီကျောင်းက Hull City အနီး Winestead Hall က CICD (College for International Cooperation and Development) ဆိုတဲ့ ကျောင်းပေါ့။ ကျောင်းမှာ နိုင်ငံတကာက ကျောင်းသားတွေ ချည်းပါပဲ။ ပုံမှာ မြင်ရတဲ့အတိုင်း ကျောင်းပရဝုဏ်ကြီးက အကျယ်ကြီးပါ။ ကျောင်းက တချို့ အဆောက်အဦတွေဟာ ၁၉ ရာစုက ဆောက်ထားတာလို့ ဆိုတယ်၊ ဒီကျောင်းကြီးဟာ အရင်က စိတ်ရောဂါကု ဆေးရုံတဲ့။
.

ရောက်ရောက်ချင်း နေရတဲ့ အခန်းက တယောက်ထဲ အတွက်တော့ အတော်ကို ကျယ်ပါတယ်။ တခါတလေ စုံညီပွဲရှိလို့ တခြားမြို့ရဲ့ ကျောင်းခွဲတွေက ကျောင်းသူကျောင်းသားတွေ ရောက်လာတဲ့အခါ အခန်းထဲကို လူတွေ စုပြုံထည့်လိုက်ရင်တော့ ကျဉ်းကျပ်သွားတာပေါ့။
.
ကျောင်းစတက်တဲ့အချိန်က နိုဝင်ဘာလကြီး။ တော်တော်အေးနေပြီ။ ပြောခဲ့ပြီးသလိုပါပဲ … အခန်းထဲမှာရှိတဲ့ အပူပေးစက်ကို အချိန်နဲ့ပေးပါတယ်။ ညဦးပိုင်း တခါပေးပြီး အိပ်ပျော်နေချိန်ဆို ပြန်ပိတ်သွားရော၊ နိုးခါနီး တခါပြန်ပေးတယ်။ အေးလွန်းလို့ ညအိပ်ရင် ခေါင်းစွပ် ဦးထုတ် သာမယ်လ် အင်္ကျီ ဘောင်းဘီ၊ ခြေအိတ် စသဖြင့် ဝတ်စုံပြည့် ဝတ်အိပ်ရတယ်။ ဒါတောင် တရေးနိုးရင် အေးစက် ချမ်းစိမ့်နေတာပဲ။
.

အဲဒီကျောင်းရဲ့ အပူပေးစနစ်က အတော်လေး ရှေးကျပါတယ်။ ဂက်စ်လည်း မဟုတ်၊ လျှပ်စစ်လည်း မဟုတ်၊ ကျောက်မီးသွေးက ရတဲ့အငွေ့နဲ့ ပေးတာပါ။ ကျောင်းဝင်းတနေရာမှာ ကျောက်မီးသွေး ရုံကလေး ရှိပါတယ်။ အဲဒီမှာ ကျောက်မီးသွေးတွေကို ဂေါ်ပြားနဲ့ကော်ပြီး မီးဖိုအကြီးကြီးထဲ ထည့်ရတယ်။ အဲဒီက အငွေ့တွေကိုမှ ပိုက်လိုင်းနဲ့ သွယ်ပြီး အခန်းတွေဆီ ပေးတာပါ။ ခေတ်ဟောင်း ရုပ်ရှင်ဇာတ်ကားတွေထဲမှာ ကြည့်ဖူးတဲ့ ကျောက်မီးသွေးနဲ့ မောင်းတဲ့ မီးရထားတွေ မီးသင်္ဘောတွေ မှာလိုပေါ့။
.
ပိုဆိုးတာက မျက်နှာသစ်တဲ့ ဘေစင်မှာ ရေပူ ရေအေး နှစ်လိုင်း တပ်မထားဘူး၊ ရေအေးပဲ ရှိပါတယ်။ ရေချိုးကန်နဲ့ ရေပန်းမှာတော့ ရေပူရလို့ တော်သေးရဲ့။ မနက် မနက် မျက်နှာသစ်တဲ့အခါ ရေက အေးလွန်းလို့ ကျဉ်နေတာပဲ။ ဒါနဲ့ ကိုယ်တယောက်ထဲလား ဆိုပြီး သူငယ်ချင်း ဂျပန်မလေးကို မေးကြည့်တော့ ...

“အေးတော့ အေးတာပေါ့၊ အဲဒီလိုအေးတော့ ငါ အိပ်ရာက နိုးသွားတယ်လေ” တဲ့။ အကောင်းမြင်တဲ့ သူများကျတော့ အဲဒီလိုပါ။
.
နောက်တော့ အမလတ်က ရေနွေးဓာတ်ဗူးလေး လာပို့ပေးလို့ ညဘက်ကတည်းက ရေနွေးယူထားပြီး မနက်ကျတော့ ရေအေးနဲ့စပ် မျက်နှာသစ်ခဲ့ရတယ်။ အဲဒီတုန်းကလည်း အင်္ဂလန်လို နေရာမျိုးမှာ ဖွင့်ထားတဲ့ ကျောင်းတကျောင်းလုပ်နေပြီး ဘေစင်မှာ ရေပူ ရေအေး မရရကောင်းလားလို့ မကျေမနပ်နဲ့ ကွန်ပလိန့် လုပ်ခဲ့တာ မှတ်မိပါသေးတယ်။
.
ခုချိန်မှာ ပြန်စဉ်းစားကြည့်တော့ အရာရာကို အပြစ်မြင်စိတ် ဝေဖန်ချင်စိတ် များနေတာပဲလို့ ကိုယ့်ကိုယ့်ကိုယ် သုံးသပ်နေမိတယ်။
***
မေဓာဝီ
၃၊ ဧပြီ ၂၀၁၇

Read More...

Sunday, April 02, 2017

လာဗင်ဒါအရပ်က ကမ်းခြေလမ်း ... (၁)

(၁)

လွန်ခဲ့တဲ့ ၂ နှစ် ဒီလိုနေ့မှာ သူရှိရာ စင်္ကာပူကျွန်းငယ်ကလေးဆီ ခရီးထွက်ခဲ့တယ်။ ဧပြီလ တရက်နေ့ မနက်စောစော ထွက်တဲ့ ပိုးသားလေကြောင်းလိုင်းက လေယာဉ်ကြီးပေါ်မှာ ငြိမ်သက်စွာ စီးလာရင်း ကိုယ့်ကိုယ်ကိုယ် ဧပရယ်ဖူးလ် လုပ်မိလေသလား စဉ်းစားလို့ပေါ့။ ကောင်းကင်ပေါ်က တိမ်တိုက်တွေလိုပဲ အတွေးတွေ မျောလွင့်နေတယ်။ ရင်ခုန်လှုပ်ရှားရမယ့် အရွယ် မဟုတ်တဲ့အတွက် ရင်ထဲမှာ ဗလာသက်သက် ဖြစ်နေသလိုပဲ။ 
.

နာရီပေါင်းများစွာ ကြာအောင်စီးရတဲ့ လေယာဉ်ခရီးစဉ်တွေမှာတောင် ပြတင်းပေါက်ဖက်ကိုသာ ရွေးခဲ့တာမို့ သုံးနာရီလောက်သာ စီးရမယ့် ဒီခရီးမှာလည်း ထုံးစံအတိုင်း ပြတင်းပေါက်ဘေးမှာ ထိုင်ခဲ့တယ်။ လေယာဉ် ပြတင်းပေါက်ကနေ အဆုံးအစမဲ့ ကောင်းကင်ကြီးကို ငေးရင်း တိမ်တိုက်တွေနဲ့ အနာဂတ်ကို ပုံဖော်ကြည့်နေမိတယ်။

တိမ်တွေက ပုံသဏ္ဌာန်အမျိုးမျိုးပဲ။ ဘယ်လိုပုံစံနဲ့ မြင်ရမယ်ဆိုတာ မခန့်မှန်းနိုင်ဘူး။ တခါတလေ တိမ်မျှင်မျှင် … တခါတလေ တိမ်အုပ်အုပ် ပုံ့ပုံ့၊ တခါတလေတော့ ကောင်းကင်ကြီးက ပြာလွင်ပြီး တိမ်ကင်းမဲ့နေပြန်ရော။ တခါတလေ တိမ်တိုက်ထူထူ ထုထဲ လေယာဉ်တိုးဝင်သွားတဲ့အခါ သိမ့်ခနဲ ငြိမ့်ခနဲ။ နေရောင် အနားကွပ်ထားတဲ့ တိမ်လေးတွေလည်း တွေ့ရသေးတယ်။ တိမ်ရဲ့ အတိမ်အနက်ကို တိမ်တွေထဲ လိုက်ရှာနေမိသေးတာလေ။ 


တိမ်တွေကို ကြည့်လို့အားရမှ ဘုရားစာရွတ်၊ လေယာဉ်မယ်လေးတွေ လာကျွေးသမျှ စား၊ ရုပ်ရှင်တကား ကြည့်ပြီးချိန်မှာတော့ စင်္ကာပူလေဆိပ်ကို ရောက်တော့တာပါပဲ။ လေယာဉ်ကွင်းမှာ သူလာကြိုပါတယ်။ ညဂျူတီတွေ ဆက်တိုက်ဝင်ခဲ့ရတဲ့သူက နွမ်းလျနေတဲ့ မျက်နှာနဲ့ ဝမ်းသာအားရ ဆီးကြိုခဲ့တယ်။ စင်္ကာပူနိုင်ငံရဲ့ ချန်ဂီလေဆိပ်ဟာ အေးစိမ့် နေပေမယ့် ကမ်းလာတဲ့ သူ့ရဲ့လက်တွေကတော့ နွေးထွေးလို့။

အတူနေကြမယ့် အိမ်ခန်းလေးဆီသွားဖို့ အငှားယာဉ်တစီး ငှားရတယ်။ ယာဉ်မောင်းက ဘယ်သွားမလဲ မေးတော့ … သူက ပြန်ဖြေတယ်။

"လာဗင်ဒါ အရပ်က ကမ်းခြေလမ်း" … တဲ့။
***
(၂)

လာဗင်ဒါ ဆိုတဲ့နာမည်လေးကို ရေရွတ်ရင်း လွန်ခဲ့တဲ့ နှစ်တချို့တုန်းက လာဗင်ဒါပန်းကလေးနဲ့ အပြင်မှာ စသိခဲ့တဲ့ နေ့ကလေးတနေ့ကို အမှတ်ရမိတယ်။ မှတ်မှတ်ရရ အင်္ဂလန်ကို စရောက်တဲ့နှစ် ပထမဆုံး ကြုံရတဲ့ ဆောင်းဦးရာသီ မှာပေါ့။

နွေဦးမှာ ဖူးပွင့်တဲ့ လာဗင်ဒါပန်းဟာ ဆောင်းဦးထိ ဘယ်လန်းဆန်းနိုင်မှာလဲ။ အပင်ပေါ်မှာတွင် ခြောက်သွေ့နေတဲ့ ဒီပန်းခြောက်လေးတွေကို လာဗင်ဒါမှန်းလည်း မသိခဲ့ပါဘူး။ တညနေခင်း ဦးရီးတော်နဲ့အတူ ခြံထဲမှာ မြက်ရိတ်ပေါင်းနှုတ် လုပ်နေတုန်း ဦးရီးတော်က မြက်ခင်းဘေးမှာ စိုက်ထားတဲ့ အပင်လေးကနေ ပန်းခြောက်ကလေးတခု ခူးပြီးပေးတယ်။ …

"သမီး အဲဒီပန်းခြောက်ကလေး ချေပြီး နမ်းကြည့်"

လက်ထဲရောက်လာတဲ့ အရောင်အဆင်းခပ်မွဲမွဲ ပန်းခြောက်လေးကို ရုတ်တရက် မနမ်းဝံ့ဘူး။ ဦးရီးတော်ရဲ့ တိုက်တွန်းချက် ကြောင့်သာ လက်ထဲ ပွတ်ချေပြီး မရဲတရဲ မွှေးလိုက်ရတယ်၊ အနံ့သင်းသင်းလေး နမ်းရှူမိပေမယ့် ဘာပန်းမှန်းမသိခဲ့တာ အမှန်ပါပဲ။

"ဘာလဲ သိလား"
"ဟင့်အင်း"
"သေချာ မွှေးကြည့်ပါဦး ရေမွှေးတို့ ဆပ်ပြာတို့ လုပ်တဲ့ ပန်းလေ"

ဦးရီးတော်ပေးတဲ့ သဲလွန်စကြောင့် ခေါင်းထဲမှာ လင်းခနဲ ဖြစ်သွားပြီး မရဲတရဲ မေးလိုက်မိတယ်။

"လာဗင်ဒါလား"
"အေး … ဟုတ်တယ်"

အဖြေမှန်သွားလို့ ဦးရီးတော်က သဘောကျသွားပြီး ဆက်ပြောတယ်။

"ခြောက်သွားတဲ့ထိ မွှေးတုန်းပဲ မဟုတ်လား … သူက spring နဲ့ summer မှာ ပွင့်တာလေ၊ အခု autumn ဆိုတော့ ခြောက်ပြီပေါ့"

လာဗင်ဒါနဲ့ ပတ်သက်လို့ ဗဟုသုတ မရှိသူတယောက်မို့ ဦးရီးတော်က ကလေးတယောက်ကို ရှင်းပြသလို ပြောပြတယ်။ မြက်ရိတ်ပြီး အိမ်ထဲပြန်ရောက်တော့ ဘေစင်ပေါ်က လက်ဆေးဆပ်ပြာ ဗူးကလေးကို ဦးရီးတော်က ပြပြီး ဒီဆပ်ပြာက လာဗင်ဒါနဲ့ လုပ်ထားတာ လို့ပြောတယ်။ ဗူးကလေးပေါ်မှာတော့ ခရမ်းရောင် လာဗင်ဒါ ပန်းကလေးတွေက လန်းဆန်း လှပလို့။

လာဗင်ဒါပန်းကလေးနဲ့ စပြီးမိတ်ဆက်ခဲ့ရတဲ့ အဲဒီ ဆောင်းဦးရာသီ နေ့ကလေးကို ဘယ်တော့မှ မမေ့ခဲ့ပါဘူး။
***
(၃)

တရိပ်ရိပ်ပြေးနေတဲ့ အငှားကားလေးရဲ့ ပြတင်းကနေ အပြင်ကို လှမ်းကြည့်တော့ လမ်းနံဘေးမှာ ကုက္ကိုပင် ပိတောက်ပင် လို အပင်ကြီးတွေ ညီညီညာညာ စိုက်ထားတာ တွေ့ရတယ်။ အပင်တွေက ကိုင်းတွေတိ ထားတာမို့ သိပ်ပြီး ဖြာထွက် မနေဘူး။ ဆံပင်ညှပ်ထားတဲ့ သူလို သပ်သပ်ရပ်ရပ် ဖြစ်နေတယ်။ မိုးရွာပြီးခါစမို့ ထင်ပါရဲ့ အပင်တွေက စိမ်းစိုလန်းဆန်း လို့၊ မိုးရေဖျန်းထားတဲ့ ကတ္တရာလမ်းကလည်း ချောမွေ့ ရှင်းလင်းလို့၊ လေဆိပ်ကအထွက်တုန်းက ပြင်ပလေနဲ့ ထိထိချင်း ပူစပ်စပ် ဖြစ်နေပေမဲ့ အငှားကားထဲမှာတော့ အေးစက် မွှေးပျံ့လို့။

လမ်းညွှန်ဆိုင်းဘုတ်တွေကို ဖတ်ရင်း … အချက်ပေး မီးပွိုင့်တွေကို ဖြတ်ရင်း သူ့ရဲ့ မေးခွန်းတွေကို ဖြေရင်း လမ်းများစွာ ဖြတ်သန်းပြီးတဲ့နောက် စီးလာတဲ့ အငှားကားလေးဟာ လာဗင်ဒါအရပ်က ကမ်းခြေလမ်း ကလေးဆီ ရောက်လာခဲ့တယ်။

"အဲဒီထဲ ဝင်ရမှာ …"

အိမ်ခန်းလေးရှိရာ တိုက်တန်းတွေကိုဝင်ဖို့ ကားတန်းရှည်ကြီးက တန်းစီနေတယ်။

"ဒီနားမှာပဲ ဆင်းလိုက်ပါ အထဲဝင်ရင် queue တန်းရှည်ကြီး စောင့်နေရမှာ" ယာဉ်မောင်းက လှမ်းပြောတော့ သူက ကားမီတာနဲ့ ကျသင့်ငွေ ပြနေတဲ့ နေရာကို တချက်လှမ်းကြည့်ပြီး "အိုကေ" လို့ပြောတယ်။ ဒါနဲ့ပဲ ယာဉ်မောင်းလည်း ကားရပ်နိုင်တဲ့ လမ်းဘေး တနေရာမှာ ထိုးရပ်လိုက်တယ်။

ဒီလိုနဲ့ ခရီးဆောင်အိတ် အထုတ်အပိုးတွေကို နှစ်ယောက်သား တိုက်ရှေ့ထိ ရောက်အောင် တွန်းသွားကြရတယ်။ ခရီးရောက်မဆိုက် အထုတ်တွေ တွန်းရတာ ... ကားက အိမ်ရှေ့တန်းမရောက်တာကို စိတ်ထဲ ဖုတုတုနဲ့။ သူများနိုင်ငံမှာ ကိုယ့်ဆီကလို ကူညီမယ့်သူ ခိုင်းရမယ့်သူ ရှိတာမဟုတ်ဘူးလေ ... လို့ စိတ်ကိုလျှော့ရတယ်။ တော်သေးတာက တွန်းသွားတဲ့ လမ်းတလျှောက်က ညီညာပျံ့ပျူးတဲ့အပြင် မိုးရွာရင် မစိုနိုင်တဲ့ ကော်ရစ်ဒါ အမိုးလေး ရှိနေပေလို့။ ဘီးတပ်အိတ်တွေကို တွန်းရင်း ခေါင်းမော့ကြည့်တော့ ခရမ်းပြာရောင် တိုက်မြင့်ကြီးတွေက ပတ်ပတ်လည်မှာ။ 
.

ဓာတ်လှေခါးဆီသွားဖို့ နှစ်လမ်းရှိတယ်။ လှေခါးထစ်နဲ့ တက်ရတဲ့ လမ်းနဲ့ ဝှီးချဲသမားတွေ အထုတ်အပိုး ထရော်လီတွေ သွားတဲ့ ဆင်ခြေလျှောလမ်း။ ခရီးဆောင်အိတ်တွေနဲ့မို့ ဆင်ခြေလျှော လမ်းကို ရွေးကြတယ်။ ဓာတ်လှေခါးထဲ ရောက်တော့ သူက နံပါတ် 4 ခလုတ်ကို နှိပ်လိုက်တယ်။

ငြိမ့်ခနဲတက်သွားတဲ့ ဓာတ်လှေခါးလေးထဲမှာ သူ့လက်ကို ဆုပ်ကိုင်ထားရင်း မော့ကြည့်မိတယ်။ အားကိုးတကြီး ပုံစံ ဖြစ်နေမလားပဲ။ သူက ငုံ့ကြည့်ပြီး ပြုံးပြတယ်။ အားပေးတဲ့ အပြုံး၊ စိတ်မပူနဲ့ ကိုယ်ရှိတယ် ဆိုတဲ့ အပြုံး။ ခဏနေတော့ တင်းတောင် ဆိုပြီး ဓာတ်လှေခါးတံခါးလေးက ပွင့်သွားတယ်။ ဓာတ်လှေခါးထဲက အထွက် သူ့လက်ကို တင်းတင်းဆုပ်ပြီး ဘဝတခုကိုစတင်ဖို့ လာဗင်ဒါ အရပ် ကမ်းခြေလမ်းက အိမ်ကလေးဆီ ... ပထမခြေလှမ်း … လှမ်းခဲ့ရပါတယ်။
***
မေဓာဝီ
၂ ဧပြီ ၂၀၁၇

Read More...