နှစ် ၁၀၀-ပြည့်လေပြီ … ဆရာဇော်ဂျီ

ဒီကနေ့ဟာ ဆရာဇော်ဂျီ သက်ရှိထင်ရှားရှိခဲ့မယ်ဆိုရင် နှစ် ၁၀၀ ပြည့်တဲ့နေ့ပါ။
ငယ်ငယ်ထဲက ဆရာ့ ကဗျာတွေနဲ့ မွေ့လျော် ယဉ်ပါးခဲ့ရပါတယ်။ ကျောင်းစာထဲမှာရော အပြင်စာ အနေနဲ့ရော ဆရာ့ကဗျာတွေကို ဖတ်ခဲ့ မှတ်ခဲ့ လေ့လာခဲ့ရပါတယ်။
ကဗျာကို ချစ်တဲ့စိတ်၊ စာပေကို မြတ်နိုးတဲ့စိတ်ဟာ ဆရာဇော်ဂျီနဲ့ ဆရာမင်းသုဝဏ် တို့ ကျေးဇူးကြောင့် ရင်ထဲခိုအောင်း လာခဲ့ရတာပါ။ ဆရာမင်းသုဝဏ် လို့ ဆိုလိုက်ရင် ဆွမ်းအုပ်နီနီ အမေရွက်လို့ ကဗျာလေးကို သတိရမိသလို … ဆရာဇော်ဂျီလို့ ပြောလိုက်ရင်တော့ ဗေဒါလမ်းကို မှန်းဆမိပါတယ်။

ကျမ ကားအက်ဆီးဒင့် ဖြစ်ပြီး ညှပ်ရိုးကျိုးလို့ အိမ်မှာ မလှုပ်မယှက် နေနေရစဉ် ကာလ … ဘယ်မှ မသွားရ မလာရ၊ မလုပ်ရ မကိုင်ရနဲ့ စိတ်ဓာတ်ကျနေချိန်မှာ ဆရာဇော်ဂျီရဲ့ ဗေဒါလမ်းဟာ ကျမအတွက် စိတ်ဓာတ်အင်အားကို ပြန်လည် ဖြည့်တင်းပေးတဲ့ အားဆေးကောင်း တလက် ဖြစ်ခဲ့ပါတယ်။ ဒါဟာ ဆရာ့ရဲ့ ကျေးဇူးပါပဲ။

ပြီးခဲ့တဲ့ တနင်္ဂနွေနေ့ ဧပြီလ ၈-ရက်နေ့က ဆရာဇော်ဂျီ ရာပြည့် အထိမ်းအမှတ်အဖြစ် ဆရာ့ဇာတိဖြစ်တဲ့ ဖျာပုံမြို့မှာ ကျင်းပပြုလုပ်ခဲ့တယ် လို့သိရတယ်။ စိတ်မကောင်းစရာက … ဆရာ့ကဗျာတွေကို ရွတ်ဆိုခွင့် မရခဲ့လို့ပါပဲ။ ကျမ အံ့လည်း အံ့သြ၊ ၀မ်းလည်း နည်းမိပါရဲ့။
ဆရာ့ကဗျာတွေဟာ မြန်မာပြည်သူ ပြည်သားတွေအတွက် ဘာများ အဆိပ်အတောက် ဖြစ်စေလို့ပါလဲ။ ဒါမှ မဟုတ်ရင် ဆရာ့ကဗျာတွေက နိုင်ငံ့အကျိုးကို ဘာများ ထိခိုက်စေလို့ပါလဲ။
သတ္တိ၊ ခွန်အား၊ မကြောက်တရား တွေကိုပေးတဲ့ ဆရာ့ကဗျာတွေရဲ့ အားမာန်ကို တာဝန်ရှိသူများက ကြောက်ရွံ့ကြလို့ပဲ ထင်ပါရဲ့။

ဆရာနဲ့ပတ်သက်သမျှ စာတွေ ကဗျာတွေ သတင်းတွေ ရေးထားကြတာ အများကြီးမို့ ကျမအနေနဲ့ အထွေအထူး ထပ်မံ မရေးလိုတော့ပါဘူး။ ဒါပေမဲ့ …. ဒီကဗျာလေး တပုဒ်တော့ ဖော်ပြလိုက်ပါရစေ။

ငါ့ညီပြောင်ဝင်း၊ မောင်သစ်ဆင်း
မင်း၏သားငယ်၊ သက်နှစ်ဆယ်သည်
ဘယ်ပညာစာ စွမ်းသနည်း။
စွမ်းသည်ခြင်းရာ၊ ဆိုသည်မှာကား
စာတွေ့သက်သက်၊ စာမာန်တက်၍
စာထွက်များလျား၊ စကားတွတ်တွတ်
ရွတ်တတ်အံ့ဘနန်း၊ သည်အစွမ်းသည်
စွမ်းရည်မရိုး သူ့ကိုယ်ကျိုး။
စာတွေ့အသိ၊ ကိုယ်တွေ့ညှိ၍
မှန်၏ကောင်း၏၊ ဉာဏ်ဖြင့်သိ၍
သတိထိန်းချုပ်၊ စိတ်ကောင်းအုပ်၍
အလုပ်ချစ်ခင်၊ ဂုဏ်ဟုမြင်၍
လိုချင်ကြိုးပမ်း၊ သည်အစွမ်းသည်
စွမ်းရည်မိုးထိုး အများကျိုး။

ငါ့ညီပြောင်ဝင်း၊ မောင်သစ်ဆင်း
မင်း၏သားငယ်၊ သက်နှစ်ဆယ်သည်
ဘယ်ပညာမှာ တော်သနည်း။
တော်သည်ခြင်းရာ၊ ဆိုသည်မှာကား
လက်ရာဆန်းသစ်၊ ခေတ်မီဆန်းပြား
တိုင်းခြားနည်းစုံ၊ အဖုံဖုံကို
တတ်ရုံမျှဖြင့်၊ မပြီးသေး
တို့မြေ တို့ရေ၊ တို့အခြေနှင့်
တို့ငွေ တို့အား၊ တို့စိတ်ထားနှင့်
စည်းဝါးကိုက်ညီ၊ ညှိကြံစည်မှ
တော်သည်ယူဆ၊ စွယ်စုံရ။
***
ဆရာဇော်ဂျီ ရာပြည့် အထိမ်းအမှတ်အဖြစ် ကျမရဲ့ ဘလော့မှာ အမှတ်တရ တင်ရင်း ၁၉၀၇ ခု၊ ဧပြီလ ၁၂ ရက်နေ့မှာ မွေးဖွားခဲ့တဲ့ ဆရာဇော်ဂျီကို ဦးညွတ် ကန်တော့လိုက်ပါတယ်။
***
မေဓာဝီ
12th April, 2007
00:30 am

ဆရာဇော်ဂျီနှင့်ပတ်သက်၍ ဖတ်ရှုလိုပါက

ဒီမိုကရက်တစ်မြန်မာ့အသံ
ဧရာဝတီအင်တာနက်မဂ္ဂဇင်း
မြန်မာ့သတင်းဆက်သွယ်ရေး နည်းပညာအဖွဲ့
မဇ္ဈိမအင်တာနက်သတင်း
ခေတ်ပြိုင်ဂျာနယ်