ဒီနေ့ ...

၀၄း၄၅ နာရီ ...
နှိုးစက်မြည်သံနဲ့ အိပ်ရာက နိုးလာခဲ့တယ်။ နှိုးစက်ပိတ်ပြီး ဘာကြောင့်နှိုးစက်လုပ်ထားတာပါလိမ့်လို့ ရုတ်တရက် စဉ်းစားမရဘူး။ စာမေးပွဲလား ... စာမေးပွဲကလဲ ပြီးပါပြီ။ ဘာလုပ်စရာရှိလဲ အိပ်ချင်မူးတူးနဲ့ စဉ်းစားတော့မှ ဆွမ်းဟင်းချက်ရအုံးမှာပဲလို့ သတိရသွားပြီး ၀ုန်းခနဲ ခုန်ထလိုက်ရတယ်။ ဟုတ်သားပဲ ... ဒီနေ့ ကျမတို့ တူဝရီးနှစ်ယောက် ဘာမင်ဂန်ဘုန်းကြီးကျောင်းမှာ ဆွမ်းသွားကပ်ကြမလို့။ အစကတော့ ဘုန်းကြီးကျောင်းကို အဆင်ပြေတဲ့အချိန်သွားပြီး ဆွမ်းချိုင့်ပို့ရုံပဲ ပို့မလို့ ဟင်းတွေက မနေ့ကတည်းက ချက်ထားပြီးပါပြီ၊ ဒါပေမဲ့ မနေ့ညဘက် ဖုန်းဆက်ကြည့်လိုက်တော့ ဒီကနေ့ ကျောင်းမှာ ဆွမ်းကပ်မယ့်သူ မရှိဘူးဆိုတာနဲ့ ကိုယ်တိုင် ကပ်ကြမယ် စိတ်ကူးပြီး လိုအပ်တဲ့ ဟင်းတွေထပ်ချက်ဖို့ ဒီမနက် စောစော နှိုးစက်ပေးထားခဲ့တာ။

ဒီကနေ့ ဆွမ်းပို့ရမယ်ဆိုကတည်းက ကျမ ပျော်နေခဲ့ပါတယ်။ ဒီလိုနေ့မျိုး တိုက်တိုက်ဆိုင်ဆိုင် ကုသိုလ်ပြုရတာ ၀မ်းသာစရာမဟုတ်လား။ မနေ့က ချက်ထားတဲ့ ဟင်းတွေက ကြက်သား၊ ကြက်မြစ်၊ ခရမ်းသီးနှပ်၊ ခရမ်းချဉ်သီးငပိချက်၊ ပဲကြော် ... ချက်နေကျ သမားရိုးကျ ဟင်းတွေပါပဲ။ ဒီမနက် ခေါက်ဆွဲတဒယ် ထကြော်တယ်။ ဟင်းရည်သောက်တခွက်ပါအောင် မြန်မြန်ဆန်ဆန် ကျက်တဲ့ ပဲနီလေးဟင်း ချက်လိုက်တယ်။ ပြီးတော့ အသုပ်တခွက်ပါအောင် ကျောက်ပွင့်နဲ့ ဆေးဘဲဥသုပ်။ ဘုန်းဘုန်းတပါးက အသားမဘုဉ်းလို့ အာလူးဆီပြန်ဟင်း တခွက်လဲ ကမန်းကတန်း ချက်လိုက်ပါသေးတယ်။ မနက် ၇ နာရီခွဲမှာ အားလုံးချက်ပြီး ဆေးကြော သိမ်းဆည်း ဗူးတွေထဲထည့်ပြီးတော့ ရေချိုးခေါင်းလျှော် အိမ်ကနေ ၉ နာရီ မထိုးခင် ထွက်ခဲ့ကြတယ်။

ရာသီဥတုက သာသာယာယာ၊ နေသိပ်မပူ၊ မိုးလည်းမရွာ၊ ကောင်းကင်မှာ တိမ်တအုပ် တဆုပ်နဲ့ ... တနင်္ဂနွေ မနက်မို့ လမ်းကလဲ ကားရှင်းနေပါတယ်။ ဘုန်းကြီးကျောင်းရောက်တော့ ၉ နာရီခွဲသာသာ ရှိသေးတယ်။ ဆွမ်းဟင်းတွေခပ်၊ နွှေး၊ အသုပ်တွေနယ်ပြီး ကိုယ့်ဟင်းခွက်တွေကိုယ် မှတ်တမ်းတင်ဖို့ ဓာတ်ပုံရိုက်တယ်။ တယောက်ထဲ အစအဆုံး ကူမယ့်လူမရှိဘဲ ချက်ခဲ့ရတဲ့ ဟင်းတွေလေ ... မှတ်တမ်းမတင်လို့ ဘယ်ဖြစ်မလဲ မဟုတ်လား။

၁၁ နာရီမှာ ဆွမ်းကပ်ကြပါတယ်။ ကျောင်းကသံဃာ ၂ ပါး၊ ဒုလ္လဘ တပါး၊ စုစုပေါင်း ၃ ပါးရှိတယ်။ ဆရာတော်က ဘရာဇီးကို ကြွနေလို့ မရှိပါဘူး။

သံဃာတွေ ဆွမ်းစားပြီး ကျမတို့ ထမင်းစားနေတုန်း မြန်မာဆရာဝန် ဇနီးမောင်နှံ နှစ်ယောက် ရောက်လာကြတယ်။ သူတို့ မင်္ဂလာနှစ်ပတ်လည်အတွက် လှူဖွယ်ဝတ္ထုတွေ လာလှူကြတာပါ။ သူတို့ကို ထမင်းဝင်စားဖို့ ပြောပြီး အတူတူစားသောက် ဆေးကြော သိမ်းဆည်းကြတယ်။

နောက် သီလယူ၊ ပရိတ်နာ၊ ရေစက်ချ အမျှဝေတော့ ကျမဒီနေ့ ပြုတဲ့ ဒါန၊ သီလ၊ ဘာဝနာ ကုသိုလ်တွေကို ၃၁ ဘုံသားတွေနဲ့တကွ အထူးအားဖြင့် ဒီကနေ့မှာ အသက် ၆၆ နှစ် ပြည့်တဲ့ ဒေါ်အောင်ဆန်းစုကြည် ကိုယ်စိတ်နှစ်ဖြာ ကျန်းမာ ချမ်းသာပါစေကြောင်း စိတ်ထဲကနေ ရည်မှန်းဆုတောင်းခဲ့တယ်။ သက်ရှည် ကျန်းမာ လွတ်လပ်စွာနဲ့ နိုင်ငံအကျိုး၊ သာသနာအကျိုး၊ အများအကျိုး ဆက်လက်သယ်ပိုးနိုင်ပါစေလို့လဲ ဆုတောင်းခဲ့မိသေးတယ်။ ဆုတောင်းတာတွေများလို့ လောဘတွေ သိပ်ကြီးနေပြီလား တွေးမိသေးတယ်။ ဘာပဲဖြစ်ဖြစ် ကိုယ့်အတွက် တောင်းတာမဟုတ်ပါဘူးလေ ... ဒီလိုလောဘမျိုးတော့ ရှိသင့်တယ် ထင်တာပဲလို့ ကိုယ့်ကိုယ်ကိုယ် နှစ်သိမ့်လိုက်ရတယ်။ တိုက်တိုက်ဆိုင်ဆိုင် ဒီနေ့မှာ ကိုယ်တိုင်ကိုယ်ကျ ချက်ပြုတ် လှူဒါန်းခဲ့ရတာကိုလည်း အင်မတန် ၀မ်းသာပီတိ ဖြစ်မိတယ်။

အပြန်လမ်း တလမ်းလုံး ကားပေါ်မှာ အိပ်ငိုက်လာတယ်။ ပင်ပန်းနေပြီ။ အိမ်ရောက်ရင် တရေးအိပ်မယ် စိတ်ကူးပေမဲ့ ဒီပို့စ်လေးတင်ဖို့ ကြိုးစားရင်း မအိပ်ဖြစ်တော့ဘူး။ ပင်ပန်းပေမဲ့ ပျော်တယ် ... ပီတိဖြစ်မိတယ်။ ဒီကနေ့မှာ ဆွမ်းကပ်ချင်တဲ့ ဦးရီးတော်ကိုလဲ ကျေးဇူးတင်မိတယ်။ ကျမအတွက်တော့ ဒီနေ့ဟာ သာယာလှပ ကုသိုလ်ရတဲ့ ကြည်နူးဖွယ် တနင်္ဂနွေတရက်ပါပဲ။

***

မေဓာဝီ

၁၉၊ ၆၊ ၂၀၁၁

၁၅း၃၀ နာရီ