ဖေဖော်ဝါရီ မွန်းလွဲချိန်

၎၊ ဖေဖော်ဝါရီ၊ ၂၀၁၂

မနက်စောစော အလုပ်သွားဖို့ အိပ်ရာကထချိန် ထုံးစံအတိုင်း ရာသီဥတု အခြေအနေကို ကွန်ပျူတာမှာကြည့်တော့ အနုတ် ၁၀ ဒီဂရီ စင်တီဂရိတ် ဖြစ်နေတယ်။ ဘတ်စ်ကား တတန် ရထားတတန် ကုန်းကြောင်းတတန် သွားရမယ့် ခရီးအတွက် အအေးဒဏ် ခံနိုင်အောင် တကိုယ်လုံးကို ကြပ်စည်းသလို ထုပ်ပိုးပြီး အိမ်ကအထွက် တံခါးကို သော့ခတ်လို့ မရဘူး။ အေးလွန်းလို့ သော့က ဂျမ်းဖြစ်သွားတယ် ထင်ပါရဲ့၊ ကြိုးစားပြီး သော့ခတ်နေတာနဲ့ စီးရမယ့် ဘတ်စ်ကားကြီးက လာနေပါရော။ ဒါနဲ့ တံခါးကို အသာလေးပဲ စေ့ပြီး ကေမန်းကတန်း ကားမှတ်တိုင်ကို ပြေးတော့ မှတ်တိုင်မှာ လူတယောက်ရှိနေတာမို့ ကားကရပ်တယ်။ ဒါဆို မီနိုင်တာမို့ ကျမလဲ ပါးစပ်ကနေ stop, stop လို့ အော်ရင်း ပြေးရင်း ကားကြီးကို မီတော့ မီသွားပါရဲ့ ကားက တံခါးကြီး ပိတ်သွားပြီး ၀ူးဆို ထွက်သွားပါလေရော။

...

တခါတလေ ဘတ်စ်ကားမောင်းသူတွေက အဲဒီလိုပါပဲ။ သိပ်တိကျလွန်းတာလား၊ စိတ်မရှည်တာလား မသိပါဘူး။ ဒါမျိုး တခါမှ မဖြစ်ဖူးတော့ စိတ်ထဲ မခံချိမခံသာ ဖြစ်မိပေမဲ့ ကိုယ်က နောက်ကျတာမို့ ဘယ်တတ်နိုင်မလဲ၊ နောက်တစီး စောင့်ရုံရှိတာပေါ့။ အဲဒီမနက် အေးခဲနေတဲ့ ရာသီဥတုအောက်မှာ နောက်လာမယ့် ဘတ်စ်ကားကို နာရီဝက်လောက် ထပ်စောင့်လိုက်ရတယ်။ အလုပ်ကိုလဲ နာရီဝက် နောက်ကျမှ ရောက်သွားခဲ့တယ်။

အဲဒီနေ့ နေ့လည်ပိုင်းမှာ နှင်းတွေစပြီး ကျလာတယ်။ အလုပ်က နေ့တ၀က်နဲ့ ပြန်လွှတ်တော့ အိမ်အပြန်လမ်းမှာ ခပ်ဖွဲဖွဲ ကျစပြုနေတဲ့ နှင်းတွေအောက် အလုပ်ထဲက သူငယ်ချင်း နှစ်ယောက်နဲ့ အတူ ဘူတာရုံကို လမ်းလျှောက်ကြတယ်။ ပါးပါးလျလျ ကျနေတဲ့ နှင်းတွေကို ကျမတို့တတွေ အားမလို အားမရ ဖြစ်နေကြသေးတယ်။ ဒီနှစ်ဆောင်းအတွက် ဒါက ပထမဆုံး နှင်းတွေမဟုတ်လား။ ရထားစီးနေရင်းနဲ့ တဖြည်းဖြည်း အဖြူရောင်တွေ ခပ်သိပ်သိပ် တစတစ ပြိုကျလာတယ်။ ကျမနေတဲ့ မြို့ကလေးဆီ ရောက်တော့ လမ်းတလျှောက်လုံး နှင်းတွေ ဖုံးနေပြီ။

အိမ်ကိုရောက်ဖို့ ဘတ်စ်ကားတဆင့် စီးရသေးတယ်။ နှင်းရော မြူပါဆိုင်းနေလို့ တလောကလုံး မှုန်မှိုင်းနေတာပဲ။ ဘတ်စ်ကားကြီး စီးနေရင်း မကြာသေးခင်က ဖတ်ဖြစ်ခဲ့တဲ့ ကဗျာလေးတပုဒ်ကို သတိရမိတယ်။ Afternoon in February တဲ့။

The snow recommences;
The buried fences
Mark no longer
The road o'er the plain;

ရေးသူက အမေရိကန် ကဗျာစာဆိုရှင် Henry Wadsworth Longfellow (1807 – 1882) ပါ။ အင်တာနက်ထဲမှာ ကဗျာတွေ ရှာဖတ်ရင်း အဲဒီကဗျာလေးကို သွားတွေ့လို့ သဘောကျတာနဲ့ ဖေ့စ်ဘွတ်ရဲ့ နံရံပေါ်မှာ တင်လိုက်တော့ အကိုကြီး ဦးဟယ်ရီက ကွန်မန့်ထဲမှာ “ဘာသာလေးပါ ပြန်ပေးလေ” လို့ လာရေးသွားတယ်။ တကယ်တော့ အဲဒီကဗျာလေး စဖတ်ကတည်းက မြန်မာလို ပြန်ကြည့်ချင်နေခဲ့ပေမဲ့ … မပြန်ဝံ့လို့ အသာလေး ငြိမ်နေခဲ့တယ်။ (ကဗျာအစအဆုံး ဖတ်ချင်ရင် ဒီနေရာမှာ ရှိပါတယ်။)

ဘတ်စ်ကားက နာရီဝက်လောက် စီးရတာမို့ အဲဒီကဗျာလေးကို ဖုန်းလေးထဲကနေ ပြန်ဖတ်ရင်း စိတ်ထဲကနေ တိတ်တဆိတ် ဘာသာပြန်နေမိတယ်။ တကယ်တော့ ကျမက ဘာသာမပြန်တတ်ပါဘူး။ အင်္ဂလိပ်စာ ညံ့တာက တကြောင်း၊ ဘာသာပြန်လိုက်ရင် မူရင်းရေးသူရဲ့ အာဘော်နဲ့ ဆိုလိုရင်းတွေ ပျက်သွားမှာ စိုးတာက တကြောင်းတို့ကြောင့်ပဲ ဆိုပါတော့။ ဒါပေမဲ့ ဒီကဗျာလေးကိုတော့ ဆိုလိုရင်း ပျက်ကာမှ ပျက်ရော မတောက်တခေါက်တော့ ပြန်ကြည့်ချင်နေမိတယ်။

အိမ်ရောက်တော့ ကော်ဖီတခွက်သောက်ပြီး ဟင်းချက်တယ်။ နောက်တနေ့ (တနင်္ဂနွေနေ့) မှာ ဦးရီးတော်က ဘာမင်ဂန် ဘုန်းကြီးကျောင်းကို ဆွမ်းဟင်းသွားပို့မယ်လို့ ပြောထားလို့ တချို့ဟင်းတွေ သောကြာနေ့ကတည်းက ကြိုတင်ချက်ထားပေမဲ့ နောက်ထပ် ချက်ချင်သေးတဲ့ ဟင်း နှစ်ခွက်ကို လတ်လတ်ဆတ်ဆတ် ဖြစ်အောင် စနေညနေခင်းမှ ချက်ပါတယ်။ ချက်ချင်တာက သီးစုံပဲကုလားဟင်းနဲ့ ရုံးပတီသီး အချိုနှပ် ဆိုတော့ အိမ်ထဲမှာချက်ရင် အနံ့တွေ လှိုင်နေမှာ စိုးတာနဲ့ ဂိုထောင်ထဲမှာ ချက်တော့ အေးလိုက်တာ ခိုက်ခိုက်တုန်။ တံခါးဖွင့်ထားတော့ နှင်းတွေကလဲ လာလာပက်သေးတယ်။ ဟင်းချက်ရတာလဲ အင်္ကျီအထပ်ထပ်ဝတ်၊ လည်ရှည်ဖိနပ်စီး၊ ဦးထုပ်ဆောင်းပြီး ချမ်းချမ်းစီးစီး ချက်ရတာပါ။ အဲဒီလို ချက်ထားတဲ့ ဆွမ်းဟင်းတွေကို ဆရာတော်တွေ နှစ်သက်စွာ ဘုဉ်းပေးမယ်ဆိုရင်တော့ အချမ်းခံရကျိုး နပ်တာပါပဲ။

ရေခဲမုန့် မဟုတ်ပါဘူး၊ ကျမအိမ်နောက်ဘေးက ပန်းစိုက်တဲ့အိုးမှာ တင်နေတဲ့နှင်းတွေပါ။ ဒီဘက်ပုံက ဘုန်းကြီးကျောင်းအတွက် ချက်ထားတဲ့ ဟင်းလျာများ။

ဟင်းချက်လို့ပြီးတော့ ညစာစားချိန်ရောက်သွားပြီ။ ထမင်းပြင်ပြီး တူဝရီးနှစ်ယောက် ညစာစား၊ ခဏနား ရေမိုးချိုးပြီး ကွန်ပျူတာရှေ့ရောက်မှ ကဗျာလေးဆီ စိတ်က ပြန်ရောက်သွားတယ်။

The day is ending,
The night is descending;
The marsh is frozen,
The river dead.

***

ဒီလိုနဲ့ ကဗျာတပုဒ် ဖြစ်လာခဲ့ပါတယ်။ ဘာသာပြန်တယ်လို့ ဆိုရအောင်လဲ အတိအကျတော့ မဟုတ်ပါဘူး။ ကိုယ်နားလည်သလိုသာ ရေးလိုက်မိတာပါပဲ။ မူရင်းကဗျာ အရသာပျက်သွားခဲ့ရင်တော့ ဘာသာပြန်သူ ကျမကို ခွင့်လွှတ်ကြပါတော့ … ။

ဖေဖော်ဝါရီ မွန်းလွဲချိန်

တရွေ့ရွေ့နှင့်
နေ့တာလွင့်ကြွေ
ညဥ့်ဦးခြေချ
အမှောင်ကျဆဲ
အေးခဲစိမ့်မြေ
အို … မြစ်သေ … ။

တိမ်လွှာလွင့်ပါး
ပြာမှုန်များသွင်
ထိုကောင်းကင်၌
နေ၀င်ဆည်းဆာ
အာကာပြင်ထက်
မှိန်ပြိုးပြက် … ။

ဖြူစင်လွနှင်း
ကျဆင်းတဖန်
ဝင်းခြံစည်းရိုး
ခြုံလွှမ်းမိုးလျက်
လမ်းမထက်မှာ
နှင်းမွေ့ယာ … ။

မြက်ခင်းပြင်ကျယ်
ကြောက်ဖွယ်ပုံရိပ်
တိုးတိတ်ဖြတ်သွား
မသာ ရထား … ။

ခေါင်းလောင်းသံမြည်
အဝေးဆီမှ
မရဏမင်း
ခေါ်ဆောင်ချဉ်းသို့
ရင်တွင်းညှိုးငယ်
အဘယ်နတ်ဆိုး
ခေါင်းလောင်းထိုး … ။

ခြေရာချန်ထား
အရိပ်များစွာ
ဝေးကွာပျက်သုဉ်း
နှလုံးပူဆွေး
အချက်ပေးနေ
သေမင်းတမန်
ခေါင်းလောင်းသံ … ။

***

၎၊ ဖေဖော်ဝါရီ ၂၀၁၂
၂၁း၄၃ နာရီ

နောက်တနေ့ အလုပ်သွားတော့ အလုပ်နားက ရေကန်ကြီးတခုလုံး ရေခဲနေတယ်။ ခါတိုင်း စိမ်းလန်းနေတဲ့ မြက်ခင်းပေါ်မှာ နှင်းတွေနဲ့ ဖြူဖြူဖွေးလို့။ စာဆို Henry က သူ့ကဗျာထဲမှာ The river dead လို့ ရေးခဲ့တယ်။ ခုမြင်ရတာတော့ The lake dead ပေါ့။ ကြည့်လေ … ရေကန်ကြီး ထဲမှာ အမြဲတမ်း လှုပ်ရှား လွန့်လူးနေတတ်တဲ့ လှိုင်းကလေးတွေတောင် မလှုပ်မယှက် တိတ်တဆိတ် အေးခဲလို့ … ။ ဖေဖော်ဝါရီ မွန်းလွဲချိန်ရဲ့ ရာသီဆိုးက ကျမကို တကယ်ပဲ ဖမ်းစားနိုင်လွန်းတယ်။

***
မေဓာဝီ
၆၊ ဖေဖော်ဝါရီ၊ ၂၀၁၂
၂၃း၀၀ နာရီ