အားရနေလို့ … အားကျစေဖို့ …

ဇူလိုင်လ ၂၂ ရက်၊ ၂၀၁၁ ခုနှစ်။

လန်ဒန်တက္ကသိုလ် (SOAS) ရဲ့ ဘွဲ့နှင်းသဘင် အပ်နှင်းတဲ့ အခမ်းအနားကို အွန်လိုင်းကနေ စောင့်ကြည့်နေခဲ့တယ်။ အဲဒီနေ့မှာ မဟာဝိဇ္ဇာဘွဲ့ယူသူ ၃ ဦးက ကျမနဲ့ ခင်မင်ရင်းနှီးနေတာမို့ သူတို့ကို အားပေးချင်စိတ်နဲ့ စောင့်ကြည့်နေခဲ့တာပါ။ သူတို့ ၃-ဦးက M.A Religions: Buddhist Studies Pathway (မဟာဝိဇ္ဇာ ဘာသာရေး ဗုဒ္ဓဘာသာလေ့လာရေးလမ်းစဉ်) ဆိုတဲ့ ဘွဲ့ကို ယူကြတဲ့သူတွေ ဖြစ်ပြီး ၃ ဦးအနက် ၂ ဦးက မြန်မာပြည်က သံဃာ ၂ ပါးနဲ့ ကျန် တဦးကတော့ ကျမနဲ့ ခင်မင်ရင်းနှီးနေတဲ့ ပြည့်ပြည့် (ပြည့်ဖြိုးကျော်) ဆိုတဲ့ မိန်းကလေးပါပဲ။

လန်ဒန်တက္ကသိုလ် ဘွဲ့နှင်းသဘင် အခမ်းအနား

ပြည့်ပြည့်ကို ကျမသိတာ ကြာပါပြီ။ ဒီနိုင်ငံကို ရောက်ခါစ လွန်ခဲ့တဲ့ လေးနှစ်ခန့်က စသိခဲ့တယ်။ အဲဒီတုန်းက သူက အောက်စ်ဖို့ဒ် တက္ကသိုလ်မှာ ကျောင်းတက်နေတာလို့ သိရတော့ ချီးကျူးဂုဏ်ယူမိတယ်။ ကျမ ငယ်ငယ်ကတည်းက ခုချိန်ထိ သိပ္ပံမောင်ဝရဲ့ “အောက်စ်ဖို့ဒ်တက္ကသိုလ် ခရီးသွားမှတ်တမ်း” စာအုပ်ကြီးကို မရိုးနိုင်အောင် အခေါက်ခေါက် ဖတ်ပြီး အောက်စ်ဖို့ဒ်နဲ့ ရင်းနှီးနေခဲ့တဲ့အပြင် အောက်စ်ဖို့ဒ်လို့ အသံကြားတာနဲ့ ရင်ခုန်မိသလို အောက်စ်ဖို့ဒ်မှာ ကျောင်းတက်ခွင့်ရသူတွေကို ဆိုရင်လဲ သိပ်အထင်ကြီး အားကျတာပဲ။

ပြည့်ပြည့်က အောက်စ်ဖို့ဒ်ကနေ ဘတ်ချလာ ဒီဂရီ ရသွားပြီး လန်ဒန်မှာ မာစတာ ဆက်တက်တယ် ကြားတယ်။ အဲဒါက မထူးဆန်းပေမဲ့ ထူးဆန်းတာက မာစတာဒီဂရီကို ယူတဲ့ ဘာသာရပ်က အောက်စ်ဖို့ဒ်မှာ တက်ခဲ့တဲ့ ဘာသာရပ်နဲ့ မတူဘဲ လုံးဝ ပြောင်းလဲသွားလို့ပါပဲ။ သူတက်တဲ့ ဘာသာရပ်က အထက်မှာ ရေးခဲ့တဲ့ ဗုဒ္ဓဘာသာဆိုင်ရာ (Buddhist Studies Pathway) ဆိုတော့ ထူးခြားနေတာပေါ့။ အဲဒီကတည်းက ကျမသူ့ကို စိတ်ဝင်စားနေမိတယ်၊ သူနဲ့ အေးအေး ဆေးဆေး စကားပြောချင်တယ်၊ သူကလဲ အလုပ်က ခပ်များများ၊ ခရီးတွေ ဟိုသွားဒီသွားနဲ့၊ နောက်ပြီး စာဂျပိုးလေးဆိုတော့ စာကလွဲရင် ဘာမှ အာရုံမရှိသူ။ စာတွေ သိပ်လုပ်လွန်းလို့ ဆရာမတွေကတောင် တားနေရတယ်လို့လဲ တဆင့်စကား သတင်းတွေကြားရဲ့။

နောက်တော့ မာစတာဒီဂရီကိုလဲ ထူးထူးချွန်ချွန် အောင်မြင်ခဲ့ပြီး အခု PhD အတွက် ဆက်လုပ်နေပြီ ဆိုတော့ ကျမအတော်လေးကို အံ့သြရင်း ချီးကျူးမိသလို ၀မ်းလဲ ၀မ်းသာဂုဏ်ယူမိတယ်။ နိုင်ငံရပ်ခြားရောက် မြန်မာမိန်းကလေး (လူဝတ်ကြောင်) ထဲမှာ ခုလို ဗုဒ္ဓဘာသာဆိုင်ရာ ပညာရပ်ကို စိတ်ဝင်တစားနဲ့ တစိုက်မတ်မတ် PhD အဆင့်ရောက်အောင် လေ့လာတဲ့သူ (ကျမသိသလောက်ဆိုရင်) အင်မတန်မှ ရှားပါတယ်။ သူ့ကို အားကျစိတ်၊ သူ့လုပ်ရပ်တွေကို အားရကျေနပ်စိတ်ကြောင့် အင်တာဗျူးလုပ်ချင်လို့ မေးခွန်းလေးတွေ စီစဉ်ပြီး ဇူလိုင်လရဲ့ နေ့လည်ခင်း တခုမှာ သူ့အိမ်ကို သွားတွေ့ဖြစ်ခဲ့တယ်။
***

(၁) အင်တာဗျူးနေ့က လျှပ်တပြက်ရိုက်ချက် (၂) ပါဠိသင်တန်းတခု၌စိတ်ဝင်စားစွာ နားထောင်နေစဉ်

မေ - ပြည့်ပြည့် အောက်စ်ဖို့ဒ်က ရတဲ့ဘွဲ့ နာမည်နဲ့ ခုနှစ်ကို ပြောပြပါဦး။
ပြည့် - B.A (Hons) Economics and Management ပါ။ စီးပွါးရေးနဲ့ စီမံ အုပ်ချုပ်ရေးပေါ့။ ၂၀၀၈ ခုနှစ်က ဘွဲ့ရခဲ့ပါတယ်။

မေ - အောက်စ်ဖို့ဒ် တက္ကသိုလ်ဝင်ဖို့အတွက် ဘယ်လိုတွေ ပြင်ဆင်ခဲ့ရလဲ၊ ၀င်ခွင့်ရဖို့ ဘယ်လို အရည်အချင်းတွေ လိုအပ်လဲ။
ပြည့် - ၀င်ခွင့်ရဖို့က Grade A level မှာ အနည်းဆုံး 3 A ရမှ လျှောက်လို့ရတယ်။ အဲဒီအတွက် GCSE မှာရော A Level မှာရော တောက်လျှောက် ကြိုးစားခဲ့ရပါတယ်။ ကျောင်းလျှောက်ဖို့အတွက် အက်ဆေး ၂ ပုဒ်နဲ့ application form ကို အောက်တိုဘာမှာ နောက်ဆုံးထားပြီး တင်ရတယ်၊ အဲဒါကို ကြည့်ပြီးးမှ သူတို့က လက်ခံတယ်ဆိုရင်ရင် အင်တာဗျူး ခေါ်တယ်။

မေ - အက်ဆေးကို သူတို့ ဘာခေါင်းစဉ်ပေးထားလဲ၊ စာလုံးရေရော သတ်မှတ်ထားလား။
ပြည့် - ဘာခေါင်းစဉ်ရယ်လို့ မပြောဘူး၊ စာလုံးရေလဲ သတ်မှတ်မထားဘူး။ အဲဒီတုန်းက ကံကောင်းချင်တယ်လို့ပဲ ပြောရမှာပေါ့၊ A level မှာတုန်းက ဘိုင်အိုတို့ Business study တို့မှာ အက်ဆေးအရှည်တွေ extra class အနေနဲ့ ဆရာတွေက လုပ်ခိုင်းထားတာ ရှိတယ်၊ တချို့လူတွေကတော့ မလုပ်ကြဘူး၊ မလုပ်လဲရတယ်။ သမီးကတော့ လုပ်ထားတာ ရှိတယ်ဆိုတော့ ပို့လိုက်တာပေါ့။ နောက်ပြီး Reference တွေလဲ ဆရာတွေဆီက ရတယ်။ application form ကို အောက်တိုဘာမှာပို့လိုက်တယ်၊ ဒီဇင်ဘာလဆန်းမှာ အင်တာဗျူးသွားရတယ်။

မေ - အင်တာဗျူးမှာ မေးတဲ့မေးခွန်းတွေ မှတ်မိသေးလား။ ဘယ်လို အခက်အခဲတွေ ရှိခဲ့လဲ။
ပြည့် - အင်တာဗျူးက ၂-ရက်မေးတာ၊ ပထမနေ့မှာ ရေးဖြေ၊ သင်္ချာနဲ့ အင်္ဂလိပ်စာ ဖြေရတယ်။ နောက်တနေ့ အီကိုနဲ့ Management ဆိုတော့ အင်တာဗျူး ၂-ကြိမ် ဖြေရတယ်။ အီကိုက တကြိမ် Management က တကြိမ်ဆိုတော့ စုစုပေါင်း ၃-ကြိမ်ပေါ့။ မေးတာကတော့ အစုံပဲ။ နာရီဝက်စီလောက် ကြာတယ်။ မေးတဲ့သူက နှစ်ယောက်၊ တယောက်က ဘာသာရပ်ဆိုင်ရာမေးတာ၊ နောက်တယောက်ကတော့ အထွေထွေပေါ့။ အဲဒီတုန်းက မှတ်မှတ်ရရ အာရှဘက်က တက်နေတဲ့အချိန်၊ အီကိုမှာမေးတာ … အနောက်နိုင်ငံက စတော့မားကတ်တွေနဲ့ အရှေ့နိုင်ငံက စတော့မားကတ်တွေကို နှိုင်းယှဉ်ခိုင်းတယ်။ အရှေ့ကတော့ အနောက်ကို မှီမှာမဟုတ်ဖူး … လို့ ။ အရှေ့နိုင်ငံက institution အနေနဲ့ လုပ်ထားတဲ့ law တွေဘာတွေက သိပ်ပြီး strong မဖြစ်ဘူး။ အနောက်နိုင်ငံက ကြာလှပြီ၊ အကုန်လုံး ဖွဲ့စည်းတည်ဆောက်ပုံက စနစ်တကျ ရှိပြီးသား။ ဒါတောင်မှ crash ဖြစ်တာဆိုတော့ အရှေ့နိုင်ငံမှာ ဆိုရင်တော့ ပိုဆိုးမှာပေါ့။ အဲဒါကတော့ မှတ်မှတ်ရရပဲ။

မေ - ဒါနဲ့ ပြည်ပြည့်က ဘာဖြစ်လို့ ဒီဘာသာရပ်ကို ရွေးခဲ့တာလဲ။
ပြည့် - Business Study လုပ်ထားတယ်ဆိုတော့ Eco နဲ့ Management ကို ရွေးလိုက်တာပါ။ အောက်စ်ဖို့ဒ်မှာ သမီးစ၀င်တော့ အဲဒီကို့စ် စတာ ၄ နှစ်လောက်ပဲ ရှိသေးတယ်။ အရင်က B.A Eco ပဲ ရှိတယ်။ Management နဲ့ မပေါင်းဘူး။ နောက်မှပေါင်းလိုက်တာ။ ဒီကို့စ်က အောက်စ်ဖို့ဒ်မှာ competition အများဆုံးဖြစ်လို့ ၀င်ဖို့ ခက်တဲ့ ကို့စ်တခုပဲ။

မေ - အောက်စ်ဖို့ဒ်မှာ ဘယ်နှနှစ်ကြာခဲ့လဲ။
ပြည့် - ပုံမှန်က ၃ နှစ် ကို့စ်၊ ၂၀၀၄ ကနေ ၂၀၀၇ ဆိုရင် ပြီးရမှာ။ ဒါပေမဲ့ သမီးက ၁ နှစ် gap ယူလိုက်တာ။ အမေဆုံးလို့ ရန်ကုန်ပြန်တာနဲ့ ၂၀၀၆-၂၀၀၇ တနှစ်နားလိုက်တယ်။ အဲဒါကြောင့် ၂၀၀၈ မှ ပြီးတယ်။

(၁) အောက်စ်ဖို့ဒ်တက္ကသိုလ်ဘွဲ့နှင်းသဘင် (၂) ဆရာတော်ဦးဓမ္မသာမိနှင့်

မေ- ပြည့်ပြည့် အဲဒီမှာ သင်နေတဲ့ ကာလတလျှောက် ကြုံခဲ့ရတဲ့ အခက်အခဲတွေ ဘာတွေများရှိလဲ။
ပြည့် - ကြုံရတဲ့ အခက်အခဲကတော့ အောက်စ်ဖို့ဒ်မှာ သင်တဲ့စနစ်က တခြားတက္ကသိုလ်တွေနဲ့ ကွာတယ်။ ဘက်ခ်ျလာ လယ်ဗယ်မှာတောင် independent study မို့ ဆရာတွေကိုချည်း သိပ်ပြီး အားကိုးလို့ မရဘူး။ နောက်ပြီး အောက်စ်ဖို့ဒ်မှာက ကျူတိုရီယာယ် စနစ်၊ အက်ဆေးစနစ် ဆိုတာ ရှိတယ်။ အက်ဆေးက တပတ်ကို ပျမ်းမျှခြင်း ၂ ပုဒ် အမြဲရေးရတယ်၊ တပုဒ်ကို စာလုံးရေ ၁၂၀၀ နဲ့ ၁၅၀၀ကြား ဆိုတော့ စုစုပေါင်း တပတ်ကို စာလုံးရေ ၃၀၀၀ လောက်က အမြဲရေးနေရတယ်။ အဲဒီအတွက် စာကလဲ အနည်းဆုံး source ၁၀ ခုလောက် ဖတ်ရတယ်။ စုစုပေါင်းဆို ၂၀ လောက် သွားကျတာပေါ့။ chapter ဆိုလဲ ၂၀၊ article တွေ ဖတ်ရင်လဲ ၂၀ ပေါ့။ အဲဒီလိုမျိုးဖတ်ရတော့ time pressure ရှိတယ်၊ အောက်စ်ဖို့ဒ်မှာ essay crisis က အမြဲတမ်းဖြစ်တယ်။ တင်ခါနီး မနက်ဖြန် တင်ရမယ်ဆိုရင် ဒီနေ့ညက အိပ်ချိန်က တော်တော်နည်းသွားပြီ။

နောက်တခုက သမီးရဲ့ ကို့စ်မှာ လက်ချာနဲ့ ကျူတိုရီယာယ်နဲ့က အံဝင်ခွင်ကျ မဖြစ်ဘူး။ ပုံမှန်က လက်ချာပြီးမှ ကျူတိုရီယာယ်ဖြစ်ရမယ်။ ဒါပေမဲ့ တခါတလေ ဒီ term က လက်ချာကို နောက် 3rd term လောက်ကျမှ ကျူတိုရီယာယ် ၀င်ရတယ်။ တခါတလေ ကျူတိုရီယာယ် အရင်ဝင်ပြီးမှ လက်ချာလာတယ်။ အဲဒီတော့ စာကို ကိုယ့်ဟာကိုယ် ဖတ်ရတယ်။ ကောင်းတာကတော့ ကျူတိုရီယာယ်မှာ ကျောင်းသား အများဆုံး ၃ ယောက်လောက်ကို ဆရာတယောက် ဆိုတော့ ဆရာက ပိုပြီး attention ပေးနိုင်တာပေါ့။ အဲဒါကတော့ အားသာချက်ပေါ့။ အားနည်းချက်ကတော့ ဆရာတွေက မရှင်းပြနိုင်ဘူး။ သူတို့မှလဲ အချိန်မရှိဘူး။ ကိုယ်စာဖတ်ပြီး နားမလည်ရင် အဲဒါ ကိုယ့်ရဲ့ ပြဿနာပဲ။ ဆရာတွေက ဘာမှ လုပ်ပေးလို့မရဘူး။ လက်ချာကလဲ နောက်မှလာမှာဆိုတော့ မသိဘူး။ အဲဒီတော့ တကယ့် Independent study ပဲ။

နောက်ပြီးတော့ အကုန်လုံးက competition များတယ်။ ၀င်ဖို့လဲ competition ရှိသလို ကျောင်းသားတွေကလဲ တယောက်နဲ့ တယောက် အမြဲတမ်း ပြိုင်နေကြတာ။ နောက်တခုက အဲဒီက အားနည်းချက်လို့ ဆိုရမှာပေါ့လေ … ကိုယ်သာလျှင် အညံ့ဆုံးလို့ ကျောင်းသားတိုင်းလိုလိုက တွေးတာ။ အဲဒါက မှန်ခြင်းမမှန်ခြင်း ဘေးချိတ်၊ ကျောင်းသား အများစုက တွေးကြတာ။

မေ - ဘာဖြစ်လို့ အဲဒီလိုတွေးတာလဲ။ သူများတွေက ကိုယ့်ထက်သာတယ်လို့ ထင်တာလား။
ပြည့် - ဟုတ်တယ် … ထင်တာ … အထင်နဲ့ချည်း ဖြစ်နေကြတာ။

မေ - အဲဒါဆို စိတ်ဓာတ်ကျတဲ့ သဘော ဖြစ်နေကြတာပေါ့။
ပြည့် - ဟုတ်တယ်၊ စိတ်ဓာတ်ကျတဲ့ ရောဂါက အဲဒီမှာ တော်တော်များတယ်။ အောက်စ်ဖို့ဒ်တက္ကသိုလ်မှာ တနှစ်ကို အနည်းဆုံး ၂ ယောက် ၃ ယောက်လောက် ကိုယ့်ကိုယ်ကိုယ် သတ်သေကြတယ်။

မေ - ဆရာတွေကရော ကျောင်းသားတွေကို စိတ်ဓာတ်အင်အား မြှင့်တင်မပေးကြဘူးလား။
ပြည့် - လုပ်တော့လုပ်တယ်၊ ဒါပေမဲ့ ဆရာတွေနဲ့ ကျောင်းသားနဲ့က ထိတွေ့မှု သိပ်မရှိဘူး။ အောက်စဖို့ဒ် တက္ကသိုလ်က ကောလိပ်တွေနဲ့ အုပ်ချုပ်တာမို့ ကိုယ်က ဒီကောလိပ်မှာနေပေမယ့် တခြားကောလိပ်က ဆရာဆီမှာ ကျူတိုရီယာယ်သွားယူရတာဆိုတော့ ဆရာနဲ့ ကျောင်းသားနဲ့က ထိတွေ့မှုသိပ်မရှိဘူး။ အထူးသဖြင့် ဘတ်ချလာ လယ်ဗယ်ဆိုရင် ထိတွေ့မှုပို နည်းတယ်။

ပထမနှစ်က အီကိုလက်ချာဆိုရင် သွားသာထိုင်တယ် ဘာမှ နားမလည်လိုက်ဘူး။ ဘာဖြစ်လို့လဲ ဆိုတော့ ဆရာတွေက စာသင်ချိန် ၂ နာရီအတွင်း သင်ရတဲ့ ခေါင်းစဉ်တွေက အရမ်းများတော့ အမြန်သင်ရတယ်။ ဘာသာစကားကို ရွေးတာကိုက စကော်လာတွေကို သင်သလို terminology တွေသုံးတာဆိုတော့ နားလည်ရခက်တယ်။ ကိုယ်က ကြိုမဖတ်ထားရင် နားမလည်ဘူး။

နောက်တခုက … အောက်စ်ဖို့ဒ်ကို ၀င်တဲ့ ဗြိတိသျှ ကျောင်းသားအများစုက ပရိုက်ဗိတ်ကျောင်းတွေက လာကြတာ၊ အဲဒီကို ၀င်တဲ့ နိုင်ငံတကာက ကျောင်းသားတွေဆိုရင်လဲ ပရိုက်ဗိတ်ကျောင်းထွက်တွေပဲ။ သမီးရဲ့ အတန်းဖော်တွေက ပရိုက်ဗိတ်ကျောင်းက၊ သမီးတယောက်ထဲ စတိတ်ကျောင်းက ဆိုတော့ သူတို့ ပရိုက်ဗိတ်ကျောင်း ယဉ်ကျေးမှုနဲ့ကွာတာပေါ့။ ဒါကြောင့် သမီးအနေနဲ့ adjust လုပ်ရခက်ခဲ့တယ်။

မေ - အဲဒီတော့ ပြည့်ပြည့် စာသင်တဲ့တလျှောက် စိတ်ဖိစီးမှုတွေ ဖြစ်တာကို ဘယ်လို တွန်းလှန်ခဲ့လဲ။
ပြည့် - ၂၀၀၅ ဒီဇင်ဘာမှာ ဆရာတော်ဦးဓမ္မသာမိ အောက်စ်ဖို့ဒ်ကျောင်း အဟောင်းကို ပြောင်းလာပြီ။ အဲဒီမှာ သောကြာညဆို စုပေါင်း တရားထိုင်တာ ရှိတယ်။ အဲဒါက တော်တော်ကယ်သွားတယ်။ အဲဒီကနေ မျိုးစေ့ပျိုးသလို ဖြစ်သွားတာပေါ့။ ပထမတုန်းကတော့ စာသင်ပြီး ပင်ပန်းတာနဲ့ ဆိုတော့ အိပ်ငိုက်တာက များတယ်။ အိပ်ငိုက်ပေမဲ့လဲ အဲဒါက အစပျိုးသလို ဖြစ်သွားပြီး နောက်ပိုင်းမှာ တဖြည်းဖြည်းနဲ့ စိတ်ဖိစီးမှုတွေကို တော်တော်လေး လျော့ကျစေပါတယ်။

မေ - အဲဒီအရင်ကရော ဘာသာရေးနဲ့ ပတ်သက်ပြီး ဘာတွေလုပ်ခဲ့လဲ။
ပြည့် - အရင်ကတော့ မိရိုးဖလာ ဘုရားရှိခိုး ပုတီးစိပ်တာလောက်ပဲ။ တရားထိုင်တာက ဆရာတော်နဲ့တွေ့မှ၊ ဆရာတော်က အခြေခံကစပြီး ဘယ်လိုထိုင်ရမယ် ဆိုတာသင်ပေးတယ်။ ဆရာတော်က ပရိယတ္တိဘက်လဲ အားသန်တယ်ဆိုတော့ စာလေးတွေနဲ့ ရှင်းပြတယ်။ သောကြာနေ့တိုင်း ၄၅ မိနစ်တရားထိုင် ပြီးရင် group discussion လုပ်တယ်။ အဲဒီအချိန်မှာ မသိတာရှိရင် မေးလို့ရတယ်၊ ဆရာတော်က ရှင်းပြပေးတယ်။

မြန်မာပြည်၌ သီလရှင်ဝတ်စဉ်

၂၀၀၇ မှာ မြန်မာပြည်ကို တနှစ်ပြန်တော့ သဲအင်းဂူမှာ ၁၀ ရက်စခန်းဝင်တယ်။ အဲဒါက ပထမဆုံး တရား စခန်း စ၀င်ဖူးတာပဲ။ သီလရှင်ဝတ်တာကတော့ ၂၀၀၈ အောက်စ်ဖို့ဒ်မှာ ဖိုင်နယ် စာမေးပွဲဖြေပြီးမှ မြန်မာပြည် ပြန်ပြီး သီလရှင် ၅ ပတ် ၀တ်တယ်။ ပြည်က သဲအင်းဂူမှာ တရားထိုင်တယ်။ အဲဒီနောက်ပိုင်း တောက်လျှောက် တရားထိုင်ဖြစ်တယ်။ ဒီကို ပြန်လာတော့ ပဋိပတ္တိက လက်တွေ့လုပ်ထားပြီးပြီ ဆိုတော့ ပရိယတ္တိ လေ့လာချင်စိတ် ပေါ်လာတာပေါ့။ ဆရာတော် ဦးဓမ္မသာမိကတော့ သီအိုရီပိုင်းတွေ ရှင်းပြတယ်။



မေ- ပြည့်ပြည့် မဟာဝိဇ္ဇာဘွဲ့ ယူခဲ့တဲ့ M.A Buddhist Study ကို လေ့လာဖို့ စိတ်ကူးဖြစ်ခဲ့ပုံကို ပြောပြပါအုံး၊
ပြည့် - ၂၀၀၈ နိုဝင်ဘာမှာ ဒီကိုပြန်ရောက်ပြီး အောက်စ်ဖို့ဒ်မှာ ဘွဲ့နှင်းသဘင်ရှိလို့ နေတဲ့အချိန်မှာ တည တိပိဋက ဆရာတော် ဦးဂန္ဓမာလာကို ပဋ္ဌာန်းအကြောင်း သိချင်လို့ မေးရင်း ပဋ္ဌာန်းဆိုတာ အရမ်းခက်တယ် အရမ်းရှုပ်တယ်ဆိုတော့ စာသင်ရင်ကောင်းမလား လျှောက်တော့ ဆရာတော်က အားပေးတယ်။ အဲဒါနဲ့ ဆရာတော် ဦးဓမ္မသာမိဆီက အကြံဉာဏ်တောင်းပြီး SOAS မှာ M.A Buddhist Study ရှိတာနဲ့ လျှောက်လိုက်တယ်။

အဲဒီဟာ လျှောက်တဲ့အချိန်မှာပဲ ဘာမင်ဂန်မှာလဲ M.A Eco Development study ကို လျှောက်လိုက်သေးတယ်။ B.A ပြီးသွားတော့ M.A ဆက်လုပ်ချင်တာလဲ ပါတယ်။ စီးပွါး စီမံနဲ့ ဘီအေဘွဲ့ရပေမဲ့ စီးပွါးရေး မလုပ်ချင်ဘူး။ အရင်ကတည်းက စာသင်တာဝါသနာပါတယ်၊ စာရေးတာဝါသနာပါတယ်၊ စကော်လာ ဖြစ်ချင်တာကိုး။ ဒီ Buddhist Study မလုပ်ဖြစ်ရင်တောင် Development Study နဲ့ လုပ်ပြီး စာသင်တဲ့ လိုင်းဘက်သွားမှာ။ အခုက subject ပြောင်းပေမဲ့ career အနေနဲ့ကတော့ မပြောင်းဘူး။

အဲဒါနဲ့ ဘာမင်ဂန်မှာ Development Study လျှောက်တော့လဲ ၀င်တယ်။ အဲဒီအချိန်မှာ အဖေက အလုပ်ရှာလို့ပြောလို့ အလုပ်လျှောက်လိုက်သေးတယ်။ နောက်တော့ ဖေဖော်ဝါရီ ၂၀၀၉ မှာ ဦးဂိုအင်ကာ စခန်းသွားတယ်။ စခန်းက ထွက်ထွက်ချင်း အလုပ်က အင်တာဗျူး လှမ်းခေါ်တယ်၊ ဖြစ်ချင်တော့ အဲဒီအချိန်မှာပဲ SOAS ကလဲ လှမ်းခေါ်တယ်၊ အလုပ်လုပ်ပြီဆိုရင် ကျောင်းတက်ရမှာ မဟုတ်တော့ဘူး၊ နောက်ဆုံးတော့ အလုပ်ကို မသွားတော့ဘူး။ SOAS အင်တာဗျူးပဲ သွားတော့တယ်။ အင်တာဗျူးတာကတော့ ခဏပါပဲ၊ ဘာကြောင့် social science ကနေ ဒီဘာသာရပ်ကို ပြောင်းတာလဲ ဆိုတာမျိုးလောက်ပဲ မေးတယ်။

အဲဒါကတော့ စိတ်ဝင်စားလို့ပေါ့၊ လေ့လာချင်တယ်၊ ကိုယ်လဲ meditation လုပ်ထားတဲ့ အခံရှိထားတော့ ဘာသာရေးကို တကယ့်ပညာရပ်တခုလို လေ့လာချင်လို့ ဖြေလိုက်တယ်။ နောက်ပြီး သမီးရဲ့ Reference တွေက အရမ်းကောင်းတယ်ပေ့ါလေ၊ ဆရာတော်ဦးဓမ္မသာမိနဲ့ အောက်စ်ဖို့ဒ်တက္ကသိုလ်က ဆရာရဲ့ reference ဆိုတော့ အရမ်းကောင်းလွန်းလို့တဲ့။ အင်တာဗျူးကတော့ လွယ်လွယ်ကူကူပဲ ပြီးသွားပါတယ်။
***
ပထမပိုင်းကို ဒီနေရာမှာ ခဏရပ်လိုက်ပါတယ်။ နောက်အပိုင်းမှာ …
- ဗုဒ္ဓဘာသာဆိုင်ရာ မဟာဝိဇ္ဇာကို လေ့လာသင်ယူတဲ့အတွက် မိဘဆွေမျိုးတွေရဲ့ အားပေးမှု (သို့) ကန့်ကွက်မှု အနေအထားတွေ …
- ဘာသာရေးနဲ့ ပတ်သက်လို့ ငယ်စဉ်ကနေ ခုချိန်ထိ အမြင်ပြောင်းလဲ လာပုံတွေ …
- မဟာဝိဇ္ဇာဘွဲ့အတွက် ကျမ်းပြုစာတမ်းအမည်နဲ့ အချက်အလက် စုဆောင်းခဲ့ရပုံတွေ …
- လက်ရှိလုပ်နေတဲ့ ပီအိတ်ခ်ျဒီဘွဲ့အတွက် ရွေးချယ်ထားတဲ့ ခေါင်းစဉ်၊ ပြီးစီးမှု အခြေအနေတွေ …
- ပီအိတ်ခ်ျဒီဘွဲ့ရပြီးနောက် အနာဂတ် ရည်မှန်းချက် … စသဖြင့် ဆက်လက်ဖော်ပြသွားပါမယ်။

စိတ်ဝင်စားရင် ဆက်ပြီး ဖတ်ရှုအားပေးကြပါအုံး။ ပြီးခဲ့တဲ့ လကတည်းက အင်တာဗျူးခဲ့တဲ့ အသံဖိုင်ကို အားတဲ့အချိန်လေးမှာ နည်းနည်းချင်း နားထောင်ပြီး ပြန်ရေးထားတာမို့ အချက်အလက် အမှားအယွင်းများ ပါရှိခဲ့ရင် ကျမတာဝန်သာ ဖြစ်ပါကြောင်း။
***
မေဓာဝီ
၁၈၊ သြဂုတ် ၂၀၁၁
၂၂း၄၂ နာရီ