မြက်ခင်းကလေး စိမ်းလန်းစေချင် …

ပြည်ပရောက် အမတဦးနဲ့ ဟိုတနေ့က အွန်လိုင်းမှာ စကားပြောဖြစ်ပါတယ်။
“မနေ့က အားနေတာနဲ့ နင့်ဘလော့ကို အစကနေ ထိုင်ဖတ်နေတာ … (စပါးတွဲရောင်းတဲ့ ကလေးတွေအကြောင်း) (စာမတတ်တဲ့သူတွေအကြောင်း) နင်ရေးထားတာတွေ ဖတ်ရတာ စိတ်တောင် မကောင်းဘူးဟာ”
လို့ သူကပြောတယ်။
“အဲဒါမျိုးတွေက အများကြီး … ဒီထဲရေးတာက နည်းနည်းလေးရှိသေးတာ” လို့ ကျမက ပြန်ပြောတော့ သူက
“အေးဟယ်… ငါလည်း နင့်ဘလော့ဖတ်ရင်းနဲ့ တခြား ဗမာသတင်း ၀က်ဘ်ဆိုက်တွေ လျှောက်ကြည့် လျှောက်ဖတ်မိတော့ ပိုသိလာတယ်၊ ညက တရေးနိုးပြီး အဲဒီအကြောင်းတွေ အတွေးထဲရောက်လာလို့ တော်တော်နဲ့ ပြန်အိပ်လို့မရဘူး၊ မျက်ရည်တောင် ကျမိတယ်၊ ငါတို့တိုင်းပြည်မှာ အဲဒီလောက်တောင် ဆိုးနေပြီနော်”
“… … …”

တကယ်တမ်း လက်တွေ့မှာ ကျမတို့ဆီက လူတွေ နေ့စဉ်နဲ့အမျှ ဘယ်လို ရင်ဆိုင်နေကြရတယ်ဆိုတာ သူသိရင် ပိုပြီး ငိုမိမလား မပြောတတ်ပါဘူး။ ကျမရေးတာတွေ .. သတင်းထဲ ပါတာတွေဟာ အနည်းငယ်မျှပါပဲ။ ကျမသည်လည်း ကိုယ့်ပတ်ဝန်းကျင် ကွက်ကွက်ကလေးမှာ ကြုံသမျှ မြင်သမျှသာ ရေးပြရတာကိုး။ ဒီ့ထက် ဆိုးဝါးတဲ့ ဘ၀ပေါင်းများစွာ … ကျမတို့ တိုင်းပြည်မှာရှိနေပါတယ်၊ ပြည်သူတွေ ကြုံတွေ့နေရပါတယ်။ ဒါ ဘာကြောင့်လဲ …. ။ ဒါကို ဘယ်လို ပြေလည်အောင် ဖြေရှင်းပေးကြမလဲ … ။

အမက ဆက်ပြောပါတယ်။
“အစတုန်းက ငါတို့ ဒီနေ့ ရုပ်ရှင်သွားကြည့်မလို့ စီစဉ်ထားတာ၊ မသွားတော့ဘူးဟာ …၊ အပျော်အပါးနဲ့ ပိုက်ဆံအကုန် မခံတော့ဘူး၊ ဒီလို ကုန်မယ့် ပိုက်ဆံတွေကို စုထားမယ်၊ ကလေးတွေအတွက် … စာမသင်နိုင်တဲ့ သူတွေအတွက် ငါတို့ လုပ်ပေးရမယ်”

ဒီစကားကြားတော့ ကျမ အလွန်ပီတိဖြစ်ရတယ်။ ကျမ အမဟာ ရုပ်ရှင်ကြိုက်ပါတယ်၊ သူနဲ့ သူ့အမျိုးသားနဲ့ အလုပ် အားလပ်ရက်မှာ ရုပ်ရှင်သွားကြည့်ဖို့ အစီအစဉ်ကို ကျမ စာတပုဒ်ကြောင့် ဖျက်လိုက်ကြသတဲ့။ သူ့အမျိုးသားကလည်း လိုလိုလားလားနဲ့ ဒီလိုကုန်ကျမယ့် ငွေတွေကို အကျိုးရှိရာမှာ အသုံးချကြမယ်လို့ သဘောတူလက်ခံခဲ့တယ်။ ကျမ ၀မ်းသာမိပါတယ်။

“နင်လဲ အချိန်တွေမဖြုန်းနဲ့၊ အလုပ်ကြိုးစားလုပ်၊ ပိုက်ဆံစုစမ်းပါ၊ အစကတော့ ငါက ပိုက်ဆံရှိရင် ဘုန်းကြီးတွေကို လှူချင်တယ်၊ ခုတော့ ဒီလိုကလေးတွေကို ပိုပြီး ထောက်ပံ့ပေးချင်တယ်ဟာ …”
သူက သူ့ခံစားချက်တွေကို ဆက်ပြောနေပါတယ်၊ ကျမကလည်း ဆက်တွေးနေမိတယ်၊

ဒီလိုသာ လူတိုင်း စဉ်းစားမိရင် … ဒီလိုသာ လူတိုင်း လုပ်ကြမယ်ဆိုရင် … ကျမတို့တိုင်းပြည်က ကလေးတွေရဲ့ အနာဂတ်ဟာ မလှပစရာ အကြောင်း မရှိနိုင်ပါဘူး။
ဒါပေမဲ့ များသောအားဖြင့် အတွေးတွေက …
“ငါတယောက်လုပ်ရုံနဲ့ ဘာဖြစ်သွားနိုင်မှာမို့လဲ … ကျန်တဲ့သူတွေ အများကြီးပါပဲ … လုပ်နိုင်တဲ့သူ လုပ်ကြပါစေ” ဆိုတဲ့ စိတ်ထားမျိုး ထားကြတဲ့သူက များနေတယ် မဟုတ်လား။

ဒီလိုမျိုး အတွေးမျိုး လူတိုင်းကတွေးကြရင် … ငါ တယောက်ကနေ … ငါ အများ ..ဖြစ်လာမယ်။ ငါပေါင်းများစွာက မလုပ်ကြတော့တဲ့အခါ … တိုင်းပြည်ဟာ ဒုံရင်းဒုံရင်း ဘ၀ကနေ လွတ်မြောက်နိုင်မှာကို မဟုတ်တော့ဘူး။
***
ဒါနဲ့ပတ်သက်ပြီး ဒီလထုတ် (မတ်-၂၀၀၇) လိုက်ဖ်စတိုင် မဂ္ဂဇင်းထဲက ဒေါက်တာမြင့်လွင်ရဲ့ ဆောင်းပါးတပုဒ် အကြောင်း နည်းနည်းပြောပြချင်ပါတယ်။ ဆောင်းပါးနာမည်က “ဘုံစားကျက် မြက်ခင်းကလေးရဲ့ အဖြစ်ဆိုး” တဲ့။

ရှေးတုန်းက အမေရိကန်မှာ စိုက်ပျိုးမွေးမြူ သူတွေဟာ ရေကြည်ရာ မြက်နုရာ စားကျက်မြက်ခင်း တခုရှာပြီး အဲဒီပတ်ဝန်းကျင်မှာ အိမ်လေးတွေဆောက်ကာ နေထိုင်ကြတယ်တဲ့၊ သူတို့ရဲ့ နွားတွေကို ဒီ ဘုံစားကျက်ထဲမှာ လွှတ်ထားလေ့ရှိ ကြတယ်ပေါ့။ တနေရာမှာတော့ နွားအကောင် ၁၀၀လောက် သာ လှည့်ပတ် စားသောက်လို့ ရလောက်အောင် ကျယ်တဲ့ စားကျက် မြက်ခင်းကလေး တခုရှိသတဲ့။ အိမ်တအိမ်ကို နွား ၂ကောင်နှုန်းနဲ့မွေးပြီး အိမ်ထောင်စု ၅၀ က ဒီ စားကျက်ကလေးရဲ့ ပတ်ပတ်လည်မှာ နေထိုင်ကြပါတယ်။

တနေ့တော့ လယ်သမားကြီးမစ္စတာစမစ်က စပါးကျီအသစ်တခုဆောက်ဖို့ ငွေလိုလို့ နွားတကောင် ထပ်တိုးမွေးပြီး ရင်းနှီးမတည်ငွေ ရှာဖို့ ကြံစည်တယ်။ နွား ၃ကောင်မွေးရင် နို့ထွက်နှုန်း ၅၀% ပိုလာမယ်၊ ၀င်ငွေ ၅၀% တိုးလာမယ်ဆိုတဲ့ စိတ်ကူးနဲ့ပေါ့။ ဒီစားကျက်လေးထဲမှာ နွား အကောင် ၁၀၀ ကနေ ၁၀၁ကောင် ဖြစ်လာရင်လဲ ၁% ပဲ တိုးလာတာမို့ ဘာမှ မဖြစ်လောက်ပါဘူးဆိုပြီး တွေးသတဲ့။
သူ့လိုပဲ မစ္စတာဘရောင်းကလည်း လယ်ယာသုံး ပစ္စည်းတွေဝယ်ဖို့ ငွေလိုလို့ နွားတကောင် ထပ်တိုးမွေးဖို့ စဉ်းစားတယ်၊ ဒီအတိုင်း … ကျန် လူတိုင်း လူတိုင်းဟာ လိုအပ်ချက်တွေ ကိုယ်စီနဲ့မို့ ငါတယောက်ထဲ နွားတကောင် ထပ်တိုးမွေးလို့ ဘာမှမဖြစ် လောက်ပါဘူးဆိုပြီး တကောင်စီ ထပ်မွေးကြသတဲ့။

ဒီတော့ တအိမ်ထောင်မှာ နွား ၂ကောင် နှုန်းနဲ့ နွား အကောင် ၁၀၀လောက်လောက်ငင စားသောက်နိုင်တဲ့ ဘုံစားကျက် မြက်ခင်းလေးဟာ အားလုံး ၁ကောင်စီ တိုးမွေးကြတဲ့အခါ နွား ကောင်ရေ ၁၅၀ဖြစ်လာတာမို့ မလောက်မင ဖြစ်လာပါရော၊ နွားတွေ မြက်၀၀ မစားရတော့ နို့ထွက်နှုန်းနည်းလာတယ်၊ ဒီတော့ လူတွေက စဉ်းစားပြန်တယ်၊ ၃ကောင်မွေးတာလဲ မဟန်သေးဘူး၊ နောက်တကောင်ထပ်တိုးပြီး မွေးဦးမှ ဆိုပြီး တကောင်စီ တိုးမွေးကြပြန်ရောတဲ့။

နွား အကောင် ၁၅၀ နဲ့တောင် မလောက်တဲ့ စားကျက်ကလေးဟာ အကောင် ၂၀၀ ဖြစ်လာပြန်တော့ ပိုဆိုးတော့တာပေါ့၊ မြက်ကလည်း အလျဉ်မီအောင် အသစ်မထွက်နိုင်တော့ စိမ်းစိုတဲ့မြက်ခင်းလေးဟာ နောက်ဆုံးမတော့ မွဲခြောက် ပျောက်ကွယ် ပျက်စီးသွား ပါလေရောတဲ့။

ဒီဖြစ်ရပ် ပုံပြင်လေးကို ‘ဘုံစားကျက်မြက်ခင်းလေးရဲ့ အဖြစ်ဆိုး’ [Tragedy of Commons] လို့ ပြောကြတယ်။
စိတ်ပညာရှင် ဂါးရက်ဟာဒင်က ဒီဖြစ်ရပ်ကြုံရတာဟာ “ဒီဘုံစားကျက်ဟာ ဘယ်သူမှပိုင်တာ မဟုတ်ဘူး၊ လူတိုင်းပိုင်တာ” လို့ အဓိပ္ပါယ်ဖွင့်ဆိုခြင်းရဲ့ ရလဒ်ကြောင့်လို့ တွေးသတဲ့။ ဘုံစားကျက်လေးရဲ့ နောက်ဆုံးကံကြမ္မာ အတွက်လည်း ဘယ်သူကမှ မိမိမှာ တာဝန်ရှိတယ်လို့ မခံစားမိကြဘူး .. ဒီတော့ ကိုယ်လုပ်လိုက်တဲ့ လုပ်ရပ်ရဲ့ အကျိုးသက်ရောက်မှုကိုလည်း ထည့်မတွက်ကြတော့ဘူး။

ဆောင်းပါးရှင် ဒေါက်တာမြင့်လွင်က ခုလို ဆက်ရေးထားပါတယ်။

‘ငါ ကားပေါ်ကနေ ရေသန့်ပုလင်းခွံလေးတလုံး ပစ်ချလိုက်ရုံနဲ့တော့ ပတ်ဝန်းကျင်ကြီး ညစ်ညမ်းသွားမှာ မဟုတ်ပါဘူး’ ဒါပေမဲ့ သင့်လိုပဲ တခြားသူတွေက ဒီလိုတွေးပြီး လုပ်ခဲ့ရင် ဘယ်လိုလုပ်မလဲ တဲ့။
‘သစ်တောထဲမှာ သစ်ပင်တွေက အများကြီး ငါတယောက်ထဲ ခုတ်လိုက်ရုံနဲ့ ကုန်မသွားပါဘူး’ ဒါပေမဲ့ သင့်လို တွေးပြီး လူသန်းပေါင်းများစွာက ပြုမူခဲ့ရင် ….
***
ဒီဆောင်းပါး ဖတ်ပြီး ကျမစိတ်ထဲ ပြောင်းပြန် ပြန်တွေးမိတယ်။
ဒီဆောင်းပါးမှာက … “ငါတယောက်ထဲ လုပ်လိုက်ရုံနဲ့ ဘာမှမဖြစ်ပါဘူး” လို့ တွေးပြီး လုပ်မိကြတာပါ။
ကျမက ဒီလိုတွေးကြည့်မိတာပါ။
“ငါတယောက်ထဲ မလုပ်ရုံနဲ့ ဘာမှ မဖြစ်ပါဘူး” လို့။

ဟုတ်ပါတယ်။ အခု လူတွေက အဲဒီလိုတွေချည်း တွေးနေကြတယ်။ “နှမ်းတလုံးထဲနဲ့ ဆီမဖြစ်နိုင်ဘူး” ဆိုတဲ့ စကားပုံကလည်း ဒီလိုလူစားမျိုးတွေ ကိုယ့်ကိုယ်ကို ကာဗာလုပ်ဖို့ အတွက် သက်သက်ဖန်တီး ပေးထားသလိုများ ဖြစ်နေသလား မသိပါဘူး။
အဲဒီအတွေးတွေနဲ့ အရာရာကို လစ်လျူရှု ဥပေက္ခာပြု နေတတ်ကြတဲ့ လူစားမျိုးထဲမှာ ကိုယ်များ ပါနေမလား။ ကျမ တွေးကြည့်မိပါတယ်။ ဒီလို လူစားမျိုးတွေ များလာရင် … ကျမတို့တိုင်းပြည် အနာဂတ်ဟာ ဘယ်လိုများ ဖြစ်လာလေမလဲ။
***
ကျမတို့ရဲ့ ဘုံစားကျက် မြက်ခင်းကလေးဟာ ခြောက်သွေ့ ပျက်စီးနေပါပြီ။
ကိုယ့်ကို ကျေးဇူးပြုခဲ့ဖူးတဲ့ ဒီစားကျက် မြက်ခင်းကလေးကို စွန့်ခွါပြီး ကိုယ်တဦးတည်း အဆင်ပြေစေဖို့ ရေကြည်ရာ မြက်နုရာ နေရာသစ်ကို သွားကြမလား။
မြက်ခင်းကလေးကို ပြန်လည် စိုပြည် လာစေဖို့ ၀ိုင်းဝန်းကြိုးစားကြမလား။
လူအား၊ ငွေအား၊ အကြံဥာဏ်အားနဲ့ တတပ်တအား ကြိုးစားကြမယ်ဆိုရင် …
ကျမတို့ ဘုံစားကျက်မြက်ခင်းကလေးဟာ ….ပြန်လည် လှပ စိမ်းလန်း လာလေမလား … ရယ်လို့ မျှော်လင့်ရင်းသာ ကျမစိတ်ထဲ တွေးနေမိပါတော့တယ်။
***
မေဓာဝီ
8.3.07
7:35pm

(အရင်ရေးထားတဲ့ ပို့စ်က လင့်ခ် ၂ ခု ထပ်ထည့်ပေးထားပါတယ်။)