ပြောင်းလဲသွားသော ရာသီမှာ …

ဒီနေ့ မနက် အိပ်ရာက နောက်ကျမှ နိုးသည်။
အိပ်ခန်း မှန်ပြတင်း ခန်းဆီးကြားမှ နေရောင်ကျဲကျဲ ကို မြင်မှ နောက်ကျ နေပြီ ဟူသော အသိဖြင့် ကမန်းကတန်း ထလိုက်ရ၏။ နာရီကို ကြည့်တော့ ၇ နာရီ ထိုးနေပြီ။

ညက တော်တော်နှင့် အိပ်မပျော် … ။
ရာသီဥတု ပူအိုက်အိုက်မှာ ဖွင့်ထားတဲ့ လေအေးစက် ခပ်စုတ်စုတ် ကလည်း တနေကုန် ပူထားတဲ့ အပူရှိန်ကို အန်မတုနိုင်ပြီလား မသိ။ အားသွန်ခွန်စိုက် အသံတွေမြည်ကာ ခုတ်မောင်း လည်ပတ်တာတောင် အအေးဓာတ်ကို ၀၀လင်လင် မပေးနိုင်ခဲ့။

ပြာလဲ့လဲ့ အလင်းရောင်ပေးသည့် အိပ်ခန်းထဲမှ ညမီးအိမ် ကလေးကလည်း ညကမှ ကျွမ်းသွားသည်။ မီးခလုတ်ကို အဖွင့်မှာ ဖြတ်ကနဲ အလင်းရောင် တချက် ထွက်သွားပြီးနောက် မှောင်ကျသွားသည်။ တန်တော့ မီးသီး ကျွမ်းသွားခြင်းပဲ ဖြစ်မည်။ ဒီလိုနှင့် … ကွန်ပျူတာကို ပိတ်၍ အိပ်ရာဝင်သည့် အချိန်က သန်းခေါင်ကျော်ပြီး ၁ ချက်တီးပင် ရှိနေပြီ။ ခေါင်းအုံးပေါ် ခေါင်းအချမှာ သံချောင်းခေါက်သံ ဒေါင်ကနဲ တချက် ကြားလိုက်ရသေး၏။ အိပ်ရာပေါ်ရောက်သော်လည်း ပိန်းပိတ်အောင် မှောင်နေသည့် အမှောင်ထုထဲတွင် မျက်လုံးတွေက ကြောင်တောင်တောင်။ ကြိုးစား အိပ်သော်လည်း မပျော် … ။

အိပ်မရတဲ့အဆုံး ကွန်ပျူတာ ပြန်ဖွင့်ဖို့ စိတ်ကူးမိသေးသည်။ သို့သော်လည်း မျက်စိအစုံက ခံနိုင်ရည်မရှိတော့။ တနေကုန် ဒီအလင်းရောင်ကို ကြည့်နေရတာ ပင်ပန်းလှပြီ။ ဒါနဲ့ပဲ မျက်စိကိုမှိတ်ပြီး အသက်ရှူသွင်း ရှူထုတ် စိတ်ထဲက လိုက်မှတ်နေမိပြန်၏။ ကြာရင်များ အိပ်ပျော်သွား လေမလား … ။ နှာခေါင်းတွေသာ ထူထူပူပူ ဖြစ်လာသည် အိပ်ချင်စိတ်က မရှိ။ ဒီလိုနဲ့ အတိတ်တွေ ပစ္စုပ္ပန်တွေ အနာဂတ်တွေ …ထွေရာလေးပါး အတွေးများရင်း နောက်ဆုံး ဘယ်လိုက ဘယ်လို အိပ်ပျော်သွားသည် မသိ …။ မိုးလင်းခါမှ နိုးလေတော့သည်။

မနက် ၇ နာရီ နေရောင်က ခါတိုင်းကဲ့သို့ နေခြည်နုနု မဟုတ်။ စူးစူးရှရှ ရှိလှသည်။ ဈေးအသွား လမ်းမှာ တိုက်ကြို တိုက်ကြားက နေရောင် တစွန်းတစ လူကို ထိတာတောင် ပူနေပြီ။
နွေရာသီကို တကယ်ပဲ ရောက်လာခဲ့ပြီပဲ … ။
***
လေကလည်း ရူး ..
နေကလည်း စူး …
သြော် ..နွေကပဲ .. ဦးသွားခဲ့ပြီလား …။

အမူးသမားတယောက်
အိပ်မက်ထဲ လမ်းထလျှောက်သလိုမျိုး
ယိုင်တိယိုင်ထိုးနဲ့
နွေရဲ့ ကန့်လန့်ကာ တချပ်
လှပ်ခဲ့ရပြန်ပေါ့ … ။

တပေါင်းနွေရဲ့ အပူဟာ
ဆောင်းနေနဲ့မှ မတူတာ ..
အပူပြင်းပြင်း .. အပြင်းပူပူ
နှင်းတွေထူတဲ့ မနက်ဖက် ..
ဆောင်းက နှုတ်ဆက်ခဲ့ပြီလား … ။

နှင်းလား မြူလား …
ခွဲခြားရခက်
ဆောင်းနှောင်းနွေ နံနက်ခင်း
ရင်ကို တင်းကျပ်စေခဲ့တယ် … ။

စိုနေတဲ့ နှင်းမျက်ရည်
သစ်ရွက်လေးတွေမှာ ခို ..
အို .. နှင်းရယ် မငိုပါနဲ့ … ။
***
ရန်ကုန် တက္ကသိုလ် ပင်မမှာ ကျောင်းတက်နေစဉ် ကာလတုန်းက ခုလို နွေဦးအ၀င် ရာသီမှာ ရေးခဲ့သော စာတပုဒ်ကို ပြန်သတိရမိ၏။ မနက်စောစော ကျောင်းသို့လာပြီး အတန်းမရှိတာကြောင့် အင်းယား ကန်စပ် တယောက်ထဲ ထိုင်ရင်း ဒီစာလေး ရေးခဲ့မိသည်။ အဲဒီမနက်တုန်းက အင်းယား ကန်ရေပြင် တခုလုံး မြူတွေပိတ်ဆိုင်း နေတာကို ခုထိ အမှတ်ရမိဆဲ။

ရာသီအကူး အပြောင်းလေးတွေတိုင်း စိတ်ထဲက မှတ်မှတ်ရရ အမြဲ ဖြစ်ခဲ့ရသည်။ ရာသီပြောင်းချိန်၏ သဘာဝ ရှုခင်းက ရာသီတွေ ဘယ်နှစ်ခါ ပြောင်းပြောင်း မဟောင်းနိုင် … မနွမ်းနိုင် … မရိုးနိုင်စွာ ခံစားရ စမြဲ။

အခုလည်း …ဆောင်းက မခွဲခွါချင့် ခွါချင်ဖြင့် တဖြည်းဖြည်း ခွဲခွါသွားချိန်မှာ …နွေကလည်း မလာချင့် လာချင် ဖြင့်လားတော့မသိ … တစတစ ချင်းနင်း ၀င်ရောက်ခဲ့ပါပြီ … ။

အပြောင်းအလဲကို စိတ်ထဲက လက်ခံနိုင်သော်ငြား ရုပ်ပိုင်းဆိုင်ရာမှာတော့ ကသိကအောက် ဖြစ်စရာလေးတွေ အနည်းနှင့်အများ ကြုံကြရပေသည်။
ခံနိုင်ရည်မရှိသူများဆိုလျှင် ရာသီအကူးအပြောင်းမှာ များသောအားဖြင့် ကိုယ်လက် မအီမသာ နေထိုင် မကောင်း ဖြစ်တတ်ကြသည် မဟုတ်လား။

ရုတ်တရက် ပြောင်းလဲမှုမျိုးကို ကြုံတဲ့အခါ ခုလို ဖြစ်တတ်တာ သဘာဝပေပဲ … ။
မည်သို့ပင်ဖြစ်စေ … မည်သည့် ပြောင်းလဲမှုမျိုးကို မဆို တကယ်တမ်း ကြုံကြိုက်လာပါက ကိုယ်ရော စိတ်ပါ ခံနိုင်ရည်ရှိစေရန် လေ့ကျင့် မွေးမြူ ထားကြရမည်သာ။
***
မေဓာဝီ
26.2.07
4:15 pm