ဒီနေ့မနက် အိပ်ရာကနိုးနိုးချင်း အိမ်အနောက် တောင်ထောင့်က လက်ထုတ်ပင်ကြီးပေါ်မှာ ချိုးကလေး ကူနေသံကို ကြားရ၏။
ကူ ကူး …
ကူ ကူး … ဆိုတဲ့ ချိုးကူသံလေး နားထောင်ပြီး ဘာကိုမှန်းမသိ လွမ်းသလို ဆွေးသလို …။
ဒီ ချိုးလည်ပြောက်လေးတွေကို ခြံထဲက သစ်ပင်တွေထက်မှာ မကြာခဏ တွေ့ရတတ်သည်။
တခါတလေလည်း တကောင်တည်း … တခါတလေလည်း ဖိုမ စုံတွဲ။ နှစ်ကောင်ယှဉ်တွဲလို့သာ ဖိုမ စုံတွဲ လို့ ဆိုရသည်၊ တကယ်တမ်းတော့ အထီး အမ မခွဲခြားတတ်။
ချိုးကလေးကူသံ နားထောင်ရင်း …
ချိုးနှစ်ကောင်
ထနောင်းပင်ညီနောင်က
လွမ်းအောင်ကူချွဲ၊
ပန်းတော်ဖြူ
ပင်မြက်နေစာ ထူလှတယ်၊
ဖိုးတောင်သူ့တဲ .. ။
………………………ဆိုသည့် ကဗျာလေးကို သတိတရ ရေရွတ်မိသည်။ တကယ်လည်း လွမ်းအောင် ကူချွဲတတ်သည့် ချိုးကလေး ပါပေ။
ဒီ့နောက်မှာတော့ …
ဘယ် ဘယ် ဘယ် ဘယ်ကို ရယ်နှက်
လည်ပင်းအထက် ခေါင်းကိုနှက်လို့ ..
ဘယ် ဘယ် ဘယ် ဘယ်ကိုရယ်ခွဲ
ရင်ကိုခွဲလို့
ရှားမီးခဲတွင် ရဲရဲကင်သည် …
အကျွန်မမြင်ဝံ့ပါသည်တကား ..
ရွှေချိုးဖြူရယ်လေ .. မယ့်လင်သား … ။ ။
ဆိုသည့် ကဗျာ အပိုင်းအစလေးကို အမှတ်ရမိပြန်၏။
ချိုးဖိုကလေးကို ခေါင်းထု ရင်ခွဲပြီး သတ်နေသည့် မြင်ကွင်းကို မြင်လိုက်ရသည့် ချိုးမလေး၏ ရင်ထဲ ဘယ်လိုများ ခံစားရမလဲ ဟု ကရုဏာသက် နေမိပြန်သည်။
နံနက်ခင်း၏ တာဝန် ၀တ္တရားများ ဆက်လက် ဆောင်ရွက် လုပ်ကိုင်နေစဉ်မှာပင် ချိုးကလေးကလည်း ကူလို့ ကောင်းနေတုန်း။
တကူ ကူး ကူ … တကူ ကူး ကူ …
ထူးတင့် သံသာ ..မြူးဝံ့မှန်စွာ
ရွှေချိုးဖြူရယ် ကူတယ်လေး … ကူ ကူ ကူ လို့နေ …
ဆိုသည့် သီချင်းကလည်း ခေါင်းထဲ ရောက်လာပြန်သည်။
ဦးတင်မောင်နှင့် ကြည်ကြည်ဌေး သရုပ်ဆောင်သည့် ဇာတ်ကား ဟုထင်ပါသည်။ နောက် သိန်းဇော်နှင့် မေလွင် လည်း ပါသေးသည်။ ဒီဇာတ်ကားထဲမှာ ချိုးဖြူကလေးတွေနှင့် အတူ သီဆိုသော တကူကူးကူ ရုပ်ရှင်ဇာတ်ဝင်တေး ကလေးကို ငယ်ငယ်ထဲက သဘောကျ နှစ်သက်မိခဲ့သည်။ ချိုးကူသံကလေးများ ကြားရရင်ဖြင့် ဒီသီချင်းလေးကို (စာသားမှန်မမှန်မသိ)ပျော်ပျော်ပါးပါး နှုတ်က ရွတ်ဆိုမိနေကျ။
***
ချိုးငှက် ဆိုသည်က ငြိမ်းချမ်းရေး၏ သင်္ကေတ။
သူ့ ကူသံကလေးကလည်း သာတောင့်သာယာ လွမ်းစရာ။ ချိုးကူသံကလေး နားထောင်မိသည့် အခိုက်အတန့်ကလေးမှာပင် လွမ်းမိဆွေးမိ၊ ကရုဏာသက်မိ၊ နှစ်သက် ကြည်နူး ပြုံးပျော်မိ … ရသမျိုးစုံ တပြိုင်တည်း ခံစား လိုက်ရ၏။
ဆောင်းအနှောင်း နွေအပြောင်း နံနက်ခင်းက အေးအေးညင်းညင်း ရှိလှသည်။
ဒီရာသီနှင့် ဒီနံနက်ခင်းနှင့် ဒီချိုးကူသံကလေးက လိုက်လည်း လိုက်ဖက်ပါဘိ။
***
မေဓာဝီ
22.2.07
12:05 pm
Mingalar bar Ma Maydar wii,
ReplyDeleteI just want to let you know that we can only see squares if we do not install zawgyi-one font in PC. Some public PC are not allowed to install font as we wish. So can you do somthing likes http://mghla.blogspot.com is doing. If you need help, just let me know.
BTW, thank you for sharing excellent post with us.
with metta,
Zaw
ချိုးငှက်ကလေးရေ…
ReplyDeleteတေးသံချိုချိုနဲ့ လောကကို အလှဆင်နိုင်ပါစေ။
လူတွေရဲ့ စိတ်နှလုံးကို ချမ်းမြေ့စေမယ့်
ငြိမ်းချမ်းရေး သံလွင်ခက်ကို ကိုက်ချီလာနိုင်ပါစေ။
ငှက်ဆိုးတွေ နှောက်ယှက်ရင်လဲ စိတ်မပျက်ပါနဲ့။
ငှက်ခတ်သမားတွေက ဖမ်းဆီးမယ့်ရန်ကိုလဲ တွေးမပူပါနဲ့။
တကူကူး… ကူး……………