ကိုယ့်ကံကြမ္မာကို ကိုယ်မဖန်တီးနိုင်ကြသူများ ...

တလောက (ခရစ်စမတ်မတိုင်ခင်) ကျမရဲ့ဆရာတယောက် အိမ်ကိုရောက်လာပါတယ်။
ဆယ်တန်းတုန်းက သင်္ချာပြတဲ့ဆရာပါ။ ဆရာက စာပြတဲ့အပြင် ရန်ကုန်မြို့နဲ့ မလှမ်းမကမ်း ဒေသလေးတွေမှာ စိုက်ပျိုးရေးလုပ်ငန်းလည်း လုပ်ပါတယ်။ သူ လာရင်း ကိစ္စကတော့ ကျမကို အီးမေးလ် ပို့ခိုင်းချင်လို့ပါပဲ။
ဆရာက ၀က်ဘ်ဆိုက် လိပ်စာ ၂ ခု ပြပြီး ကျမနားလည်အောင်ရှင်းပြတယ်။ သူက ထိုင်းနိုင်ငံမှာရှိတဲ့ ကုမ္ပဏီကြီးတခုဆီ လှမ်းပြီး ရွက်ဖြန်းဆေး မှာချင်တာပါ။

“ပိုးသတ်ဆေးလား ဆရာ”
“အဲဒီဆေးက ပိုးသတ်ဆေး မဟုတ်ဖူး .. သမီးရဲ့၊ ပိုးကောင်တွေ မကြိုက်တဲ့ အနံ့ထည့်ထားတော့ ပိုးမကပ်နိုင်တာ၊ ပိုးသေတာမဟုတ်ဖူး၊ လူကိုလည်း ဘေးဥပဒ်မဖြစ်စေဘူး၊ တောင်သူလယ်သမားတွေ တအားအသုံးတည့်တယ်၊ ဈေးကလည်း သင့်တင့်တယ်ဆိုတော့ သူတို့သိပ်ကြိုက်ကြတယ်၊ အရင်ကအမြဲသွင်းနေတဲ့ အမျိုးသမီးက အခု အဲဒီပစ္စည်းမသွင်းတော့လို့ …”

ဆရာ့ကိုကူညီပေးပါမယ်လို့ ကတိပေးပြီး တခြား အာလာပသလ္လာပ စကားတွေဆက်ပြောဖြစ်ကြရင်းနဲ့ … ဆရာ့ စိုက်ပျိုးရေး လုပ်ငန်းရော အဆင်ပြေလား မေးမိတယ်၊ မိုးတွင်းတုန်းက ရေကြီးလို့ ဆရာ့ကွမ်းပင်တွေ ဂျင်းပင်တွေ တော်တော် ဆုံးရှုံးသွားတယ်ဆိုလို့ပါ။
ဆရာကသူ့လုပ်ငန်းအခြေအနေထက် တောင်သူလယ်သမားတွေ အလုပ်သမားတွေ ဒုက္ခရောက်တဲ့အကြောင်း ကျမကို ခုလိုပြောပြပါတယ်။

“ဈေးတွေက အစစအရာရာကြီးတော့ သူတို့တွေ သိပ်ဒုက္ခရောက်တာပဲ၊ သူတို့စားတဲ့ဆန်ဆိုတာ သမီးမြင်ရင် အံ့သြသွားမယ်၊ ထမင်းချက်ပြီးသားကို ဖွင့်ကြည့်လိုက်ရင်တောင် နီရဲနေတာပဲ။ ဒီလိုဆန်မျိုးကို အဲဒီမှာတင် ဈေးကြီးပေးပြီး ၀ယ်စားရတာ …”

“တပြည် ဘယ်လောက်မို့လဲ ဆရာ”

“သမီး ဒီမှာဆို အခွန်လွတ်ဈေးတို့ဘာတို့မှာ သွားဝယ်ရင် တပြည် ၄၅၀ - ၅၀၀လောက် ရဦးမယ်၊ ဟိုမှာ တပြည် ၆၀၀-၆၅၀ နဲ့ ၀ယ်စားရတာကို ဆန်ဖြူမရဘူး၊ ဒါတောင် စပါးစိုက်တဲ့ နေရာနော်”

“ဟင် ဟုတ်လား …. သူတို့ ၀မ်းစာစပါးတွေ ချန်မထားဘူးလား”

“၀မ်းစာဆိုတာ ကြိုတင်ယူပြီးစားနှင့်လို့ ကုန်ပြီလေ၊ ကောက်သစ်ပေါ်ချိန်ဆို အလုပ်တွေတအားများတော့ လယ်ပိုင်ရှင်တွေက အလုပ်သမားတွေကို ကြိုတင်ပေးပြီးခေါ်ရတယ်၊ စပါးဆို စပါး၊ ပိုက်ဆံဆို ပိုက်ဆံကြိုပေးပြီးတော့ ပေါ့၊ အဲဒါတွေရတာနဲ့ သူတို့က ကြိုသုံးလိုက်ရော၊ နောက်ပိုင်းကျ ပြန်ဝယ်စားကြ ရတယ်လေ… ဒီလိုနဲ့ပဲ လုံးလည်လိုက်နေကြရတာ”

“……….”

“ပြီးတော့ အဲဒီလို ဆန်နီကြမ်း ထမင်းကို ဘာနဲ့စားရတယ်မှတ်လဲ၊ ငပိရည်တမျိုးထဲနဲ့နော်၊ ဟင်းမပါဘူး၊ တို့စရာဆိုတာကတော့ အလေ့ကျပေါက်တဲ့ အရွက်လေး ဘာလေး ခူးပြီး တို့လို့ရတယ်လေ၊ အဲဒီ ငပိရည်ကိုလည်း ငရုတ်သီးမှုန့်တောင် မထည့်နိုင်ဘူး၊ ငပိရည်ကျဲ ပလိန်းသက်သက် နဲ့ ထမင်းနဲ့ စားရတာ …ပြီးတော့ သမီးကိုပြောရင် ရယ်စရာပြောတယ်ထင်အုံးမယ် … ရယ်စရာမဟုတ်ဖူး တကယ် … တခါတလေ ဆရာက ကိုယ့်အလုပ်သမားတွေအတွက် ငရုတ်သီးမှုန့်ဝယ်သွားရင် ဒီကောင်တွေ သံသေတ္တာထဲ သော့ခတ် သိမ်းထားတာကွ”

“အယ် … ငရုတ်သီးမှုန့်ကို သော့ခတ်သိမ်းတယ် ….”

“ဟုတ်ပ … သမီးရေ … စားချင်တော့မှ အသာလေး ခွက်လေးနဲ့ နဲနဲ ခွဲယူပြီး ထည့်စားရတာ … အဲဒီလို ငပိရည်ထဲ ငရုတ်သီးမှုန့်ထည့်စားနိုင်တဲ့သူက သူဌေးပဲ”

“ဟင်း …. ဒုက္ခပါပဲနော် …”

“ပြီးတော့ ဒီကောင်တွေက အရိုးစွဲနေတဲ့ အကျင့်တခုကို ဖျောက်ပေးဖို့ တော်တော်ခက်တယ်ကွ၊ ပညာမတတ်တာလဲ ပါတယ်၊ ၂ တန်း ၃ တန်း တက်ဖူးတဲ့သူက သူတို့ထဲမှာ ဆရာကြီးပဲ၊ ဘုန်းကြီးကျောင်းမှာ သေစာ ရှင်စာ ရေးတတ်တဲ့သူဆိုလဲ ဆရာကြီးပဲ … များသောအားဖြင့် ကျောင်းမနေဖူးတဲ့သူတွေချည်းပဲ … အဲဒီတော့ သူတို့အတွေးတွေ အမြင်တွေက တမျိုးတွေဖြစ်နေတာပေါ့ကွာ … သွားပြောလို့လဲ တော်ရုံတန်ရုံ လက်မခံကြဘူး၊ ဆရာ ဆိုရင် နားဝင်အောင် ပြောတတ်ပါတယ်၊ ဒါပေမဲ့ ပြောလွန်းလို့ ဆရာလဲ အာပေါက်ရုံပဲ … သူတို့ သိပ် လက်မခံချင်ဘူး၊ ဒါကြောင့် … အခု ဒီရွက်ဖြန်းဆေးကို သူတို့အရမ်းလိုအပ်နေလို့ သူတို့အတွက် မှာပေးရတာ၊ ကိုယ်က သူတို့လိုအပ်တာလေး တခုခု လုပ်ပေးလိုက်လို့ အဆင်ပြေသွားပြီဆိုတော့မှ သူတို့ကိုယ့်စကား နားထောင် လက်ခံကြမှာလေ”

ဆရာစိုက်ပျိုးရေးလုပ်တဲ့နေရာက တွံတေးမြို့နယ်မှာပါ၊ ရန်ကုန်နဲ့သိပ်မဝေးတဲ့ အဲဒီလိုနေရာမျိုးမှာတောင် လူနေမှုအဆင့်အတန်း ပညာရေးအဆင့်အတန်းက နိမ့်ကျလွန်းနေတော့ ဒီထက်ဒီ အစွန်အဖျား ဝေးလံ သီခေါင်တဲ့ အရပ်ဒေသတွေမှာဆို ဘယ်လိုနေရှာပါလိမ့်လို့ ခပ်ဆိတ်ဆိတ်နေရင်းက တွေးနေမိပါတယ်။

ဆရာပြန်သွားတော့ ပေးသွားတဲ့ ၀က်ဘ်ဆိုက်လိပ်စာ အတိုင်း အင်တာနက်မှာ ရှာပေးခဲ့တယ်။ ဆရာပြောတဲ့ ၀က်ဘ်ဆိုက်ကလည်း မှားနေပါတယ်၊ လိပ်စာပဲပြောင်းသွားလို့လားမသိ၊ နောက်ဆုံး ကြိုးစားရှာဖွေရင်းနဲ့ အဲဒီကုမ္ပဏီနဲ့ အီးမေးလ် အချိတ်အဆက်ရ သွားပါတယ်။ လိုအပ်တဲ့ ပစ္စည်းတွေကို သူတို့တင်သွင်းပေးမှာ ဖြစ်ကြောင်း မြန်မာပြည်မှာ ဘယ်သူနဲ့ ဆက်သွယ်နိုင်ကြောင်း ပြန်အကြောင်းကြားလာပါတယ်။ မနေ့က ဆရာ့ကိုတွေ့လို့မေးကြည့်တော့ ဆရာက အဆင်ပြေသွားပြီ ပစ္စည်းတွေရောက်နေပြီလို့ ၀မ်းသာအားရပြောတယ်။

ဆရာနဲ့ထပ်တူ ၀မ်းသာပေမဲ့လို့ မြန်မာပြည်က တောင်သူလယ်သမားတွေရဲ့ဘ၀ဟာ ဘယ်တော့များမှ မြင့်မားလာမလဲဆိုတာ ကျမ ဇဝေဇ၀ါနဲ့တွေးနေမိပါတယ်။ ဆရာကြီးမောင်ထင် ရေးတဲ့ “ငဘ” ၀တ္ထုရဲ့ အဖွင့်စာမျက်နှာမှာ “ကိုယ့်ကြမ္မာကိုယ် မဖန်တီးနိုင်ကြရှာသော ဗမာပြည်မှ ငဘ များသို့” .. လို့ ရည်ညွှန်း ရေးသားထားတာ မှတ်မှတ်ရရ ဖတ်ခဲ့ဖူးပါတယ်။

အင်္ဂလိပ်ခေတ်၊ ဂျပန်ခေတ်၊ ဖဆပလခေတ်၊ တော်လှန်ရေးကောင်စီခေတ် ကနေ ..ခေတ်တွေအမျိုးမျိုးပြောင်းလို့ အခုခေတ်ထိ …တောင်သူလယ်သမားတွေရဲ့ဘ၀ဟာ ကိုယ့်ကြမ္မာကိုယ် မဖန်တီးနိုင်ခဲ့ကြပါဘူး။ တိုးတက်လာဖို့ နေနေသာသာ တဖြည်းဖြည်း ပိုပိုပြီးသာ ဆုတ်ယုတ် နိမ့်ကျနေကြပါပြီ။
ဒီလိုနဲ့ပဲ ရှင်သန်နေထိုင်ရင်း တင်းတိမ်ရောင့်ရဲရင်း အဘိုးခေတ်ထက် အဖေခေတ်ကနိမ့်ကျ အဖေခေတ်ထက် သားခေတ်က နိမ့်ကျရင်းနဲ့ … အ၀ီစိထဲ ရောက်တော့မယ် … နောက်ထပ်ဘယ်လောက်ထိများ ဆက်လက် နိမ့်ကျနေကြအုံးမှာလဲ လို့ စိတ်ပျက်လက်ပျက် တွေးမိပါတော့တယ်။
***
17.1.07
4:04 pm